ਪਾਣੀ ਦੇ ਪ੍ਰਦੂਸ਼ਣ 'ਤੇ ਵੱਡਾ ਐਕਸ਼ਨ: ਸਤਲੁਜ ਤੋਂ ਲੈ ਕੇ ਨਲਕਿਆਂ ਤੱਕ ਦੇ ਪਾਣੀ ਦੀ ਹੋਵੇ ਨਿਰਪੱਖ ਜਾਂਚ; PAC ਨੇ CM ਮਾਨ ਤੇ ਰਾਜਪਾਲ ਨੂੰ ਭੇਜਿਆ ਮੰਗ-ਪੱਤਰ

ਕਮੇਟੀ ਨੇ ਕਿਹਾ ਕਿ ਕੱਚੇ ਪਾਣੀ ਵਿੱਚ ਮੌਜੂਦ ਜਾਂ ਭਵਿੱਖ ਵਿੱਚ ਪੈਦਾ ਹੋ ਸਕਣ ਵਾਲੇ ਪ੍ਰਦੂਸ਼ਕਾਂ ਮੁਤਾਬਕ ਹੀ ਟ੍ਰੀਟਮੈਂਟ ਪ੍ਰਣਾਲੀ ਦੀ ਸਮਰੱਥਾ ਦਾ ਮੁਲਾਂਕਣ ਹੋਣਾ ਚਾਹੀਦਾ ਹੈ। ਮੰਗ-ਪੱਤਰ ਵਿੱਚ ਸਤਲੁਜ ਵਿੱਚ ਸਰਸਾ-ਬਾਲਦ ਅਤੇ ਸਵਾਂ ਦਰਿਆ ਪ੍ਰਣਾਲੀਆਂ ਰਾਹੀਂ ਆਉਣ ਵਾਲੇ ਸੰਭਾਵਿਤ ਪ੍ਰਦੂਸ਼ਣ ਤੇ ਬੱਦੀ-ਬਰੋਟੀਵਾਲਾ-ਨਾਲਾਗੜ੍ਹ ਖੇਤਰ ਦੇ ਉਦਯੋਗਿਕ ਪ੍ਰਦੂਸ਼ਣ ਦੇ ਪ੍ਰਭਾਵ ਦਾ ਵੀ ਵਿਗਿਆਨਕ ਅਧਿਐਨ ਕਰਵਾਉਣ ਦੀ ਮੰਗ ਕੀਤੀ ਹੈ।ਪੀਏਸੀ ਨੇ ਵਾਟਰ ਟ੍ਰੀਟਮੈਂਟ ਪਲਾਂਟ ਦੀ ਅੰਤਿਮ ਟ੍ਰੀਟਮੈਂਟ ਪ੍ਰਕਿਰਿਆ ਜਨਤਕ ਕਰਨ ਦੇ ਨਾਲ ਇਹ ਵੀ ਸਪੱਸ਼ਟ ਕਰਨ ਦੀ ਮੰਗ ਕੀਤੀ ਹੈ ਕਿ ਪਲਾਂਟ ਭਾਰੀ ਧਾਤਾਂ, ਯੂਰੇਨੀਅਮ, ਕੀਟਨਾਸ਼ਕਾਂ, ਦਵਾਈਆਂ ਦੇ ਅਵਸ਼ੇਸ਼, ਐਂਟੀਬਾਇਓਟਿਕਸ, ਪੀਐੱਫਏਐੱਸ ਅਤੇ ਹੋਰ ਉਦਯੋਗਿਕ ਤੇ ਉਭਰਦੇ ਪ੍ਰਦੂਸ਼ਕਾਂ ਨੂੰ ਕਿੰਨੀ ਪ੍ਰਭਾਵਸ਼ਾਲੀ ਢੰਗ ਨਾਲ ਹਟਾ ਸਕਦਾ ਹੈ। ਕਮੇਟੀ ਨੇ ਮੰਗ-ਪੱਤਰ ’ਚ ਸਬੰਧਤ ਅਧਿਕਾਰੀਆਂ ਸਾਹਮਣੇ 80 ਵਿਸ਼ੇਸ਼ ਸਵਾਲ ਰੱਖੇ ਹਨ। ਪ੍ਰੋਜੈਕਟ ਦੀ ਮਨਜ਼ੂਰਸ਼ੁਦਾ ਡੀਪੀਆਰ, ਕੁੱਲ ਲਾਗਤ, ਵਿੱਤੀ ਪ੍ਰਬੰਧ, ਠੇਕੇ ਦੀਆਂ ਸ਼ਰਤਾਂ, ਮੌਜੂਦਾ ਭੌਤਿਕ ਤੇ ਵਿੱਤੀ ਪ੍ਰਗਤੀ, ਕੱਚੇ ਪਾਣੀ ਦੇ ਇੰਟੇਕ ਦੀ ਸੁਰੱਖਿਆ ਅਤੇ ਨਹਿਰ ਵਿੱਚ ਸਾਲ ਭਰ ਪਾਣੀ ਦੀ ਉਪਲੱਬਧਤਾ ਵਰਗੇ ਮੁੱਦੇ ਸ਼ਾਮਲ ਹਨ। ਪ੍ਰਦੂਸ਼ਣ ਦੀ ਸਥਿਤੀ ਵਿੱਚ ਤੁਰੰਤ ਚੇਤਾਵਨੀ, ਪਾਣੀ ਦੀ ਸਪਲਾਈ ਬੰਦ ਕਰਨ ਦੀ ਵਿਵਸਥਾ, ਐਮਰਜੈਂਸੀ ਲਈ ਕੱਚੇ ਪਾਣੀ ਦੀ ਵਾਧੂ ਸਟੋਰੇਜ, ਵਾਟਰ ਟ੍ਰੀਟਮੈਂਟ ਪਲਾਂਟ ਦੀ ਸਲੱਜ ਅਤੇ ਫਿਲਟਰ ਬੈਕਵਾਸ਼ ਪਾਣੀ ਦੇ ਵਿਗਿਆਨਕ ਨਿਪਟਾਰੇ, ਓਵਰਹੈੱਡ ਟੈਂਕਾਂ ਅਤੇ ਪਾਈਪਲਾਈਨ ਨੈੱਟਵਰਕ ਦੀ ਸਫ਼ਾਈ ਤੇ ਨਿਗਰਾਨੀ ਬਾਰੇ ਵੀ ਜਾਣਕਾਰੀ ਮੰਗੀ ਹੈ।