ਸੁਆਮੀ ਸੰਤ ਦਾਸ ਸਕੂਲ ਦਾ ਖੇਡਾਂ ’ਚ ਸ਼ਾਨਦਾਰ ਪ੍ਰਦਰਸ਼ਨ

ਪੰਜਾਬੀ ਜਾਗਰਣ ਪ੍ਰਤੀਨਿੱਧ ਫਗਵਾੜਾ : ਪੰਜਾਬ ਸਕੂਲ ਸਿੱਖਿਆ ਬੋਰਡ ਵੱਲੋਂ ਕਰਵਾਈਆਂ ਗਈਆਂ ਪੰਜਾਬ ਸਕੂਲ ਖੇਡਾਂ 2026-27 ਵਿੱਚ ਸੁਆਮੀ ਸੰਤ ਦਾਸ ਪਬਲਿਕ ਸਕੂਲ ਫਗਵਾੜਾ ਦੇ ਵਿਦਿਆਰਥੀਆਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਕੇ ਸਕੂਲ ਦਾ ਨਾਮ ਰੌਸ਼ਨ ਕੀਤਾ। ਯੋਗਾ ਵਿੱਚ ਸਿਮਰਪ੍ਰੀਤ ਕੌਰ ਨੇ ਆਰਟਿਸਟਿਕ ਯੋਗਾ ਵਿੱਚ ਸੋਨ ਤਗਮਾ ਤੇ ਵਿਅਕਤੀਗਤ ਰਵਾਇਤੀ ਯੋਗਾ ਵਿੱਚ ਤੀਜਾ ਸਥਾਨ ਹਾਸਲ ਕੀਤਾ, ਜਦਕਿ ਪੱਲਵੀ ਨੇ ਆਰਟਿਸਟਿਕ ਯੋਗਾ ਵਿੱਚ ਚਾਂਦੀ ਦਾ ਤਗਮਾ ਜਿੱਤਿਆ। ਦੋਵਾਂ ਲੜਕੀਆਂ ਦੀ ਚੋਣ ਜ਼ਿਲ੍ਹਾ ਪੱਧਰੀ ਮੁਕਾਬਲੇ ਲਈ ਕੀਤੀ ਗਈ ਹੈ। ਬੈਡਮਿੰਟਨ (ਅੰਡਰ-19 ਲੜਕੇ) ਵਿੱਚ, ਹਰਸ਼ਿਤ, ਆਯੁਸ਼, ਸਵਰਿਤ, ਅਭਿਜੀਤ ਤੇ ਵੇਦਾਂਸ਼ ਦੀ ਟੀਮ ਨੇ ਜ਼ੋਨਲ ਪੱਧਰ ਤੇ ਹਿੱਸਾ ਲਿਆ। ਹਰਸ਼ਿਤ ਨੇ ਜ਼ਿਲ੍ਹਾ ਪੱਧਰ ਤੇ ਦੂਜਾ ਸਥਾਨ ਪ੍ਰਾਪਤ ਕੀਤਾ ਤੇ ਉਸਦੀ ਚੋਣ ਰਾਜ ਪੱਧਰ ਲਈ ਕੀਤੀ ਗਈ ਹੈ। ਸਕੂਲ ਨੇ ਕ੍ਰਿਕੇਟ ਵਿੱਚ ਵੀ ਸ਼ਲਾਘਾਯੋਗ ਪ੍ਰਦਰਸ਼ਨ ਕੀਤਾ, ਜਿੱਥੇ ਵਿਦਿਆਰਥੀਆਂ ਪ੍ਰਣਯ ਗਾਬਾ, ਨੈਤਿਕ ਚੋਪੜਾ, ਰਣਬੀਰ ਮਲਹੋਤਰਾ ਤੇ ਆਰਵ ਚੌਹਾਨ ਨੇ ਜ਼ੋਨਲ ਪੱਧਰੀ ਟੂਰਨਾਮੈਂਟ ਵਿੱਚ ਸਕੂਲ ਦੀ ਨੁਮਾਇੰਦਗੀ ਕੀਤੀ। ਸਭ ਤੋਂ ਵੱਡੀ ਪ੍ਰਾਪਤੀ ਖੋ-ਖੋ ਵਿੱਚ ਹੋਈ, ਜਿੱਥੇ ਸਕੂਲ ਦੀਆਂ ਅੰਡਰ-14 (ਲੜਕੇ), ਅੰਡਰ-17 (ਲੜਕੇ) ਤੇ ਅੰਡਰ-19 (ਲੜਕੀਆਂ) ਦੀਆਂ ਟੀਮਾਂ ਨੇ ਜ਼ਿਲ੍ਹਾ ਪੱਧਰ ਤੇ ਬੇਮਿਸਾਲ ਖੇਡ ਭਾਵਨਾ ਦਾ ਪ੍ਰਦਰਸ਼ਨ ਕੀਤਾ। ਅੰਡਰ-19 ਲੜਕੀਆਂ ਦੀ ਖੋ-ਖੋ ਟੀਮ ਨੇ ਸੋਨ ਤਗਮਾ ਜਿੱਤਿਆ ਤੇ ਪਹਿਲਾ ਸਥਾਨ ਹਾਸਲ ਕੀਤਾ। 5 ਲੜਕੀਆਂ ਖੁਸ਼ਪ੍ਰੀਤ ਕੌਰ, ਰੂਹਾਨੀ, ਅੰਕਿਤਾ, ਅਰਸ਼ਦੀਪ ਤੇ ਅਭਿਨੀਤ ਦੀ ਚੋਣ ਰਾਜ ਪੱਧਰ ਲਈ ਕੀਤੀ ਗਈ ਹੈ। ਅੰਡਰ-14 ਲੜਕਿਆਂ ਦੀ ਟੀਮ ਨੇ ਦੂਜਾ ਸਥਾਨ ਪ੍ਰਾਪਤ ਕੀਤਾ ਤੇ 4 ਲੜਕਿਆਂ ਦਮਨਪ੍ਰੀਤ, ਪਵਨ ਕੁਮਾਰ, ਗੁਰਕੀਰਤ ਤੇ ਅੰਕਿਤ ਤੇ 1 ਲੜਕੀ ਰੁਦਰਵਿਕਾ ਦੀ ਚੋਣ ਰਾਜ ਪੱਧਰ ਲਈ ਕੀਤੀ ਗਈ। ਅੰਡਰ-17 ਲੜਕਿਆਂ ਦੀ ਟੀਮ ਨੇ ਜ਼ਿਲ੍ਹਾ ਪੱਧਰ ਤੇ ਤੀਜਾ ਸਥਾਨ ਪ੍ਰਾਪਤ ਕੀਤਾ ਤੇ ਮਯੰਕ ਸੋਨੀ, ਗੀਤਾਂਗ, ਸੰਦੀਪ ਤੇ ਗੁਰਮਨ ਸਿੰਘ ਦੀ ਚੋਣ ਰਾਜ ਪੱਧਰ ਲਈ ਕੀਤੀ ਗਈ। ਮੋਹਿਤ ਰੇਰੂ ਨੇ ਵੀ ਅੰਡਰ-19 ਵਰਗ ਵਿੱਚ ਪਹਿਲਾ ਸਥਾਨ ਹਾਸਲ ਕੀਤਾ। ਸਕੂਲ ਦੀ ਪ੍ਰਿੰਸੀਪਲ, ਅੰਜੂ ਮਹਿਤਾ ਨੇ ਸਾਰੇ ਖਿਡਾਰੀਆਂ ਨੂੰ ਵਧਾਈ ਦਿੱਤੀ ਤੇ ਨੌਜਵਾਨ ਖਿਡਾਰੀਆਂ ਨੂੰ ਉਨ੍ਹਾਂ ਦੇ ਭਵਿੱਖ ਵਿੱਚ ਹੋਣ ਵਾਲੇ ਟੂਰਨਾਮੈਂਟਾਂ ਲਈ ਸ਼ੁੱਭਕਾਮਨਾਵਾਂ ਦਿੱਤੀਆਂ।