ਲੁਧਿਆਣਾ 'ਚ ਕਲਯੁਗੀ ਪਿਓ ਤੇ ਦਾਦੇ ਦੀ ਸਾਜ਼ਿਸ਼! ਬੱਚੀ ਦੇ ਅਗਵਾ ਲਈ ਭੇਜੇ ਗੁੰਡੇ, ਮਾਂ-ਨਾਨੀ ਨੇ ਨਾਕਾਮ ਕੀਤਾ ਪਲਾਨ

ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ’ਚ ਬੱਚੀ ਦੀ ਮਾਂ ਅਨੁਪ੍ਰਿਯਾ ਨੇ ਦੱਸਿਆ ਕਿ ਜਦੋਂ ਉਹ ਆਪਣੀ ਮਾਂ ਨਾਲ ਧੀ ਹੇਜ਼ਲ ਨੂੰ ਸਕੂਲ ਛੱਡਣ ਜਾਂਦੀ ਸੀ ਤਾਂ ਕੁਝ ਅਣਪਛਾਤੇ ਵਿਅਕਤੀ ਉਨ੍ਹਾਂ ਦਾ ਪਿੱਛਾ ਕਰਦੇ ਅਤੇ ਫੋਟੋਆਂ ਖਿੱਚਦੇ ਸਨ। 12 ਸਤੰਬਰ ਨੂੰ 3-4 ਸ਼ੱਕੀ ਉਨ੍ਹਾਂ ਦੇ ਘਰ ਦੇ ਆਸ-ਪਾਸ ਪਹੁੰਚੇ। ਇਨ੍ਹਾਂ ’ਚੋਂ ਚਿੱਟੇ ਰੰਗ ਦੀ ਐਕਟਿਵਾ 'ਤੇ ਸਵਾਰ ਦੋ ਨੌਜਵਾਨ ਘਰ ਦੇ ਬਾਹਰ ਰੁਕ ਗਏ।

Posted By Anuradha Bains

Publish Date: Sun, 13 Sep 2026 11:57 AM (IST)

Updated Date: Sun, 13 Sep 2026 12:00 PM (IST)

ਲੁਧਿਆਣਾ 'ਚ ਕਲਯੁਗੀ ਪਿਓ ਤੇ ਦਾਦੇ ਦੀ ਸਾਜ਼ਿਸ਼! ਬੱਚੀ ਦੇ ਅਗਵਾ ਲਈ ਭੇਜੇ ਗੁੰਡੇ, ਮਾਂ-ਨਾਨੀ ਨੇ ਨਾਕਾਮ ਕੀਤਾ ਪਲਾਨ

ਜਾਗਰਣ ਸੰਵਾਦਦਾਤਾ, ਲੁਧਿਆਣਾ। ਹੈਬੋਵਾਲ ਥਾਣਾ ਖੇਤਰ ’ਚ ਬੱਚੀ ਨੂੰ ਅਗਵਾ ਕਰਨ ਦੀ ਕਥਿਤ ਸਾਜ਼ਿਸ਼ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਬੱਚੀ ਦੀ ਮਾਂ ਅਤੇ ਨਾਨੀ ਦੀ ਬਹਾਦਰੀ ਤੇ ਸੂਝ-ਬੂਝ ਸਦਕਾ ਦੋ ਸ਼ੱਕੀ ਮੌਕੇ 'ਤੇ ਹੀ ਫੜੇ ਗਏ।

ਪੁਲਿਸ ਜਾਂਚ ’ਚ ਸਾਹਮਣੇ ਆਇਆ ਹੈ ਕਿ ਦੋਵੇਂ ਨੌਜਵਾਨ ਪਿਛਲੇ ਕੁਝ ਸਮੇਂ ਤੋਂ ਬੱਚੀ ਅਤੇ ਉਸ ਦੇ ਪਰਿਵਾਰ ਦੀ ਰੇਕੀ ਕਰ ਰਹੇ ਸਨ। ਸਕੂਲ ਛੱਡਣ ਦੌਰਾਨ ਬੱਚੀ ਦੀ ਮਾਂ ਅਤੇ ਨਾਨੀ 'ਤੇ ਨਜ਼ਰ ਰੱਖਣ ਦੇ ਨਾਲ-ਨਾਲ ਉਨ੍ਹਾਂ ਦੀਆਂ ਤਸਵੀਰਾਂ ਵੀ ਖਿੱਚੀਆਂ ਜਾਂਦੀਆਂ ਸਨ।

ਬੱਚੀ ਦੀ ਨਾਨੀ ਨੇ ਦੋਵਾਂ ਨੌਜਵਾਨਾਂ ਨੂੰ ਉੱਥੇ ਦੇਖ ਕੇ ਬਾਹਰ ਆ ਕੇ ਪੁੱਛਗਿੱਛ ਕੀਤੀ। ਨੌਜਵਾਨਾਂ ਵੱਲੋਂ ਘਬਰਾ ਕੇ ਭੱਜਣ ਦੀ ਕੋਸ਼ਿਸ਼ ਕਰਨ 'ਤੇ ਨਾਨੀ ਨੇ ਬਹਾਦਰੀ ਦਿਖਾਉਂਦੇ ਹੋਏ ਉਨ੍ਹਾਂ ਦੀ ਐਕਟਿਵਾ ਦੀ ਚਾਬੀ ਕੱਢ ਲਈ ਅਤੇ ਰੌਲਾ ਪਾ ਦਿੱਤਾ।

ਆਵਾਜ਼ ਸੁਣ ਕੇ ਅਨੁਪ੍ਰਿਯਾ ਵੀ ਬਾਹਰ ਆ ਗਈ। ਇਸ ਤੋਂ ਬਾਅਦ ਮੁੱਹਲੇ ਦੇ ਲੋਕਾਂ ਦੀ ਮਦਦ ਨਾਲ ਦੋਵਾਂ ਨੌਜਵਾਨਾਂ ਨੂੰ ਮੌਕੇ 'ਤੇ ਹੀ ਫੜ ਲਿਆ ਗਿਆ।

ਫੜੇ ਗਏ ਨੌਜਵਾਨਾਂ ਦੀ ਪਛਾਣ ਓਮਕਾਰ ਸਿੰਘ ਨਿਵਾਸੀ ਹਰਕ੍ਰਿਸ਼ਨ ਨਗਰ, ਸ਼ਿਮਲਾਪੁਰੀ ਅਤੇ ਤੇਜਪਾਲ ਸਿੰਘ ਨਿਵਾਸੀ ਨਿਊ ਸ਼ਿਮਲਾਪੁਰੀ ਵਜੋਂ ਹੋਈ ਹੈ। ਪੁਲਿਸ ਪੁੱਛਗਿੱਛ ’ਚ ਦੋਵਾਂ ਨੇ ਕਥਿਤ ਤੌਰ 'ਤੇ ਦੱਸਿਆ ਕਿ ਉਨ੍ਹਾਂ ਨੂੰ ਬੱਚੀ ਨੂੰ ਅਗਵਾ ਕਰਨ ਲਈ ਅਨੁਪ੍ਰਿਯਾ ਦੇ ਪਤੀ ਅਮਨਦੀਪ ਸ਼ਰਮਾ ਅਤੇ ਸਹੁਰੇ ਹੇਮਰਾਜ ਸ਼ਰਮਾ ਨੇ ਭੇਜਿਆ ਸੀ।

ਥਾਣਾ ਹੈਬੋਵਾਲ ਪੁਲਿਸ ਨੇ ਸ਼ਿਕਾਇਤ ਦੇ ਆਧਾਰ 'ਤੇ ਓਮਕਾਰ ਸਿੰਘ, ਤੇਜਪਾਲ ਸਿੰਘ, ਅਮਨਦੀਪ ਸ਼ਰਮਾ, ਅਵਤਾਰ ਕੌਰ ਅਤੇ ਹੇਮਰਾਜ ਸ਼ਰਮਾ ਸਮੇਤ ਦੋ ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਬੀ.ਐਨ.ਐਸ. ਦੀ ਧਾਰਾ 140(3), 3(5) ਅਤੇ 62 ਤਹਿਤ ਕੇਸ ਦਰਜ ਕਰ ਲਿਆ ਹੈ।

ਜਾਂਚ ਅਧਿਕਾਰੀ ਏ.ਐਸ.ਆਈ. ਓਮ ਪ੍ਰਕਾਸ਼ ਨੇ ਦੱਸਿਆ ਕਿ ਓਮਕਾਰ ਅਤੇ ਤੇਜਪਾਲ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਵਾਰਦਾਤ ਵਿੱਚ ਵਰਤੀ ਗਈ ਐਕਟਿਵਾ ਵੀ ਬਰਾਮਦ ਕਰ ਲਈ ਗਈ ਹੈ। ਪੁਲਿਸ ਮਾਮਲੇ ਵਿੱਚ ਨਾਮਜ਼ਦ ਹੋਰ ਵਿਅਕਤੀਆਂ ਦੀ ਭੂਮਿਕਾ ਦੀ ਜਾਂਚ ਕਰ ਰਹੀ ਹੈ।