ਐਤਵਾਰ ਨੂੰ ਖਰੀਦੀ ਟਿਕਟ, ਸੋਮਵਾਰ ਨੂੰ ਲੱਗਿਆ ਜੈਕਪਾਟ; ਪੰਜਾਬ ਦੇ ਕਿਸਾਨ ਨੇ ਜਿੱਤਿਆ 50 ਲੱਖ ਦਾ ਬੰਪਰ ਇਨਾਮ

ਰਾਜ ਕੁਮਾਰ ਰਾਜੂ, ਜਾਗਰਣ ਮੋਗਾ: ਮੋਗਾ ਦੇ ਮਥਰਾਪੁਰੀ 'ਚ ਰਹਿਣ ਵਾਲੇ ਇਕ ਮੱਧਵਰਗੀ ਕਿਸਾਨ ਵੱਲੋਂ ਪ੍ਰਤਾਪ ਰੋਡ 'ਤੇ ਸਥਿਤ ਗੋਲੀ ਲਾਟਰੀ ਸਟਾਲ ਤੋਂ ਪੰਜਾਬ ਸਟੇਟ ਡੀਅਰ ਲਾਟਰੀ ਬੰਪਰ ਖਰੀਦਿਆ ਗਿਆ। ਜਿਸ ਨਾਲ ਕਿਸਾਨ ਦੀ ਕਿਸਮਤ ਚਮਕ ਗਈ। ਸੋਮਵਾਰ ਸਵੇਰੇ ਲਾਟਰੀ ਡਰਾਅ ਦੌਰਾਨ ਪ੍ਰਤਾਪ ਰੋਡ 'ਤੇ ਸਥਿਤ ਗੋਲੀ ਲਾਟਰੀ ਸਟਾਲ 'ਤੇ ਲੋਕਾਂ ਨੇ ਲੱਡੂਆਂ ਤੇ ਢੋਲ ਦੀ ਥਾਪ 'ਤੇ ਜਸ਼ਨ ਮਨਾਇਆ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਮਥੁਰਾਪੁਰੀ ਕਾਲੋਨੀ ਦੇ ਰਹਿਣ ਵਾਲੇ ਕਿਸਾਨ ਚਰਨਜੀਤ ਸਿੰਘ ਨੇ ਦੱਸਿਆ ਕਿ ਉਸ ਨੇ ਐਤਵਾਰ ਨੂੰ ਪ੍ਰਤਾਪ ਰੋਡ 'ਤੇ ਸਥਿਤ ਗੋਲੀ ਲਾਟਰੀ ਸਟਾਲ ਤੋਂ ਹਜ਼ਾਰ ਰੁਪਏ ਦੀ ਪੰਜਾਬ ਸਟੇਟ ਲਾਟਰੀ ਖਰੀਦੀ ਸੀ। ਉਸ ਨੂੰ ਲਾਟਰੀ ਡਰਾਅ ਦਾ ਸਮਾਂ ਉਦੋਂ ਲੱਗਾ ਜਦੋਂ ਉਹ ਸੋਮਵਾਰ ਸਵੇਰੇ ਆਪਣੀ ਟਿਕਟ ਚੈੱਕ ਕਰਵਾਉਣ ਲਈ ਲਾਟਰੀ ਸਟਾਲ 'ਤੇ ਪਹੁੰਚਿਆ। ਇਸ ਦੌਰਾਨ ਲਾਟਰੀ ਸਟਾਲ ਸੰਚਾਲਕ ਪ੍ਰਦੀਪ ਕੁਮਾਰ ਗੋਲੀ ਨੇ ਦੱਸਿਆ ਕਿ ਉਸ ਨੇ 50 ਲੱਖ ਰੁਪਏ ਦਾ ਇਨਾਮ ਜਿੱਤਿਆ ਹੈ। ਇਸ ਸਬੰਧੀ ਲਾਟਰੀ ਸਟਾਲ ਸੰਚਾਲਕ ਪ੍ਰਦੀਪ ਕੁਮਾਰ ਗੋਲੀ ਤੇ ਹੋਰ ਲੋਕਾਂ ਨੇ ਢੋਲ ਦੀ ਤਾਣ 'ਤੇ ਨੱਚ ਕੇ ਖੁਸ਼ੀ ਦਾ ਪ੍ਰਗਟਾਵਾ ਕੀਤਾ। ਇਕ ਦੂਜੇ ਨੂੰ ਲੱਡੂ ਖਿਲਾ ਕੇ ਅਤੇ ਮੂੰਹ ਮਿੱਠਾ ਕਰਵਾ ਕੇ ਕਿਸਾਨ ਚਰਨਜੀਤ ਸਿੰਘ ਨੂੰ ਵਧਾਈ ਦਿੱਤੀ।

ਪਹਿਲਾਂ ਵੀ ਕਈ ਵਾਰ ਪਾ ਚੁੱਕੈ ਲਾਟਰੀ

ਚਰਨਜੀਤ ਸਿੰਘ ਨੇ ਦੱਸਿਆ ਕਿ ਉਹ ਆਪਣੀ ਕਿਸਮਤ ਅਜ਼ਮਾਉਣ ਲਈ ਸਮੇਂ-ਸਮੇਂ 'ਤੇ ਲਾਟਰੀ ਪਾਉਂਦਾ ਰਿਹਾ ਹੈ ਪਰ ਪਹਿਲੀ ਵਾਰ ਵਾਹਿਗੁਰੂ ਨੇ ਉਸਦੀ ਕਿਸਮਤ ਚਮਕਾਈ ਹੈ। ਉਸ ਨੇ ਦੱਸਿਆ ਕਿ ਉਕਤ ਪੈਸਿਆਂ ਨਾਲ ਉਹ ਸਮਾਜ ਸੇਵਾ ਦੇ ਕੰਮ ਕਰਨ ਸਮੇਤ ਆਪਣੀ ਜ਼ਰੂਰਤ ਅਨੁਸਾਰ ਕੰਮਕਾਜ ਪੂਰਾ ਕਰੇਗਾ। ਪ੍ਰਦੀਪ ਕੁਮਾਰ ਗੋਲੀ ਨੇ ਦੱਸਿਆ ਕਿ ਉਸ ਨੇ ਸ਼ਿਵਮ ਏਜੰਸੀ ਰਾਹੀਂ ਟਿਕਟ ਆਪਣੇ ਲਾਟਰੀ ਸਟਾਕਿਸਟ ਭਨੋਟ ਐਂਟਰਪ੍ਰਾਈਜ਼ ਲੁਧਿਆਣਾ ਤੋਂ ਖਰੀਦੀ ਸੀ ਜੋ ਅੱਗੇ ਕਿਸਾਨ ਚਰਨਜੀਤ ਸਿੰਘ ਨੂੰ ਵੇਚ ਦਿੱਤੀ ਗਈ ਸੀ। ਪ੍ਰਦੀਪ ਕੁਮਾਰ ਗੋਲੀ ਨੇ ਦੱਸਿਆ ਕਿ ਇਹ ਲਾਟਰੀ ਕਿਸੇ ਹੋਰ ਲਈ ਰੱਖੀ ਗਈ ਸੀ ਪਰ ਉਹ ਵਿਅਕਤੀ ਲੈਣ ਨਹੀਂ ਆਇਆ ਤੇ ਉਸ ਨੇ ਲਾਟਰੀ ਚਰਨਜੀਤ ਸਿੰਘ ਨੂੰ ਦੇ ਦਿੱਤੀ। ਇਸ ਮੌਕੇ ਸ਼ਮਸ਼ੇਰ ਸਿੰਘ ਜੌਹਲ ਮੱਤਾ ਆਦਿ ਹਾਜ਼ਰ ਸਨ।