215 ਪਿੰਡ, ਇੱਕੋ ਸੰਕਲਪ: ਸਾਫ਼ ਹਵਾ ਦੀ ਪਹਿਰੇਦਾਰੀ ’ਤੇ ਡਟੀ ਸੁਲਤਾਨਪੁਰ ਲੋਧੀ ਦੀ ਫੀਲਡ ਟੀਮ

ਸੈਂਕੜੇ ਕਰਮਚਾਰੀ ਸਵੇਰ ਤੋਂ ਸ਼ਾਮ ਤੱਕ ਮੈਦਾਨ ’ਚ ਦੇ ਰਹੇ ਪਹਿਰੇਦਾਰੀ ਲਖਵੀਰ ਸਿੰਘ ਲੱਖੀ, ਪੰਜਾਬੀ ਜਾਗਰਣ ਸੁਲਤਾਨਪੁਰ ਲੋਧੀ : ਹਰ ਸਵੇਰ ਖੇਤਾਂ ’ਚ ਪਹਿਲੀ ਕੰਬਾਈਨ ਚੱਲਣ ਤੋਂ ਪਹਿਲਾਂ ਹੀ ਸਬ-ਡਵੀਜ਼ਨ ਸੁਲਤਾਨਪੁਰ ਲੋਧੀ ’ਚ ਸਰਕਾਰੀ ਕਰਮਚਾਰੀਆਂ ਦੀ ਇੱਕ ਟੀਮ ਆਪਣੇ ਕੰਮ ’ਤੇ ਲੱਗ ਜਾਂਦੀ ਹੈ। ਉਪ ਮੰਡਲ ਮੈਜਿਸਟਰੇਟ ਜਸਜੀਤ ਸਿੰਘ ਤੇ ਸਹਾਇਕ ਪੁਲਿਸ ਕਪਤਾਨ ਧੀਰੇਂਦਰ ਵਰਮਾ ਦੀ ਅਗਵਾਈ ਹੇਠ ਸਬ-ਡਵੀਜ਼ਨ ਦੇ ਸਾਰੇ 215 ਪਿੰਡਾਂ ’ਚ ਹਰ ਪਿੰਡ ਲਈ ਇੱਕ ਨੋਡਲ ਅਫ਼ਸਰ ਤੇ ਪਟਵਾਰੀ ਤਾਇਨਾਤ ਹੈ, ਜਦਕਿ 11 ਕਲੱਸਟਰ ਅਫ਼ਸਰ ਲਗਭਗ 20-20 ਪਿੰਡਾਂ ਦੀ ਨਿਗਰਾਨੀ ਕਰ ਰਹੇ ਹਨ। ਇਸ ਸੀਜ਼ਨ ’ਚ ਇਨ੍ਹਾਂ ਸਭ ਦਾ ਇੱਕੋ ਟੀਚਾ ਹੈ- ਪਰਾਲੀ ਨੂੰ ਅੱਗ ਦੀ ਭੇਟ ਨਹੀਂ, ਸਗੋਂ ਖੇਤ ਦੀ ਦੌਲਤ ਬਣਾਉਣਾ। ਬਾਕਸ ਹਲਕੇ ਅੰਦਰ ਹਰ ਵਿਭਾਗ ਤੋਂ ਜੁੜੀ ਇੱਕ-ਇੱਕ ਟੀਮ ਇਸ ਮੁਹਿੰਮ ਨੇ ਵੈਟਰਨਰੀ ਅਫ਼ਸਰਾਂ ਤੇ ਇੰਸਪੈਕਟਰਾਂ, ਵਾਟਰ ਸਪਲਾਈ ਤੇ ਲੋਕ ਨਿਰਮਾਣ ਵਿਭਾਗ ਦੇ ਇੰਜੀਨੀਅਰਾਂ, ਸਹਿਕਾਰਤਾ ਤੇ ਖੇਤੀਬਾੜੀ ਅਧਿਕਾਰੀਆਂ, ਬੀਡੀਪੀਓਜ਼, ਪੰਚਾਇਤ ਸਕੱਤਰਾਂ, ਗ੍ਰਾਮ ਰੋਜ਼ਗਾਰ ਸੇਵਕਾਂ, ਪੀਐੱਸਪੀਸੀਐੱਲ ਦੇ ਲਾਈਨਮੈਨਾਂ, ਪਟਵਾਰੀਆਂ, ਨੰਬਰਦਾਰਾਂ, ਆਸ਼ਾ ਤੇ ਆਂਗਣਵਾੜੀ ਵਰਕਰਾਂ ਤੇ ਥਾਣਾ ਸੁਲਤਾਨਪੁਰ ਲੋਧੀ, ਕਬੀਰਪੁਰ ਤੇ ਤਲਵੰਡੀ ਚੌਧਰੀਆਂ ਦੀ ਪੁਲਿਸ ਨੂੰ ਇੱਕ ਮੰਚ ’ਤੇ ਲਿਆ ਖੜ੍ਹਾ ਕੀਤਾ ਹੈ। ਖੇਤੀਬਾੜੀ ਵਿਕਾਸ ਅਫ਼ਸਰ ਡਾ. ਜਸਪਾਲ ਸਿੰਘ ਸਬ-ਡਵੀਜ਼ਨ ਪੱਧਰੀ ਕਮੇਟੀ ਦੇ ਕਨਵੀਨਰ ਵਜੋਂ ਫੀਲਡ ਦੇ ਕੰਮ ਦਾ ਤਾਲਮੇਲ ਕਰ ਰਹੇ ਹਨ, ਜਦਕਿ ਤਹਿਸੀਲਦਾਰ ਤੇ ਨਾਇਬ ਤਹਿਸੀਲਦਾਰ ਮਾਲ ਅਮਲੇ ਦੀ ਅਗਵਾਈ ਕਰ ਰਹੇ ਹਨ। ਐੱਸਡੀਐੱਮ ਵੱਲੋਂ ਰੋਜ਼ਾਨਾ ਮੀਟਿੰਗਾਂ ਤੇ ਵੀਡੀਓ ਕਾਨਫਰੰਸਾਂ ਰਾਹੀਂ ਸਥਿਤੀ ਦੀ ਸਮੀਖਿਆ ਕੀਤੀ ਜਾ ਰਹੀ ਹੈ। ਅਧਿਕਾਰੀ ਹਰ ਘੰਟੇ ਖੇਤਾਂ ਤੋਂ ਸਥਾਨ ਸਮੇਤ ਫੋਟੋਆਂ ਸਾਂਝੀਆਂ ਕਰਦੇ ਹਨ ਤੇ ਸੈਟੇਲਾਈਟ ਤੋਂ ਮਿਲੀ ਹਰ ਸੂਚਨਾ ਦੀ ਉਸੇ ਦਿਨ ਮੌਕੇ ’ਤੇ ਜਾ ਕੇ ਜਾਂਚ ਕੀਤੀ ਜਾਂਦੀ ਹੈ। ਚੌਕਸ ਟੀਮਾਂ ਨੇ ਦਰਜਨਾਂ ਥਾਵਾਂ ’ਤੇ ਅੱਗ ਨੂੰ ਫੈਲਣ ਤੋਂ ਪਹਿਲਾਂ ਹੀ ਮੌਕੇ ’ਤੇ ਬੁਝਾ ਦਿੱਤਾ। ਬਾਕਸ ਗੁਰਦੁਆਰਿਆਂ ਤੋਂ ਸਕੂਲਾਂ ਦੀਆਂ ਜਮਾਤਾਂ ਤੱਕ ਦਿੱਤਾ ਜਾ ਰਿਹਾ ਸੁਨੇਹਾ ਪਿਛਲੇ ਹਫ਼ਤਿਆਂ ਦੌਰਾਨ ਅਧਿਕਾਰੀਆਂ ਨੇ ਪਿੰਡ-ਪਿੰਡ ਜਾ ਕੇ ਗੁਰਦੁਆਰਾ ਸਾਹਿਬਾਨ, ਪੰਚਾਇਤ ਘਰਾਂ, ਸਹਿਕਾਰੀ ਸਭਾਵਾਂ ਤੇ ਖੇਤਾਂ ਦੀਆਂ ਵੱਟਾਂ ’ਤੇ ਮੀਟਿੰਗਾਂ ਤੇ ਕੈਂਪ ਲਾਏ। 44 ਪਿੰਡਾਂ ’ਚ ਜਾਗਰੂਕਤਾ ਕੈਂਪ ਲਾਏ ਗਏ ਤੇ ਪਿਛਲੇ ਸਾਲਾਂ ’ਚ ਵੱਧ ਘਟਨਾਵਾਂ ਵਾਲੇ ਪਿੰਡਾਂ ’ਚ ਵਿਸ਼ੇਸ਼ ਸੈਸ਼ਨ ਕੀਤੇ ਗਏ। ਗੁਰਦੁਆਰਾ ਸਾਹਿਬਾਨ ਤੋਂ ਰੋਜ਼ਾਨਾ ਅਨਾਊਂਸਮੈਂਟਾਂ ਹੋ ਰਹੀਆਂ ਹਨ, ਸਕੂਲੀ ਬੱਚਿਆਂ ਨੇ ਪੋਸਟਰ ਮੁਕਾਬਲਿਆਂ ਰਾਹੀਂ ਇਹ ਸੁਨੇਹਾ ਘਰ-ਘਰ ਪਹੁੰਚਾਇਆ ਹੈ ਤੇ ਇਕੱਲੀ ਪੁਲਿਸ ਨੇ ਹੀ ਕਿਸਾਨਾਂ ਨਾਲ ਸੌ ਤੋਂ ਵੱਧ ਮੀਟਿੰਗਾਂ ਕੀਤੀਆਂ ਹਨ। ਕਿਸਾਨ ਜਥੇਬੰਦੀਆਂ ਦੇ ਆਗੂ ਵੀ ਆਪਣੇ ਖੇਤਾਂ ’ਚ ਪਰਾਲੀ ਵਾਹੁਣ ਦੀਆਂ ਵੀਡੀਓ ਸਾਂਝੀਆਂ ਕਰ ਕੇ ਇਸ ਮੁਹਿੰਮ ’ਚ ਸ਼ਾਮਲ ਹੋਏ ਹਨ। ਬਾਕਸ ਹਰ ਕੋਨੇ ਤੱਕ ਮਸ਼ੀਨਾਂ ਪਹੁੰਚਾਈਆਂ ਇਸ ਸੀਜ਼ਨ ’ਚ ਬਲਾਕ ਦੇ ਕਿਸਾਨਾਂ ਨੂੰ ਸਬਸਿਡੀ ’ਤੇ ਪਰਾਲੀ ਪ੍ਰਬੰਧਨ ਦੀਆਂ 325 ਮਸ਼ੀਨਾਂ ਮਿਲੀਆਂ ਹਨ, ਜਿਨ੍ਹਾਂ ’ਚ ਸਹਿਕਾਰੀ ਸਭਾਵਾਂ ਤੇ 4 ਕਿਸਾਨ ਉਤਪਾਦਕ ਸੰਗਠਨਾਂ ਨੂੰ ਦਿੱਤੀਆਂ ਮਸ਼ੀਨਾਂ ਵੀ ਸ਼ਾਮਲ ਹਨ ਤਾਂ ਜੋ ਛੋਟੇ ਤੇ ਸੀਮਾਂਤ ਕਿਸਾਨ ਪਿੱਛੇ ਨਾ ਰਹਿਣ। ਸੁਪਰ ਸੀਡਰ, ਹੈਪੀ ਸੀਡਰ, ਮਲਚਰ ਤੇ ਬੇਲਰਾਂ ਦੀ ਉਪਲਬਧਤਾ ਦਾ ਹਰ ਰੋਜ਼ ਪਿੰਡ-ਵਾਰ ਹਿਸਾਬ ਰੱਖਿਆ ਜਾ ਰਿਹਾ ਹੈ, ਵਿਹਲੀਆਂ ਮਸ਼ੀਨਾਂ ਲੋੜਵੰਦ ਪਿੰਡਾਂ ’ਚ ਭੇਜੀਆਂ ਜਾ ਰਹੀਆਂ ਹਨ ਤੇ ਫਗਵਾੜਾ ਤੋਂ ਵੀ ਵਾਧੂ ਮਸ਼ੀਨਰੀ ਮੰਗਵਾਈ ਗਈ ਹੈ। ਬੇਲਰ ਮਾਲਕਾਂ ਨੂੰ ਖੇਤ ਵੰਡੇ ਗਏ ਹਨ, ਉਨ੍ਹਾਂ ਦੇ ਫ਼ੋਨ ਨੰਬਰ ਹਰ ਮੰਡੀ ’ਚ ਲਾਏ ਗਏ ਹਨ ਤੇ ਮਨਰੇਗਾ ਮਜ਼ਦੂਰ ਛੋਟੇ ਬੇਲਰਾਂ ਨਾਲ ਛੋਟੇ ਖੇਤ ਸਮੇਂ ਸਿਰ ਸਾਫ਼ ਕਰਨ ’ਚ ਮਦਦ ਕਰ ਰਹੇ ਹਨ। ਹਾਟ-ਸਪਾਟ ਪਿੰਡਾਂ ’ਚ ਬਿਨਾਂ ਅੱਗ ਲਾਏ ਕਣਕ ਦੀ ਬਿਜਾਈ ਦੇ 20 ਪ੍ਰਦਰਸ਼ਨੀ ਪਲਾਟ ਲਾਏ ਗਏ ਹਨ ਤਾਂ ਜੋ ਕਿਸਾਨ ਨਤੀਜੇ ਆਪਣੀ ਅੱਖੀਂ ਦੇਖ ਸਕਣ। ਬਾਕਸ ਹਲਕੇ ਅੰਦਰ ਨਤੀਜੇ ਆਪ ਬੋਲਦੇ ਹਨ ਇਨ੍ਹਾਂ ਯਤਨਾਂ ਦਾ ਅਸਰ ਜ਼ਮੀਨ ’ਤੇ ਸਾਫ਼ ਦਿਖਾਈ ਦੇ ਰਿਹਾ ਹੈ। ਬਲਾਕ ਦੇ ਲੱਗਭਗ 90 ਫ਼ੀਸਦੀ ਝੋਨੇ ਹੇਠਲੇ ਰਕਬੇ ’ਚ ਪਰਾਲੀ ਦਾ ਪ੍ਰਬੰਧਨ ਬਿਨਾਂ ਅੱਗ ਲਾਏ ਹੋ ਚੁੱਕਾ ਹੈ ਤੇ ਜ਼ਿਆਦਾਤਰ ਪਿੰਡਾਂ ’ਚ ਇਸ ਸੀਜ਼ਨ ਦੌਰਾਨ ਇੱਕ ਵੀ ਘਟਨਾ ਦਰਜ ਨਹੀਂ ਹੋਈ। ਸ਼ੇਖਮਾਂਗਾ, ਲੋਧੀਵਾਲ, ਨੂਰੋਵਾਲ ਤੇ ਹੁਸੈਨਪੁਰ ਦੂਲੋਵਾਲ ਵਰਗੇ ਪਿੰਡਾਂ ਦੇ ਅਗਾਂਹਵਧੂ ਕਿਸਾਨ, ਜਿਨ੍ਹਾਂ ਨੇ ਸਾਲਾਂ ਤੋਂ ਪਰਾਲੀ ਨਹੀਂ ਸਾੜੀ, ਦੱਸਦੇ ਹਨ ਕਿ ਉਨ੍ਹਾਂ ਦੀ ਮਿੱਟੀ ਸਿਹਤਮੰਦ ਹੋਈ ਹੈ, ਕੱਲਰ ਘਟਿਆ ਹੈ ਤੇ ਝਾੜ ਵਧਿਆ ਹੈ। ਬਾਕਸ ਅੱਗ ਸਭ ਦਾ ਨੁਕਸਾਨ ਕਰਦੀ ਹੈ ਜਸਜੀਤ ਸਿੰਘ ਨੇ ਦੱਸਿਆ ਕਿ ਇੱਕ ਏਕੜ ਪਰਾਲੀ ਸਾੜਨ ਨਾਲ ਉਹ ਖ਼ੁਰਾਕੀ ਤੱਤ ਸੜ ਜਾਂਦੇ ਹਨ, ਜੋ ਅਗਲੀ ਫ਼ਸਲ ਦੇ ਕੰਮ ਆਉਣੇ ਸਨ, ਮਿੱਟੀ ਨੂੰ ਜਿਉਂਦਾ ਰੱਖਣ ਵਾਲੇ ਗੰਡੋਏ ਤੇ ਮਿੱਤਰ ਜੀਵਾਣੂ ਮਰ ਜਾਂਦੇ ਹਨ ਤੇ ਖੇਤ ਦੀ ਉਪਰਲੀ ਤਹਿ ਸੁੱਕ ਜਾਂਦੀ ਹੈ। ਧੂੰਏਂ ਵਿਚਲੇ ਬਰੀਕ ਕਣ ਬੱਚਿਆਂ, ਬਜ਼ੁਰਗਾਂ ਤੇ ਬਿਮਾਰਾਂ ਦੇ ਫੇਫੜਿਆਂ ’ਚ ਜਾ ਕੇ ਦਮਾ, ਖੰਘ ਤੇ ਅੱਖਾਂ ਦੀ ਜਲਣ ਵਧਾਉਂਦੇ ਹਨ, ਜਦਕਿ ਸੜਕਾਂ ’ਤੇ ਛਾਇਆ ਧੂੰਆਂ ਹਾਦਸਿਆਂ ਦਾ ਕਾਰਨ ਬਣਦਾ ਹੈ। ਜਦੋਂ ਖੇਤ ਸੜਦਾ ਹੈ, ਤਾਂ ਉਹ ਧੂੰਆਂ ਸਭ ਤੋਂ ਪਹਿਲਾਂ ਕਿਸਾਨ ਦਾ ਆਪਣਾ ਪਰਿਵਾਰ ਹੀ ਸਾਹ ਰਾਹੀਂ ਲੈਂਦਾ ਹੈ। ਬਾਕਸ ਪ੍ਰਸ਼ਾਸਨ ਦੀ ਲੋਕਾਂ ਨੂੰ ਅਪੀਲ ਸਮੂਹ ਅਧਿਕਾਰੀਆਂ ਤੇ ਕਰਮਚਾਰੀਆਂ ਦੀ ਲਗਨ ਅਤੇ ਕਿਸਾਨਾਂ ਤੇ ਪੰਚਾਇਤਾਂ ਦੇ ਸਹਿਯੋਗ ਦੀ ਸ਼ਲਾਘਾ ਕਰਦਿਆਂ ਐੱਸਡੀਐੱਮ ਜਸਜੀਤ ਸਿੰਘ ਨੇ ਸੁਲਤਾਨਪੁਰ ਲੋਧੀ ਦੇ ਹਰ ਵਾਸੀ ਨੂੰ ਅਪੀਲ ਕੀਤੀ ਕਿ ਸੀਜ਼ਨ ਦੇ ਬਾਕੀ ਰਹਿੰਦੇ ਖੇਤਾਂ ਨੂੰ ਵੀ ਅੱਗ ਤੋਂ ਬਚਾਇਆ ਜਾਵੇ। “ਜੇ ਤੁਹਾਨੂੰ ਮਸ਼ੀਨ ਦੀ ਲੋੜ ਹੈ ਤਾਂ ਆਪਣੇ ਨੋਡਲ ਅਫ਼ਸਰ ਜਾਂ ਖੇਤੀਬਾੜੀ ਦਫ਼ਤਰ ਨੂੰ ਫ਼ੋਨ ਕਰੋ- ਮਦਦ ਤੁਹਾਡੇ ਤੱਕ ਪਹੁੰਚੇਗੀ, ਜੇ ਕਿਤੇ ਧੂੰਆਂ ਦਿਸੇ ਤਾਂ ਨੇੜਲੇ ਅਧਿਕਾਰੀ ਨੂੰ ਸੂਚਿਤ ਕਰੋ। ਆਓ, ਗੁਰੂ ਨਾਨਕ ਦੇਵ ਜੀ ਦੀ ਬਖ਼ਸ਼ਿਸ਼ ਵਾਲੀ ਇਸ ਧਰਤੀ ਨੂੰ ਸਾਫ਼ ਹਵਾ ਤੇ ਉਪਜਾਊ ਮਿੱਟੀ ਲਈ ਜਾਣਿਆ ਜਾਵੇ,” ਉਨ੍ਹਾਂ ਕਿਹਾ। ਏਐੱਸਪੀ ਧੀਰੇਂਦਰ ਵਰਮਾ ਨੇ ਕਿਹਾ ਕਿ ਪੁਲਿਸ ਜਾਗਰੂਕਤਾ ਦੇ ਕੰਮ ’ਚ ਕਿਸਾਨਾਂ ਦੇ ਨਾਲ ਖੜ੍ਹੀ ਰਹੇਗੀ ਤੇ ਨਾਲ ਹੀ ਮਾਣਯੋਗ ਸੁਪਰੀਮ ਕੋਰਟ, ਨੈਸ਼ਨਲ ਗ੍ਰੀਨ ਟ੍ਰਿਬਿਊਨਲ ਤੇ ਪੰਜਾਬ ਪ੍ਰਦੂਸ਼ਣ ਰੋਕਥਾਮ ਬੋਰਡ ਦੀਆਂ ਹਦਾਇਤਾਂ ਦੀ ਪੂਰੀ ਪਾਲਣਾ ਵੀ ਯਕੀਨੀ ਬਣਾਏਗੀ।