ਪਿਤਾ ਲਈ ਖ਼ਰੀਦੀ ਨਵੀਂ ਸਕਾਰਪੀਓ-ਐੱਨ 'ਤੇ ਚੋਰਾਂ ਦੀ ਨਜ਼ਰ, ਮਾਸਟਰ ਕੀ ਨਾਲ ਮਿੰਟਾਂ 'ਚ ਘਰ ਦੇ ਬਾਹਰੋਂ ਉਡਾਈ ਕਾਰ

ਸੁਸ਼ੀਲ ਕੁਮਾਰ ਸ਼ਸ਼ੀ,ਪੰਜਾਬੀ ਜਾਗਰਣ, ਲੁਧਿਆਣਾ : ਦੁੱਗਰੀ ਇਲਾਕੇ ਵਿੱਚ ਸ਼ਾਤਰ ਚੋਰਾਂ ਨੇ ਘਰ ਦੇ ਬਿਲਕੁਲ ਬਾਹਰ ਖੜ੍ਹੀ ਨਵੀਂ ਨਕੋਰ ਸਕਾਰਪੀਓ-ਐੱਨ ਗੱਡੀ ਨੂੰ ਨਿਸ਼ਾਨਾ ਬਣਾਇਆ। ਚੋਰ ਗਿਰੋਹ ਨੇ ਕੁਝ ਹੀ ਸਮੇਂ ਵਿੱਚ ਕਾਰ ਖੋਲੀ ਅਤੇ ਰਫੂ ਚੱਕਰ ਹੋ ਗਿਆ। ਫਾਦਰ ਡੇ ਤੇ ਖਰੀਦੀ ਗਈ ਇਸ ਗੱਡੀ ਦਾ ਅਜੇ ਤੱਕ ਸਥਾਈ ਰਜਿਸਟ੍ਰੇਸ਼ਨ ਨੰਬਰ ਵੀ ਨਹੀਂ ਆਇਆ ਸੀ ਅਤੇ ਉਸ ’ਤੇ ਆਰਜ਼ੀ ਨੰਬਰ ਲੱਗਾ ਹੋਇਆ ਸੀ। ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਪਹਿਲਾਂ ਚੋਰਾਂ ਵੱਲੋਂ ਇਲਾਕੇ ਦੀ ਰੈਕੀ ਕੀਤੇ ਜਾਣ ਦੀ ਗੱਲ ਵੀ ਸਾਹਮਣੇ ਆਈ ਹੈ।

ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ 31 ਸਾਲਾ ਮਿਅੰਕ ਟੱਕਰ ਵਾਸੀ ਨਿਊ ਮਾਡਲ ਟਾਊਨ ਲੁਧਿਆਣਾ ਨੇ ਦੱਸਿਆ ਕਿ ਬੀਤੇ ਦਿਨ ਦਰਮਿਆਨੀ ਰਾਤ ਨੂੰ ਕੋਈ ਅਣਪਛਾਤਾ ਵਿਅਕਤੀ ਉਸ ਦੇ ਘਰ ਦੇ ਸਾਹਮਣੇ ਬਣੀ ਪਾਰਕ ਦੇ ਨੇੜਿਓਂ ਉਸ ਦੀ ਸਕਾਰਪੀਓ-ਐੱਨ ਚੋਰੀ ਕਰਕੇ ਲੈ ਗਿਆ। ਗੱਡੀ ਨਵੀਂ ਖਰੀਦੀ ਹੋਈ ਸੀ ਅਤੇ ਇਸ ’ਤੇ ਆਰਜ਼ੀ ਨੰਬਰ ਲੱਗਾ ਹੋਇਆ ਸੀ।