20 ਸਕਿੰਟਾਂ ’ਚ ਮੋਟਰਸਾਈਕਲ ਚੋਰੀ

ਕਰਾਈਮ ਰਿਪੋਰਟਰ, ਪੰਜਾਬੀ ਜਾਗਰਣ, ਜਲੰਧਰ

ਆਦਰਸ਼ ਨਗਰ ’ਚ ਇਕ ਮਕੈਨਿਕ ਦਾ ਮੋਟਰਸਾਈਕਲ ਉਸ ਸਮੇਂ ਚੋਰੀ ਹੋ ਗਿਆ ਜਦੋਂ ਉਹ ਜਨਰੇਟਰ ਦੀ ਮੁਰੰਮਤ ਕਰਨ ਗਿਆ ਸੀ। ਚੋਰੀ ਦੀ ਘਟਨਾ ਉੱਥੇ ਲੱਗੇ ਸੀਸੀਟੀਵੀ ਕੈਮਰੇ ’ਚ ਕੈਦ ਹੋ ਗਈ। ਫੁਟੇਜ ਅਨੁਸਾਰ, ਇਕ ਸ਼ੱਕੀ ਪੈਦਲ ਆਇਆ ਤੇ ਕੁਝ ਹੀ ਸਕਿੰਟਾਂ ’ਚ ਮੋਟਰਸਾਈਕਲ ਲੈ ਕੇ ਫਰਾਰ ਹੋ ਗਿਆ। ਪੀੜਤ ਅਖਿਲੇਸ਼ ਨੇ ਦੱਸਿਆ ਕਿ ਆਦਰਸ਼ ਨਗਰ ’ਚ ਜਨਰੇਟਰ ਸਟਾਰਟ ਨਾ ਹੋਣ ਦੀ ਸੂਚਨਾ ਮਿਲਣ 'ਤੇ ਉਹ ਸਵੇਰੇ ਕਰੀਬ 9:30 ਵਜੇ ਉੱਥੇ ਪਹੁੰਚਿਆ ਸੀ। ਜਦੋਂ ਉਹ ਕੰਮ ਕਰ ਰਿਹਾ ਸੀ ਤਾਂ ਮੋਟਰਸਾਈਕਲ ਨੇੜੇ ਹੀ ਖੜ੍ਹਾ ਸੀ। ਬਾਅਦ ’ਚ ਪਤਾ ਲੱਗਾ ਕਿ ਮੋਟਰਸਾਈਕਲ ਗਾਇਬ ਸੀ। ਸੀਸੀਟੀਵੀ ਫੁਟੇਜ ਦੀ ਜਾਂਚ ਕਰਨ 'ਤੇ ਪਤਾ ਲੱਗਾ ਕਿ ਦੁਪਹਿਰ ਕਰੀਬ 2:50 ਵਜੇ ਇਕ ਵਿਅਕਤੀ ਮੋਟਰਸਾਈਕਲ ਲੈ ਕੇ ਜਾ ਰਿਹਾ ਸੀ। ਪੀੜਤ ਅਨੁਸਾਰ ਸੀਸੀਟੀਵੀ ਫੁਟੇਜ ’ਚ ਪਤਾ ਲੱਗਾ ਕਿ ਸ਼ੱਕੀ ਨੇ ਮੋਟਰਸਾਈਕਲ ਲੈਣ ਤੋਂ ਪਹਿਲਾਂ ਗਲੀ ’ਚ ਦੋ-ਤਿੰਨ ਵਾਰ ਚੱਕਰ ਲਗਾਏ। ਦੱਸਿਆ ਜਾ ਰਿਹਾ ਹੈ ਕਿ ਇਹ ਪੂਰੀ ਘਟਨਾ ਲਗਭਗ 20 ਸਕਿੰਟਾਂ ’ਚ ਵਾਪਰ ਗਈ। ਅਖਿਲੇਸ਼ ਨੇ ਦੱਸਿਆ ਕਿ ਉਸ ਨੇ ਇਹ ਮੋਟਰਸਾਈਕਲ ਤਿੰਨ-ਚਾਰ ਸਾਲ ਪਹਿਲਾਂ ਕਿਸ਼ਤਾਂ 'ਤੇ ਖਰੀਦਿਆ ਸੀ। ਪੀੜਤ ਨੇ ਦੱਸਿਆ ਕਿ ਉਸਨੇ ਸਬੰਧਤ ਥਾਣੇ ’ਚ ਸ਼ਿਕਾਇਤ ਦਰਜ ਕਰਵਾ ਦਿੱਤੀ ਹੈ।