‘ਵਾਈਲਡਲਾਈਫ ਵੀਕ 2026' ਤਹਿਤ ਕਰਵਾਈ ਵਿੱਦਿਅਕ ਸਰਗਰਮੀ

ਸੁਖਦੇਵ ਸਿੰਘ, ਪੰਜਾਬੀ ਜਾਗਰਣ, ਲੁਧਿਆਣਾ

ਖਾਲਸਾ ਕਾਲਜ ਫਾਰ ਵੂਮੈਨ ਦੇ ਜੀਵ-ਵਿਗਿਆਨ ਵਿਭਾਗ ਨੇ ਜੰਗਲੀ ਜੀਵ ਸੰਭਾਲ, ਜੈਵ-ਵਿਭਿੰਨਤਾ ਅਤੇ ਕੁਦਰਤ ਨਾਲ ਟਿਕਾਊ ਸਹਿ-ਹੋਂਦ ਬਾਰੇ ਜਾਗਰੂਕਤਾ ਪੈਦਾ ਕਰਨ ਲਈ ਲੁਧਿਆਣਾ ਚਿੜੀਆਘਰ ਤੇ ਛੱਤਬੀੜ ਚਿੜੀਆਘਰ ਦੇ ਸਹਿਯੋਗ ਨਾਲ ‘ਵਾਈਲਡਲਾਈਫ ਵੀਕ 2026' ਤਹਿਤ ਵਿਦਿਅਕ ਗਤੀਵਿਧੀਆਂ ਦੀ ਇੱਕ ਲੜੀ ਦਾ ਪ੍ਰਬੰਧ ਕੀਤਾ। ਬੀਐੱਸਸੀ ਮੈਡੀਕਲ ਦੀਆਂ ਵਿਦਿਆਰਥਣਾਂ ਲਈ ਲੁਧਿਆਣਾ ਚਿੜੀਆਘਰ ਵਿਖੇ ਇਕ ਵਿੱਦਿਅਕ 'ਨੇਚਰ ਵਾਕ' ਕਰਵਾਈ ਗਈ। ਵਿਦਿਆਰਥਣਾਂ ਨੇ ਜੰਗਲੀ ਜੀਵਾਂ ਤੇ ਕੁਦਰਤੀ ਵਾਤਾਵਰਣ ਦਾ ਨਿਰੀਖਣ ਕੀਤਾ ਤੇ ਜਾਨਵਰਾਂ ਦੇ ਵਿਵਹਾਰ, ਜੰਗਲੀ ਜੀਵ ਪ੍ਰਬੰਧਨ, ਸੰਭਾਲ ਦੇ ਤਰੀਕਿਆਂ ਤੇ ਕੁਦਰਤੀ ਰਿਹਾਇਸ਼ੀ ਸਥਾਨਾਂ ਦੀ ਸੁਰੱਖਿਆ ਦੇ ਮਹੱਤਵ ਬਾਰੇ ਕੀਮਤੀ ਜਾਣਕਾਰੀ ਹਾਸਲ ਕੀਤੀ। ਇਸੇ ਮੌਕੇ ਵਿਭਾਗ ਨੇ ਛੱਤਬੀੜ ਚਿੜੀਆਘਰ ਦੇ ਸਹਿਯੋਗ ਨਾਲ ਵਾਈਲਡਲਾਈਫ ਮਾਹਰ ਡਾ. ਸਿਧਾਰਥ ਸ਼ਰਮਾ ਦੁਆਰਾ ਇਕ ਆਨਲਾਈਨ ਵਿਸਤਾਰ ਲੈਕਚਰ ਵੀ ਕਰਵਾਇਆ। ਸੈਸ਼ਨ ਨੇ ਵਿਦਿਆਰਥਣਾਂ ਨੂੰ ਜੰਗਲੀ ਜੀਵ ਪ੍ਰਬੰਧਨ ਤੇ ਸੰਭਾਲ ਬਾਰੇ ਮਾਹਰਾਂ ਦੀ ਰਾਏ ਜਾਣਨ ਦਾ ਮੌਕਾ ਦਿੱਤਾ ਤੇ ਵਾਤਾਵਰਣ ਪ੍ਰਤੀ ਵਧੇਰੇ ਜ਼ਿੰਮੇਵਾਰੀ ਦੀ ਭਾਵਨਾ ਨੂੰ ਉਤਸ਼ਾਹਿਤ ਕੀਤਾ। ਖਾਲਸਾ ਕਾਲਜ ਫਾਰ ਵੂਮੈਨ ਦੀ ਪ੍ਰਿੰਸੀਪਲ ਡਾ. ਕਮਲਜੀਤ ਗਰੇਵਾਲ ਅਤੇ ਡਾਇਰੈਕਟਰ ਡਾ. ਮੁਕਤੀ ਗਿੱਲ ਨੇ ਇਨ੍ਹਾਂ ਅਰਥਪੂਰਨ ਅਕਾਦਮਿਕ ਤੇ ਜਾਗਰੂਕਤਾ ਪਹਿਲਕਦਮੀਆਂ ਦੇ ਪ੍ਰਬੰਧ ਲਈ ਜੀਵ-ਵਿਗਿਆਨ ਵਿਭਾਗ ਦੀ ਸ਼ਲਾਘਾ ਕੀਤੀ।