ਕੁਝ ਮਿੰਟਾਂ ਦੇ ਮੀਂਹ ਨਾਲ ਜਨ-ਜੀਵਨ ਹੋਇਆ ਪ੍ਰਭਾਵਿਤ

-ਵਾਹਨਾਂ ਦੀ ਥੰਮੀ ਰਫ਼ਤਾਰ ਪਰ ਲੋਕਾਂ ਨੂੰ ਹੁੰਮਸ ਤੋਂ ਪੂਰੀ ਤਰ੍ਹਾਂ ਨਹੀਂ ਮਿਲੀ ਰਾਹਤ

ਫੋਟੋ ਨੰਬਰ-32,33

ਪਲਵਿੰਦਰ ਸਿੰਘ ਢੁੱਡੀਕੇ, ਪੰਜਾਬੀ ਜਾਗਰਣ, ਲੁਧਿਆਣਾ : ਸ਼ਹਿਰ ਵਿੱਚ ਸੋਮਵਾਰ ਸ਼ਾਮ ਪਏ ਕੁੱਝ ਮਿੰਟਾਂ ਦੇ ਮੀਂਹ ਨੇ ਇਕ ਪਾਸੇ ਲੋਕਾਂ ਨੂੰ ਗਰਮੀ ਤੋਂ ਥੋੜ੍ਹੀ ਰਾਹਤ ਦਿੱਤੀ ਪਰ ਦੂਜੇ ਪਾਸੇ ਜਨਜੀਵਨ ਨੂੰ ਅਸਤ-ਵਿਅਸਤ ਕਰ ਦਿੱਤਾ। ਸਾਰਾ ਦਿਨ ਪਈ ਤਿੱਖੀ ਧੁੱਪ ਅਤੇ ਹੁੰਮਸ ਕਾਰਨ ਲੋਕ ਪਰੇਸ਼ਾਨ ਰਹੇ। ਸ਼ਾਮ ਵੇਲੇ ਹੋਈ ਹਲਕੀ ਤੋਂ ਦਰਮਿਆਨੀ ਬਾਰਿਸ਼ ਨਾਲ ਮੌਸਮ ਕੁੱਝ ਸਮੇਂ ਲਈ ਸੁਹਾਵਣਾ ਹੋਇਆ ਪਰ ਮੀਂਹ ਰੁਕਦੇ ਹੀ ਨਮੀ ਵਧਣ ਕਾਰਨ ਹੁੰਮਸ ਮੁੜ ਵਧ ਗਈ ਅਤੇ ਲੋਕਾਂ ਨੂੰ ਪੂਰੀ ਤਰ੍ਹਾਂ ਰਾਹਤ ਨਹੀਂ ਮਿਲ ਸਕੀ। ਮੀਂਹ ਸ਼ੁਰੂ ਹੁੰਦਿਆਂ ਹੀ ਸ਼ਹਿਰ ਦੀਆਂ ਕਈ ਮੁੱਖ ਸੜਕਾਂ ਅਤੇ ਨੀਵੇਂ ਇਲਾਕਿਆਂ ਵਿੱਚ ਪਾਣੀ ਇਕੱਠਾ ਹੋ ਗਿਆ। ਫਿਰੋਜ਼ਪੁਰ ਰੋਡ, ਗਿੱਲ ਰੋਡ, ਚੰਡੀਗੜ੍ਹ ਰੋਡ, ਜਲੰਧਰ ਬਾਈਪਾਸ ਅਤੇ ਹੋਰ ਭੀੜ ਵਾਲੇ ਖੇਤਰਾਂ ਵਿੱਚ ਵਾਹਨਾਂ ਦੀ ਰਫ਼ਤਾਰ ਹੌਲੀ ਹੋ ਗਈ। ਕਈ ਥਾਵਾਂ 'ਤੇ ਟ੍ਰੈਫਿਕ ਜਾਮ ਵਰਗੀ ਸਥਿਤੀ ਬਣ ਗਈ, ਜਿਸ ਕਾਰਨ ਦਫ਼ਤਰਾਂ ਤੋਂ ਘਰ ਪਰਤ ਰਹੇ ਲੋਕਾਂ ਨੂੰ ਕਾਫ਼ੀ ਸਮਾਂ ਸੜਕਾਂ 'ਤੇ ਹੀ ਬਿਤਾਉਣਾ ਪਿਆ।

ਦੋਪਹੀਆ ਵਾਹਨ ਚਾਲਕਾਂ ਅਤੇ ਪੈਦਲ ਯਾਤਰੀਆਂ ਨੂੰ ਸਭ ਤੋਂ ਵੱਧ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਸੜਕਾਂ 'ਤੇ ਪਾਣੀ ਭਰਨ ਕਾਰਨ ਕਈ ਥਾਵਾਂ 'ਤੇ ਵਾਹਨ ਫਿਸਲਦੇ ਵੀ ਨਜ਼ਰ ਆਏ। ਬਾਜ਼ਾਰਾਂ ਵਿੱਚ ਵੀ ਖਰੀਦਦਾਰੀ ਕਰਨ ਆਏ ਲੋਕ ਮੀਂਹ ਤੋਂ ਬਚਣ ਲਈ ਦੁਕਾਨਾਂ ਅਤੇ ਛੱਜਿਆਂ ਹੇਠਾਂ ਖੜ੍ਹੇ ਹੋ ਗਏ। ਕੁਝ ਥਾਵਾਂ 'ਤੇ ਸੀਵਰੇਜ ਪ੍ਰਬੰਧ ਠੀਕ ਨਾ ਹੋਣ ਕਾਰਨ ਪਾਣੀ ਦੀ ਨਿਕਾਸੀ ਵਿੱਚ ਦੇਰੀ ਹੋਈ, ਜਿਸ ਨਾਲ ਲੋਕਾਂ ਦੀਆਂ ਮੁਸ਼ਕਲਾਂ ਹੋਰ ਵਧ ਗਈਆਂ। ਮੌਸਮ ਵਿੱਚ ਆਈ ਇਸ ਤਬਦੀਲੀ ਕਾਰਨ ਤਾਪਮਾਨ ਵਿੱਚ ਹਲਕੀ ਗਿਰਾਵਟ ਤਾਂ ਦਰਜ ਕੀਤੀ ਗਈ, ਪਰ ਹਵਾ ਵਿੱਚ ਨਮੀ ਦਾ ਪੱਧਰ ਵਧਣ ਨਾਲ ਹੁੰਮਸ ਜਾਰੀ ਰਹੀ। ਲੋਕਾਂ ਦਾ ਕਹਿਣਾ ਸੀ ਕਿ ਮੀਂਹ ਨਾਲ ਕੁੱਝ ਸਮੇਂ ਲਈ ਗਰਮੀ ਘੱਟ ਮਹਿਸੂਸ ਹੋਈ, ਪਰ ਬਾਅਦ ਵਿੱਚ ਮੁੜ ਪਸੀਨਾ ਅਤੇ ਉਮਸ ਕਾਰਨ ਬੇਚੈਨੀ ਵਧ ਗਈ। ਬਿਜਲੀ ਦੀ ਮੰਗ ਵੀ ਦਿਨ ਭਰ ਉੱਚੀ ਰਹੀ, ਕਿਉਂਕਿ ਲੋਕਾਂ ਨੇ ਗਰਮੀ ਤੋਂ ਬਚਣ ਲਈ ਪੱਖੇ, ਕੂਲਰ ਅਤੇ ਏਅਰ ਕੰਡੀਸ਼ਨਰਾਂ ਦੀ ਵਰਤੋਂ ਜਾਰੀ ਰੱਖੀ। ਮੌਸਮ ਮਾਹਿਰਾਂ ਅਨੁਸਾਰ ਅਗਲੇ ਕੁੱਝ ਦਿਨਾਂ ਦੌਰਾਨ ਵੀ ਬੱਦਲ ਛਾਏ ਰਹਿਣ ਅਤੇ ਕਿਤੇ-ਕਿਤੇ ਹਲਕੇ ਤੋਂ ਦਰਮਿਆਨੇ ਮੀਂਹ ਦੀ ਸੰਭਾਵਨਾ ਬਣੀ ਹੋਈ ਹੈ।

ਹਾਲਾਂਕਿ ਲਗਾਤਾਰ ਅਤੇ ਵਧੀਆ ਬਾਰਿਸ਼ ਹੋਣ ਤੋਂ ਬਾਅਦ ਹੀ ਲੋਕਾਂ ਨੂੰ ਗਰਮੀ ਅਤੇ ਹੁੰਮਸ ਤੋਂ ਪੂਰੀ ਰਾਹਤ ਮਿਲਣ ਦੀ ਉਮੀਦ ਹੈ। ਸ਼ਹਿਰ ਵਾਸੀਆਂ ਨੇ ਨਗਰ ਨਿਗਮ ਤੋਂ ਮੰਗ ਕੀਤੀ ਹੈ ਕਿ ਮੀਂਹ ਦੇ ਮੌਸਮ ਨੂੰ ਧਿਆਨ ਵਿੱਚ ਰੱਖਦਿਆਂ ਪਾਣੀ ਦੀ ਨਿਕਾਸੀ ਦੇ ਪ੍ਰਬੰਧ ਹੋਰ ਸੁਚਾਰੂ ਬਣਾਏ ਜਾਣ, ਤਾਂ ਜੋ ਥੋੜ੍ਹੇ ਸਮੇਂ ਦੇ ਮੀਂਹ ਦੌਰਾਨ ਵੀ ਸੜਕਾਂ 'ਤੇ ਪਾਣੀ ਨਾ ਖੜ੍ਹੇ ਤੇ ਆਵਾਜਾਈ ਪ੍ਰਭਾਵਿਤ ਨਾ ਹੋਵੇ। ਕੁੱਲ ਮਿਲਾ ਕੇ ਕੁੱਝ ਮਿੰਟਾਂ ਦਾ ਮੀਂਹ ਮੌਸਮ ਨੂੰ ਸੁਹਾਵਣਾ ਬਣਾਉਣ ਦੀ ਬਜਾਏ ਲੋਕਾਂ ਲਈ ਰਾਹਤ ਅਤੇ ਪਰੇਸ਼ਾਨੀ ਦੋਵੇਂ ਲੈ ਕੇ ਆਇਆ।