ਲੁਧਿਆਣਾ : ਬੰਦ ਫੈਕਟਰੀ ਦੀ ਮਸ਼ੀਨਰੀ ਕੱਟ ਕੇ ਚੋਰੀ, ਸਕਿਉਰਟੀ ਗਾਰਡਾਂ ਦੀ ਮਿਲੀਭੁਗਤ ਦਾ ਸ਼ੱਕ

ਸੁਸ਼ੀਲ ਕੁਮਾਰ ਸ਼ਸ਼ੀ, ਪੰਜਾਬੀ ਜਾਗਰਣ, ਲੁਧਿਆਣਾ : ਲੁਧਿਆਣਾ ਦੇ ਕੁਹਾੜਾ ਇਲਾਕੇ ਵਿੱਚ ਚੋਰਾਂ ਨੇ ਇੱਕ ਬੰਦ ਪਈ ਫੈਕਟਰੀ ਨੂੰ ਨਿਸ਼ਾਨਾ ਬਣਾ ਕੇ ਅਜਿਹੀ ਵੱਡੀ ਵਾਰਦਾਤ ਨੂੰ ਅੰਜਾਮ ਦਿੱਤਾ ਹੈ, ਜਿਸ ਨੇ ਉਦਯੋਗਿਕ ਇਲਾਕਿਆਂ ਦੇ ਸੁਰੱਖਿਆ ਪ੍ਰਬੰਧਾਂ ‘ਤੇ ਵੱਡੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਚੋਰਾਂ ਨੇ ਐਮਕੇ ਅਗਰਵਾਲ ਫਿਨਿਸ਼ਿੰਗ ਫੈਕਟਰੀ ਵਿੱਚੋਂ ਹਜ਼ਾਰਾਂ ਟਨ ਵਜ਼ਨ ਵਾਲੀ ਭਾਰੀ ਮਸ਼ੀਨਰੀ ਨੂੰ ਕੱਟ-ਕੱਟ ਕੇ ਗਾਇਬ ਕਰ ਦਿੱਤਾ। ਫੈਕਟਰੀ ਮਾਲਕ ਦੇ ਦੋਸ਼ ਹਨ ਕਿ ਇਹ ਵਾਰਦਾਤ ਇਕੱਲੇ ਚੋਰਾਂ ਵੱਲੋਂ ਨਹੀਂ ਕੀਤੀ ਜਾ ਸਕਦੀ ਅਤੇ ਇਸ ਚੋਰੀ ਵਿੱਚ ਸਿਕਿਉਰਟੀ ਗਾਰਡਾਂ ਸਮੇਤ ਕੁਝ ਹੋਰ ਲੋਕਾਂ ਦੀ ਵੀ ਭੂਮਿਕਾ ਹੈ। ਕੁਹਾੜਾ ਇਲਾਕੇ ਵਿੱਚ ਸਥਿਤ ਐਮਕੇ ਅਗਰਵਾਲ ਫਿਨਿਸ਼ਿੰਗ ਫੈਕਟਰੀ ਵਿੱਚ ਹੋਈ ਚੋਰੀ ਦੀ ਇਸ ਸੰਸਨੀ ਖੇਜ ਵਾਰਦਾਤ ਨੇ ਪੂਰੇ ਇਲਾਕੇ ਵਿੱਚ ਹੜਕੰਪ ਮਚਾ ਦਿੱਤਾ ਹੈ। ਫੈਕਟਰੀ ਮਾਲਕ ਅਨਿਲ ਅਗਰਵਾਲ ਨੇ ਦੱਸਿਆ ਕਿ ਆਰਥਿਕ ਮੰਦੀ (ਰਿਸੈਸ਼ਨ) ਕਾਰਨ ਉਨ੍ਹਾਂ ਦੀ ਫੈਕਟਰੀ ਕਾਫੀ ਸਮੇਂ ਤੋਂ ਬੰਦ ਪਈ ਹੋਈ ਸੀ। ਫੈਕਟਰੀ ਦੇ ਅੰਦਰ ਹਜ਼ਾਰਾਂ ਕਿਲੋ ਵਜ਼ਨ ਵਾਲੀ ਭਾਰੀ ਮਸ਼ੀਨਰੀ ਅਤੇ ਹੋਰ ਸਾਮਾਨ ਮੌਜੂਦ ਸੀ।