'ਮੇਰੇ ਪੁੱਤ ਨੂੰ ਭਰੇ ਬਾਜ਼ਾਰ 'ਚ ਮਾਰ ਦਿੱਤਾ...', SSP ਸਾਹਮਣੇ ਛਲਕਿਆ ਪਰਵਿੰਦਰ ਝੋਟਾ ਦੇ ਪਿਤਾ ਦਾ ਦਰਦ; ਘਰੋਂ ਨਿਕਲਣ ਤੋਂ ਪਹਿਲਾਂ ਮਾਂ ਦੇ ਛੂਹੇ ਸਨ ਪੈਰ

ਡਿਜੀਟਲ ਡੈਸਕ, ਮਾਨਸਾ : ਨਸ਼ੇ ਦੀ ਲਤ ਛੱਡ ਕੇ ਨਸ਼ਾ ਵਿਰੋਧੀ ਮੁਹਿੰਮ ਚਲਾ ਰਹੇ ਪਰਵਿੰਦਰ ਸਿੰਘ ਝੋਟਾ ਦੀ ਮੰਗਲਵਾਰ ਸਵੇਰੇ ਸਵਾ 9 ਵਜੇ ਕੈਮਰੇ ਸਾਹਮਣੇ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ। 45 ਸਾਲਾ ਪਰਵਿੰਦਰ ਨੂੰ ਇਕ ਮੈਡੀਕਲ ਸਟੋਰ ਤੋਂ ਪਾਬੰਦੀਸ਼ੁਦਾ ਨਸ਼ੀਲੀਆਂ ਗੋਲੀਆਂ ਵੇਚੇ ਜਾਣ ਦੀ ਸੂਚਨਾ ਮਿਲੀ ਸੀ। ਇਸ ਤੋਂ ਬਾਅਦ ਉਹ ਫੇਸਬੁੱਕ 'ਤੇ ਲਾਈਵ ਹੋ ਕੇ ਮੈਡੀਕਲ ਸਟੋਰ ਪਹੁੰਚੇ ਸਨ। ਝੋਟਾ ਉਸ ਬਜ਼ੁਰਗ ਨੂੰ ਵੀ ਆਪਣੇ ਨਾਲ ਲੈ ਗਏ ਸਨ, ਜਿਸ ਨੇ ਨਸ਼ਾ ਖਰੀਦਿਆ ਸੀ। ਉਨ੍ਹਾਂ ਕੈਮਿਸਟ ਅਸ਼ਵਨੀ ਨੂੰ ਪੁੱਛਿਆ ਕਿ ਕੀ ਉਸ ਨੇ ਇਸ ਬਜ਼ੁਰਗ ਨੂੰ ਨਸ਼ਾ ਵੇਚਿਆ ਹੈ। ਇਸ ਦੌਰਾਨ ਦੁਕਾਨਦਾਰ ਨਾਲ ਉਨ੍ਹਾਂ ਦੀ ਤਿੱਖੀ ਬਹਿਸ ਹੋ ਗਈ। ਝੋਟਾ ਨੇ ਕੈਮਿਸਟ ਨੂੰ ਫੁਟੇਜ ਦਿਖਾਉਣ ਤੇ ਡੀਐੱਸਪੀ ਨੂੰ ਫ਼ੋਨ ਕਰਨ ਲਈ ਕਿਹਾ। ਇਸ 'ਤੇ ਦੁਕਾਨਦਾਰ ਨੇ ਪਿਸਤੌਲ ਕੱਢ ਲਈ। ਝੋਟਾ ਨੇ ਆਪਣੇ ਸਾਥੀਆਂ ਨੂੰ ਬੁਲਾਇਆ ਤੇ ਕਿਹਾ ਕਿ ਗੋਲੀ ਚਲਾ ਦੇ। ਕਰੀਬ ਸਵਾ ਚਾਰ ਮਿੰਟ ਤਕ ਬਹਿਸ ਹੋਣ ਤੋਂ ਬਾਅਦ ਕੈਮਿਸਟ ਨੇ ਝੋਟਾ 'ਤੇ ਦੋ ਗੋਲੀਆਂ ਚਲਾ ਦਿੱਤੀਆਂ। ਆਪਣਾ ਬਚਾਅ ਕਰਨ ਲਈ ਉਹ ਕਰੀਬ 200 ਮੀਟਰ ਤਕ ਭੱਜੇ, ਪਰ ਮੁਲਜ਼ਮ ਨੇ ਪਿੱਛਾ ਕਰ ਕੇ ਉਨ੍ਹਾਂ 'ਤੇ ਇਕ ਹੋਰ ਗੋਲੀ ਚਲਾ ਦਿੱਤੀ।