ਜਾਅਲੀ ਟਿਕਟ ਜਾਰੀ ਕਰਨ ਤੋਂ ਬਾਅਦ ਟ੍ਰੈਵਲ ਏਜੰਸੀ ਦਾ ਦਫ਼ਤਰ ਬੰਦ

ਰਾਕੇਸ਼ ਗਾਂਧੀ, ਪੰਜਾਬੀ ਜਾਗਰਣ, ਜਲੰਧਰ : ਸ਼ਹਿਰ ਵਿਚ ਇਕ ਟ੍ਰੈਵਲ ਏਜੰਟ ਨੇ ਵਿਦੇਸ਼ ਭੇਜਣ ਦਾ ਝਾਂਸਾ ਦੇ ਕੇ ਇਕ ਨੌਜਵਾਨ ਨਾਲ ਲੱਖਾਂ ਰੁਪਏ ਦੀ ਠੱਗੀ ਮਾਰ ਲਈ। ਪੀੜਤ ਗੁਰਪ੍ਰੀਤ ਨੇ ਇਕ ਪ੍ਰੈੱਸ ਕਾਨਫਰੰਸ ਕਰਕੇ ਦੋਸ਼ ਲਗਾਇਆ ਕਿ ਐੱਮਬੀਡੀ ਮਾਲ ’ਚ ਸਥਿਤ ਵਾਣੀ ਵੀਜ਼ਾ ਸੇਵਾ ਦੇ ਮਾਲਕਾਂ ਨੇ ਉਸ ਤੋਂ ਅਜ਼ਰਬਾਈਜਾਨ ਭੇਜਣ ਦੇ ਵਾਅਦੇ ਨਾਲ ਕੁੱਲ 1.45 ਲੱਖ ਰੁਪਏ ਲਏ। ਉਸ ਨੂੰ ਨਾ ਤਾਂ ਵਿਦੇਸ਼ ਭੇਜਿਆ ਗਿਆ ਤੇ ਨਾ ਹੀ ਪੂਰੀ ਰਕਮ ਵਾਪਸ ਕੀਤੀ ਗਈ। ਪੀੜਤ ਦਾ ਦਾਅਵਾ ਹੈ ਕਿ ਤਸਦੀਕ ਕਰਨ ਤੇ ਏਜੰਸੀ ਵੱਲੋਂ ਦਿੱਤੀ ਗਈ ਫਲਾਈਟ ਟਿਕਟ ਜਾਅਲੀ ਪਾਈ ਗਈ। ----------------------------- ਸੋਸ਼ਲ ਮੀਡੀਆ ਇਸ਼ਤਿਹਾਰ ਦੇਖਣ ਤੋਂ ਬਾਅਦ ਏਜੰਸੀ ਕੀਤਾ ਸੰਪਰਕ ਗੁਰਪ੍ਰੀਤ ਅਨੁਸਾਰ ਉਸ ਨੇ ਵਿਦੇਸ਼ ਯਾਤਰਾ ਸਬੰਧੀ ਸੋਸ਼ਲ ਮੀਡੀਆ ਤੇ ਵਾਣੀ ਵੀਜ਼ਾ ਸੇਵਾ ਦਾ ਇਸ਼ਤਿਹਾਰ ਦੇਖਿਆ। ਇਸ ਤੋਂ ਬਾਅਦ 15 ਜੂਨ, 2025 ਨੂੰ ਉਹ ਐੱਮਬੀਡੀ ਮਾਲ ’ਚ ਏਜੰਸੀ ਦੇ ਦਫ਼ਤਰ ਗਿਆ। ਉੱਥੇ, ਉਹ ਏਜੰਸੀ ਦੇ ਮਾਲਕ ਬਲਰਾਮ ਸਿੰਘ ਉਰਫ਼ ਸ਼ੇਰਾ, ਉਸਦੇ ਭਰਾ ਤੇ ਸ਼ਿਵਾਨੀ ਨਾਂ ਦੀ ਇਕ ਔਰਤ ਨੂੰ ਮਿਲਿਆ। ਗੱਲਬਾਤ ਦੌਰਾਨ ਉਸਨੂੰ ਭਰੋਸਾ ਦਿੱਤਾ ਗਿਆ ਕਿ ਉਸ ਨੂੰ ਅਜ਼ਰਬਾਈਜਾਨ ਭੇਜਿਆ ਜਾਵੇਗਾ। ਏਜੰਸੀ ਨੇ ਉਸ ਨੂੰ ਵਿਦੇਸ਼ ਭੇਜਣ ਦੀ ਪ੍ਰਕਿਰਿਆ ਲਈ 1.40 ਲੱਖ ਲਏ। ਇਸ ਤੋਂ ਇਲਾਵਾ ਡਾਕਟਰੀ ਜਾਂਚ ਲਈ 5 ਹਜ਼ਾਰ ਰੁਪਏ ਵੱਖਰੇ ਤੌਰ ਤੇ ਲਏ ਗਏ ਸਨ। ਏਜੰਸੀ ਨੇ ਉਨ੍ਹਾਂ ਨੂੰ 9 ਜੁਲਾਈ, 2025 ਲਈ ਇਕ ਫਲਾਈਟ ਟਿਕਟ ਦਿੱਤਾ ਪਰ ਬਾਅਦ ’ਚ ਕੀਤੀ ਗਈ ਜਾਂਚ ਤੋਂ ਪਤਾ ਲੱਗਾ ਕਿ ਟਿਕਟ ਡੁਪਲੀਕੇਟ ਸੀ। ਜਦੋਂ ਉਸ ਨੇ ਏਜੰਸੀ ਨਾਲ ਸੰਪਰਕ ਕੀਤਾ ਤਾਂ ਉਹ ਕਈ ਕਾਰਨਾਂ ਦਾ ਹਵਾਲਾ ਦੇ ਕੇ ਮਾਮਲੇ ਨੂੰ ਟਾਲਦੇ ਰਹੇ। ਇਸ ਸਮੇਂ ਦੌਰਾਨ ਏਜੰਸੀ ਨੇ ਕਥਿਤ ਤੌਰ ਤੇ ਜੰਗਬੰਦੀ ਸਥਿਤੀ ਨੂੰ ਬਹਾਨਾ ਵੀ ਦੱਸਿਆ। --------------------------------- ਸ਼ਿਕਾਇਤ ਦੇ ਬਾਵਜੂਦ ਕਾਰਵਾਈ ਨਾ ਕਰਨ ਦਾ ਦੋਸ਼ ਗੁਰਪ੍ਰੀਤ ਨੇ ਦੱਸਿਆ ਕਿ ਉਸ ਨੇ ਇਸ ਮਾਮਲੇ ਸਬੰਧੀ ਪੁਲਿਸ ਕਮਿਸ਼ਨਰ ਦਫ਼ਤਰ ਲਿਖਤੀ ਸ਼ਿਕਾਇਤ ਵੀ ਸੌਂਪੀ ਸੀ। ਸ਼ਿਕਾਇਤ ਦਰਜ ਕਰਨ ਤੋਂ ਲਗਭਗ ਦੋ ਮਹੀਨੇ ਬਾਅਦ ਥਾਣੇ ਤੋਂ ਫ਼ੋਨ ਆਇਆ ਪਰ ਫਿਰ ਵੀ ਮਾਮਲੇ ਤੇ ਕੋਈ ਉਮੀਦ ਅਨੁਸਾਰ ਕਾਰਵਾਈ ਨਹੀਂ ਕੀਤੀ ਗਈ। ਪੀੜਤ ਦਾ ਦੋਸ਼ ਹੈ ਕਿ ਟ੍ਰੈਵਲ ਏਜੰਸੀ ਦਾ ਦਫ਼ਤਰ ਉਦੋਂ ਤੋਂ ਬੰਦ ਹੋ ਗਿਆ ਹੈ ਤੇ ਮੁਲਜ਼ਮ ਕਥਿਤ ਤੌਰ ਤੇ ਇਮਾਰਤ ਛੱਡ ਕੇ ਚਲੇ ਗਏ ਹਨ। ਫ਼ੋਨ ਤੇ ਸੰਪਰਕ ਕੀਤੇ ਜਾਣ ਤੇ ਵੀ ਉਨ੍ਹਾਂ ਤੱਕ ਪਹੁੰਚ ਨਹੀਂ ਹੋ ਸਕੀ।