ਬਿਨਾਂ ਪ੍ਰਵਾਨਗੀ ਫਾਰਮ ਹਾਊਸ ਉਸਾਰਨ ਵਾਲਿਆਂ 'ਤੇ ਕਾਰਵਾਈ, 4 ਏਕੜ 'ਚ ਚੱਲ ਰਿਹਾ ਨਾਜਾਇਜ਼ ਪ੍ਰੋਜੈਕਟ ਰੋਕਿਆ

ਜਾਣਕਾਰੀ ਦਿੰਦਿਆਂ ਨਗਰ ਕੌਂਸਲ ਦੇ ਬਿਲਡਿੰਗ ਇੰਸਪੈਕਟਰ ਅਜੇ ਬਰਾੜ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਲਗਾਤਾਰ ਸ਼ਿਕਾਇਤਾਂ ਮਿਲ ਰਹੀਆਂ ਸਨ ਕਿ ਭਬਾਤ-ਨਡਿਆਲੀ ਸੜਕ 'ਤੇ ਸ਼ੰਕਰ ਸਿਟੀ ਦੇ ਪਿਛਲੇ ਪਾਸੇ ਇਕ ਵਿਅਕਤੀ ਵੱਲੋਂ ਬਿਨਾਂ ਕਿਸੇ ਪ੍ਰਵਾਨਗੀ ਤੋਂ ਕਰੀਬ ਚਾਰ ਏਕੜ ਜ਼ਮੀਨ ਵਿਚ ਫਾਰਮ ਹਾਊਸਾਂ ਲਈ ਪਲਾਟਿੰਗ ਕੀਤੀ ਜਾ ਰਹੀ ਹੈ। ਸ਼ਿਕਾਇਤ ਦਾ ਗੰਭੀਰ ਨੋਟਿਸ ਲੈਂਦਿਆਂ ਨਗਰ ਕੌਂਸਲ ਦੀ ਵਿਸ਼ੇਸ਼ ਟੀਮ ਨੇ ਤੁਰੰਤ ਮੌਕੇ 'ਤੇ ਪਹੁੰਚ ਕੇ ਸਥਿਤੀ ਦਾ ਜਾਇਜ਼ਾ ਲਿਆ। ਜਾਂਚ ਦੌਰਾਨ ਜ਼ਮੀਨ ਦੀ ਡਿਵੈਲਪਮੈਂਟ ਜਾਂ ਪਲਾਟ ਕੱਟਣ ਸਬੰਧੀ ਕੋਈ ਵੀ ਮੰਜ਼ੂਰੀ ਪੱਤਰ, ਸੀਐੱਲਯੂ ਜਾਂ ਹੋਰ ਲੋੜੀਂਦੇ ਸਰਕਾਰੀ ਦਸਤਾਵੇਜ਼ ਪੇਸ਼ ਨਹੀਂ ਕੀਤੇ ਜਾ ਸਕੇ। ਮੌਕੇ 'ਤੇ ਅਣ ਅਧਿਕਾਰਤ ਤੌਰ 'ਤੇ ਬਣਾਏ ਗਏ ਰਸਤੇ ਨੂੰ ਪੁੱਟ ਦਿੱਤਾ ਗਿਆ ਹੈ ਅਤੇ ਬਿਨਾਂ ਮਨਜ਼ੂਰੀ ਬਣਾਈ ਗਈ ਪ੍ਰੀ-ਕਾਸਟ ਦੀ ਚਾਰਦੀਵਾਰੀ ਨੂੰ ਢਾਹ ਦਿੱਤਾ ਗਿਆ ਹੈ, ਤਾਂ ਜੋ ਇਸ ਗ਼ੈਰ-ਕਾਨੂੰਨੀ ਵਿਕਾਸ ਨੂੰ ਅੱਗੇ ਵਧਣ ਤੋਂ ਤੁਰੰਤ ਰੋਕਿਆ ਜਾ ਸਕੇ।