ਲੁਧਿਆਣਾ : ਪੁਲਿਸ ਮੁਲਾਜ਼ਮ ਬਣ ਕੇ ਪਟਵਾਰਖਾਨੇ ਦੇ ਬਾਹਰੋਂ ਵਿਅਕਤੀ ਦਾ ਅਗਵਾ, 2 ਲੱਖ 22 ਹਜ਼ਾਰ ਦੀ ਲੁੱਟ

ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਗੁਰੂ ਨਾਨਕ ਸਟਰੀਟ ਗਿੱਲ ਰੋਡ ਦੇ ਵਾਸੀ ਗੁਰਪ੍ਰੀਤ ਸਿੰਘ ਨੇ ਦੱਸਿਆ ਕਿ ਉਹ ਨਿੱਜੀ ਕੰਮ ਸਬੰਧੀ ਸੈਕਟਰ-32 ਸਥਿਤ ਪਟਵਾਰਖਾਨੇ ਗਿਆ ਹੋਇਆ ਸੀ। ਇਸ ਦੌਰਾਨ ਸੰਦੀਪ ਨਾਮ ਦਾ ਵਿਅਕਤੀ ਆਪਣੇ ਤਿੰਨ ਸਾਥੀਆਂ ਨਾਲ ਉੱਥੇ ਪਹੁੰਚਿਆ ਅਤੇ ਖੁਦ ਨੂੰ ਪੁਲਿਸ ਮੁਲਾਜ਼ਮ ਦੱਸਦਿਆਂ ਉਸ ਨੂੰ ਮਹਿੰਦਰਾ ਕਾਰ ਵਿੱਚ ਜ਼ਬਰਦਸਤੀ ਬਿਠਾ ਕੇ ਲੈ ਗਿਆ। ਧਮਕੀਆਂ ਦਿੰਦੇ ਹੋਏ ਬਦਮਾਸ਼ ਪਹਿਲੋਂ ਗੁਰਪ੍ਰੀਤ ਨੂੰ ਉਸਦੇ ਘਰ ਲੈ ਗਏ ਅਤੇ ਉੱਥੋਂ ਬੈਂਕ ਖਾਤੇ ਨਾਲ ਸਬੰਧਤ ਚੈੱਕ ਆਪਣੇ ਕਬਜ਼ੇ ਵਿੱਚ ਲੈ ਲਿਆ। ਇਸ ਤੋਂ ਬਾਅਦ ਉਹ ਉਸ ਨੂੰ ਗਿੱਲ ਸਥਿਤ ਐਚਡੀਐਫਸੀ ਬੈਂਕ ਦੀ ਸ਼ਾਖਾ ਵਿੱਚ ਲੈ ਗਏ, ਜਿੱਥੇ ਜਾਨੋਂ ਮਾਰਨ ਅਤੇ ਝੂਠੇ ਕੇਸ ਵਿੱਚ ਫਸਾਉਣ ਦੀ ਧਮਕੀ ਦੇ ਕੇ ਸੈਲਫ਼ ਚੈੱਕ 'ਤੇ ਦਸਤਖ਼ਤ ਕਰਵਾਏ ਅਤੇ ਖਾਤੇ ਵਿੱਚੋਂ ਦੋ ਲੱਖ ਰੁਪਏ ਨਕਦ ਕਢਵਾ ਲਏ। ਇੰਨਾ ਹੀ ਨਹੀਂ, ਮੁਲਜ਼ਮਾਂ ਨੇ ਉਸ ਦੀ ਜੇਬ ਵਿੱਚ ਪਏ 22 ਹਜ਼ਾਰ ਰੁਪਏ ਵੀ ਖੋਹ ਲਏ।