ਜੈਵਿਕ ਸੁਰੱਖਿਆ ਸੰਵਾਦ ’ਚ ਸ਼ਾਮਲ ਹੋਏ ਵੈਟਰਨਰੀ ’ਵਰਸਿਟੀ ਦੇ ਵਿਗਿਆਨੀ

ਫੋਟੋ ਨੰਬਰ-9 * ਏਮਜ਼ ਨਵੀਂ ਦਿੱਲੀ ਵਿਖੇ ਕਰਵਾਇਆ ਗਿਆ ਚਾਰ-ਰੋਜ਼ਾ ਸਮਾਗਮ ਪਲਵਿੰਦਰ ਸਿੰਘ ਢੁੱਡੀਕੇ, ਪੰਜਾਬੀ ਜਾਗਰਣ ਲੁਧਿਆਣਾ : ਗੁਰੂ ਅੰਗਦ ਦੇਵ ਵੈਟਰਨਰੀ ਤੇ ਐਨੀਮਲ ਸਾਇੰਸਿਜ਼ ਯੂਨੀਵਰਸਿਟੀ ਦੇ ਸੈਂਟਰ ਫਾਰ ਵਨ ਹੈਲਥ ਦੇ ਨਿਰਦੇਸ਼ਕ ਡਾ. ਜਸਬੀਰ ਸਿੰਘ ਬੇਦੀ ਨੇ ਭਾਰਤ ’ਚ ਜੈਵਿਕ ਸੁਰੱਖਿਆ ਪ੍ਰਯੋਗਸ਼ਾਲਾਵਾਂ ਬਾਰੇ ਦੂਜੀ ਤਕਨੀਕੀ ਵਰਕਿੰਗ ਗਰੁੱਪ ਮੀਟਿੰਗ ’ਚ ਹਿੱਸਾ ਲਿਆ। ਇਹ ਚਾਰ-ਰੋਜ਼ਾ ਸਮਾਗਮ ਏਮਜ਼, ਨਵੀਂ ਦਿੱਲੀ ਵਿਖੇ ਕਰਵਾਇਆ ਗਿਆ ਸੀ। ਵਾਈਸ ਚਾਂਸਲਰ ਡਾ. ਜਤਿੰਦਰ ਪਾਲ ਸਿੰਘ ਗਿੱਲ ਨੇ ਇਸ ਵੱਕਾਰੀ ਮੀਟਿੰਗ ’ਚ ਯੂਨੀਵਰਸਿਟੀ ਦੀ ਨੁਮਾਇੰਦਗੀ ਕਰਨ ਲਈ ਸੈਂਟਰ ਫਾਰ ਵਨ ਹੈਲਥ ਦੇ ਵਿਗਿਆਨੀਆਂ ਨੂੰ ਵਧਾਈ ਦਿੱਤੀ। ਇਸ ਮੌਕੇ ਪ੍ਰਮੁੱਖ ਸੰਸਥਾਵਾਂ ਦੇ ਉੱਘੇ ਵਿਗਿਆਨੀ ਅਤੇ ਵਿਸ਼ਾ ਮਾਹਰ ਸ਼ਾਮਲ ਹੋਏ, ਜਿਨ੍ਹਾਂ ’ਚ ਇੰਡੀਅਨ ਕੌਂਸਲ ਆਫ਼ ਮੈਡੀਕਲ ਰਿਸਰਚ, ਨੈਸ਼ਨਲ ਇੰਸਟੀਚਿਊਟ ਆਫ਼ ਵਾਇਰੋਲੋਜੀ, ਨੈਸ਼ਨਲ ਸੈਂਟਰ ਫਾਰ ਡਿਜ਼ੀਜ਼ ਕੰਟਰੋਲ, ਡਿਫੈਂਸ ਰਿਸਰਚ ਐਂਡ ਡਿਵੈਲਪਮੈਂਟ ਆਰਗੇਨਾਈਜ਼ੇਸ਼ਨ/ਡਿਫੈਂਸ ਰਿਸਰਚ ਐਂਡ ਡਿਵੈਲਪਮੈਂਟ ਇਸਟੈਬਲਿਸ਼ਮੈਂਟ, ਏਮਜ਼ ਨਵੀਂ ਦਿੱਲੀ, ਬਾਇਓਟੈਕਨਾਲੋਜੀ ਵਿਭਾਗ, ਵਿਗਿਆਨ ਅਤੇ ਤਕਨਾਲੋਜੀ ਵਿਭਾਗ ਅਤੇ ਹੋਰ ਪ੍ਰਮੁੱਖ ਸੰਸਥਾਵਾਂ ਸ਼ਾਮਲ ਸਨ। ਡਾ. ਬੇਦੀ ਨੇ ਦੇਸ਼ ਭਰ ਦੇ 25 ਚੋਣਵੇਂ ਵਿਗਿਆਨੀਆਂ ਦੇ ਸਮੂਹ ਨੂੰ ਜ਼ੂਨੋਸਿਸ (ਜਾਨਵਰਾਂ ਤੋਂ ਮਨੁੱਖਾਂ ਵਿੱਚ ਫੈਲਣ ਵਾਲੀਆਂ ਬਿਮਾਰੀਆਂ) ਦੀ ਰੋਕਥਾਮ, ਨਿਗਰਾਨੀ ਅਤੇ ਜੋਖਮ ਘਟਾਉਣ ਲਈ ਭਾਈਚਾਰਾ-ਅਧਾਰਿਤ ਵਨ ਹੈਲਥ ਰਣਨੀਤੀਆਂ ਵਿਸ਼ੇ ਤੇ ਇੱਕ ਮਾਹਰ ਲੈਕਚਰ ਵੀ ਦਿੱਤਾ। ਡਾ. ਬੇਦੀ ਨੇ ਰਾਸ਼ਟਰੀ ਸਿਹਤ ਸੁਰੱਖਿਆ ਨੂੰ ਮਜ਼ਬੂਤ ਕਰਨ ਲਈ ਭਾਈਚਾਰਾ-ਕੇਂਦਰਿਤ ਨਿਗਰਾਨੀ, ਬਹੁ-ਖੇਤਰੀ ਤਾਲਮੇਲ, ਜ਼ੂਨੋਟਿਕ ਖਤਰਿਆਂ ਦੀ ਸ਼ੁਰੂਆਤੀ ਪਛਾਣ ਤੇ ਸਥਾਨਕ ਪੱਧਰ ਤੇ ਢੁੱਕਵੇਂ ਜੋਖਮ-ਘਟਾਉਣ ਦੇ ਉਪਾਵਾਂ ਦੀ ਮਹੱਤਤਾ ਤੇ ਜ਼ੋਰ ਦਿੱਤਾ। ਇਸੇ ਸੈਂਟਰ ਦੇ ਡਾ. ਪੰਕਜ ਢਾਕਾ ਨੂੰ ਤਕਨੀਕੀ ਕਾਰਜ ਸਮੂਹ ਲਈ ਵੀ ਨਾਮਜ਼ਦ ਕੀਤਾ ਗਿਆ ਸੀ, ਜਿਸ ਨਾਲ ਰਾਸ਼ਟਰੀ ਜੈਵਿਕ ਸੁਰੱਖਿਆ ਮਾਰਗਦਰਸ਼ਨ ਦੇ ਵਿਕਾਸ ’ਚ ਯੂਨੀਵਰਸਿਟੀ ਦੇ ਯੋਗਦਾਨ ਨੂੰ ਹੋਰ ਮਜ਼ਬੂਤੀ ਮਿਲੀ। ਡਾ. ਵਿਕਰਮ ਸੈਣੀ, ਏਮਜ਼, ਨਵੀਂ ਦਿੱਲੀ ਅਤੇ ਸੋਟਰ, ਰੋਸਵੈੱਲ, ਜਾਰਜੀਆ, ਅਮਰੀਕਾ ਤੋਂ ਅੰਤਰਰਾਸ਼ਟਰੀ ਮਾਹਰ ਨਤਾਸ਼ਾ ਕੇ. ਗ੍ਰਿਫਿਥ ਦੁਆਰਾ ਤਾਲਮੇਲ ਕੀਤਾ ਗਿਆ। ਇਹ ਪ੍ਰੋਗਰਾਮ ਪ੍ਰਯੋਗਸ਼ਾਲਾ ਮਾਪਦੰਡਾਂ ਅਤੇ ਉੱਚ-ਨਿਯੰਤਰਣ ਸਹੂਲਤ ਕਾਰਜਾਂ ਤੇ ਕੇਂਦ੍ਰਿਤ ਸੀ।