Punjab News : ਫ਼ਲੈਟ ਵੇਚਣ ਦੇ ਨਾਂ 'ਤੇ 83.75 ਲੱਖ ਦੀ ਠੱਗੀ, ਪਿਓ ਤੇ 2 ਪੁੱਤਰਾਂ 'ਤੇ ਪਰਚਾ ਦਰਜ

ਐੱਸਐੱਸਪੀ ਮੁਹਾਲੀ ਨੂੰ ਦਿੱਤੀ ਸ਼ਿਕਾਇਤ ਵਿਚ ਮੋਤੀਆ ਬਲੂ ਰਿਜ-2, ਪੀਰਮੁਛੱਲਾ ਦੀ ਰਹਿਣ ਵਾਲੀ ਅਨੀਤਾ ਸ਼ਰਮਾ ਨੇ ਦੱਸਿਆ ਕਿ ਅਗਸਤ 2020 ਵਿਚ ਉਸ ਦੇ ਪਤੀ ਅਸ਼ੋਕ ਕੁਮਾਰ ਦੀ ਮੌਤ ਹੋ ਗਈ ਸੀ। ਇਸ ਤੋਂ ਬਾਅਦ ਉਹ ਆਪਣੇ ਬੇਟੇ ਮੁਨੀਸ਼ ਸ਼ਰਮਾ ਨਾਲ ਰਹਿ ਰਹੀ ਸੀ। ਮਈ 2024 ਵਿਚ ਇਕ ਜਾਣਕਾਰ ਰਾਹੀਂ ਉਸ ਦੀ ਮੁਲਾਕਾਤ ਅਰੁਣ ਪੰਗੋਤਰਾ ਨਾਲ ਹੋਈ, ਜਿਸ ਨੇ ਖ਼ੁਦ ਨੂੰ ਇਕ ਇੰਸਟੀਚਿਊਟ ਦਾ ਮਾਲਕ ਅਤੇ ਪ੍ਰਾਪਰਟੀ ਡੀਲਰ ਦੱਸਿਆ। ਅਰੁਣ ਨੇ ਉਸ ਨੂੰ ਬਲੂ ਰਿਜ-2 ਵਿਚ ਦੋ ਅਧੂਰੇ ਫ਼ਲੈਟ (ਨੰ. 114 ਸੀ ਅਤੇ 115 ਸੀ) ਦਿਖਾ ਕੇ ਖ਼ੁਦ ਨੂੰ ਉਨ੍ਹਾਂ ਦਾ ਮਾਲਕ ਦੱਸਿਆ। ਦੋਵਾਂ ਫ਼ਲੈਟਾਂ ਦਾ ਸੌਦਾ 85 ਲੱਖ ਰੁਪਏ ਵਿਚ ਤੈਅ ਹੋਇਆ। ਪੀੜਤ ਔਰਤ ਅਨੁਸਾਰ ਉਸ ਨੇ ਖਰੜ ਸਥਿਤ ਆਪਣਾ ਮਕਾਨ ਅਤੇ ਸੋਨੇ ਦੇ ਗਹਿਣੇ ਵੇਚ ਕੇ ਪੈਸੇ ਇਕੱਠੇ ਕੀਤੇ ਅਤੇ ਗੂਗਲ ਪੇ, ਆਰਟੀਜੀਐੱਸ ਅਤੇ ਨਕਦ ਜ਼ਰੀਏ ਕੁੱਲ 83,75,000 ਰੁਪਏ ਅਰੁਣ, ਉਸ ਦੇ ਦੋਵਾਂ ਪੁੱਤਰਾਂ ਅਤੇ ਉਸ ਦੇ ਅਨੰਤ ਇੰਸਟੀਚਿਊਟ ਦੇ ਖ਼ਾਤੇ ਵਿਚ ਟਰਾਂਸਫਰ ਕਰ ਦਿੱਤੇ।