ਨਿਗਮ ਚੋਣਾਂ ਦਾ ਘਮਾਸਾਨ: ‘ਆਪ’ ਦੀ ਇਕਜੁੱਟਤਾ ਨੂੰ ਵੱਡਾ ਝਟਕਾ, ਵਿਧਾਇਕਾਂ ਦੇ ਪੁੱਤਰਾਂ ਨੂੰ ਟਿਕਟ ਮਿਲਣ 'ਤੇ ਭੜਕੇ ਕੌਂਸਲਰ

ਲੁਧਿਆਣਾ ਪੱਛਮੀ ਹਲਕੇ ਦੇ ਕੌਂਸਲਰਾਂ ਨੇ ਸਭ ਤੋਂ ਪਹਿਲਾਂ ਮੋਰਚਾ ਖੋਲ੍ਹਿਆ। ਨਾਰਾਜ਼ਗੀ ਇੱਥੋਂ ਤੱਕ ਪਹੁੰਚ ਗਈ ਕਿ ਕੌਂਸਲਰ ਮਨਦੀਪ ਕੌਰ ਘੁੰਮਣ ਨੇ ਆਜ਼ਾਦ ਤੌਰ ’ਤੇ ਨਾਮਜ਼ਦਗੀ ਦਾਖ਼ਲ ਕਰ ਦਿੱਤੀ। ਇਸ ਨਾਲ ਪਾਰਟੀ ਨੂੰ ਕਰਾਸ ਵੋਟਿੰਗ ਦਾ ਖ਼ਤਰਾ ਪੈਦਾ ਹੋ ਗਿਆ ਅਤੇ ਹਾਈਕਮਾਨ ਨੂੰ ਤੁਰੰਤ ਮਾਮਲੇ ਵਿੱਚ ਉਤਰਨਾ ਪਿਆ। ਹਾਈ ਕਮਾਂਡ ਨੂੰ ਬੰਦ ਕਮਰੇ ਵਿੱਚ ਬਗਾਵਤੀ ਸੁਰ ਵਾਲੇ ਕੌਂਸਲਰ ਨਾਲ ਮੀਟਿੰਗ ਕਰਨੀ ਪਾਈ। ਮੀਟਿੰਗ ਦੌਰਾਨ ਕੌਂਸਲਰਾਂ ਨੇ ਅਣਦੇਖੀ, ਵਾਰਡ ਵਿੱਚ ਵਿਕਾਸ ਕਾਰਜਾਂ ਵਿੱਚ ਰੁਕਾਵਟ ਅਤੇ ਪ੍ਰਸ਼ਾਸਨਿਕ ਪੱਧਰ ’ਤੇ ਆਪਣੀ ਸੁਣਵਾਈ ਨਾ ਹੋਣ ਵਰਗੇ ਮੁੱਦੇ ਖੁੱਲ੍ਹ ਕੇ ਉਠਾਏ। ਮੀਟਿੰਗ ਵਿੱਚ ਸਭ ਤੋਂ ਅਹਿਮ ਗੱਲ ਇਹ ਰਹੀ ਕਿ ਕੌਂਸਲਰਾਂ ਨੇ ਸੀਨੀਅਰ ਲੀਡਰਸ਼ਿਪ ਨਾਲ ਸਿੱਧੀ ਗੱਲਬਾਤ ਦੀ ਮੰਗ ਕੀਤੀ। ਇਸ ਤੋਂ ਬਾਅਦ ਵਿਧਾਇਕਾਂ ਨੂੰ ਵੱਖ ਕਰਕੇ ਕੌਂਸਲਰਾਂ ਦੀ ਗੱਲ ਸੁਣੀ ਗਈ।