ਹਿੱਤਚਿੰਤਕ ਅਭਿਆਨ ਨਾਲ ਸਾਰੇ ਹਿੰਦੂਆਂ ਨੂੰ ਜੋੜੇਗਾ ਵੀਐੱਚਪੀ ਹਿੱਤਚਿੰਤਕ ਅਭਿਆਨ ਨਾਲ ਸਾਰੇ ਹਿੰਦੂਆਂ ਨੂੰ ਜੋੜੇਗਾ ਵਿਸ਼ਵ ਹਿੰਦੂ ਪ੍ਰੀਸ਼ਦ : ਪੰਡਿਤ/ਅਸ਼ੋਕ/ਜੱਸਲ
Publish Date: Tue, 17 Nov 2026 09:26 PM (IST)
Updated Date: Tue, 17 Nov 2026 09:27 PM (IST)
ਅਮਰੀਕ ਮੱਲ੍ਹੀ ਪੰਜਾਬੀ ਜਾਗਰਣ ਕਪੂਰਥਲਾ : ਵਿਸ਼ਵ ਹਿੰਦੂ ਪ੍ਰੀਸ਼ਦ ਦੇ ਦੇਸ਼ ਵਿਆਪੀ ਹਿੱਤਚਿੰਤਕ ਅਭਿਆਨ ਦੇ ਹਿੱਸੇ ਵਜੋਂ, ਕਪੂਰਥਲਾ ਜ਼ਿਲ੍ਹੇ ਵਿੱਚ ਵਿਹਿਪ ਨੇ ਜਨ ਸੰਪਰਕ ਤੇ ਮੈਂਬਰਸ਼ਿਪ ਵਿਸਥਾਰ ਮੁਹਿੰਮਾਂ ਨੂੰ ਤੇਜ਼ ਕਰ ਦਿੱਤਾ ਗਿਆ ਹੈ। ਵਿਸ਼ਵ ਹਿੰਦੂ ਪ੍ਰੀਸ਼ਦ ਜਲੰਧਰ ਵਿਭਾਗ ਦੇ ਪ੍ਰਧਾਨ ਨਰੇਸ਼ ਪੰਡਿਤ, ਜ਼ਿਲ੍ਹਾ ਪ੍ਰਧਾਨ ਅਸ਼ੋਕ ਬਾਵਾ ਤੇ ਜ਼ਿਲ੍ਹਾ ਉਪ ਪ੍ਰਧਾਨ ਮੋਹਿਤ ਜਸਲ ਨੇ ਸਾਂਝੇ ਤੌਰ ’ਤੇ ਕਪੂਰਥਲਾ ਦੇ ਸਾਰੇ ਨਾਗਰਿਕਾਂ, ਨੌਜਵਾਨਾਂ ਤੇ ਬੁੱਧੀਜੀਵੀਆਂ ਨੂੰ ਇਸ ਮੁਹਿੰਮ ਵਿੱਚ ਸ਼ਾਮਲ ਹੋਣ ਦੀ ਅਪੀਲ ਕੀਤੀ ਹੈ। ਆਪਣੇ ਸੰਦੇਸ਼ ਵਿੱਚ ਨਰੇਸ਼ ਪੰਡਿਤ ਨੇ ਕਿਹਾ ਕਿ ਹਿੱਤਚਿੰਤਕ ਅਭਿਆਨ ਦਾ ਮੁੱਖ ਉਦੇਸ਼ ਹਿੰਦੂ ਭਾਈਚਾਰੇ ਨੂੰ ਇੱਕਜੁੱਟ ਕਰਨਾ, ਭਾਰਤੀ ਸੱਭਿਆਚਾਰ ਤੇ ਪਰੰਪਰਾਵਾਂ ਦੀ ਰੱਖਿਆ ਕਰਨਾ ਤੇ ਸਮਾਜਿਕ ਬੁਰਾਈਆਂ ਨੂੰ ਖਤਮ ਕਰਕੇ ਸਮਾਜਿਕ ਸਦਭਾਵਨਾ ਨੂੰ ਉਤਸ਼ਾਹਿਤ ਕਰਨਾ ਹੈ। ਨਰੇਸ਼ ਪੰਡਿਤ ਨੇ ਕਿਹਾ ਕਿ ਸੇਵਾ, ਸੁਰੱਖਿਆ ਤੇ ਕਦਰਾਂ-ਕੀਮਤਾਂ ਦੇ ਸਿਧਾਂਤ ’ਤੇ ਕੰਮ ਕਰਨ ਵਾਲਾ ਵਿਸ਼ਵ ਹਿੰਦੂ ਪ੍ਰੀਸ਼ਦ ਸਿੱਖਿਆ, ਸਿਹਤ, ਗਊ ਰੱਖਿਆ ਤੇ ਨਸ਼ਾ ਛੁਡਾਊ ਵਰਗੇ ਲੋਕ ਭਲਾਈ ਪ੍ਰੋਜੈਕਟਾਂ ਰਾਹੀਂ ਸਮਾਜ ਦੀ ਸੇਵਾ ਕਰ ਰਿਹਾ ਹੈ। ਨਰੇਸ਼ ਪੰਡਿਤ ਨੇ ਕਪੂਰਥਲਾ ਸ਼ਹਿਰ ਤੇ ਆਲੇ ਦੁਆਲੇ ਦੇ ਪੇਂਡੂ ਖੇਤਰਾਂ ਦੇ ਵਸਨੀਕਾਂ ਨੂੰ ਅੱਗੇ ਆਉਣ ਤੇ ਵਿਸ਼ਵ ਹਿੰਦੂ ਪ੍ਰੀਸ਼ਦ ਦੇ ਹਿੱਤਚਿੰਤਕ ਬਣਨ ਤੇ ਰਾਸ਼ਟਰ ਤੇ ਧਰਮ ਦੀ ਸੇਵਾ ਵਿੱਚ ਸਰਗਰਮੀ ਨਾਲ ਯੋਗਦਾਨ ਪਾਉਣ ਦੀ ਅਪੀਲ ਕੀਤੀ। ਉਨ੍ਹਾਂ ਕਿਹਾ ਕਿ ਇਸ ਮੁਹਿੰਮ ਨੂੰ ਸਫਲ ਬਣਾਉਣ ਲਈ ਵਰਕਰਾਂ ਦੇ ਸਮੂਹ ਜ਼ਿਲ੍ਹੇ ਦੇ ਵੱਖ-ਵੱਖ ਵਾਰਡਾਂ ਤੇ ਬਲਾਕਾਂ ਵਿੱਚ ਘਰ-ਘਰ ਜਾ ਰਹੇ ਹਨ, ਤਾਂ ਜੋ ਵੱਧ ਤੋਂ ਵੱਧ ਲੋਕਾਂ ਨੂੰ ਇਸ ਮੁਹਿੰਮ ਦਾ ਹਿੱਸਾ ਬਣਾਇਆ ਜਾ ਸਕੇ। ਇਸ ਵਾਰ ਤਿੰਨ ਸਾਲਾਂ ਵਿੱਚ ਇੱਕ ਵਾਰ ਚਲਾਈ ਜਾਣ ਵਾਲੀ ਇਸ ਹਿੱਤਚਿੰਤਕ ਮੁਹਿੰਮ ਦੇ ਤਹਿਤ ਵਿਸ਼ਵ ਹਿੰਦੂ ਪ੍ਰੀਸ਼ਦ ਨੇ ਦੇਸ਼ ਦੇ 1.5 ਲੱਖ ਪਿੰਡਾਂ ਤੱਕ ਪਹੁੰਚਣ ਦੀ ਯੋਜਨਾ ਬਣਾਈ ਹੈ। ਹੁਣ ਤੱਕ ਇੱਕ ਲੱਖ ਪਿੰਡਾਂ ਵਿੱਚ 34 ਲੱਖ ਹਿੱਤਚਿੰਤਕ ਹਨ। 15 ਸਾਲ ਤੋਂ ਵੱਧ ਉਮਰ ਦਾ ਕੋਈ ਵੀ ਵਿਅਕਤੀ ਹਿੱਤਚਿੰਤਕ ਬਣ ਸਕਦਾ ਹੈ। ਹਿੱਤਚਿੰਤਕ ਵਜੋਂ ਚੁਣੇ ਜਾਣ ਵਾਲਿਆਂ ਨੂੰ 20 ਰੁਪਏ ਦਾ ਕੂਪਨ ਮਿਲਦਾ ਹੈ। ਲੋਕਾਂ ਦੇ ਖਾਸ ਸਮੂਹਾਂ ਨੂੰ ਸ਼ਾਮਲ ਕਰਨ ਲਈ ਵੱਖਰਾ ਆਊਟਰੀਚ ਵੀ ਕੀਤਾ ਜਾਵੇਗਾ। ਇਸ ਮੁਹਿੰਮ ਵਿੱਚ ਡਾਕਟਰ, ਇੰਜੀਨੀਅਰ, ਚਾਰਟਰਡ ਅਕਾਊਂਟੈਂਟ, ਵਕੀਲ, ਸਾਬਕਾ ਜੱਜ, ਗਾਇਕ, ਅਦਾਕਾਰ, ਖਿਡਾਰੀ ਤੇ ਹੋਰ ਮਸ਼ਹੂਰ ਹਸਤੀਆਂ ਸ਼ਾਮਲ ਹੋਣਗੀਆਂ। ਅਸ਼ੋਕ ਬਾਵਾ ਤੇ ਮੋਹਿਤ ਜੱਸਲ ਨੇ ਦੱਸਿਆ ਕਿ ਹਿੱਤਚਿੰਤਕ ਮੁਹਿੰਮ ਦੇ ਟੀਮ ਮੈਂਬਰ ਕਪੂਰਥਲਾ ਦੇ ਹਰ ਹਿੰਦੂ ਘਰ ਦਾ ਦੌਰਾ ਕਰਨਗੇ ਤਾਂ ਜੋ ਸਾਰੇ ਹਿੰਦੂਆਂ ਨੂੰ ਸ਼ੁਭਚਿੰਤਕ ਬਣਾਇਆ ਜਾ ਸਕੇ। ਵੀਐੱਚਪੀ ਦੀਆਂ ਗਤੀਵਿਧੀਆਂ ਬਾਰੇ ਵੀ ਜਨਤਾ ਨੂੰ ਵਿਸਤ੍ਰਿਤ ਜਾਣਕਾਰੀ ਪ੍ਰਦਾਨ ਕੀਤੀ ਜਾਵੇਗੀ।