ਸਨਅਤਕਾਰਾਂ ਨੇ ਕਾਰਖ਼ਾਨਿਆਂ 'ਤੇ ਰਾਤ ਨੂੰ ਬਲੈਕਆਊਟ ਦਾ ਕੀਤਾ ਸਖ਼ਤ ਵਿਰੋਧ

-ਬਿਜਲੀ ਨਿਗਮ ਦੇ ਚੀਫ਼ ਇੰਜੀਨੀਅਰ ਨੂੰ ਸੌਂਪਿਆ ਮੰਗ-ਪੱਤਰ

-ਕੈਟੇਗਰੀ-2 ਤੇ 3 ਦੇ ਸਨਅਤੀ ਫੀਡਰਾਂ ਦੀ ਬਿਜਲੀ ਨਾ ਕੀਤੀ ਜਾਵੇ ਬੰਦ

ਪੁਨੀਤ ਬਾਵਾ, ਪੰਜਾਬੀ ਜਾਗਰਣ, ਲੁਧਿਆਣਾ

ਉਦਯੋਗਪਤੀਆ ਨੇ ਕਾਰਖ਼ਾਨਿਆਂ ’ਤੇ ਨਾਈਟ ਬਲੈਕਆਊਟ ਦੀ ਸਖ਼ਤ ਸ਼ਬਦਾਂ ਵਿੱਚ ਵਿਰੋਧ ਕੀਤਾ ਹੈ। ਸਨਅਤਕਾਰਾਂ ਦੇ ਇੱਕ ਵਫ਼ਦ ਨੇ ਫੈਡਰੇਸ਼ਨ ਆਫ ਇੰਡਸਟਰੀਅਲ ਐਂਡ ਕਮਰਸ਼ੀਅਲ ਆਰਗੇਨਾਈਜ਼ੇਸ਼ਨ (ਫਿਕੋ) ਦੇ ਚੇਅਰਮੈਨ ਕੇਕੇ ਸੇਠ ਚੇਅਰਮੈਨ ਦੀ ਅਗਵਾਈ ਹੇਠ ਪੰਜਾਬ ਰਾਜ ਬਿਜਲੀ ਨਿਗਮ ਲਿਮਟਿਡ (ਪੀਐਸਪੀਸੀਐਲ) ਦੀ ਕੇਂਦਰੀ ਜ਼ੋਨ ਦੇ ਮੁੱਖ ਇੰਜੀਨੀਅਰ ਜਗਦੇਵ ਸਿੰਘ ਹਾਂਸ ਨਾਲ ਮੁਲਾਕਾਤ ਕੀਤੀ। ਵਫ਼ਦ ਵਿੱਚ ਗੁਰਮੀਤ ਸਿੰਘ ਕੁਲਾਰ ਪ੍ਰਧਾਨ ਫਿਕੋ ਅਤੇ ਹਰਪਾਲ ਸਿੰਘ ਭੰਬਰ ਮੁਖੀ ਸਾਈਕਲ ਡਿਵੀਜ਼ਨ ਫਿਕੋ ਵੀ ਹਾਜ਼ਰ ਸਨ।

ਵਫ਼ਦ ਨੇ ਪੀਐਸਪੀਸੀਐਲ ਵੱਲੋਂ ਕੈਟੇਗਰੀ-2 ਅਤੇ ਕੈਟੇਗਰੀ-3 ਉਦਯੋਗਿਕ ਫੀਡਰਾਂ ਦੀ ਬਿਜਲੀ ਸਪਲਾਈ ਸ਼ਾਮ 7 ਵਜੇ ਤੋਂ ਰਾਤ 12 ਵਜੇ ਤੱਕ ਬੰਦ ਕਰਨ ਦੇ ਹਾਲੀਆ ਫੈਸਲੇ ਸਬੰਧੀ ਇੱਕ ਮੰਗ ਪੱਤਰ ਸੌਂਪਿਆ। ਇਹ ਬਿਜਲੀ ਕਟੌਤੀ ਲੁਧਿਆਣਾ ਸ਼ਹਿਰ, ਮਿਲਰ ਗੰਜ, ਮੰਡੀ ਗੋਬਿੰਦਗੜ੍ਹ, ਖੰਨਾ ਅਤੇ ਮੋਹਾਲੀ ਦੇ ਉਦਯੋਗਿਕ ਖੇਤਰਾਂ ਵਿੱਚ ਕੀਤੀ ਜਾ ਰਹੀ ਹੈ। ਪੀਐੱਸਪੀਸੀਐੱਲ ਵੱਲੋਂ ਦੱਸਿਆ ਗਿਆ ਹੈ ਕਿ ਜੀਐਚਟੀਪੀ ਲਹਿਰਾ ਮੁਹੱਬਤ ਅਤੇ ਜੀਜੀਐਸਐਸਟੀਪੀ ਰੋਪੜ ਦੇ ਯੂਨਿਟ ਬੰਦ ਹੋਣ ਅਤੇ ਆਰਐਸਡੀ ਯੂਨਿਟ ਉਪਲੱਬਧ ਨਾ ਹੋਣ ਕਾਰਨ ਬਿਜਲੀ ਦੀ ਕਮੀ ਨੂੰ ਦੇਖਦੇ ਹੋਏ ਇਹ ਕਟੌਤੀ ਕੀਤੀ ਗਈ ਹੈ। ਫਿਕੋ ਨੇ ਉਦਯੋਗਾਂ ਉੱਤੇ ਰੋਜ਼ਾਨਾ ਪੰਜ ਘੰਟਿਆਂ ਦੀ ਰਾਤ ਦੀ ਬਿਜਲੀ ਕਟੌਤੀ ਲਾਉਣ ਦੇ ਫੈਸਲੇ ਦਾ ਸਖ਼ਤ ਵਿਰੋਧ ਕੀਤਾ।

ਸੇਠ ਅਤੇ ਕੁਲਾਰ ਨੇ ਕਿਹਾ ਕਿ ਰਾਤ ਦੇ ਸਮੇਂ ਬਿਜਲੀ ਬੰਦ ਹੋਣ ਨਾਲ ਉਦਯੋਗਿਕ ਖੇਤਰਾਂ ਵਿੱਚ ਸੁਰੱਖਿਆ ਤੇ ਸਕਿਓਰਿਟੀ ਦੀਆਂ ਗੰਭੀਰ ਸਮੱਸਿਆਵਾਂ ਪੈਦਾ ਹੋ ਸਕਦੀਆਂ ਹਨ। ਨਿਰਧਾਰਤ ਸਮੇਂ ਦੌਰਾਨ ਬਲੈਕਆਊਟ ਹੋਣ ਨਾਲ ਚੋਰੀ ਅਤੇ ਲੁੱਟ ਦੀਆਂ ਘਟਨਾਵਾਂ ਦਾ ਖਤਰਾ ਵੱਧ ਜਾਂਦਾ ਹੈ, ਜਿਸ ਨਾਲ ਉਦਯੋਗਾਂ, ਕਰਮਚਾਰੀਆਂ ਤੇ ਮਸ਼ੀਨਰੀ ਦੀ ਸੁਰੱਖਿਆ ਪ੍ਰਭਾਵਿਤ ਹੋ ਸਕਦੀ ਹੈ। ਉਨ੍ਹਾਂ ਕਿਹਾ ਕਿ ਬਿਜਲੀ ਉਦਯੋਗਾਂ ਲਈ ਇੱਕ ਬੁਨਿਆਦੀ ਲੋੜ ਹੈ। ਉਦਯੋਗ ਪਹਿਲਾਂ ਹੀ ਵੱਧ ਰਹੀਆਂ ਲਾਗਤਾਂ ਅਤੇ ਦੂਜੇ ਰਾਜਾਂ ਤੋਂ ਸਖ਼ਤ ਮੁਕਾਬਲੇ ਵਰਗੀਆਂ ਕਈ ਸਮੱਸਿਆਵਾਂ ਦਾ ਸਾਹਮਣਾ ਕਰ ਰਿਹਾ ਹੈ। ਰੋਜ਼ਾਨਾ ਰਾਤ ਦੀ ਬਿਜਲੀ ਕਟੌਤੀ ਨਾਲ ਉਦਯੋਗਾਂ ਉੱਤੇ ਹੋਰ ਵਾਧੂ ਬੋਝ ਪਵੇਗਾ ਅਤੇ ਇਸ ਦਾ ਅਸਰ ਰੁਜ਼ਗਾਰ ਤੇ ਉਤਪਾਦਨ ਉੱਤੇ ਵੀ ਪੈ ਸਕਦਾ ਹੈ।

ਫਿਕੋ ਨੇ ਪੀਐੱਸਪੀਸੀਐੱਲ ਨੂੰ ਅਪੀਲ ਕੀਤੀ ਕਿ ਉਦਯੋਗਾਂ ਲਈ ਰਾਤ ਦੀ ਬਿਜਲੀ ਕਟੌਤੀ ਦੇ ਇਸ ਫੈਸਲੇ ਦੀ ਤੁਰੰਤ ਸਮੀਖਿਆ ਕਰਕੇ ਇਸ ਨੂੰ ਵਾਪਸ ਲਿਆ ਜਾਵੇ। ਵਫ਼ਦ ਨੇ ਕਿਹਾ ਕਿ ਜੇਕਰ ਬਿਜਲੀ ਦੀ ਗੰਭੀਰ ਕਮੀ ਹੈ ਤਾਂ ਪੀਐੱਸਪੀਸੀਐੱਲ ਦਿਨ ਦੇ ਸਮੇਂ ਯੋਜਨਾਬੱਧ ਬਿਜਲੀ ਕਟੌਤੀ ਕਰਨ ਬਾਰੇ ਵਿਚਾਰ ਕਰ ਸਕਦਾ ਹੈ, ਪਰ ਰੋਜ਼ਾਨਾ ਪੰਜ ਘੰਟਿਆਂ ਦੀ ਰਾਤ ਦੀ ਬਿਜਲੀ ਕਟੌਤੀ ਉਦਯੋਗਾਂ ਨੂੰ ਮਨਜ਼ੂਰ ਨਹੀਂ ਹੈ। ਇਹ ਪੰਜਾਬ ਦੇ ਇਤਿਹਾਸ ਵਿੱਚ ਪਹਿਲੀ ਵਾਰ ਹੈ ਕਿ ਉਦਯੋਗਾਂ ਉੱਤੇ ਇਸ ਤਰ੍ਹਾਂ ਨਿਯਮਿਤ ਤੌਰ 'ਤੇ ਰਾਤ ਦਾ ਬਲੈਕਆਊਟ ਲਾਇਆ ਹੈ। ਉਦਯੋਗਿਕ ਖੇਤਰ ਨੇ ਪਹਿਲਾਂ ਕਦੇ ਅਜਿਹੀ ਸਥਿਤੀ ਦਾ ਸਾਹਮਣਾ ਨਹੀਂ ਕੀਤਾ, ਜਿੱਥੇ ਹਰ ਰੋਜ਼ ਰਾਤ ਦੇ ਸਮੇਂ ਉਦਯੋਗਿਕ ਫੀਡਰਾਂ ਦੀ ਬਿਜਲੀ ਪੰਜ ਘੰਟਿਆਂ ਲਈ ਬੰਦ ਕੀਤੀ ਜਾ ਰਹੀ ਹੋਵੇ। ਫਿਕੋ ਨੇ ਸਪੱਸ਼ਟ ਕੀਤਾ ਕਿ ਜੇਕਰ ਰਾਤ ਦੇ ਬਿਜਲੀ ਬਲੈਕਆਊਟ ਨੂੰ ਤੁਰੰਤ ਬੰਦ ਨਾ ਕੀਤਾ ਗਿਆ, ਤਾਂ ਫਿਕੋ ਨੂੰ ਪੀਐਸਪੀਸੀਐਲ ਦੇ ਖਿਲਾਫ ਰੋਸ ਪ੍ਰਦਰਸ਼ਨ ਕਰਨ ਲਈ ਮਜਬੂਰ ਹੋਣਾ ਪਵੇਗਾ। ਫਿਕੋ ਨੇ ਪੀਐੱਸਪੀਸੀਐੱਲ ਨੂੰ ਅਪੀਲ ਕੀਤੀ ਕਿ ਉਦਯੋਗਾਂ ਨੂੰ ਨਿਰਵਿਘਨ ਬਿਜਲੀ ਸਪਲਾਈ ਦਿੱਤੀ ਜਾਵੇ ਅਤੇ ਮੌਜੂਦਾ ਬਿਜਲੀ ਸੰਕਟ ਨੂੰ ਦੂਰ ਕਰਨ ਲਈ ਹਰ ਸੰਭਵ ਕਦਮ ਚੁੱਕੇ ਜਾਣ। ਫਿਕੋ ਨੇ ਕਿਹਾ ਕਿ ਭਰੋਸੇਯੋਗ ਬਿਜਲੀ ਸਪਲਾਈ ਪੰਜਾਬ ਦੇ ਉਦਯੋਗਿਕ ਵਿਕਾਸ, ਰੋਜ਼ਗਾਰ, ਐਕਸਪੋਰਟ ਅਤੇ ਸੂਬੇ ਦੀ ਆਰਥਿਕ ਤਰੱਕੀ ਲਈ ਬਹੁਤ ਜ਼ਰੂਰੀ ਹੈ।