ਫਿੱਕੀ ਫਲੋ ਨੇ ‘ਬਿਓਂਡ ਦਿਸ ਲਾਈਫਟਾਈਮ’ ਸੈਸ਼ਨ ਕਰਵਾਇਆ

ਫੋਟੋ ਨੰਬਰ-4 ਪਲਵਿੰਦਰ ਸਿੰਘ ਢੁੱਡੀਕੇ, ਪੰਜਾਬੀ ਜਾਗਰਣ ਲੁਧਿਆਣਾ ਫਿੱਕੀ ਫਲੋ ਲੁਧਿਆਣਾ ਦੀ ਚੇਅਰਪਰਸਨ ਐਸ਼ਨੀ ਸੇਠੀ ਦੀ ਅਗਵਾਈ ਹੇਠ ਸਥਾਨਕ ਹੋਟਲ ਫਿਰੋਜ਼ਪੁਰ ਰੋਡ ਵਿਖੇ ‘ਬਿਓਂਡ ਦਿਸ ਲਾਈਫਟਾਈਮ’ ਨਾਮਕ ਵਿਸ਼ੇਸ਼ ਸੈਸ਼ਨ ਕਰਵਾਇਆ ਗਿਆ। ਇਸ ਮੌਕੇ ਹਿਪਨੋਥੈਰੇਪਿਸਟ ਤੇ ਰੇਕੀ ਪ੍ਰੈਕਟੀਸ਼ਨਰ ਸੁਰੇਖਾ ਕੋਠਾਰੀ ਨੇ ਵਿਚਾਰ ਸਾਂਝੇ ਕੀਤੇ। ਸੈਸ਼ਨ ਦਾ ਕੇਂਦਰ ਆਤਮ-ਖੋਜ, ਅੰਦਰੂਨੀ ਇਲਾਜ ਅਤੇ ਜੀਵਨ ਵਿੱਚ ਸਕਾਰਾਤਮਕ ਬਦਲਾਅ ਰਿਹਾ। ਸੁਰੇਖਾ ਕੋਠਾਰੀ ਲੰਬੇ ਸਮੇਂ ਤੋਂ ਅਧਿਆਤਮਿਕਤਾ, ਅੰਦਰੂਨੀ ਇਲਾਜ ਤੇ ਵਿਅਕਤੀਗਤ ਬਦਲਾਅ ਦੇ ਖੇਤਰ ਨਾਲ ਜੁੜੇ ਹੋਏ ਹਨ। ਉਨ੍ਹਾਂ ਚਕਰਾ ਮੈਨੇਜਮੈਂਟ, ਪਾਸਟ-ਲਾਈਫ ਰਿਗ੍ਰੈਸ਼ਨ ਤੇ ਆਪਣੇ-ਆਪ ਦੀ ਸੂਝ ਨਾਲ ਜੁੜੇ ਵਿਸ਼ਿਆਂ ਰਾਹੀਂ ਲੋਕਾਂ ਨੂੰ ਅੰਦਰੂਨੀ ਸੰਸਾਰ ਨੂੰ ਸਮਝਣ ਅਤੇ ਜੀਵਨ ਨੂੰ ਨਵੇਂ ਨਜ਼ਰੀਏ ਨਾਲ ਦੇਖਣ ਲਈ ਪ੍ਰੇਰਿਤ ਕੀਤਾ ਹੈ। ਸਮਾਗਮ ਦੀ ਸ਼ੁਰੂਆਤ ਜੁਆਇੰਟ ਟ੍ਰੇਜ਼ਰਰ ਦਿਵਿਆ ਵੱਲੋਂ ਨਿੱਘੇ ਸਵਾਗਤੀ ਭਾਸ਼ਣ ਨਾਲ ਹੋਈ। ਉਨ੍ਹਾਂ ਨੇ ਮੁੱਖ ਬੁਲਾਰੇ, ਫਿੱਕੀ ਫਲੋ ਦੀਆਂ ਮੈਂਬਰਾਂ ਅਤੇ ਮਹਿਮਾਨਾਂ ਦਾ ਸਵਾਗਤ ਕਰਦਿਆਂ ਸੁਰੇਖਾ ਕੋਠਾਰੀ ਨਾਲ ਜਾਣ-ਪਛਾਣ ਕਰਵਾਈ। ਚੇਅਰਪਰਸਨ ਐਸ਼ਨੀ ਸੇਠੀ ਨੇ ਕਿਹਾ ਕਿ ਅਜਿਹੇ ਮੰਚ ਲੋਕਾਂ ਨੂੰ ਆਪਣੇ ਅੰਦਰ ਝਾਤ ਮਾਰਨ, ਆਪਣੇ ਆਪ ਨੂੰ ਸਮਝਣ ਅਤੇ ਨਿੱਜੀ ਵਿਕਾਸ ਵੱਲ ਅੱਗੇ ਵਧਣ ਦਾ ਮੌਕਾ ਦਿੰਦੇ ਹਨ। ਉਨ੍ਹਾਂ ਨੇ ਅਰਥਪੂਰਨ ਵਿਚਾਰ-ਵਟਾਂਦਰੇ ਤੇ ਆਤਮ-ਚਿੰਤਨ ਨੂੰ ਉਤਸ਼ਾਹਿਤ ਕਰਨ ਵਾਲੇ ਅਜਿਹੇ ਪ੍ਰੋਗਰਾਮਾਂ ਦੀ ਮਹੱਤਤਾ ’ਤੇ ਜ਼ੋਰ ਦਿੱਤਾ। ਇਸ ਤੋਂ ਬਾਅਦ ਸੁਰੇਖਾ ਕੋਠਾਰੀ ਨਾਲ ਵਿਸ਼ੇਸ਼ ਗੱਲਬਾਤ ਹੋਈ, ਜਿਸ ਨੂੰ ਐਸ਼ਨੀ ਸੇਠੀ ਤੇ ਸਾਬਕਾ ਚੇਅਰਪਰਸਨ ਰਾਧਿਕਾ ਗੁਪਤਾ ਨੇ ਸੰਚਾਲਿਤ ਕੀਤਾ। ਗੱਲਬਾਤ ਦੌਰਾਨ ਅੰਦਰੂਨੀ ਵਿਕਾਸ, ਇਲਾਜ, ਅਧਿਆਤਮਿਕਤਾ ਅਤੇ ਵਿਅਕਤੀਗਤ ਬਦਲਾਅ ਨਾਲ ਜੁੜੇ ਵੱਖ-ਵੱਖ ਪਹਿਲੂਆਂ ’ਤੇ ਚਰਚਾ ਕੀਤੀ ਗਈ। ਸੈਸ਼ਨ ਦੌਰਾਨ ਮੈਂਬਰਾਂ ਨੇ ਉਤਸ਼ਾਹ ਨਾਲ ਹਿੱਸਾ ਲਿਆ। ਉਨ੍ਹਾਂ ਰਿਫਲੈਕਟਿਵ ਐਕਸਰਸਾਈਜ਼ ਵਿੱਚ ਭਾਗ ਲੈਂਦਿਆਂ ਆਪਣੇ ਵਿਚਾਰ ਅਤੇ ਨਿੱਜੀ ਤਜਰਬੇ ਵੀ ਸਾਂਝੇ ਕੀਤੇ। ਇੰਟਰਐਕਟਿਵ ਸੈਸ਼ਨ ਨੇ ਮੈਂਬਰਾਂ ਨੂੰ ਖ਼ੁਦ ਨਾਲ ਜੁੜੇ ਸਵਾਲਾਂ ’ਤੇ ਵਿਚਾਰ ਕਰਨ ਅਤੇ ਅਰਥਪੂਰਨ ਸਵਾਲ ਪੁੱਛਣ ਦਾ ਮੌਕਾ ਦਿੱਤਾ। ਸਵਾਲ-ਜਵਾਬ ਸੈਸ਼ਨ ਦੌਰਾਨ ਵੀ ਮੈਂਬਰਾਂ ਨੇ ਸਰਗਰਮੀ ਨਾਲ ਭਾਗ ਲਿਆ, ਜਿਸ ਨਾਲ ਪੂਰਾ ਪ੍ਰੋਗਰਾਮ ਹੋਰ ਵੀ ਦਿਲਚਸਪ ਅਤੇ ਪ੍ਰਭਾਵਸ਼ਾਲੀ ਬਣਿਆ। ਅੰਤ ’ਚ ਐਗਜ਼ੀਕਿਊਟਿਵ ਮੈਂਬਰ ਪੂਜਾ ਤੁਲੀ ਨੇ ਧੰਨਵਾਦੀ ਭਾਸ਼ਣ ਦਿੱਤਾ। ਉਨ੍ਹਾਂ ਮੁੱਖ ਬੁਲਾਰੇ, ਮੈਂਬਰਾਂ ਅਤੇ ਮਹਿਮਾਨਾਂ ਦਾ ਪ੍ਰੋਗਰਾਮ ਨੂੰ ਸਫਲ ਬਣਾਉਣ ਲਈ ਧੰਨਵਾਦ ਕੀਤਾ। ‘ਬਿਓਂਡ ਦਿਸ ਲਾਈਫਟਾਈਮ’ ਰਾਹੀਂ ਫਿੱਕੀ ਫਲੋ ਲੁਧਿਆਣਾ ਨੇ ਮੁੜ ਇਹ ਸੁਨੇਹਾ ਦਿੱਤਾ ਕਿ ਔਰਤਾਂ ਲਈ ਅਜਿਹੇ ਮੰਚ ਬਣਾਉਣਾ ਜ਼ਰੂਰੀ ਹੈ, ਜਿੱਥੇ ਉਹ ਆਤਮ-ਚਿੰਤਨ ਕਰ ਸਕਣ।