ਜ਼ਰਾ ਜਿੰਨੀ ਗੱਲ ਨੇ ਮਚਾਇਆ ਤਹਿਲਕਾ! ਮਾਮੂਲੀ ਬਹਿਸ ਤੋਂ ਬਾਅਦ ਪ੍ਰਾਪਰਟੀ ਡੀਲਰ 'ਤੇ ਜਾਨਲੇਵਾ ਹਮਲਾ, ਦੋ ਖ਼ਿਲਾਫ਼ ਪਰਚਾ ਦਰਜ

ਜਾਂਚ ਅਧਿਕਾਰੀ ਏਐੱਸਆਈ ਬਲਬੀਰ ਸਿੰਘ ਨੇ ਦੱਸਿਆ ਕਿ ਪੁਲਿਸ ਨੂੰ ਦਿੱਤੇ ਬਿਆਨਾਂ 'ਚ ਰਣਜੀਤ ਰਾਣਾ ਨੇ ਦੱਸਿਆ ਕਿ 15 ਅਗਸਤ ਨੂੰ ਉਹ ਆਪਣੀ ਬੇਟੀ ਨਵਜੋਤ ਕੌਰ ਨਾਲ ਕਾਰ 'ਚ ਘਰ ਜਾ ਰਿਹਾ ਸੀ। ਉਸ ਦੀ ਬੇਟੀ ਕਾਰ ਚਲਾ ਰਹੀ ਸੀ। ਜਗਤਪੁਰਾ ਵਿਖੇ ਰਸਤੇ 'ਚ ਇਕ ਪਾਸੇ ਆਟੋ ਅਤੇ ਦੂਜੇ ਪਾਸੇ ਹੋਰ ਵਾਹਨ ਖੜ੍ਹੇ ਸਨ। ਜਦੋਂ ਰਣਜੀਤ ਰਾਣਾ ਨੇ ਇਕ ਚਾਲਕ ਨੂੰ ਆਟੋ ਪਾਸੇ ਕਰਨ ਲਈ ਕਿਹਾ ਤਾਂ ਉਨ੍ਹਾਂ ਵਿਚਕਾਰ ਬਹਿਸ ਹੋ ਗਈ। ਦੋਸ਼ ਹੈ ਕਿ ਆਟੋ ਚਾਲਕ ਨੇ ਉਸ ਨਾਲ ਗਾਲੀ-ਗਲੋਚ ਅਤੇ ਧੱਕਾ-ਮੁੱਕੀ ਕੀਤੀ। ਇਸੇ ਦੌਰਾਨ ਮੌਕੇ 'ਤੇ ਪੁੱਜੀ ਪੀਜੀ ਸੰਚਾਲਕ 'ਤੇ ਵੀ ਰਣਜੀਤ ਰਾਣਾ ਨੇ ਆਪਣੀ ਬੇਟੀ ਨਾਲ ਹੱਥੋਪਾਈ ਕਰਨ ਦੇ ਦੋਸ਼ ਲਾਏ ਹਨ। ਬਾਅਦ 'ਚ ਗੱਡੀ ਹਟਾਉਣ 'ਤੇ ਉਹ ਆਪਣੀ ਬੇਟੀ ਨਾਲ ਘਰ ਚਲਾ ਗਿਆ।