ਐੱਚਐੱਮਵੀ ’ਚ ਕੌਮਾਂਤਰੀ ਵਰਕਸ਼ਾਪ ਲੜੀ ਸੰਪੰਨ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਹੰਸ ਰਾਜ ਮਹਿਲਾ ਮਹਾ ਵਿਦਿਆਲਿਆ ਜਲੰਧਰ ਦੇ ਪੋਸਟ ਗ੍ਰੈਜੂਏਟ ਬਾਇਓਇਨਫਾਰਮੈਟਿਕਸ ਵਿਭਾਗ ਤੇ ਬਾਇਓਟੈਕਨਾਲੋਜੀ ਵਿਭਾਗ ਵੱਲੋਂ ਯੂਰੋਪੀਅਨ ਮੋਲੇਕਿਊਲਰ ਬਾਇਓਲੋਜੀ ਲੈਬਾਰਟਰੀ, ਯੂਰੋਪੀਅਨ ਬਾਇਓਇਨਫਾਰਮੈਟਿਕਸ ਇੰਸਟੀਚਿਊਟ, ਹੈਕਿਸਟਨ ਦੇ ਸਹਿਯੋਗ ਨਾਲ ਦੋ-ਦਿਨਾ ਅੰਤਰਰਾਸ਼ਟਰੀ ਵਰਕਸ਼ਾਪ ਲਗਾਈ ਗਈ। ਈਐੱਮਬੀਐੱਲ-ਈਬੀਆਈ ਹਿੰਕਸਟਨ ਵਿਖੇ ਐਨਸੈਂਬਲ ਆਊਟਰੀਚ ਅਧਿਕਾਰੀ ਵਿਸ਼ੇਸ਼ ਮਹਿਮਾਨ ਲੁਈਸ ਪਾਓਲਾ ਮਿਰਾਬੁਏ ਦਾ ਪ੍ਰਿੰਸੀਪਲ ਡਾ. ਏਕਤਾ ਖੋਸਲਾ ਵੱਲੋਂ ਸਵਾਗਤ ਕੀਤਾ ਗਿਆ। ਇਸ ਦੌਰਾਨ ਤਿਆਰ ਕੀਤੇ ਗਏ ਸਿਖਲਾਈ ਮੋਡਿਊਲਾਂ ਰਾਹੀਂ ਵਿਆਪਕ ਪ੍ਰੈਕਟੀਕਲ ਸਿਖਲਾਈ ਦਿੱਤੀ ਗਈ। ਦੂਜਾ ਦਿਨ ਐਨਸੈਂਬਲ ਟਰੇਨ-ਦੀ- ਟਰੇਨਰ ਵਰਕਸ਼ਾਪ ਤੇ ਆਧਾਰਿਤ ਸੀ, ਜੋ ਵਿਸ਼ੇਸ਼ ਤੌਰ ਤੇ ਫੈਕਲਟੀ ਮੈਂਬਰਾਂ ਤੇ ਖੋਜਕਰਤਾਵਾਂ ਲਈ ਤਿਆਰ ਕੀਤੀ ਗਈ ਸੀ। ਇਸ ਮੌਕੇ ਬਾਇਓਟੈਕਨਾਲੋਜੀ ਵਿਭਾਗ ਦੇ ਮੁਖੀ ਡਾ. ਜਤਿੰਦਰ ਕੁਮਾਰ ਨੇ ਡੀਏਵੀ ਕਾਲਜ ਪ੍ਰਬੰਧਕੀ ਕਮੇਟੀ ਨਵੀਂ ਦਿੱਲੀ, ਲੋਕਲ ਕਮੇਟੀ ਤੇ ਪ੍ਰਿੰਸੀਪਲ ਡਾ. ਏਕਤਾ ਖੋਸਲਾ, ਸਹਿ-ਸੰਯੋਜਕ ਪੂਰਨਿਮਾ, ਕਾਲਜ ਦੇ ਉਪ-ਪ੍ਰਿੰਸੀਪਲ ਡਾ. ਮਮਤਾ, ਡੀਨ ਅਕਾਦਮਿਕ ਡਾ. ਸੀਮਾ ਮਾਰਵਾਹਾ, ਦੀਪਸ਼ਿਖਾ ਫੈਕਲਟੀ ਹੈੱਡ ਸਾਇੰਸਜ਼ ਤੇ ਮੁਖੀ ਪੀਜੀ ਕੈਮਿਸਟਰੀ ਵਿਭਾਗ, ਡਾ. ਸਲੋਨੀ ਸ਼ਰਮਾ ਮੁਖੀ ਪੀਜੀ ਫਿਜ਼ਿਕਸ ਵਿਭਾਗ,ਸੁਮਿਤ ਸ਼ਰਮਾ, ਡਾ. ਰਮਨਦੀਪ ਕੌਰ, ਡਾ. ਰਮਾ ਭਾਟੀਆ, ਡਾ. ਰਾਖੀ ਮਹਿਤਾ, ਨਵਨੀਤਾ, ਕੁਮਾਰੀ ਆਦਿ ਹਾਜ਼ਰ ਸਨ।