ਸਿਲਾਈ ਕੋਰਸ ਪੂਰਾ ਕਰਨ ਵਾਲੀਆਂ 15 ਲੜਕੀਆਂ ਨੂੰ ਸਰਟੀਫਿਕੇਟ ਪ੍ਰਦਾਨ ਕੀਤੇ

ਲਖਵੀਰ ਸਿੰਘ ਲੱਖੀ ਪੰਜਾਬੀ ਜਾਗਰਣ ਸੁਲਤਾਨਪੁਰ ਲੋਧੀ : ਆਰੀਆ ਸਮਾਜ ਚੌਕ ਸਥਿਤ ਪ੍ਰਾਚੀਨ ਸ਼ਿਵ ਮੰਦਰ ਕਮੇਟੀ ਦੀ ਦੇਖ-ਰੇਖ ਹੇਠ ਚੱਲ ਰਹੇ ਦੀਵਾਨ ਰਾਮ ਜਸ ਸਾਹਿਬ ਚੈਰੀਟੇਬਲ ਟੇਲਰਿੰਗ ਸਕੂਲ ਵਿੱਚ ਸਿਲਾਈ ਕੋਰਸ ਸਫਲਤਾਪੂਰਵਕ ਪੂਰਾ ਕਰਨ ਵਾਲੀਆਂ 15 ਲੜਕੀਆਂ ਨੂੰ ਸਰਟੀਫਿਕੇਟ ਪ੍ਰਦਾਨ ਕੀਤੇ ਗਏ। ਇਸ ਮੌਕੇ ਮੰਦਰ ਪ੍ਰਬੰਧਕ ਕਮੇਟੀ ਦੀ ਪ੍ਰਧਾਨ ਨੀਲਮ ਵਿਜ, ਨਰੇਸ਼ ਪਾਲ ਪੁਰੀ, ਅਸ਼ੋਕ ਗੁਜਰਾਲ, ਕੌਂਸਲਰ ਜਤਿੰਦਰ ਸੇਠੀ, ਡਾ. ਸੁਖਵਿੰਦਰ ਸਿੰਘ, ਪੰਡਿਤ ਆਲੋਕ ਨਾਥ ਤਿਵਾਰੀ, ਪ੍ਰਿੰਸੀਪਲ ਸੁਮਨ ਠਾਕੁਰ, ਅਸ਼ਵਨੀ ਪਰਮਾਰ ਅਤੇ ਸ਼ਾਰਦਾ ਦੇਵੀ ਨੇ ਲੜਕੀਆਂ ਨੂੰ ਸਰਟੀਫਿਕੇਟ ਦਿੱਤੇ ਅਤੇ ਉਨ੍ਹਾਂ ਦੀ ਹੌਸਲਾ-ਅਫਜ਼ਾਈ ਕੀਤੀ। ਪ੍ਰਿੰਸੀਪਲ ਸੁਮਨ ਠਾਕੁਰ ਨੇ ਦੱਸਿਆ ਕਿ 15 ਲੜਕੀਆਂ ਨੇ ਸਿਲਾਈ ਦੀ ਸਿਖਲਾਈ ਪੂਰੀ ਕੀਤੀ ਹੈ ਅਤੇ ਅੱਜ ਉਨ੍ਹਾਂ ਨੂੰ ਸਰਟੀਫਿਕੇਟ ਦਿੱਤੇ ਗਏ ਹਨ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਹੁਨਰਾਂ ਦੀ ਮਦਦ ਨਾਲ ਲੜਕੀਆਂ ਆਪਣੇ ਬੁਟੀਕ ਖੋਲ੍ਹ ਸਕਦੀਆਂ ਹਨ, ਸਵੈ-ਰੁਜ਼ਗਾਰ ਅਪਣਾ ਸਕਦੀਆਂ ਹਨ, ਆਰਥਿਕ ਤੌਰ ਤੇ ਆਜ਼ਾਦ ਹੋ ਸਕਦੀਆਂ ਹਨ ਅਤੇ ਆਪਣੇ ਪਰਿਵਾਰਾਂ ਲਈ ਸਹਾਰਾ ਬਣ ਸਕਦੀਆਂ ਹਨ।ਕਮੇਟੀ ਦੀ ਪ੍ਰਧਾਨ ਨੀਲਮ ਵਿਜ ਨੇ ਕਿਹਾ ਕਿ ਦੀਵਾਨ ਰਾਮ ਜਸ ਸਾਹਿਬ ਚੈਰੀਟੇਬਲ ਟੇਲਰਿੰਗ ਸਕੂਲ ਸਥਾਪਤ ਕਰਨ ਦਾ ਮੁੱਖ ਉਦੇਸ਼ ਲੋੜਵੰਦ ਲੜਕੀਆਂ ਨੂੰ ਸਿਲਾਈ ਦਾ ਕੰਮ ਸਿਖਾ ਕੇ ਉਨ੍ਹਾਂ ਨੂੰ ਸਮਰੱਥ ਬਣਾਉਣਾ ਅਤੇ ਆਤਮ-ਨਿਰਭਰ ਕਰਨਾ ਹੈ। ਕਮੇਟੀ ਦਾ ਟੀਚਾ ਹੈ ਕਿ ਇਹ ਲੜਕੀਆਂ ਦੂਜਿਆਂ ਤੇ ਨਿਰਭਰ ਰਹਿਣ ਦੀ ਬਜਾਏ, ਆਪਣੇ ਹੁਨਰ ਦੇ ਜ਼ਰੀਏ ਰੁਜ਼ਗਾਰ ਪ੍ਰਾਪਤ ਕਰਨ ਅਤੇ ਮਾਣ-ਸਨਮਾਨ ਨਾਲ ਜੀਵਨ ਬਤੀਤ ਕਰਨ। ਉਨ੍ਹਾਂ ਕਿਹਾ ਕਿ ਕਮੇਟੀ ਲੋੜਵੰਦ ਲੜਕੀਆਂ ਨੂੰ ਕੀਮਤੀ ਕਿੱਤਾਮੁਖੀ ਹੁਨਰ ਸਿਖਾਉਣ ਲਈ ਆਪਣੇ ਯਤਨ ਜਾਰੀ ਰੱਖੇਗੀ । ਇਸ ਮੌਕੇ ਮੌਜੂਦ ਪਤਵੰਤਿਆਂ ਨੇ ਸਿਖਲਾਈ ਪੂਰੀ ਕਰਨ ਵਾਲੀਆਂ ਸਾਰੀਆਂ ਲੜਕੀਆਂ ਨੂੰ ਵਧਾਈ ਦਿੱਤੀ ਅਤੇ ਉਨ੍ਹਾਂ ਦੇ ਉੱਜਵਲ ਭਵਿੱਖ ਦੀ ਕਾਮਨਾ ਕੀਤੀ ।