ਦਿਵਿਆ ਜਯੋਤੀ ਜਾਗ੍ਰਿਤੀ ਸੰਸਥਾਨ ਨੇ ਸਜਾਈ ਦੂਸਰੀ ‘ਸੰਧਿਆ ਫੇਰੀ’

ਪੰਜਾਬੀ ਜਾਗਰਣ ਰਿਪੋਰਟਰ, ਸ੍ਰੀ ਮੁਕਤਸਰ ਸਾਹਿਬ : ਦਿਵਿਆ ਜਯੋਤੀ ਜਾਗ੍ਰਿਤੀ ਸੰਸਥਾਨ ਵੱਲੋਂ ਕਰਵਾਈ ਜਾ ਰਹੀ ‘ਸ੍ਰੀ ਕ੍ਰਿਸ਼ਨ ਕਥਾ’ ਦੇ ਪ੍ਰਚਾਰ ਅਤੇ ਪਾਸਾਰ ਦੇ ਸਿਲਸਿਲੇ ’ਚ ਸ਼ਹਿਰ ਅੰਦਰ ਦੂਸਰੀ ‘ਸੰਧਿਆ ਫੇਰੀ’ ਬੜੀ ਸ਼ਰਧਾ ਅਤੇ ਉਤਸ਼ਾਹ ਨਾਲ ਕੱਢੀ ਗਈ। ਇਸ ਸੰਧਿਆ ਫੇਰੀ ਦੀ ਸ਼ੁਰੂਆਤ ਸਥਾਨਕ ਭਗਵਾਨ ਸ਼ਿਵ ਮੰਦਿਰ ਤੋਂ ਹੋਈ, ਜਿੱਥੇ ਮੰਦਿਰ ਦੇ ਮੁਖੀ ਵੱਲੋਂ ਭਗਵਾਨ ਦੀ ਵਿਸ਼ੇਸ਼ ਪੂਜਾ-ਅਰਚਨਾ ਕਰਨ ਅਤੇ ਨਾਰੀਅਲ ਤੋੜਨ ਦੀ ਰਸਮ ਨਿਭਾ ਕੇ ਫੇਰੀ ਨੂੰ ਰਵਾਨਾ ਕੀਤਾ ਗਿਆ। ਇਸ ਸ਼ੁਭ ਮੌਕੇ ਵੱਡੀ ਗਿਣਤੀ ’ਚ ਹਾਜ਼ਰ ਸ਼ਰਧਾਲੂਆਂ ਨੇ ਪ੍ਰਭੂ ਦੀ ਮਹਿਮਾ ਦਾ ਗਾਇਨ ਕੀਤਾ। ਇਸ ਮੌਕੇ ਸੰਸਥਾਨ ਦੀ ਸੇਵਿਕਾ ਸਾਧਵੀ ਸੁਨੀਤਾ ਭਾਰਤੀ ਨੇ ਦੱਸਿਆ ਕਿ ਸੰਧਿਆ ਫੇਰੀਆਂ ’ਚ ਸ਼ਹਿਰ ਦੀਆਂ ਵੱਖ-ਵੱਖ ਸਮਾਜਿਕ ਅਤੇ ਧਾਰਮਿਕ ਸੰਸਥਾਵਾਂ ਨੇ ਵਧ-ਚੜ੍ਹ ਕੇ ਹਿੱਸਾ ਲਿਆ ਹੈ। ਉਨ੍ਹਾਂ ਕਿਹਾ ਕਿ ਅੱਜ ਦੇ ਸਮਾਜ ਨੂੰ ਅਜਿਹੇ ਪ੍ਰੋਗਰਾਮਾਂ ਦੀ ਸਖ਼ਤ ਜ਼ਰੂਰਤ ਹੈ ਤਾਂ ਜੋ ਮਨੁੱਖ ਨੂੰ ਸਹੀ ਮਾਰਗ ਮਿਲ ਸਕੇ। ਸਾਧਵੀ ਨੇ ਅਫ਼ਸੋਸ ਪ੍ਰਗਟ ਕਰਦਿਆਂ ਕਿਹਾ ਕਿ ਅੱਜ-ਕੱਲ੍ਹ ਭਗਵਾਨ ਦੀਆਂ ਲੀਲਾਵਾਂ ਦੇ ਮੰਚਨ ਨੂੰ ਸਿਰਫ਼ ਮਨੋਰੰਜਨ ਦਾ ਸਾਧਨ ਬਣਾ ਦਿੱਤਾ ਗਿਆ ਹੈ, ਜਦਕਿ ਭਗਵਾਨ ਨੇ ਜਦੋਂ ਵੀ ਇਸ ਧਰਤੀ ’ਤੇ ਅਵਤਾਰ ਲਿਆ, ਆਪਣੀਆਂ ਲੀਲਾਵਾਂ ਰਾਹੀਂ ਮਾਨਵਤਾ ਨੂੰ ਗੂੜ੍ਹ ਅਧਿਆਤਮਿਕ ਸੰਦੇਸ਼ ਦਿੱਤੇ। ਉਨ੍ਹਾਂ ਅੱਗੇ ਕਿਹਾ ਕਿ ਭਗਵਾਨ ਸ੍ਰੀ ਕ੍ਰਿਸ਼ਨ ਨੂੰ ਧੇਨੂ ਚਰਈਆ, ਬੰਸੀ ਬਜਈਆ, ਨਟਵਰ ਨਾਗਰ, ਗਿਰਧਾਰੀ, ਮੱਖਣ ਚੋਰ, ਮਟਕੀ ਫੋੜ, ਨੰਦ ਨੰਦਨ ਅਤੇ ਕਾਨ੍ਹਾ ਵਰਗੇ ਅਨੇਕਾਂ ਨਾਮਾਂ ਨਾਲ ਜਾਣਿਆ ਜਾਂਦਾ ਹੈ ਅਤੇ ਉਨ੍ਹਾਂ ਦੇ ਹਰੇਕ ਨਾਮ ਅਤੇ ਲੀਲਾ ਪਿੱਛੇ ਡੂੰਘੇ ਅਧਿਆਤਮਿਕ ਭੇਦ ਛੁਪੇ ਹੋਏ ਹਨ। ਸਾਧਵੀ ਸੁਨੀਤਾ ਭਾਰਤੀ ਨੇ ਦੱਸਿਆ ਕਿ ਇਨ੍ਹਾਂ ਅਲੌਕਿਕ ਅਤੇ ਅਧਿਆਤਮਿਕ ਭੇਦਾਂ ਨੂੰ ਉਜਾਗਰ ਕਰਨ ਲਈ ਸੰਸਥਾਨ ਦੇ ਸੰਸਥਾਪਕ ਆਸ਼ੂਤੋਸ਼ ਮਹਾਰਾਜ ਦੀ ਸੇਵਿਕਾ ਅਤੇ ਕਥਾ ਵਿਆਸ ਸਾਧਵੀ ਸੋਮਿਆ ਭਾਰਤੀ ਜੀ ਆਪਣੀ ਪੂਰੀ ਟੀਮ ਸਮੇਤ ਆਗਾਮੀ 30 ਅਗਸਤ ਤੋਂ 3 ਸਤੰਬਰ ਤੱਕ ਸ੍ਰੀ ਮੁਕਤਸਰ ਸਾਹਿਬ ਵਿਖੇ ਸ੍ਰੀ ਕ੍ਰਿਸ਼ਨ ਕਥਾ ਕਰਨ ਲਈ ਪਹੁੰਚ ਰਹੇ ਹਨ। ਅੱਜ ਦੀ ਸੰਧਿਆ ਫੇਰੀ ’ਚ ਸ਼ਰਧਾਲੂਆਂ ਦੀ ਗਿਣਤੀ ਪਹਿਲਾਂ ਨਾਲੋਂ ਕਈ ਗੁਣਾ ਜ਼ਿਆਦਾ ਦੇਖਣ ਨੂੰ ਮਿਲੀ। ਪੀਲੇ ਰੰਗ ਦੇ ਬਸਤਰ ਪਹਿਨੀ, ਹੱਥਾਂ ’ਚ ਪ੍ਰਭੂ ਦੀਆਂ ਛਵੀਆਂ ਅਤੇ ਝੰਡੇ ਲਏ ਸ਼ਰਧਾਲੂ ‘‘ਬਾਂਕੇ ਬਿਹਾਰੀ’’ ਅਤੇ ‘‘ਰਾਧਾ ਸਰਕਾਰ’’ ਦੇ ਭਜਨ ਗਾਉਂਦੇ ਹੋਏ ਅੱਗੇ ਵਧ ਰਹੇ ਸਨ। ਸ਼ਹਿਰ ਦੇ ਨਿਵਾਸੀਆਂ ਵੱਲੋਂ ਵੱਖ-ਵੱਖ ਥਾਵਾਂ ਤੇ ਸੰਧਿਆ ਫੇਰੀ ਦਾ ਬਹੁਤ ਹੀ ਨਿੱਘਾ ਅਤੇ ਉਤਸ਼ਾਹਪੂਰਵਕ ਸਵਾਗਤ ਕੀਤਾ ਗਿਆ। ਭਜਨ ਸੰਕੀਰਤਨ ਕਰਦੇ ਹੋਏ ਸਾਰੇ ਸ਼ਰਧਾਲੂ ਵਾਪਸ ਮੰਦਿਰ ਕੰਪਲੈਕਸ ਵਿਖੇ ਪਹੁੰਚੇ। ਇਸ ਅਧਿਆਤਮਿਕ ਮਾਰਚ ਦੌਰਾਨ ਸੰਸਥਾਨ ਵੱਲੋਂ ਸਵਾਮੀ ਸੁਖਦੇਵਾਨੰਦ, ਸਾਧਵੀ ਸੁਨੀਤਾ ਭਾਰਤੀ, ਸਾਧਵੀ ਦੀਪਿਕਾ ਭਾਰਤੀ, ਸਾਧਵੀ ਮਨਦੀਪ ਭਾਰਤੀ ਅਤੇ ਸਾਧਵੀ ਕਿਰਨ ਭਾਰਤੀ ਵਿਸ਼ੇਸ਼ ਤੌਰ ’ਤੇ ਹਾਜ਼ਰ ਰਹੇ। ਸੰਧਿਆ ਫੇਰੀ ਦਾ ਸਮਾਪਨ ਭਗਵਾਨ ਦੀ ਪਾਵਨ ਆਰਤੀ ਅਤੇ ਪ੍ਰਸਾਦ ਵੰਡਣ ਨਾਲ ਬੜੀ ਸ਼ਰਧਾਪੂਰਵਕ ਤਰੀਕੇ ਨਾਲ ਹੋਇਆ।