ਦੋਸਤੀ 'ਚ ਖ਼ੂਨੀ ਖੇਡ! ਲੁਧਿਆਣਾ ਦੇ ਵਪਾਰੀ ਦੀ ਗੋਲ਼ੀ ਲੱਗਣ ਕਾਰਨ ਮੌਤ, ਪੁਲਿਸ ਨੇ ਕੀਤੀ ਸਖ਼ਤ ਕਾਰਵਾਈ

ਇਸ ਮਾਮਲੇ ਦੇ ਜਾਂਚ ਅਧਿਕਾਰੀ ਐੱਸਆਈ ਸੁਖਵਿੰਦਰ ਸਿੰਘ ਨੇ ਦੱਸਿਆ ਕਿ ਪੁਲਿਸ ਨੂੰ ਪੰਕਜ ਕੁਮਾਰ ਪੁੱਤਰ ਕਮਲ ਕੁਮਾਰ ਵਾਸੀ ਲੁਧਿਆਣਾ ਨੇ ਆਪਣੇ ਬਿਆਨਾਂ ’ਚ ਦੱਸਿਆ ਕਿ ਉਸ ਦਾ ਛੋਟਾ ਭਰਾ ਗੁਰਪ੍ਰੀਤ ਤੇ ਉਹ ਲੁਧਿਆਣਾ ਵਿਖੇ ਹੀ ਬੀਐੱਮਐੱਸ ਮੋਟਰ ਏਜੰਸੀ ਚਲਾਉਂਦੇ ਹਨ। ਉਨ੍ਹਾਂ ਦੱਸਿਆ ਕਿ ਉਸ ਦਾ ਭਰਾ ਬੀਤੇ ਕੱਲ੍ਹ ਆਪਣੇ ਦੋਸਤਾਂ ਹਰਪਾਲ ਸਿੰਘ ਉਰਫ਼ ਗੋਪੀ, ਹਰਸ਼ਵੀਰ ਸਿੰਘ ਵਿਰਦੀ ਤੇ ਗੁਰਜਿੰਦਰ ਸਿੰਘ ਭੰਮਰਾ ਨਾਲ ਲੁਧਿਆਣਾ ਤੋਂ ਖਰੜ ਘੁੰਮਣ ਲਈ ਆਏ ਸਨ। ਉਨ੍ਹਾਂ ਦੱਸਿਆ ਕਿ ਅੱਜ ਸਵੇਰੇ ਤੜਕੇ ਹਰਸ਼ਵੀਰ ਵਿਰਦੀ ਦਾ ਉਸ ਨੂੰ ਫੋਨ ਆਇਆ ਕਿ ਗੁਰਪ੍ਰੀਤ ਦੇ ਗੋਲ਼ੀ ਲੱਗੀ ਹੈ ਅਤੇ ਤੁਸੀਂ ਮੁਹਾਲੀ ਫੇਜ਼-6 ਹਸਪਤਾਲ ਪਹੁੰਚ ਜਾਓ। ਜਿਸ ਤੋਂ ਬਾਅਦ ਉਹ ਮੁਹਾਲੀ ਹਸਪਤਾਲ ਪਹੁੰਚਿਆ ਤਾਂ ਪਤਾ ਲੱਗਾ ਕਿ ਗੁਰਪ੍ਰੀਤ ਤੇ ਉਸ ਦੇ ਦੋਸਤ, ਇਕ ਜਾਣਕਾਰ ਲੜਕੀ ਦੇ ਸ਼ਿਵਾਲਿਕ ਸਿਟੀ ਖਰੜ ’ਚ ਸਥਿਤ ਇਕ ਫਲੈਟ ’ਚ ਪਹੁੰਚੇ ਹੋਏ ਸਨ, ਜਿੱਥੇ ਹੋਰ ਲੜਕੀਆਂ ਵੀ ਸਨ। ਉਨ੍ਹਾਂ ਦੱਸਿਆ ਕਿ ਇਸ ਮੌਕੇ ਗੁਰਪ੍ਰੀਤ ਨੇ ਆਪਣਾ ਲਾਇਸੈਂਸੀ .45 ਬੋਰ ਦਾ ਪਿਸਤੌਲ ਅਨਲੋਡ ਕਰ ਕੇ ਰੱਖ ਦਿੱਤਾ ਤੇ ਹਰਪਾਲ ਸਿੰਘ ਉਰਫ਼ ਗੋਪੀ ਨੇ ਵੀ ਆਪਣਾ ਪੁਆਇੰਟ .32 ਬੋਰ ਦਾ ਲਾਇਸੈਂਸੀ ਰਿਵਾਲਵਰ ਅਨਲੋਡ ਕਰ ਕੇ ਰੱਖ ਦਿੱਤਾ ਪਰ ਗੁਰਪ੍ਰੀਤ ਦੇ ਪਿਸਤੌਲ ’ਚ ਇਕ ਰੌਂਦ ਰਹਿ ਗਿਆ ਸੀ।