ਖ਼ਰੀਦ ਕੇਂਦਰ ’ਚ ਕੰਡਾ ਨਾ ਖੁੱਲ੍ਹਣ ਕਾਰਨ ਕਿਸਾਨ ਪਰੇਸ਼ਾਨ

ਜਰਨੈਲ ਸਿੰਘ ਸਿੱਧੂ, ਪੰਜਾਬੀ ਜਾਗਰਣ, ਸਿੱਧਵਾਂ ਬੇਟ : ਮਾਰਕੀਟ ਕਮੇਟੀ ਦੇ ਖ਼ਰੀਦ ਕੇਂਦਰ ਵਿੱਚ ਠੇਕੇ ’ਤੇ ਦਿੱਤਾ ਗਿਆ ਕੰਡਾ ਸਮੇਂ ਸਿਰ ਨਾ ਖੁੱਲ੍ਹਣ ਕਾਰਨ ਕਿਸਾਨਾਂ ਅਤੇ ਟਰੱਕ ਚਾਲਕਾਂ ਨੂੰ ਭਾਰੀ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ। ਕੰਡਾ ਨਾ ਖੁੱਲ੍ਹਣ ਕਾਰਨ ਮੰਡੀ ਵਿੱਚੋਂ ਮਾਲ ਲੱਦ ਕੇ ਜਾਣ ਵਾਲੇ ਟਰੱਕਾਂ ਅਤੇ ਟਰਾਲੀਆਂ ਨੂੰ ਤੋਲ ਕਰਵਾਉਣ ਲਈ ਦੂਜੇ ਕੰਡੇ ’ਤੇ ਜਾਣਾ ਪਿਆ, ਜਿਸ ਕਾਰਨ ਮੰਡੀ ’ਚ ਆਵਾਜਾਈ ਦਾ ਰਸ਼ ਵਧ ਗਿਆ ਅਤੇ ਲੋਕਾਂ ਨੂੰ ਮੁਸ਼ਕਲਾਂ ਆਈਆਂ। ਮੰਡੀ ਦੇ ਕੁਝ ਆੜ੍ਹਤੀਆਂ ਨੇ ਦੱਸਿਆ ਕਿ ਇੱਥੇ ਕੰਡੇ ’ਤੇ ਤੋਲ ਕਰਵਾਉਣ ਸਮੇਂ ਜੇਕਰ ਮਾਲ ਦੇ ਵਜ਼ਨ ਵਿੱਚ ਕੋਈ ਵਾਧਾ-ਘਾਟਾ ਸਾਹਮਣੇ ਆਉਂਦਾ ਹੈ ਤਾਂ ਉਸ ਨੂੰ ਪੂਰਾ ਕਰਨ ਦੀ ਸਹੂਲਤ ਮਿਲ ਜਾਂਦੀ ਹੈ। ਪਰ ਹੁਣ ਦੂਜੇ ਕੰਡੇ ’ਤੇ ਤੋਲ ਕਰਵਾਉਣ ਲਈ ਜਾਣਾ ਪੈਂਦਾ ਹੈ, ਜੋ ਮੰਡੀ ਤੋਂ ਤਕਰੀਬਨ ਤਿੰਨ ਕਿਲੋਮੀਟਰ ਦੂਰ ਹੈ। ਇਸ ਕਾਰਨ ਵਜ਼ਨ ਵਿੱਚ ਫ਼ਰਕ ਆਉਣ ’ਤੇ ਮਾਲ ਦੀ ਪੂਰਤੀ ਕਰਨ ਲਈ ਮੁੜ ਆਉਣਾ ਮੁਸ਼ਕਲ ਹੋ ਜਾਂਦਾ ਹੈ ਤੇ ਸਮੇਂ ਦੀ ਵੀ ਬਰਬਾਦੀ ਹੁੰਦੀ ਹੈ। ਆੜ੍ਹਤੀਆਂ ਨੇ ਮੰਗ ਕੀਤੀ ਕਿ ਕੰਡਾ ਖੋਲ੍ਹਣ ਦਾ ਸਮਾਂ ਸਵੇਰੇ 7 ਵਜੇ ਨਿਰਧਾਰਤ ਕੀਤਾ ਜਾਵੇ ਤਾਂ ਜੋ ਕਿਸਾਨਾਂ, ਆੜ੍ਹਤੀਆਂ ਅਤੇ ਟਰੱਕ ਚਾਲਕਾਂ ਨੂੰ ਕਿਸੇ ਕਿਸਮ ਦੀ ਪਰੇਸ਼ਾਨੀ ਦਾ ਸਾਹਮਣਾ ਨਾ ਕਰਨਾ ਪਵੇ। ਇਸ ਸਬੰਧੀ ਮਾਰਕੀਟ ਕਮੇਟੀ ਦੀ ਲੇਖਾਕਾਰ ਸੀਮਾ ਰਾਣੀ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਨ੍ਹਾਂ ਦੱਸਿਆ ਕਿ ਕਮੇਟੀ ਵੱਲੋਂ ਕੰਡਾ ਠੇਕੇ ’ਤੇ ਦਿੱਤਾ ਗਿਆ ਹੈ। ਉਨ੍ਹਾਂ ਅਨੁਸਾਰ, ਸਬੰਧਤ ਮੁਲਾਜ਼ਮ ਨੇ ਦੱਸਿਆ ਕਿ ਕੰਡੇ ਦੀਆਂ ਪਰਚੀਆਂ ਵਾਲਾ ਕਾਗਜ਼ ਖ਼ਤਮ ਹੋ ਗਿਆ ਸੀ, ਜਿਸ ਕਾਰਨ ਉਹ ਕਾਗਜ਼ ਲੈਣ ਗਿਆ ਹੋਇਆ ਸੀ। ਦੁਕਾਨਾਂ ਖੁੱਲ੍ਹਣ ਤੋਂ ਬਾਅਦ ਕਾਗਜ਼ ਲੈ ਕੇ ਵਾਪਸ ਆਉਣ ਉਪਰੰਤ ਕੰਡਾ ਖੋਲ੍ਹਿਆ ਜਾਣਾ ਸੀ।