ਸੈਨਿਕ ਸਕੂਲ ਨੇ ਆਜ਼ਾਦੀ ਤੇ ਸਥਾਪਨਾ ਦਿਵਸ ਸਮਾਰੋਹ ਮਨਾਇਆ

--ਕੈਡਿਟ ਸੁਪਨੇ ਦੇਖਣ ਦੀ ਆਜ਼ਾਦੀ ਤੇ ਅਸਫਲਤਾ ਦਾ ਸਾਹਮਣਾ ਕਰਨ ਦਾ ਹੌਸਲਾ ਰੱਖਣ : ਮੇਜਰ ਜਨਰਲ ਪੀਕੇ ਸਿੰਘ

ਮੱਲ੍ਹੀ, ਪੰਜਾਬੀ ਜਾਗਰਣ

ਕਪੂਰਥਲਾ : ਸੈਨਿਕ ਸਕੂਲ ਕਪੂਰਥਲਾ ਵਿੱਚ ਅੱਜ 15 ਅਗਸਤ ਦੇ ਮੌਕੇ ’ਤੇ ਇਤਿਹਾਸਕ ਜਗਤਜੀਤ ਪੈਲੇਸ ਵਿਖੇ 80ਵਾਂ ਆਜ਼ਾਦੀ ਦਿਵਸ ਸਮਾਰੋਹ ਤੇ ਸਕੂਲ ਦਾ 65ਵਾਂ ਸਥਾਪਨਾ ਦਿਵਸ ਮਨਾਇਆ ਗਿਆ। ਇਸ ਸਮਾਰੋਹ ਵਿੱਚ ਮੁੱਖ ਮਹਿਮਾਨ ਵਜੋਂ ਮੇਜਰ ਜਨਰਲ ਪੀਕੇ ਸਿੰਘ (ਐੱਸਐੱਮ), ਚੀਫ਼ ਆਫ਼ ਸਟਾਫ਼, 11 ਕੋਰ ਤੇ ਸੈਨਿਕ ਸਕੂਲ ਕਪੂਰਥਲਾ (ਲੋਕਲ ਬੋਰਡ ਆਫ਼ ਐਡਮਿਨਿਸਟ੍ਰੇਸ਼ਨ) ਦੇ ਚੇਅਰਮੈਨ ਨੇ ਸ਼ਿਰਕਤ ਕੀਤੀ। ਇਸ ਮੌਕੇ ਸਕੂਲ ਦੇ ਵਿਸ਼ੇਸ਼ ਪੁਰਾਣੇ ਵਿਦਿਆਰਥੀ ਲੈਫਟੀਨੈਂਟ ਜਨਰਲ ਗੁਰਦੀਪ ਸਿੰਘ (ਸੇਵਾਮੁਕਤ) ਤੇ ਆਕਾਸ਼ ਬਾਂਸਲ (ਆਈਏਐੱਸ) ਜ਼ਿਲ੍ਹਾ ਅਧਿਕਾਰੀ ਕਪੂਰਥਲਾ ਸਮੇਤ ਸੀਨੀਅਰ ਪੁਰਾਣੇ ਵਿਦਿਆਰਥੀ, ਮਾਪੇ, ਸਟਾਫ਼ ਤੇ ਕੈਡਿਟ ਮੌਜੂਦ ਸਨ। ਜ਼ਿਕਰਯੋਗ ਹੈ ਕਿ ਜ਼ਿਲ੍ਹਾ ਅਧਿਕਾਰੀ ਨੇ ਆਪਣੇ ਰੁੱਝੇ ਪ੍ਰੋਗਰਾਮ ਦੇ ਬਾਵਜੂਦ ਇਸ ਸਮਾਰੋਹ ਵਿੱਚ ਸ਼ਮੂਲੀਅਤ ਕੀਤੀ। ਇਸ ਮੌਕੇ ਸਕੂਲ ਦੇ ਪ੍ਰਿੰਸੀਪਲ ਗਰੁੱਪ ਕੈਪਟਨ ਆਈ ਮਨੋਜ ਮੇਨਨ ਨੇ ਮੁੱਖ ਮਹਿਮਾਨ, ਸੀਨੀਅਰ ਪੁਰਾਣੇ ਵਿਦਿਆਰਥੀਆਂ, ਮਾਪਿਆਂ ਤੇ ਹੋਰ ਪਤਵੰਤੇ ਵਿਅਕਤੀਆਂ ਦਾ ਸਵਾਗਤ ਕੀਤਾ। ਉਨ੍ਹਾਂ ਨੇ ਸੈਨਿਕ ਸਕੂਲ ਕਪੂਰਥਲਾ ਦੀਆਂ ਪਰੰਪਰਾਵਾਂ ਤੇ ਕਦਰਾਂ-ਕੀਮਤਾਂ ਨੂੰ ਅੱਗੇ ਵਧਾਉਣ ਵਿੱਚ ਪੁਰਾਣੇ ਵਿਦਿਆਰਥੀਆਂ, ਸਟਾਫ਼ ਤੇ ਕੈਡਿਟਾਂ ਦੇ ਯੋਗਦਾਨ ਦੀ ਵੀ ਸ਼ਲਾਘਾ ਕੀਤੀ। ਸਮਾਰੋਹ ਦੀ ਸ਼ੁਰੂਆਤ ਸਕੂਲ ਦੇ ‘ਸੈਕਪ ਸਮ੍ਰਿਤੀ ਸਥਲ’ ’ਤੇ ਪੁਸ਼ਪਾਂਜਲੀ ਅਰਪਿਤ ਕਰਨ ਨਾਲ ਹੋਈ। ਇੱਥੇ ਮੁੱਖ ਮਹਿਮਾਨ ਤੇ ਹੋਰ ਪਤਵੰਤੇ ਵਿਅਕਤੀਆਂ ਨੇ ਰਾਸ਼ਟਰ ਲਈ ਸਰਵਉੱਚ ਬਲਿਦਾਨ ਦੇਣ ਵਾਲੇ ਹਥਿਆਰਬੰਦ ਸੈਨਾਵਾਂ ਦੇ ਜਵਾਨਾਂ ਤੇ ਪੁਰਾਣੇ ਵਿਦਿਆਰਥੀਆਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ। ਇਸ ਤੋਂ ਬਾਅਦ ਗਾਰਡ ਆਫ਼ ਆਨਰ ਤੇ ਰਸਮੀ ਪਰੇਡ ਹੋਈ। ਪਰੇਡ ਦਾ ਨਿਰੀਖਣ ਕਰਦਿਆਂ ਮੇਜਰ ਜਨਰਲ ਪੀਕੇ ਸਿੰਘ ਨੇ ਕੈਡਿਟਾਂ ਦੀ ਹਾਜ਼ਰੀ, ਅਨੁਸ਼ਾਸਨ, ਡ੍ਰਿੱਲ ਤੇ ਤਾਲਮੇਲ ਦੀ ਸ਼ਲਾਘਾ ਕੀਤੀ। ਨਿਸ਼ਾਨ ਟੋਲੀ, ਸਕੂਲ ਬੈਂਡ ਤੇ ਸੱਭਿਆਚਾਰਕ ਪੇਸ਼ਕਾਰੀਆਂ ਵੀ ਸਮਾਰੋਹ ਦਾ ਹਿੱਸਾ ਰਹੀਆਂ। ਇਸ ਮੌਕੇ ਆਪਣੇ ਸੰਬੋਧਨ ਵਿੱਚ ਮੁੱਖ ਮਹਿਮਾਨ ਨੇ ਕਿਹਾ ਕਿ ਸੁਪਨੇ ਦੇਖਣ ਦੀ ਆਜ਼ਾਦੀ, ਅਸਫਲਤਾ ਦਾ ਸਾਹਮਣਾ ਕਰਨ ਦਾ ਹੌਸਲਾ ਤੇ ਮੁੜ ਖੜ੍ਹੇ ਹੋਣ ਦਾ ਅਨੁਸ਼ਾਸਨ ਹੀ ਵਿਅਕਤੀ ਨੂੰ ਸਫਲ ਬਣਾਉਂਦਾ ਹੈ। ਉਨ੍ਹਾਂ ਨੇ ਇਸ ਮੌਕੇ ਦੀ ਮਹੱਤਤਾ ਤੇ ਰਾਸ਼ਟਰ ਦੀ ਸੇਵਾ ਤੇ ਅਗਵਾਈ ਲਈ ਨੌਜਵਾਨ ਵਿਦਿਆਰਥੀਆਂ ਨੂੰ ਤਿਆਰ ਕਰਨ ਵਿੱਚ ਸਕੂਲ ਦੇ 65 ਸਾਲਾਂ ਦੇ ਯੋਗਦਾਨ ਨੂੰ ਰੇਖਾਂਕਿਤ ਕੀਤਾ। ਉਨ੍ਹਾਂ ਨੇ ਨੌਜਵਾਨ ਕੈਡਿਟਾਂ ਨੂੰ ਕਿਹਾ, “ਆਜ਼ਾਦੀ ਸਾਨੂੰ ਸੁਪਨੇ ਦੇਖਣ ਦੀ ਥਾਂ ਦਿੰਦੀ ਹੈ। ਹੌਸਲਾ ਸਾਨੂੰ ਅਸਫਲਤਾ ਦਾ ਸਾਹਮਣਾ ਕਰਨ ਦੀ ਤਾਕਤ ਦਿੰਦਾ ਹੈ। ਅਨੁਸ਼ਾਸਨ ਸਾਨੂੰ ਉਦੋਂ ਤੱਕ ਉੱਠਦੇ ਰਹਿਣ ਦੀ ਸ਼ਕਤੀ ਦਿੰਦਾ ਹੈ, ਜਦੋਂ ਤੱਕ ਸੁਪਨਾ ਹਕੀਕਤ ਨਹੀਂ ਬਣ ਜਾਂਦਾ।

ਇਸ ਮੌਕੇ ਸੈਨਿਕ ਸਕੂਲ ਕਪੂਰਥਲਾ ਦੇ 65ਵੇਂ ਸਥਾਪਨਾ ਦਿਵਸ ਦੀ ਯਾਦ ਵਿੱਚ ਰਸਮੀ ਕੇਕ ਕੱਟਣ ਦੀ ਰਸਮ ਵੀ ਹੋਈ। ਸਕੂਲ ਦੀ ‘ਗ੍ਰੀਨ ਵੈਲਕਮ’ ਪਹਿਲਕਦਮੀ ਤਹਿਤ ਮੁੱਖ ਮਹਿਮਾਨ ਨੂੰ ਇੱਕ ਪੌਦਾ ਭੇਟ ਕੀਤਾ ਗਿਆ। ਸਮਾਰੋਹ ਦਾ ਸਮਾਪਨ ਕੈਡਿਟਾਂ, ਸਟਾਫ਼, ਮਾਪਿਆਂ, ਪੁਰਾਣੇ ਵਿਦਿਆਰਥੀਆਂ ਤੇ ਪਤਵੰਤੇ ਵਿਅਕਤੀਆਂ ਦੀ ਭਾਗੀਦਾਰੀ ਨਾਲ ਹੋਇਆ।