‘ਵਿਜ਼ਨ 2 ਐਕਸ਼ਨ’ ਸਮਾਗਮ ’ਚ ਆਰਕੀਟੈਕਟਾਂ ਨੇ ਲਿਆ ਹਿੱਸਾ

ਫ਼ੋਟੋ ਨੰਬਰ-37 ਸਟਾਫ਼ ਰਿਪੋਰਟਰ, ਪੰਜਾਬੀ ਜਾਗਰਣ, ਲੁਧਿਆਣਾ : ਇੰਡੀਅਨ ਸੋਸਾਇਟੀ ਆਫ ਹੀਟਿੰਗ, ਰੈਫ੍ਰਿਜਰੇਟਿੰਗ ਐਂਡ ਏਅਰ-ਕੰਡੀਸ਼ਨਿੰਗ ਇੰਜੀਨੀਅਰਜ਼ (ਆਈਐਸਐਚਆਰਏਈ) ਵੱਲੋਂ ਸੀਆਈਆਈ ਵਿਖੇ “ਵਿਜ਼ਨ 2 ਐਕਸ਼ਨ” ਪ੍ਰੋਗਰਾਮ ਕਰਵਾਇਆ ਗਿਆ। ਪ੍ਰੋਗਰਾਮ ਦਾ ਵਿਸ਼ਾ “ਇੰਜੀਨੀਅਰਿੰਗ ਏ ਗ੍ਰੀਨਰ ਗਲੋਬਲ ਬਿਲਟ ਐਨਵਾਇਰਨਮੈਂਟ” ਸੀ। ਇਸ ਵਿੱਚ ਲਗਭਗ 150 ਪ੍ਰਤੀਭਾਗੀਆਂ ਨੇ ਹਿੱਸਾ ਲਿਆ, ਜਿਨ੍ਹਾਂ ਵਿੱਚ ਪ੍ਰਮੁੱਖ ਆਰਕੀਟੈਕਟ, ਐਚਵੀਏਸੀ ਮਾਹਿਰ ਅਤੇ ਪੰਜਾਬ ਐਨਰਜੀ ਡਿਵੈਲਪਮੈਂਟ ਏਜੰਸੀ, ਗ੍ਰੀਨ ਰੇਟਿੰਗ ਫਾਰ ਇੰਟੀਗ੍ਰੇਟਿਡ ਹੈਬੀਟੈਟ ਅਸੈਸਮੈਂਟ ਅਤੇ ਹੋਰ ਵਿਭਾਗਾਂ ਦੇ ਅਧਿਕਾਰੀ ਸ਼ਾਮਲ ਸਨ। ਲੁਧਿਆਣਾ ਦੇ ਕਈ ਆਰਕੀਟੈਕਟਾਂ ਨੇ ਵਿਸ਼ੇਸ਼ ਸੱਦੇ ’ਤੇ ਪ੍ਰੋਗਰਾਮ ਵਿੱਚ ਸ਼ਿਰਕਤ ਕੀਤੀ। ਪ੍ਰੋਗਰਾਮ ਦੌਰਾਨ ਦੇਸ਼ ਭਰ ਦੇ ਨਿਰਮਾਣ ਅਤੇ ਬਿਲਡਿੰਗ ਉਦਯੋਗ ਨਾਲ ਜੁੜੇ ਮਾਹਿਰ ਇਕ ਮੰਚ ’ਤੇ ਇਕੱਠੇ ਹੋਏ ਅਤੇ ਟਿਕਾਊ ਵਿਕਾਸ, ਗ੍ਰੀਨ ਬਿਲਡਿੰਗਜ਼ ਤੇ ਤਕਨਾਲੋਜੀ ਦੀ ਵਿਹਾਰਕ ਵਰਤੋਂ ਬਾਰੇ ਵਿਚਾਰ-ਵਟਾਂਦਰਾ ਕੀਤਾ। ਲੁਧਿਆਣਾ ਦੇ ਆਰਕੀਟੈਕਟ ਸੰਜੇ ਗੋਇਲ ਨੇ ‘ਗ੍ਰੀਨ ਸਿਟੀਜ਼’ ਵਿਸ਼ੇ ’ਤੇ ਪ੍ਰੇਰਣਾਦਾਇਕ ਪੇਸ਼ਕਾਰੀ ਦਿੱਤੀ। ਇਸੇ ਤਰ੍ਹਾਂ ਐਡਵੋਕੇਸੀ ਕਮੇਟੀ ਦੇ ਚੇਅਰ ਵਿਕਰਮ ਮੂਰਤੀ ਨੇ ਹਰੇ-ਭਰੇ ਅਤੇ ਟਿਕਾਊ ਇਮਾਰਤਾਂ ਨਾਲ ਸਬੰਧਤ ਵੱਖ-ਵੱਖ ਪਹਿਲੂਆਂ ਬਾਰੇ ਵਿਚਾਰ ਸਾਂਝੇ ਕੀਤੇ। ਆਰਕੀਟੈਕਟ ਸ਼ੈਲਜਾ ਗੁਪਤਾ ਨੇ ਗ੍ਰੀਨ ਬਿਲਡਿੰਗਜ਼ ਨਾਲ ਜੁੜੇ ਵਿਹਾਰਕ ਪੱਖਾਂ ਤੇ ਜ਼ਮੀਨੀ ਹਕੀਕਤਾਂ ਬਾਰੇ ਚਰਚਾ ਕੀਤੀ। ਆਰਕੀਟੈਕਟ ਸਿਧਾਰਥ ਵਿਗ ਨੇ ਸਪੇਨ, ਚੀਨ ਅਤੇ ਜਾਪਾਨੀ ਸੱਭਿਆਚਾਰ ਦੀਆਂ ਉਦਾਹਰਣਾਂ ਪੇਸ਼ ਕਰਦਿਆਂ ਦੱਸਿਆ ਕਿ ਮਨੁੱਖੀ ਜੀਵਨ ਅਤੇ ਆਪਸੀ ਸੰਵਾਦ ਨੂੰ ਕੇਂਦਰ ਵਿੱਚ ਰੱਖਦਿਆਂ ਛੋਟੇ ਪਰ ਸਾਰਥਕ ਟਿਕਾਊ ਵਿਕਾਸ ਸਬੰਧੀ ਉਪਰਾਲਿਆਂ ਲਈ ਤਕਨਾਲੋਜੀ ਦੀ ਪ੍ਰਭਾਵਸ਼ਾਲੀ ਵਰਤੋਂ ਕਿਵੇਂ ਕੀਤੀ ਜਾ ਸਕਦੀ ਹੈ। ਡਾ. ਭੁੱਲਰ ਨੇ ਸੁਰੱਖਿਆ ਗਾਰਡਾਂ ਦੀਆਂ ਕੰਮਕਾਜੀ ਸਥਿਤੀਆਂ ਵਿੱਚ ਸੁਧਾਰ ਲਈ ਘੱਟ ਲਾਗਤ ਵਾਲੇ ਅਤੇ ਟਿਕਾਊ ਕੈਬਿਨ ਵਿਕਸਿਤ ਕਰਨ ਦੀ ਰਣਨੀਤੀ ਪੇਸ਼ ਕੀਤੀ। ਪ੍ਰੋਗਰਾਮ ਦੀ ਸਮਾਪਤੀ ਇੱਕ ਦਿਲਚਸਪ ‘ਓਪਨ ਹਾਊਸ’ ਚਰਚਾ ਨਾਲ ਹੋਈ। ਇਸ ਤੋਂ ਬਾਅਦ ਆਈਐਸਐਚਆਰਏਈ ਦੇ ਉਪ ਪ੍ਰਧਾਨ ਅਜੇ ਬਾਂਸਲ ਨੇ ਸਮਾਪਤੀ ਸੰਬੋਧਨ ਕੀਤਾ। ਨੌਰਥ ਜ਼ੋਨ ਦੀ ਚੇਅਰ ਸ਼ੀਬਾ ਸਿੱਦੀਕੀ ਨੇ ਵੀ ਪ੍ਰੋਗਰਾਮ ਵਿੱਚ ਸ਼ਿਰਕਤ ਕੀਤੀ। ਪ੍ਰਤੀਭਾਗੀਆਂ ਨੇ ਗਿਆਨਵਰਧਕ ਸੈਸ਼ਨਾਂ ਅਤੇ ਸਥਿਰਤਾ, ਨਵੀਨਤਾ ਅਤੇ ਵਿਹਾਰਕ ਹੱਲਾਂ ਪ੍ਰਤੀ ਆਈਐਸਐਚਆਰਏਈ ਦੇ ਦ੍ਰਿਸ਼ਟੀਕੋਣ ਦੀ ਸ਼ਲਾਘਾ ਕੀਤੀ। ਕਈ ਮੁਕਾਬਲੇਬਾਜ਼ਾਂ ਨੇ ਮੌਕੇ ’ਤੇ ਹੀ ਆਈਐਸਐਚਆਰਏਈ ਦੀ ਮੈਂਬਰਸ਼ਿਪ ਵੀ ਹਾਸਲ ਕੀਤੀ ਅਤੇ ਭਵਿੱਖ ਵਿੱਚ ਅਜਿਹੇ ਹੋਰ ਗਿਆਨਵਰਧਕ ਪ੍ਰੋਗਰਾਮ ਕਰਵਾਏ ਜਾਣ ਦੀ ਉਮੀਦ ਪ੍ਰਗਟਾਈ। ਲੁਧਿਆਣਾ ਪਰਤਣ ਤੋਂ ਬਾਅਦ ਆਰਕੀਟੈਕਟ ਸੰਜੇ ਗੋਇਲ ਨੇ ਕਿਹਾ ਕਿ ਇਹ ਪ੍ਰੋਗਰਾਮ ਗ੍ਰੀਨ ਬਿਲਡਿੰਗਜ਼, ਟਿਕਾਊ ਵਿਕਾਸ ਅਤੇ ਵਧੇਰੇ ਟਿਕਾਊ ਨਿਰਮਿਤ ਵਾਤਾਵਰਣ ਸਿਰਜਣ ਲਈ ਤਕਨਾਲੋਜੀ ਦੀ ਪ੍ਰਭਾਵਸ਼ਾਲੀ ਵਰਤੋਂ ਨਾਲ ਸਬੰਧਤ ਵਿਚਾਰਾਂ ਦੇ ਆਦਾਨ-ਪ੍ਰਦਾਨ ਲਈ ਇੱਕ ਸਾਰਥਕ ‘ਵਿਜ਼ਨ ਟੂ ਐਕਸ਼ਨ’ ਮੰਚ ਸਾਬਤ ਹੋਇਆ।