ਉੱਤਰ ਪੂਰਬੀ ਹੜ੍ਹ ਤੇ ਮੈਦਾਨ ਖੇਤਰ ਦੇ ਦੌਰੇ ਦੌਰਾਨ ਪੀਏਸੀ ਨੇ ਪ੍ਰਗਟਾਈ ਚਿੰਤਾ

-ਪੀਏਸੀ ਵੱਲੋਂ ਬੁੱਢਾ ਦਰਿਆ ਨੂੰ ਬਚਾਉਣ ਲਈ ਸੂਮਹਿਕ ਯਤਨ ਕਰਨ ਦਾ ਸੱਦਾ

ਪੁਨੀਤ ਬਾਵਾ, ਪੰਜਾਬੀ ਜਾਗਰਣ, ਲੁਧਿਆਣਾ

ਪਬਲਿਕ ਐਕਸ਼ਨ ਕਮੇਟੀ (ਪੀਏਸੀ) ਦੀ ਟੀਮ ਨੇ ਸਤਲੁਜ ਦਰਿਆ ਅਤੇ ਬੁੱਢਾ ਦਰਿਆ ਵਿਚਕਾਰਲੇ ਉੱਤਰ-ਪੂਰਬੀ ਹੜ੍ਹ-ਮੈਦਾਨੀ ਖੇਤਰ ਦਾ ਵਿਸਥਾਰਤ ਦੌਰਾ ਕਰਕੇ ਦਰਿਆ ਅਤੇ ਇਸ ਦੇ ਆਲੇ-ਦੁਆਲੇ ਦੀ ਮੌਜੂਦਾ ਸਥਿਤੀ ਦਾ ਜਾਇਜ਼ਾ ਲਿਆ। ਟੀਮ ਵਿੱਚ ਦਾਨ ਸਿੰਘ ਓਸਾਹਨ, ਐਡਵੋਕੇਟ ਯੋਗੇਸ਼ ਖੰਨਾ, ਜਸਬੀਰ ਸਿੰਘ ਤੇ ਕਰਨਲ ਸੀਐੱਮ ਲਖਨਪਾਲ ਸ਼ਾਮਲ ਸਨ।

ਪੀਏਸੀ ਨੇ ਕਿਹਾ ਕਿ ਦੌਰੇ ਦੌਰਾਨ ਇੱਕ ਪਾਸੇ ਸਲੇਮਪੁਰ-ਮੱਤੇਵਾੜਾ ਖੇਤਰ ਵਿੱਚ ਵਾਤਾਵਰਨ ਬਹਾਲੀ ਦੇ ਕੰਮਾਂ ਦੀ ਉਮੀਦਜਨਕ ਤਸਵੀਰ ਸਾਹਮਣੇ ਆਈ, ਜਦਕਿ ਦੂਜੇ ਪਾਸੇ ਬੁੱਢਾ ਦਰਿਆ ਵਿੱਚ ਪ੍ਰਦੂਸ਼ਣ, ਰਹਿੰਦ-ਖੂੰਹਦ ਦੇ ਗਲਤ ਪ੍ਰਬੰਧਨ, ਕਬਜ਼ਿਆਂ ਅਤੇ ਬੁਨਿਆਦੀ ਢਾਂਚੇ ਦੀਆਂ ਖਾਮੀਆਂ ਦੀ ਗੰਭੀਰ ਸਥਿਤੀ ਵੇਖਣ ਨੂੰ ਮਿਲੀ।

ਪੀਏਸੀ ਟੀਮ ਨੇ ਸਲੇਮਪੁਰ ਜੰਗਲ ਖੇਤਰ ਦੇ ਵਿਸਥਾਰ ਦਾ ਨਿਰੀਖਣ ਕੀਤਾ। ਕਮੇਟੀ ਮੁਤਾਬਕ ਇਹ ਖੇਤਰ ਅੱਗੇ ਚੱਲ ਕੇ ਮੱਤੇਵਾੜਾ ਜੰਗਲ ਸਮੂਹ ਨਾਲ ਜੁੜ ਕੇ ਸਤਲੁਜ ਦੇ ਹੜ੍ਹ-ਮੈਦਾਨ ਵਿੱਚ ਇੱਕ ਲਗਾਤਾਰ ਗ੍ਰੀਨ ਕੋਰੀਡੋਰ ਵਿਕਸਤ ਕਰਨ ਵਿੱਚ ਸਹਾਇਕ ਹੋ ਸਕਦਾ ਹੈ। ਇਸ ਨਾਲ ਜੈਵ-ਵਿਭਿੰਨਤਾ, ਧਰਤੀ ਹੇਠਲੇ ਪਾਣੀ ਦੀ ਰੀਚਾਰਜ, ਹੜ੍ਹਾਂ ਤੇ ਅਤਿ ਗਰਮੀ ਨਾਲ ਨਜਿੱਠਣ ਦੀ ਸਮਰੱਥਾ ਨੂੰ ਮਜ਼ਬੂਤੀ ਮਿਲ ਸਕਦੀ ਹੈ। ਟੀਮ ਨੇ ਦੱਸਿਆ ਕਿ ਹਾਲ ਹੀ ਵਿੱਚ ਲਗਾਏ ਗਏ ਦੇਸੀ ਬੂਟੇ ਸਿਹਤਮੰਦ ਸਨ ਅਤੇ ਉਨ੍ਹਾਂ ਦੀ ਸੰਭਾਲ ਵੀ ਠੀਕ ਢੰਗ ਨਾਲ ਕੀਤੀ ਜਾ ਰਹੀ ਸੀ। ਰੇਂਜ ਅਫਸਰ ਮੋਹਨ ਸਿੰਘ ਦੀ ਅਗਵਾਈ ਹੇਠ ਟੀਮ ਮੱਤੇਵਾੜਾ ਜੰਗਲਜ਼ ਵੱਲੋਂ ਕੀਤੇ ਜਾ ਰਹੇ ਕੰਮ ਦਾ ਬੂਟਿਆਂ ਦੀ ਸੰਭਾਲ ਅਤੇ ਬਚਾਅ ਵਿੱਚ ਅਸਰ ਦਿਖਾਈ ਦਿੱਤਾ। ਪੀਏਸੀ ਨੇ ਟੀਮ ਸੀਚੇਵਾਲ ਵੱਲੋਂ ਬਿਜਲੀ ਟਰਾਂਸਫਾਰਮਰ ਲਗਵਾਉਣ ਅਤੇ ਟਿਊਬਵੈੱਲ ਚਲਾਉਣ ਲਈ ਕੀਤੇ ਸਹਿਯੋਗ ਦੀ ਵੀ ਸ਼ਲਾਘਾ ਕੀਤੀ।

-ਬਾਕਸ-

ਜਨਤਾ ਘਾਟ ’ਤੇ ਮੁੜ ਲਾਇਆ ਪਿੱਪਲ ਸੰਭਲ ਰਿਹਾ

ਟੀਮ ਨੇ ਜਨਤਾ ਘਾਟ ਦਾ ਵੀ ਦੌਰਾ ਕੀਤਾ, ਜਿੱਥੇ ਟੀਮ ਸੀਚੇਵਾਲ ਵੱਲੋਂ ਸਥਾਪਤ ਕੀਤੇ ਸਥਾਨ ’ਤੇ ਪੁੱਟ ਕੇ ਮੁੜ ਲਗਾਏ ਗਏ ਪਿੱਪਲ ਦੇ ਦਰੱਖਤ ਦੀ ਸਥਿਤੀ ਦਾ ਜਾਇਜ਼ਾ ਲਿਆ ਗਿਆ। ਪੀਏਸੀ ਮੁਤਾਬਕ ਦਰੱਖਤ ਟਰਾਂਸਪਲਾਂਟੇਸ਼ਨ ਦੇ ਝਟਕੇ ਤੋਂ ਉਭਰ ਰਿਹਾ ਹੈ ਅਤੇ ਇਸ ਦੀ ਸੰਭਾਲ ਕੀਤੀ ਜਾ ਰਹੀ ਹੈ।

ਤਾਜਪੁਰ ਟ੍ਰਾਈਜੰਕਸ਼ਨ ’ਤੇ ਕਾਲੇ-ਸਲੇਟੀ ਪਾਣੀ ਤੇ ਝੱਗ

ਪੀਏਸੀ ਟੀਮ ਨੇ ਬੁੱਢਾ ਦਰਿਆ ਪੁਲ ਨੇੜੇ ਤਾਜਪੁਰ ਟ੍ਰਾਈਜੰਕਸ਼ਨ ਦਾ ਨਿਰੀਖਣ ਕੀਤਾ, ਜਿੱਥੇ 40 ਐੱਮਐੱਲਡੀ ਤੇ 50 ਐੱਮਐੱਲਡੀ ਸੀਈਟੀਪੀ ਅਤੇ 225 ਐੱਮਐੱਲਡੀ ਐੱਸਟੀਪੀ ਨਾਲ ਸਬੰਧਤ ਡਿਸਚਾਰਜ ਮਿਲਦੇ ਹਨ। ਟੀਮ ਨੇ ਦਾਅਵਾ ਕੀਤਾ ਕਿ ਇੱਥੇ ਕਾਲੇ, ਸਲੇਟੀ ਅਤੇ ਭੂਰੇ ਰੰਗ ਦੇ ਪਾਣੀ ਦੇ ਨਾਲ ਬਦਬੂ ਅਤੇ ਝੱਗ ਵੀ ਨਜ਼ਰ ਆਈ। ਪੀਏਸੀ ਨੇ ਇਨ੍ਹਾਂ ਥਾਵਾਂ ਤੋਂ ਵਿਗਿਆਨਕ ਢੰਗ ਨਾਲ ਪਾਣੀ ਦੇ ਨਮੂਨੇ ਲੈ ਕੇ ਜਾਂਚ ਕਰਵਾਉਣ, ਟਰੀਟਮੈਂਟ ਪਲਾਂਟਾਂ ਦੀ ਕਾਰਗੁਜ਼ਾਰੀ ਜਨਤਕ ਕਰਨ ਅਤੇ ਨਿਰਧਾਰਤ ਮਾਪਦੰਡਾਂ ਦੀ ਸੁਤੰਤਰ ਤਸਦੀਕ ਕਰਵਾਉਣ ਦੀ ਮੰਗ ਕੀਤੀ। ਕਮੇਟੀ ਮੁਤਾਬਕ ਇੱਕੋ ਸਥਾਨ ’ਤੇ ਸੀਵਰੇਜ ਅਤੇ ਉਦਯੋਗਿਕ ਪਾਣੀ ਦੇ ਡਿਸਚਾਰਜ ਨਾਲ ਕੁੱਲ ਪ੍ਰਦੂਸ਼ਣ ਲੋਡ ਅਤੇ ਟਰੀਟਮੈਂਟ ਪ੍ਰਬੰਧਾਂ ਦੀ ਕਾਰਗੁਜ਼ਾਰੀ ਬਾਰੇ ਸਵਾਲ ਖੜ੍ਹੇ ਹੁੰਦੇ ਹਨ।

ਤਾਜਪੁਰ ਡੇਅਰੀ ਕੰਪਲੈਕਸ ’ਚ ਕੂੜਾ ਤੇ ਸਲੱਜ ਦੀ ਸਮੱਸਿਆ

ਤਾਜਪੁਰ ਡੇਅਰੀ ਕੰਪਲੈਕਸ ਵਿੱਚ ਪੀਏਸੀ ਨੇ ਡੇਅਰੀ ਵੇਸਟ ਤੇ ਸਲੱਜ ਦੀ ਇਕੱਠੀ ਕਰਨ, ਢੋਆ-ਢੁਆਈ ਅਤੇ ਟਰੀਟਮੈਂਟ ਪ੍ਰਣਾਲੀ ਨਾਲ ਸਬੰਧਤ ਖਾਮੀਆਂ ਦਾ ਜ਼ਿਕਰ ਕੀਤਾ। ਕਮੇਟੀ ਮੁਤਾਬਕ ਕਈ ਥਾਵਾਂ ’ਤੇ ਡੇਅਰੀ ਰਹਿੰਦ-ਖੂੰਹਦ ਬੁੱਧ ਦਰਿਆ ਵੱਲ ਜਾਂਦੀ ਦਿਖਾਈ ਦਿੱਤੀ, ਜਦਕਿ ਇਲਾਕੇ ਵਿੱਚ ਗਾਰਾ, ਸਲੱਜ ਤੇ ਠੋਸ ਕੂੜਾ ਵੀ ਮੌਜੂਦ ਸੀ। ਪੀਏਸੀ ਨੇ ਡੇਅਰੀ ਈਟੀਪੀ ਦੀ ਕਾਰਗੁਜ਼ਾਰੀ, ਸਟਾਰਮ ਵਾਟਰ ਪਾਈਪਾਂ ਵਿੱਚ ਸ਼ੱਕੀ ਸੀਵਰੇਜ ਜਾਂ ਹੋਰ ਪ੍ਰਦੂਸ਼ਿਤ ਪਾਣੀ ਦੇ ਵਹਾਅ ਅਤੇ ਸਮੁੱਚੀ ਵੇਸਟ ਮੈਨੇਜਮੈਂਟ ਪ੍ਰਣਾਲੀ ’ਤੇ ਵੀ ਸਵਾਲ ਉਠਾਏ। ਕਮੇਟੀ ਨੇ ਕਿਹਾ ਕਿ ਸ਼ੱਕੀ ਡਿਸਚਾਰਜ ਪੁਆਇੰਟਾਂ ਦੀ ਮੈਪਿੰਗ ਕਰਕੇ ਉਨ੍ਹਾਂ ਦੇ ਨਮੂਨੇ ਲਏ ਜਾਣ ਅਤੇ ਗੈਰਕਾਨੂੰਨੀ ਆਊਟਲੈੱਟਾਂ ਨੂੰ ਬੰਦ ਕੀਤਾ ਜਾਵੇ।

ਗਊਘਾਟ ਆਈਪੀਐੱਸ ਨੇੜੇ ਵੀ ਕਥਿਤ ਕੱਚਾ ਸੀਵਰੇਜ

ਲੁਧਿਆਣਾ ਕੇਂਦਰੀ ਵਿਧਾਨ ਸਭਾ ਹਲਕੇ ਦੇ ਨਾਲ ਲੱਗਦੇ ਗਊਘਾਟ ਆਈਪੀਐੱਸ ਨੇੜੇ ਵੀ ਬੁੱਢਾ ਦਰਿਆ ਵਿੱਚ ਕਥਿਤ ਤੌਰ ’ਤੇ ਕੱਚਾ ਸੀਵਰੇਜ ਤੇ ਰਸਾਇਣਕ ਤੌਰ ’ਤੇ ਪ੍ਰਦੂਸ਼ਿਤ ਪਾਣੀ ਜਾਣ ਦੀ ਗੱਲ ਪੀਏਸੀ ਨੇ ਕਹੀ। ਕਮੇਟੀ ਮੁਤਾਬਕ ਦਰਿਆ ਦੇ ਕੰਢਿਆਂ ’ਤੇ ਕੂੜਾ ਤੇ ਪ੍ਰਦੂਸ਼ਣ ਦੀ ਸਥਿਤੀ ਦਿਖਾਈ ਦਿੱਤੀ। ਪੀਏਸੀ ਨੇ ਕਿਹਾ ਕਿ ਸਿਰਫ਼ ਐੱਸਟੀਪੀ ਬਣਾਉਣ ਨਾਲ ਬੁੱਢਾ ਦਰਿਆ ਦੀ ਬਹਾਲੀ ਸੰਭਵ ਨਹੀਂ ਹੋਵੇਗੀ। ਗੈਰਕਾਨੂੰਨੀ ਸੀਵਰੇਜ ਕੁਨੈਕਸ਼ਨ, ਉਦਯੋਗਿਕ ਪਾਣੀ ਨੂੰ ਸੀਵਰੇਜ ਵਿੱਚ ਪਾਉਣ ਤੇ ਸਿੱਧੇ ਡਿਸਚਾਰਜ ਪੁਆਇੰਟਾਂ ਨੂੰ ਰੋਕਣਾ ਵੀ ਜ਼ਰੂਰੀ ਹੈ।

ਬਹਾਦੁਰਕੇ ਸੀਈਟੀਪੀ ਕੋਲ ਬਦਬੂ ਤੇ ਝੱਗ, ਪੁਲਾਂ ਦਾ ਜਾਲ ਬਣਿਆ ਚੋਕ ਪੁਆਇੰਟ

ਟੀਮ ਨੇ ਲੁਧਿਆਣਾ ਉੱਤਰੀ ਹਲਕੇ ਵਿੱਚ ਪੁਰਾਣੀ ਜੀਟੀ ਰੋਡ ਨੇੜੇ ਬਹਾਦੁਰਕੇ ਡਾਈਂਗ ਸੀਈਟੀਪੀ ਦੇ ਆਊਟਫਾਲ ਦਾ ਵੀ ਨਿਰੀਖਣ ਕੀਤਾ। ਪੀਏਸੀ ਮੁਤਾਬਕ ਇੱਥੇ ਤੇਜ਼ ਬਦਬੂ ਤੇ ਵੱਡੀ ਮਾਤਰਾ ਵਿੱਚ ਝੱਗ ਦਿਖਾਈ ਦਿੱਤੀ। ਆਊਟਫਾਲ ਨੇੜੇ ਬਣੇ ਨਵੇਂ ਪੁਲ ਕਾਰਨ ਡਿਸਚਾਰਜ ਪੁਆਇੰਟ ਦਾ ਸਿੱਧਾ ਨਿਰੀਖਣ ਵੀ ਮੁਸ਼ਕਲ ਹੋ ਗਿਆ ਹੈ। ਕਮੇਟੀ ਨੇ ਦੱਸਿਆ ਕਿ ਲਗਭਗ 100 ਮੀਟਰ ਦੇ ਖੇਤਰ ਵਿੱਚ ਚਾਰ ਪੁਲ ਤੇ ਹੋਰ ਢਾਂਚੇ ਮੌਜੂਦ ਹਨ। ਪੁਲਾਂ ਦੇ ਆਲੇ-ਦੁਆਲੇ ਕੂੜਾ, ਦਰਿਆ ਦੇ ਵਹਾਅ ਵਾਲੀ ਥਾਂ ਦੀ ਘੱਟਦੀ ਚੌੜਾਈ, ਦੋਵੇਂ ਕੰਢਿਆਂ ’ਤੇ ਕਬਜ਼ੇ ਅਤੇ ਦੱਖਣੀ ਕੰਢੇ ’ਤੇ ਤੰਗ ਜ਼ਿਗਜ਼ੈਗ ਸੜਕ ਕਾਰਨ ਪਾਣੀ ਦੇ ਕੁਦਰਤੀ ਵਹਾਅ ’ਤੇ ਅਸਰ ਪੈਣ ਦੀ ਸੰਭਾਵਨਾ ਪ੍ਰਗਟਾਈ ਗਈ। ਪੀਏਸੀ ਨੇ ਇਸ ਖੇਤਰ ਦਾ ਹਾਈਡ੍ਰੌਲਿਕ ਤੇ ਸਟਰਕਚਰਲ ਮੁਲਾਂਕਣ ਕਰਵਾਉਣ ਦੀ ਮੰਗ ਕੀਤੀ ਹੈ।

ਕੁੰਦਨਪੁਰੀ ਆਈਪੀਐੱਸ ’ਚ ਨੀਲੇ ਰੰਗ ਦਾ ਪਾਣੀ

ਕੁੰਦਨਪੁਰੀ ਦੇ 12.50 ਐੱਮਐੱਲਡੀ ਆਈਪੀਐੱਸ ਵਿੱਚ ਪੀਏਸੀ ਟੀਮ ਨੇ ਨੀਲੇ ਰੰਗ ਦਾ ਪਾਣੀ ਪੁਰਾਣੇ 5 ਐੱਮਐੱਲਡੀ ਵੈੱਲ ਵਿੱਚ ਜਾਂਦਾ ਦੇਖਣ ਦਾ ਦਾਅਵਾ ਕੀਤਾ। ਇਸ ਤੋਂ ਬਾਅਦ ਇਹ ਪਾਣੀ ਬੱਲੋਕੇ ਐੱਸਟੀਪੀ ਨਾਲ ਜੁੜੇ ਪੰਪਿੰਗ ਸਿਸਟਮ ਵੱਲ ਜਾਂਦਾ ਹੈ। ਟੀਮ ਨੇ ਉਪਕਾਰ ਨਗਰ ਦੇ 29.25 ਐੱਮਐੱਲਡੀ ਆਈਪੀਐੱਸ ਅਤੇ ਮਹਾਵੀਰ ਆਈਪੀਐੱਸ 96.75 ਐੱਮਐੱਲਡੀ ਦਾ ਵੀ ਨਿਰੀਖਣ ਕੀਤਾ। ਛੋਟੀ ਹੈਬੋਵਾਲ ਪੁਲ ਨੇੜੇ ਮਹਾਵੀਰ ਆਈਪੀਐੱਸ ਕੋਲ ਹੈਬੋਵਾਲ ਵਾਲੇ ਪਾਸੇ ਤੋਂ ਕਥਿਤ ਗੈਰਅਧਿਕਾਰਤ ਆਊਟਲੈੱਟ ਰਾਹੀਂ ਕੱਚਾ ਸੀਵਰੇਜ ਆਉਣ ਦੀ ਗੱਲ ਵੀ ਪੀਏਸੀ ਨੇ ਕਹੀ।

ਜ਼ਿੰਮੇਵਾਰੀ ਤੈਅ ਕਰਨ ਲਈ ਕਾਨੂੰਨੀ ਅਧਿਕਾਰਾਂ ਦੇ ਆਧਾਰ ’ਤੇ ਮੁਲਾਂਕਣ ਦੀ ਮੰਗ

ਬੁੱਢਾ ਦਰਿਆ ਦੀ ਮਾੜੀ ਹਾਲਤ ਲਈ ਸੰਤ ਬਲਬੀਰ ਸਿੰਘ ਸੀਚੇਵਾਲ ਅਤੇ ਟੀਮ ਸੀਚੇਵਾਲ ਦੀ ਕੀਤੀ ਜਾ ਰਹੀ ਆਲੋਚਨਾ ਬਾਰੇ ਪੀਏਸੀ ਨੇ ਕਿਹਾ ਕਿ ਸਵੈ-ਸੇਵੀ ਟੀਮ ਦੀ ਭੂਮਿਕਾ ਅਤੇ ਸਰਕਾਰੀ ਅਦਾਰਿਆਂ ਦੀ ਕਾਨੂੰਨੀ ਜ਼ਿੰਮੇਵਾਰੀ ਨੂੰ ਵੱਖ-ਵੱਖ ਦੇਖਿਆ ਜਾਣਾ ਚਾਹੀਦਾ ਹੈ।

ਕਮੇਟੀ ਮੁਤਾਬਕ ਟੀਮ ਸੀਚੇਵਾਲ ਨੇ ਸਫਾਈ, ਪੌਦੇ ਲਗਾਉਣ, ਮਸ਼ੀਨਰੀ, ਮਨੁੱਖੀ ਸਰੋਤ ਅਤੇ ਲੋਕਾਂ ਨੂੰ ਜੋੜਨ ਸਬੰਧੀ ਕੰਮ ਕੀਤੇ ਹਨ, ਪਰ ਕਿਸੇ ਸਵੈ-ਸੇਵੀ ਟੀਮ ਕੋਲ ਪ੍ਰਦੂਸ਼ਣ ਫੈਲਾਉਣ ਵਾਲਿਆਂ ’ਤੇ ਮੁਕੱਦਮੇ ਦਰਜ ਕਰਨ, ਗੈਰਕਾਨੂੰਨੀ ਆਊਟਲੈੱਟ ਸੀਲ ਕਰਨ, ਸੀਈਟੀਪੀ-ਐੱਸਟੀਪੀ-ਈਟੀਪੀ ਚਲਾਉਣ, ਕਬਜ਼ੇ ਹਟਾਉਣ ਜਾਂ ਵਾਤਾਵਰਨੀ ਸ਼ਰਤਾਂ ਲਾਗੂ ਕਰਵਾਉਣ ਦੇ ਕਾਨੂੰਨੀ ਅਧਿਕਾਰ ਨਹੀਂ ਹੁੰਦੇ। ਪੀਏਸੀ ਨੇ ਕਿਹਾ ਕਿ ਜ਼ਿੰਮੇਵਾਰੀ ਦਾ ਮੁਲਾਂਕਣ ਸਬੰਧਤ ਸਰਕਾਰੀ ਏਜੰਸੀਆਂ, ਚੁਣੇ ਨੁਮਾਇੰਦਿਆਂ, ਪਲਾਂਟ ਆਪਰੇਟਰਾਂ ਅਤੇ ਪ੍ਰਦੂਸ਼ਣ ਫੈਲਾਉਣ ਵਾਲੀਆਂ ਇਕਾਈਆਂ ਦੀ ਕਾਨੂੰਨੀ ਭੂਮਿਕਾ ਅਤੇ ਕਾਰਗੁਜ਼ਾਰੀ ਦੇ ਆਧਾਰ ’ਤੇ ਹੋਣਾ ਚਾਹੀਦਾ ਹੈ।

‘ਪ੍ਰਦੂਸ਼ਣ ਰੋਕੋ, ਸਰੋਤ ’ਤੇ ਟਰੀਟ ਕਰੋ ਤੇ ਪਾਣੀ ਮੁੜ ਵਰਤੋ’

ਪੀਏਸੀ ਨੇ ਬੁੱਢਾ ਦਰਿਆ, ਮੱਤੇਵਾੜਾ, ਸਲੇਮਪੁਰ ਅਤੇ ਸਤਲੁਜ ਵਿਚਕਾਰਲੇ ਖੇਤਰ ਨੂੰ ਭਵਿੱਖ ਵਿੱਚ ਜੁੜੇ ਹੋਏ ਜੰਗਲਾਂ, ਸਾਫ਼ ਪਾਣੀ ਦੇ ਰਸਤੇ, ਟਰੀਟ ਕੀਤੇ ਪਾਣੀ ਦੀ ਮੁੜ ਵਰਤੋਂ, ਵਿਕੇਂਦਰੀਕ੍ਰਿਤ ਕੂੜਾ ਪ੍ਰਬੰਧਨ, ਡੇਅਰੀ ਤੇ ਜੈਵਿਕ ਰਹਿੰਦ-ਖੂੰਹਦ ਤੋਂ ਸਰੋਤ ਪ੍ਰਾਪਤੀ, ਸਾਈਕਲਿੰਗ ਤੇ ਪੈਦਲ ਮਾਰਗਾਂ ਅਤੇ ਲੋਕਾਂ ਦੀ ਭਾਗੀਦਾਰੀ ਵਾਲੇ ਵਾਤਾਵਰਨੀ ਖੇਤਰ ਵਜੋਂ ਵਿਕਸਤ ਕਰਨ ਦੀ ਲੋੜ ਦੱਸੀ। ਕਮੇਟੀ ਨੇ ਇਸ ਲਈ ‘ਪ੍ਰਦੂਸ਼ਣ ਰੋਕੋ, ਸਰੋਤ ’ਤੇ ਟਰੀਟ ਕਰੋ, ਸਰੋਤਾਂ ਦੀ ਮੁੜ ਪ੍ਰਾਪਤੀ ਕਰੋ, ਪਾਣੀ ਮੁੜ ਵਰਤੋ, ਵਾਤਾਵਰਨ ਬਹਾਲ ਕਰੋ ਅਤੇ ਭਾਈਚਾਰੇ ਨੂੰ ਜੋੜੋ’ ਦਾ ਸਿਧਾਂਤ ਅਪਣਾਉਣ ਦੀ ਗੱਲ ਕਹੀ।

ਪੀਏਸੀ ਨੇ ਲੋਕਾਂ ਨੂੰ ਮੌਕੇ ’ਤੇ ਪਹੁੰਚ ਕੇ ਹਾਲਾਤ ਸਮਝਣ ਦੀ ਅਪੀਲ ਕੀਤੀ

ਪੀਏਸੀ ਨੇ ਵਿਦਿਆਰਥੀਆਂ, ਅਧਿਆਪਕਾਂ, ਡਾਕਟਰਾਂ, ਇੰਜੀਨੀਅਰਾਂ, ਉਦਯੋਗਪਤੀਆਂ, ਕਿਸਾਨਾਂ, ਰੈਜ਼ੀਡੈਂਟ ਵੈਲਫੇਅਰ ਐਸੋਸੀਏਸ਼ਨਾਂ, ਵਾਤਾਵਰਨ ਜਥੇਬੰਦੀਆਂ, ਚੁਣੇ ਨੁਮਾਇੰਦਿਆਂ ਤੇ ਹੋਰਨਾਂ ਨੂੰ ਸੁਰੱਖਿਅਤ ਅਤੇ ਸੁਚੱਜੇ ਢੰਗ ਨਾਲ ਇਨ੍ਹਾਂ ਖੇਤਰਾਂ ਦਾ ਦੌਰਾ ਕਰਨ ਦੀ ਅਪੀਲ ਕੀਤੀ ਹੈ। ਕਮੇਟੀ ਨੇ ਕਿਹਾ ਕਿ ਲੋਕ ਸਲੇਮਪੁਰ ਵਿੱਚ ਹੋ ਰਹੇ ਪੌਦਿਆਂ ਦੇ ਵਿਕਾਸ ਅਤੇ ਦੂਜੇ ਪਾਸੇ ਬੁੱਧ ਦਰਿਆ ਵਿੱਚ ਮੌਜੂਦ ਪ੍ਰਦੂਸ਼ਣਦੋਵੇਂ ਪੱਖਾਂ ਨੂੰ ਮੌਕੇ ’ਤੇ ਦੇਖਣ। ਵਿਦਿਅਕ ਸੰਸਥਾਵਾਂ ਬੂਟਿਆਂ ਵਾਲੇ ਖੇਤਰ ਅਪਣਾ ਕੇ ਜੈਵ-ਵਿਭਿੰਨਤਾ ਅਧਿਐਨ, ਪਾਣੀ ਦੀ ਗੁਣਵੱਤਾ ਦੀ ਦਸਤਾਵੇਜ਼ੀਕਰਨ ਅਤੇ ਵਾਤਾਵਰਨੀ ਦੌਰੇ ਕਰਵਾ ਸਕਦੀਆਂ ਹਨ।

-ਬਾਕਸ-

ਪੀਏਸੀ ਦੀਆਂ ਰੱਖੀਆਂ 10 ਮੰਗਾਂ

ਪੀਏਸੀ ਨੇ ਨਗਰ ਨਿਗਮ, ਪੰਜਾਬ ਪ੍ਰਦੂਸ਼ਣ ਰੋਕਥਾਮ ਬੋਰਡ ਅਤੇ ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਸਾਰੇ ਪਛਾਣੇ ਪ੍ਰਦੂਸ਼ਣ ਪੁਆਇੰਟਾਂ ਦੀ ਸਾਂਝੀ ਜਾਂਚ, ਸੀਈਟੀਪੀ, ਐੱਸਟੀਪੀ, ਈਟੀਪੀ ਅਤੇ ਆਈਪੀਐੱਸ ਦੇ ਇਨਲੈੱਟ-ਆਊਟਲੈੱਟ ਦੀ ਸੁਤੰਤਰ ਸੈਂਪਲਿੰਗ, ਪਲਾਂਟ-ਵਾਰ ਕਾਰਗੁਜ਼ਾਰੀ ਅਤੇ ਆਨਲਾਈਨ ਮਾਨੀਟਰਿੰਗ ਡਾਟਾ ਜਨਤਕ ਕਰਨ ਦੀ ਮੰਗ ਕੀਤੀ ਹੈ। ਇਸ ਤੋਂ ਇਲਾਵਾ ਗੈਰਕਾਨੂੰਨੀ ਉਦਯੋਗਿਕ, ਸੀਵਰੇਜ ਤੇ ਡੇਅਰੀ ਵੇਸਟ ਆਊਟਲੈੱਟਾਂ ਦੀ ਮੈਪਿੰਗ ਤੇ ਸੀਲਿੰਗ, ਤਾਜਪੁਰ ਲਈ ਸਲੱਜ ਅਤੇ ਡੇਅਰੀ ਵੇਸਟ ਦੇ ਇਕੱਠੇ ਕਰਨ-ਢੋਆਈ-ਨਿਪਟਾਰੇ ਦੀ ਪੂਰੀ ਯੋਜਨਾ, ਪੁਰਾਣੀ ਜੀਟੀ ਰੋਡ ਨੇੜੇ ਪੁਲਾਂ ਦੇ ਸਮੂਹ ਅਤੇ ਕਬਜ਼ਿਆਂ ਦਾ ਹਾਈਡ੍ਰੌਲਿਕ ਮੁਲਾਂਕਣ, ਬੁੱਧ ਦਰਿਆ ਦੀ ਪੂਰੀ ਵਹਾਅ ਸਮਰੱਥਾ ਬਹਾਲ ਕਰਨ, ਸਲੇਮਪੁਰ-ਮੱਤੇਵਾੜਾ ਗ੍ਰੀਨ ਕੋਰੀਡੋਰ ਦੀ ਸੁਰੱਖਿਆ ਤੇ ਵਿਸਥਾਰ ਅਤੇ ਬਹੁ-ਪੱਖੀ ਲੋਕ ਨਿਗਰਾਨੀ ਪਲੇਟਫਾਰਮ ਬਣਾਉਣ ਦੀ ਮੰਗ ਕੀਤੀ ਗਈ ਹੈ। ਪੀਏਸੀ ਨੇ ਸਬੰਧਤ ਵਿਧਾਇਕਾਂ, ਕੌਂਸਲਰਾਂ ਅਤੇ ਸਰਕਾਰੀ ਏਜੰਸੀਆਂ ਤੋਂ ਹਲਕਾ-ਵਾਰ ਸਮਾਂਬੱਧ ਕਾਰਵਾਈ ਯੋਜਨਾ ਜਾਰੀ ਕਰਨ ਦੀ ਮੰਗ ਕਰਦਿਆਂ ਕਿਹਾ ਕਿ ਬੁੱਢਾ ਦਰਿਆ ਦੀ ਬਹਾਲੀ ਸਿਰਫ਼ ਸਫਾਈ ਮੁਹਿੰਮਾਂ ਜਾਂ ਰਸਮੀ ਗਤੀਵਿਧੀਆਂ ਨਾਲ ਸੰਭਵ ਨਹੀਂ। ਇਸ ਲਈ ਲਗਾਤਾਰ ਲਾਗੂਕਰਨ, ਪਾਰਦਰਸ਼ੀ ਪ੍ਰਬੰਧਨ, ਪ੍ਰਭਾਵਸ਼ਾਲੀ ਟਰੀਟਮੈਂਟ ਪ੍ਰਣਾਲੀ ਅਤੇ ਲੋਕਾਂ ਦੀ ਜਾਣਕਾਰੀਪੂਰਨ ਭਾਗੀਦਾਰੀ ਜ਼ਰੂਰੀ ਹੈ।