ਰੁੱਖਾਂ ਦੀਆਂ ਦੁਰਲੱਭ ਪ੍ਰਜਾਤੀਆਂ ਦੀ ਹੋਵੇਗੀ ਸੰਭਾਲ : ਗ੍ਰੀਨ ਪਲੈਨੈਟ ਸੁਸਾਇਟੀ ਤੇ ਪੰਜਾਬ ਜੈਵ ਵਿਭਿੰਨਤਾ ਬੋਰਡ ਵੱਲੋਂ ਬਣਾਈ ਜਾਵੇਗੀ 'ਐਕਸ-ਸਿਟੂ ਕੰਜ਼ਰਵੇਸ਼ਨ ਰਿਪੋਜ਼ਟਰੀ'

ਗਰੀਨ ਪਲੈਨੈਟ ਸੁਸਾਇਟੀ ਦੇ ਪ੍ਰਧਾਨ ਸੁਮਿਤ ਭਾਰਦਵਾਜ ਨੇ ਦੱਸਿਆ ਕਿ ਗਾਜ਼ੀਪੁਰ ਅਰਬਨ ਫਾਰੈਸਟ ਦੇ ਲਗਭਗ 25 ਏਕੜ ਖੇਤਰ ਵਿਚ ਹੁਣ ਤੱਕ 25,000 ਦੇ ਲਗਭਗ ਪੌਦੇ ਲਗਾ ਕੇ ਇਸ ਨੂੰ ਸੰਘਣੇ ਸ਼ਹਿਰੀ ਜੰਗਲ ਵਿਚ ਬਦਲਿਆ ਜਾ ਚੁੱਕਾ ਹੈ। ਉਨ੍ਹਾਂ ਦੱਸਿਆ ਕਿ ਸੁਸਾਇਟੀ ਦਾ ਲੰਮੇ ਸਮੇਂ ਦਾ ਟੀਚਾ ਸਾਲ 2031 ਤੱਕ ਇਸ ਪੂਰੇ 112 ਏਕੜ ਖੇਤਰ ਨੂੰ ਇਕ ਵਿਸ਼ਾਲ ਸ਼ਹਿਰੀ ਵਨ ਅਤੇ ਜੈਵ ਵਿਭਿੰਨਤਾ ਲੈਂਡਸਕੇਪ ਵਜੋਂ ਵਿਕਸਿਤ ਕਰਨਾ ਹੈ। ਉਨ੍ਹਾਂ ਕਿਹਾ ਕਿ ਕੁਦਰਤ ਦੀ ਸੰਭਾਲ ਕੇਵਲ ਪੌਦੇ ਲਗਾਉਣ ਤੱਕ ਸੀਮਤ ਨਹੀਂ ਹੈ, ਸਗੋਂ ਪ੍ਰਜਾਤੀਆਂ ਦੀ ਰੱਖਿਆ ਕਰਨਾ, ਪਾਰਿਸਥਿਤਿਕ ਗਿਆਨ ਨੂੰ ਸੰਭਾਲਣਾ ਅਤੇ ਆਉਣ ਵਾਲੀਆਂ ਪੀੜ੍ਹੀਆਂ ਨੂੰ ਕੁਦਰਤ ਨਾਲ ਜੋੜਨਾ ਇਸ ਦਾ ਮੁੱਖ ਮਨੋਰਥ ਹੈ। ਇਸ ਪ੍ਰੋਜੈਕਟ ਵਿਚ ਸਰਕਾਰੀ ਵਿਭਾਗਾਂ, ਵਿਦਿਅਕ ਸੰਸਥਾਵਾਂ ਅਤੇ ਸਥਾਨਕ ਸੰਗਠਨਾਂ ਦਾ ਸਹਿਯੋਗ ਮਹੱਤਵਪੂਰਨ ਰਹੇਗਾ।