ਹੁਣ ਕੈਮਰਿਆਂ ਦੀ ਪੈਨੀ ਨਜ਼ਰ ਤੋਂ ਨਹੀਂ ਬਚ ਰਹੇ ਟ੍ਰੈਫਿਕ ਨਿਯਮ ਤੋੜਨ ਵਾਲੇ

- ਤਿੰਨ ਮਹੀਨਿਆਂ ਵਿੱਚ ਕੱਟੇ 66 ਹਜ਼ਾਰ ਤੋਂ ਵੱਧ ਈ-ਚਾਲਾਨ

ਸੁਸ਼ੀਲ ਕੁਮਾਰ ਸ਼ਸ਼ੀ,ਪੰਜਾਬੀ ਜਾਗਰਣ

ਲੁਧਿਆਣਾ : ਸ਼ਹਿਰ ਦੀਆਂ ਸੜਕਾਂ ’ਤੇ ਟ੍ਰੈਫਿਕ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲਿਆਂ ਲਈ ਹੁਣ ਬਚ ਨਿਕਲਣਾ ਆਸਾਨ ਨਹੀਂ ਰਿਹਾ। ਚੌਰਾਹਿਆਂ ਅਤੇ ਮੁੱਖ ਸੜਕਾਂ ’ਤੇ ਲੱਗੇ ਉੱਚ ਗੁਣਵੱਤਾ ਵਾਲੇ ਕੈਮਰੇ ਹਰ ਪਲ ਨਿਗਰਾਨੀ ਕਰ ਰਹੇ ਹਨ ਅਤੇ ਨਿਯਮ ਟੁੱਟਦੇ ਹੀ ਵਾਹਨ ਮਾਲਕ ਦੇ ਨਾਮ ਈ-ਚਾਲਾਨ ਜਾਰੀ ਹੋ ਰਿਹਾ ਹੈ। ਇੰਟੈਲੀਜੈਂਟ ਟ੍ਰੈਫਿਕ ਮੈਨੇਜਮੈਂਟ ਸਿਸਟਮ ਲਾਗੂ ਹੋਣ ਤੋਂ ਬਾਅਦ ਪੁਲਿਸ ਕਮਿਸ਼ਨਰੇਟ ਲੁਧਿਆਣਾ ਦੀ ਈ-ਚਾਲਾਨ ਪ੍ਰਣਾਲੀ ਹੁਣ ਪੂਰੀ ਤਰ੍ਹਾਂ ਪ੍ਰਭਾਵਸ਼ਾਲੀ ਢੰਗ ਨਾਲ ਕੰਮ ਕਰ ਰਹੀ ਹੈ। ਅਪ੍ਰੈਲ ਤੋਂ ਜੂਨ ਤੱਕ ਸਿਰਫ਼ ਤਿੰਨ ਮਹੀਨਿਆਂ ਦੌਰਾਨ ਹੀ 66,079 ਵਾਹਨ ਚਾਲਕਾਂ ਦੇ ਈ-ਚਾਲਾਨ ਕੀਤੇ ਗਏ ਹਨ, ਜਦਕਿ ਰੋਜ਼ਾਨਾ ਔਸਤ 700 ਤੋਂ ਵੱਧ ਚਾਲਾਨ ਜਾਰੀ ਹੋ ਰਹੇ ਹਨ। ਅੰਕੜੇ ਦਰਸਾਉਂਦੇ ਹਨ ਕਿ ਬਿਨਾਂ ਹੈਲਮਟ ਵਾਹਨ ਚਲਾਉਣ ਵਾਲੇ ਸਭ ਤੋਂ ਵੱਧ ਕੈਮਰਿਆਂ ਦੀ ਪਕੜ ਵਿੱਚ ਆਏ ਹਨ। ਟ੍ਰੈਫਿਕ ਪੁਲਿਸ ਤੋਂ ਪ੍ਰਾਪਤ ਵੇਰਵਿਆਂ ਅਨੁਸਾਰ ਕੁੱਲ 66,079 ਈ-ਚਾਲਾਨਾਂ ਵਿੱਚੋਂ ਸਭ ਤੋਂ ਵੱਧ 36,192 ਚਾਲਾਨ ਬਿਨਾਂ ਹੈਲਮਟ ਦੋਪਹੀਆ ਵਾਹਨ ਚਲਾਉਣ ਵਾਲਿਆਂ ਦੇ ਕੱਟੇ ਗਏ। ਇਸ ਤੋਂ ਇਲਾਵਾ ਗਲਤ ਦਿਸ਼ਾ ਵਿੱਚ ਵਾਹਨ ਚਲਾਉਣ ਦੇ 9,543, ਲਾਲ ਬੱਤੀ ਦੀ ਉਲੰਘਣਾ ਕਰਨ ਦੇ 7,835, ਤਿੰਨ ਸਵਾਰੀਆਂ ਬਿਠਾ ਕੇ ਵਾਹਨ ਚਲਾਉਣ ਦੇ 5,592 ਅਤੇ ਜ਼ੈਬਰਾ ਕਰਾਸਿੰਗ ਦੇ ਨਿਯਮ ਤੋੜਨ ਦੇ 6,917 ਚਾਲਾਨ ਜਾਰੀ ਕੀਤੇ ਗਏ।

ਮਹੀਨਾਵਾਰ ਅੰਕੜਿਆਂ ਨੇ ਦਿਖਾਈ ਤਸਵੀਰ

ਅੰਕੜਿਆਂ ਅਨੁਸਾਰ ਬਿਨਾਂ ਹੈਲਮਟ ਵਾਹਨ ਚਲਾਉਣ ਦੇ ਅਪ੍ਰੈਲ ਮਹੀਨੇ 17,356, ਮਈ ਵਿੱਚ 10,346 ਅਤੇ ਜੂਨ ਵਿੱਚ 8,490 ਚਲਾਨ ਜਾਰੀ ਕੀਤੇ ਗਏ। ਗਲਤ ਦਿਸ਼ਾ ਵਿੱਚ ਵਾਹਨ ਚਲਾਉਣ ਦੇ ਅਪ੍ਰੈਲ ਵਿੱਚ 345, ਮਈ ਵਿੱਚ 5,573 ਅਤੇ ਜੂਨ ਵਿੱਚ 3,625 ਚਲਾਨ ਕੱਟੇ ਗਏ। ਲਾਲ ਬੱਤੀ ਦੀ ਉਲੰਘਣਾ ਦੇ ਅਪ੍ਰੈਲ ਵਿੱਚ 53, ਮਈ ਵਿੱਚ 2,841 ਅਤੇ ਜੂਨ ਵਿੱਚ 4,941 ਈ-ਚਾਲਾਨ ਜਾਰੀ ਹੋਏ। ਜ਼ੈਬਰਾ ਕਰਾਸਿੰਗ ਦੀ ਉਲੰਘਣਾ ਲਈ ਅਪ੍ਰੈਲ ਵਿੱਚ ਕੋਈ ਚਾਲਾਨ ਨਹੀਂ ਹੋਇਆ, ਪਰ ਮਈ ਵਿੱਚ 2,813 ਅਤੇ ਜੂਨ ਵਿੱਚ 4,104 ਚਲਾਨ ਕੱਟੇ ਗਏ। ਤਿੰਨ ਸਵਾਰੀਆਂ ਬਿਠਾ ਕੇ ਦੋਪਹੀਆ ਵਾਹਨ ਚਲਾਉਣ ਦੇ ਅਪ੍ਰੈਲ ਵਿੱਚ 2,253, ਮਈ ਵਿੱਚ 1,463 ਅਤੇ ਜੂਨ ਵਿੱਚ 1,876 ਚਾਲਾਨ ਜਾਰੀ ਕੀਤੇ ਗਏ। ਸਹਾਇਕ ਪੁਲਿਸ ਕਮਿਸ਼ਨਰ (ਟ੍ਰੈਫਿਕ) ਜਤਿਨ ਬਾਂਸਲ ਨੇ ਦੱਸਿਆ ਕਿ ਇੰਟੈਲੀਜੈਂਟ ਟ੍ਰੈਫਿਕ ਮੈਨੇਜਮੈਂਟ ਸਿਸਟਮ ਤਹਿਤ ਲੱਗੇ ਕ੍ਰਿਤ੍ਰਿਮ ਬੁੱਧੀ ਆਧਾਰਿਤ ਕੈਮਰਿਆਂ ਰਾਹੀਂ ਈ-ਚਾਲਾਨ ਜਾਰੀ ਕੀਤੇ ਜਾ ਰਹੇ ਹਨ। ਆਉਣ ਵਾਲੇ ਸਮੇਂ ਵਿੱਚ ਸ਼ਹਿਰ ਦੇ ਹੋਰ ਇਲਾਕਿਆਂ ਵਿੱਚ ਵੀ ਅਜਿਹੇ ਕੈਮਰੇ ਲਗਾਏ ਜਾਣਗੇ। ਇਹ ਪ੍ਰਣਾਲੀ ਬਿਨਾਂ ਹੈਲਮਟ, ਪਿੱਛੇ ਬੈਠੇ ਵਿਅਕਤੀ ਵੱਲੋਂ ਹੈਲਮਟ ਨਾ ਪਹਿਨਣਾ, ਤਿੰਨ ਸਵਾਰੀਆਂ, ਤੇਜ਼ ਰਫ਼ਤਾਰ, ਜ਼ੈਬਰਾ ਕਰਾਸਿੰਗ ਦੀ ਉਲੰਘਣਾ, ਗਲਤ ਦਿਸ਼ਾ ਵਿੱਚ ਵਾਹਨ ਚਲਾਉਣਾ, ਗਲਤ ਢੰਗ ਨਾਲ ਵਾਹਨ ਖੜ੍ਹਾ ਕਰਨਾ ਸਮੇਤ ਕੁੱਲ ਨੌਂ ਕਿਸਮ ਦੀਆਂ ਟ੍ਰੈਫਿਕ ਉਲੰਘਣਾਵਾਂ ਦੀ ਪਛਾਣ ਕਰਦੀ ਹੈ। ਉਨ੍ਹਾਂ ਦੱਸਿਆ ਕਿ ਜਿਵੇਂ ਹੀ ਕੋਈ ਟ੍ਰੈਫਿਕ ਉਲੰਘਣਾ ਕੈਮਰੇ ਵਿੱਚ ਦਰਜ ਹੁੰਦੀ ਹੈ ਅਤੇ ਚਲਾਨ ਤਿਆਰ ਹੁੰਦਾ ਹੈ ਤਾਂ ਵਾਹਨ ਮਾਲਕ ਦੇ ਮੋਬਾਈਲ ’ਤੇ ਅਧਿਕਾਰਤ ਸੰਦੇਸ਼ ਭੇਜਿਆ ਜਾਂਦਾ ਹੈ, ਜਿਸ ਵਿੱਚ ਚਾਲਾਨ ਭਰਨ ਲਈ ਲਿੰਕ ਵੀ ਹੁੰਦਾ ਹੈ। ਵਾਹਨ ਮਾਲਕ ਪਰਿਵਹਨ ਐਪ ਜਾਂ ਹੋਰ ਭਰੋਸੇਯੋਗ ਡਿਜ਼ੀਟਲ ਮਾਧਿਅਮਾਂ ਰਾਹੀਂ ਵੀ ਆਪਣੇ ਚਾਲਾਨ ਦੀ ਸਥਿਤੀ ਦੀ ਜਾਂਚ ਕਰ ਸਕਦੇ ਹਨ।

ਕਿਹੜੀਆਂ ਉਲੰਘਣਾਵਾਂ ’ਤੇ ਰੱਖੀ ਜਾ ਰਹੀ ਹੈ ਨਜ਼ਰ

ਇੰਟੈਲੀਜੈਂਟ ਟ੍ਰੈਫਿਕ ਮੈਨੇਜਮੈਂਟ ਸਿਸਟਮ ਤਹਿਤ ਲੱਗੇ ਕੈਮਰੇ ਬਿਨਾਂ ਹੈਲਮਟ ਵਾਹਨ ਚਲਾਉਣਾ, ਪਿੱਛੇ ਬੈਠੇ ਵਿਅਕਤੀ ਵੱਲੋਂ ਹੈਲਮਟ ਨਾ ਪਹਿਨਣਾ, ਤਿੰਨ ਸਵਾਰੀਆਂ, ਤੇਜ਼ ਰਫ਼ਤਾਰ, ਜ਼ੈਬਰਾ ਕਰਾਸਿੰਗ ਦੀ ਉਲੰਘਣਾ, ਗਲਤ ਦਿਸ਼ਾ ਵਿੱਚ ਵਾਹਨ ਚਲਾਉਣਾ, ਗਲਤ ਢੰਗ ਨਾਲ ਵਾਹਨ ਖੜ੍ਹਾ ਕਰਨਾ ਸਮੇਤ ਕੁੱਲ ਨੌਂ ਕਿਸਮ ਦੀਆਂ ਟ੍ਰੈਫਿਕ ਉਲੰਘਣਾਵਾਂ ਨੂੰ ਆਪਣੇ ਆਪ ਰਿਕਾਰਡ ਕਰਦੇ ਹਨ ਅਤੇ ਉਸ ਦੇ ਆਧਾਰ ’ਤੇ ਈ-ਚਾਲਾਨ ਜਾਰੀ ਹੁੰਦਾ ਹੈ।

ਈ-ਚਾਲਾਨ ਦੇ ਨਾਂ ’ਤੇ ਸਾਈਬਰ ਠੱਗਾਂ ਤੋਂ ਰਹੋ ਸਾਵਧਾਨ

ਲੁਧਿਆਣਾ ਪੁਲਿਸ ਵੱਲੋਂ ਈ-ਚਾਲਾਨ ਪ੍ਰਣਾਲੀ ਸ਼ੁਰੂ ਕੀਤੇ ਜਾਣ ਦੇ ਨਾਲ ਹੀ ਸਾਈਬਰ ਠੱਗ ਵੀ ਸਰਗਰਮ ਹੋ ਗਏ ਹਨ। ਸ਼ਹਿਰ ਦੇ 46 ਸਥਾਨਾਂ ’ਤੇ ਲੱਗੇ ਕ੍ਰਿਤ੍ਰਿਮ ਬੁੱਧੀ ਆਧਾਰਿਤ ਕੈਮਰਿਆਂ ਦੇ ਨਾਂ ’ਤੇ ਲੋਕਾਂ ਨੂੰ ਜਾਅਲੀ ਈ-ਚਾਲਾਨ ਵਾਲੇ ਸੰਦੇਸ਼ ਭੇਜੇ ਜਾ ਰਹੇ ਹਨ। ਇਨ੍ਹਾਂ ਸੰਦੇਸ਼ਾਂ ਵਿੱਚ ਚਾਲਾਨ ਭਰਨ ਦੇ ਬਹਾਨੇ ਕਿਸੇ ਅਣਜਾਣ ਐਪ ਦੀ ਫਾਈਲ ਡਾਊਨਲੋਡ ਕਰਨ ਜਾਂ ਸ਼ੱਕੀ ਲਿੰਕ ’ਤੇ ਕਲਿੱਕ ਕਰਨ ਲਈ ਕਿਹਾ ਜਾਂਦਾ ਹੈ।

ਜਿਵੇਂ ਹੀ ਕੋਈ ਵਿਅਕਤੀ ਅਜਿਹੀ ਫਾਈਲ ਡਾਊਨਲੋਡ ਕਰਦਾ ਹੈ ਤਾਂ ਉਸ ਦੇ ਮੋਬਾਈਲ ਦਾ ਕੰਟਰੋਲ ਸਾਈਬਰ ਠੱਗਾਂ ਦੇ ਹੱਥ ਵਿੱਚ ਜਾ ਸਕਦਾ ਹੈ। ਇਸ ਤੋਂ ਬਾਅਦ ਉਹ ਬੈਂਕ ਖਾਤਿਆਂ, ਯੂਪੀਆਈ ਅਤੇ ਕ੍ਰੈਡਿਟ ਕਾਰਡ ਨਾਲ ਸਬੰਧਿਤ ਗੁਪਤ ਜਾਣਕਾਰੀ ਚੋਰੀ ਕਰ ਕੇ ਵਿੱਤੀ ਠੱਗੀ ਨੂੰ ਅੰਜਾਮ ਦੇ ਸਕਦੇ ਹਨ। ਪੁਲਿਸ ਨੇ ਲੋਕਾਂ ਨੂੰ ਸਿਰਫ਼ ਅਧਿਕਾਰਤ ਸੰਦੇਸ਼ਾਂ ’ਤੇ ਹੀ ਭਰੋਸਾ ਕਰਨ ਅਤੇ ਕਿਸੇ ਵੀ ਸ਼ੱਕੀ ਲਿੰਕ ਜਾਂ ਐਪ ਨੂੰ ਡਾਊਨਲੋਡ ਨਾ ਕਰਨ ਦੀ ਅਪੀਲ ਕੀਤੀ ਹੈ।

ਜਨਤਾ ਦੀ ਸੁਰੱਖਿਆ ਲਈ ਹੀ ਸਖ਼ਤੀ, ਨਿਯਮ ਤੋੜਨ ਵਾਲਿਆਂ ਲਈ ਕੋਈ ਛੋਟ ਨਹੀਂ : ਏਸੀਪੀ ਜਤਿਨ ਬਾਂਸਲ

ਸਹਾਇਕ ਪੁਲਿਸ ਕਮਿਸ਼ਨਰ (ਟਰੈਫਿਕ) ਜਤਿਨ ਬਾਂਸਲ ਨੇ ਕਿਹਾ ਕਿ ਟ੍ਰੈਫਿਕ ਨਿਯਮਾਂ ਨੂੰ ਸਖ਼ਤੀ ਨਾਲ ਲਾਗੂ ਕਰਨ ਦਾ ਮਕਸਦ ਕਿਸੇ ਨੂੰ ਪਰੇਸ਼ਾਨ ਕਰਨਾ ਨਹੀਂ, ਸਗੋਂ ਆਮ ਲੋਕਾਂ ਦੀ ਜਾਨ-ਮਾਲ ਦੀ ਸੁਰੱਖਿਆ ਯਕੀਨੀ ਬਣਾਉਣਾ ਹੈ। ਉਨ੍ਹਾਂ ਕਿਹਾ ਕਿ ਲੋਕ ਕਾਨੂੰਨ ਦੀ ਪਾਲਣਾ ਕਰਨ, ਸੜਕ ਹਾਦਸਿਆਂ ਵਿੱਚ ਕਮੀ ਆਵੇ ਅਤੇ ਹਰ ਵਿਅਕਤੀ ਸੁਰੱਖਿਅਤ ਆਪਣੇ ਘਰ ਪਹੁੰਚੇ, ਇਸੇ ਉਦੇਸ਼ ਨਾਲ ਈ-ਚਲਾਨ ਪ੍ਰਣਾਲੀ ਅਤੇ ਆਧੁਨਿਕ ਨਿਗਰਾਨੀ ਪ੍ਰਬੰਧ ਨੂੰ ਪ੍ਰਭਾਵਸ਼ਾਲੀ ਢੰਗ ਨਾਲ ਲਾਗੂ ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਇੰਟੈਲੀਜੈਂਟ ਟ੍ਰੈਫਿਕ ਮੈਨੇਜਮੈਂਟ ਸਿਸਟਮ ਤਹਿਤ ਕ੍ਰਿਤ੍ਰਿਮ ਬੁੱਧੀ ਆਧਾਰਿਤ ਕੈਮਰੇ ਨੌਂ ਕਿਸਮ ਦੀਆਂ ਟ੍ਰੈਫਿਕ ਉਲੰਘਣਾਵਾਂ ’ਤੇ ਨਜ਼ਰ ਰੱਖ ਰਹੇ ਹਨ ਅਤੇ ਆਉਣ ਵਾਲੇ ਸਮੇਂ ਵਿੱਚ ਸ਼ਹਿਰ ਦੇ ਹੋਰ ਇਲਾਕਿਆਂ ਵਿੱਚ ਵੀ ਇਹ ਪ੍ਰਣਾਲੀ ਵਿਸਥਾਰ ਕੀਤੀ ਜਾਵੇਗੀ। ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਜੁਰਮਾਨੇ ਤੋਂ ਬਚਣ ਲਈ ਨਹੀਂ, ਸਗੋਂ ਆਪਣੀ ਅਤੇ ਦੂਜਿਆਂ ਦੀ ਸੁਰੱਖਿਆ ਲਈ ਟ੍ਰੈਫਿਕ ਨਿਯਮਾਂ ਦੀ ਪੂਰੀ ਇਮਾਨਦਾਰੀ ਨਾਲ ਪਾਲਣਾ ਕਰਨ।