ਵਿਧਾਨ ਸਭਾ 'ਚ ਗੂੰਜਿਆ ਵਿਦਿਆਰਥੀਆਂ ਦਾ ਭਵਿੱਖ : ਵਿਧਾਇਕ ਰੰਧਾਵਾ ਨੇ ਸਕੂਲਾਂ ਦੀ ਅੱਪਗਰੇਡੇਸ਼ਨ ਦਾ ਮੁੱਦਾ ਜ਼ੋਰ-ਸ਼ੋਰ ਨਾਲ ਚੁੱਕਿਆ

ਸ਼੍ਰੀ ਰੰਧਾਵਾ ਨੇ ਦੱਸਿਆ ਕਿ ਮਕੰਦਪੁਰ ਦੇ ਸਰਕਾਰੀ ਹਾਈ ਸਕੂਲ ਵਿਚ ਕਰੀਬ 800 ਵਿਦਿਆਰਥੀ ਪੜ੍ਹ ਰਹੇ ਹਨ। ਨੇੜਲੇ ਮੀਆਂਪੁਰ, ਬਿੱਜਨਪੁਰ, ਖੇੜੀ ਗੁਜਰਾਂ, ਦੰਦਰਾਲਾ ਅਤੇ ਤੋਗਾਪੁਰ ਦੇ ਬੱਚਿਆਂ ਨੂੰ ਦਸਵੀਂ ਤੋਂ ਬਾਅਦ ਸੀਨੀਅਰ ਸੈਕੰਡਰੀ ਸਿੱਖਿਆ ਲਈ ਕਰੀਬ 7 ਕਿਲੋਮੀਟਰ ਦੂਰ ਡੇਰਾਬੱਸੀ ਜਾਣਾ ਪੈਂਦਾ ਹੈ। ਉਨ੍ਹਾਂ ਦੱਸਿਆ ਕਿ ਧਰਮਗੜ੍ਹ ਹਾਈ ਸਕੂਲ ਵਿਚ ਬੱਲੋਪੁਰ, ਤੋਫਾਪੁਰ, ਜਸਤਾਨਾ ਕਲਾਂ ਅਤੇ ਜਸਤਾਨਾ ਖੁਰਦ ਦੇ ਲਗਭਗ 150 ਤੋਂ 400 ਵਿਦਿਆਰਥੀ ਪੜ੍ਹਦੇ ਹਨ। ਇਨ੍ਹਾਂ ਵਿਦਿਆਰਥੀਆਂ ਨੂੰ ਅੱਗੇ ਦੀ ਪੜ੍ਹਾਈ ਲਈ ਕਰੀਬ 6 ਕਿਲੋਮੀਟਰ ਦੂਰ ਲਾਲੜੂ ਜਾਣਾ ਪੈਂਦਾ ਹੈ, ਜਿੱਥੇ ਸਕੂਲ ਪਹਿਲਾਂ ਹੀ ਦੋ ਸ਼ਿਫਟਾਂ ਵਿਚ ਚੱਲ ਰਿਹਾ ਹੈ। ਇਸੇ ਤਰ੍ਹਾਂ ਬਲਟਾਣਾ ਹਾਈ ਸਕੂਲ ਦੇ ਕਰੀਬ 450 ਵਿਦਿਆਰਥੀਆਂ ਨੂੰ ਦਸਵੀਂ ਤੋਂ ਬਾਅਦ 8 ਕਿਲੋਮੀਟਰ ਦੂਰ ਲੋਹਗੜ੍ਹ, ਦਿਆਲਪੁਰਾ ਜਾਂ ਭਬਾਤ ਜਾਣਾ ਪੈਂਦਾ ਹੈ। ਸਿੱਖਿਆ ਮੰਤਰੀ ਨੇ ਜ਼ਿਲ੍ਹਾ ਸਿੱਖਿਆ ਅਫ਼ਸਰ (ਡੀਈਓ), ਮੁਹਾਲੀ ਨੂੰ ਸਥਾਨਕ ਵਿਧਾਇਕ ਨਾਲ ਤਾਲਮੇਲ ਕਰਕੇ ਸਬੰਧਤ ਸਕੂਲਾਂ ਦੀ ਜ਼ਮੀਨ ਦੀ ਜਾਂਚ ਕਰਨ ਦੇ ਨਿਰਦੇਸ਼ ਦਿੱਤੇ। ਉਨ੍ਹਾਂ ਕਿਹਾ ਕਿ ਲੋੜੀਂਦੀ ਜ਼ਮੀਨ ਉਪਲਬਧ ਹੋਣ ਦੀ ਸੂਰਤ ਵਿਚ ਸਕੂਲਾਂ ਦੀ ਅੱਪਗਰੇਡੇਸ਼ਨ ਦੀ ਪ੍ਰਕਿਰਿਆ ਨੂੰ ਅੱਗੇ ਵਧਾਇਆ ਜਾਵੇਗਾ।