ਪਾਲਤੂ ਜਾਨਵਰਾਂ ਦੀ ਈਕੋ-ਕਾਰਡੀਓਗ੍ਰਾਫੀ ਵਿਧੀ 'ਤੇ ਕਰਵਾਈ ਕਾਰਜਸ਼ਾਲਾ

ਫੋਟੋ ਨੰਬਰ-21

ਪਲਵਿੰਦਰ ਸਿੰਘ ਢੁੱਡੀਕੇ, ਪੰਜਾਬੀ ਜਾਗਰਣ, ਲੁਧਿਆਣਾ

ਗੁਰੂ ਅੰਗਦ ਦੇਵ ਵੈਟਰਨਰੀ ਅਤੇ ਐਨੀਮਲ ਸਾਇੰਸਜ਼ ਯੂਨੀਵਰਸਿਟੀ ਨੇ ਵੈਟਰਨਰੀ ਮੈਡੀਸਿਨ ਵਿਭਾਗ ਵਿਖੇ ਪਾਲਤੂ ਜਾਨਵਰਾਂ ਅਤੇ ਪਸ਼ੂਧਨ ਵਿੱਚ ਇਕੋਕਾਰਡੀਓਗ੍ਰਾਫੀ ਵਿਧੀ 'ਤੇ ਕਾਰਜਸ਼ਾਲਾ ਕਰਵਾਈ। ਇਸ ਕਾਰਜਸ਼ਾਲਾ ਦਾ ਉਦੇਸ਼ ਸਾਥੀ ਜਾਨਵਰਾਂ ਅਤੇ ਪਸ਼ੂਆਂ ਵਿੱਚ ਦਿਲ ਦੀ ਸਿਹਤ ਦੇ ਮੁੱਲਾਂਕਣ ਲਈ ਈਕੋ-ਕਾਰਡੀਓਗ੍ਰਾਫੀ ਵਿਧੀ ਦੀ ਵਰਤੋਂ ਵਿੱਚ ਵੈਟਰਨਰੀ ਪੇਸ਼ੇਵਰਾਂ ਦੇ ਵਿਹਾਰਕ ਹੁਨਰ ਨੂੰ ਬਿਹਤਰ ਕਰਨਾ ਸੀ। ਪਸ਼ੂ ਪਾਲਣ ਵਿਭਾਗ, ਪੰਜਾਬ ਦੇ ਨੌਂ ਵੈਟਰਨਰੀ ਅਫਸਰਾਂ ਨੇ ਇਸ ਸਿਖਲਾਈ ਵਿੱਚ ਹਿੱਸਾ ਲਿਆ। ਮਾਹਿਰ ਅਧਿਆਪਕਾਂ ਡਾ. ਨੀਤੂ ਸੈਣੀ, ਡਾ. ਸ਼ਬਨਮ ਸਿੱਧੂ ਤੇ ਡਾ. ਤਨਵਿਕਾ ਸਾਂਗਵਾਨ ਨੇ ਪਾਲਤੂ ਜਾਨਵਰਾਂ ਅਤੇ ਪਸ਼ੂਆਂ ਦੀ ਈਕੋ-ਕਾਰਡੀਓਗ੍ਰਾਫੀ ਜਾਂਚ ਵਿੱਚ ਵਿਹਾਰਕ ਪ੍ਰਦਰਸ਼ਨ ਅਤੇ ਸਿਖਲਾਈ ਪ੍ਰਦਾਨ ਕੀਤੀ। ਪ੍ਰਤੀਭਾਗੀਆਂ ਨੂੰ ਈਕੋ-ਕਾਰਡੀਓਗ੍ਰਾਫੀ ਜਾਂਚ, ਪ੍ਰਤੀਬਿੰਬ ਚਿੱਤਰ, ਦਿਲ ਦੀ ਬਣਤਰ ਦੀ ਪਛਾਣ ਤੇ ਦਿਲ ਦੇ ਕਾਰਜਾਂ ਦੇ ਮੁਲਾਂਕਣ ਦਾ ਵਿਹਾਰਕ ਅਨੁਭਵ ਦਿੱਤਾ ਗਿਆ। ਵਾਈਸ ਚਾਂਸਲਰ ਡਾ. ਜਤਿੰਦਰ ਪਾਲ ਸਿੰਘ ਗਿੱਲ ਨੇ ਕਿਹਾ ਕਿ ਪਸ਼ੂਆਂ ਦੇ ਪੇਸ਼ੇਵਰਾਂ ਨੂੰ ਆਧੁਨਿਕ ਨਿਰੀਖਣ ਤੇ ਇਲਾਜ ਤਕਨੀਕਾਂ ਬਾਰੇ ਸਮਕਾਲੀ ਗਿਆਨ ਦੇਣ ਲਈ ਨਿਰੰਤਰ ਸਿੱਖਿਆ ਤੇ ਸਮਰੱਥਾ-ਨਿਰਮਾਣ ਦੀਆਂ ਪਹਿਲਕਦਮੀਆਂ ਬਹੁਤ ਜ਼ਰੂਰੀ ਹਨ। ਉਨ੍ਹਾਂ ਕਿਹਾ ਕਿ ਅਜਿਹੇ ਪ੍ਰੋਗਰਾਮ ਪਸ਼ੂ ਸਿਹਤ ਸੰਭਾਲ ਸੇਵਾਵਾਂ ਨੂੰ ਮਜ਼ਬੂਤ ਕਰਨ, ਨਿਰੀਖਣ ’ਚ ਸੁਧਾਰ ਕਰਨ ਤੇ ਜਾਨਵਰਾਂ ਦੀ ਸਿਹਤ ਅਤੇ ਭਲਾਈ ਨੂੰ ਵਧਾਉਣ ਵਿੱਚ ਮਹੱਤਵਪੂਰਨ ਯੋਗਦਾਨ ਪਾਉਂਦੇ ਹਨ। ਡਾ. ਸੁਸ਼ਮਾ ਛਾਬੜਾ, ਵਿਭਾਗ ਮੁਖੀ ਨੇ ਇਸ ਗੱਲ 'ਤੇ ਜ਼ੋਰ ਦਿੱਤਾ ਕਿ ਈਕੋ-ਕਾਰਡੀਓਗ੍ਰਾਫੀ ਜਾਨਵਰਾਂ ਵਿੱਚ ਦਿਲ ਦੀਆਂ ਬਿਮਾਰੀਆਂ ਦੇ ਮੁਲਾਂਕਣ ਲਈ ਇੱਕ ਮਹੱਤਵਪੂਰਨ ਵਿਧੀ ਹੈ। ਪਸ਼ੂਆਂ ਦੇ ਡਾਕਟਰਾਂ ਦੀਆਂ ਕਲੀਨਿਕਲ ਯੋਗਤਾਵਾਂ ਨੂੰ ਮਜ਼ਬੂਤ ਕਰਨ ਲਈ ਈਕੋ-ਕਾਰਡੀਓਗ੍ਰਾਫੀ ਵਰਗੀਆਂ ਉੱਨਤ ਤਕਨੀਕਾਂ ਵਿੱਚ ਵਿਹਾਰਕ ਸਿਖਲਾਈ ਬਹੁਤ ਜ਼ਰੂਰੀ ਹੈ। ਭਾਗ ਲੈਣ ਵਾਲੇ ਵੈਟਰਨਰੀ ਅਫਸਰਾਂ ਨੇ ਪ੍ਰਯੋਗੀ ਸੈਸ਼ਨਾਂ ਵਿੱਚ ਸਰਗਰਮੀ ਨਾਲ ਹਿੱਸਾ ਲਿਆ ਤੇ ਜਾਨਵਰਾਂ ਦੀ ਈਕੋ-ਕਾਰਡੀਓਗ੍ਰਾਫਿਕ ਜਾਂਚ ’ਚ ਤਜਰਬਾ ਹਾਸਲ ਕੀਤਾ।