ਸੁਰੀਲਾ ਗੋਤ ਜਠੇਰਿਆਂ ਦਾ ਸਾਲਾਨਾ ਮੇਲਾ ਮਨਾਇਆ

ਸੁਰਜੀਤ ਪਾਲ, ਪੰਜਾਬੀ ਜਾਗਰਣ, ਕਿਸ਼ਨਗੜ੍ਹ : ਸੁਰੀਲਾ ਗੋਤ ਜਠੇਰਿਆਂ ਦਾ ਸਾਲਾਨਾ ਜੋੜ ਮੇਲਾ ਦਰਬਾਰ ਦੀ ਮੇਲਾ ਪ੍ਰਬੰਧਕ ਕਮੇਟੀ, ਸੁਰੀਲਾ ਗੋਤ ਪਰਿਵਾਰਾਂ ਤੇ ਸਮੂਹ ਨਗਰ ਨਿਵਾਸੀਆਂ ਦੇ ਸਾਂਝੇ ਸਹਿਯੋਗ ਨਾਲ ਪਿੰਡ ਕਰਾੜੀ ਵਿਖੇ ਜਠੇਰਿਆਂ ਦੇ ਪਾਵਨ ਅਸਥਾਨ ’ਤੇ ਮਨਾਇਆ ਗਿਆ। ਮੇਲੇ ਮੌਕੇ ਸਵੇਰੇ ਦਰਬਾਰ ਵਿਖੇ ਝੰਡੇ ਦੀ ਰਸਮ ਅਦਾ ਕੀਤੀ ਗਈ, ਉਪਰੰਤ ਸ੍ਰੀ ਸੁਖਮਨੀ ਸਾਹਿਬ ਜੀ ਦੇ ਪਾਠ ਦੇ ਭੋਗ ਪਾਏ ਗਏ। ਅਰਦਾਸ ਉਪਰੰਤ ਕੀਰਤਨੀ ਜਥਿਆਂ ਤੇ ਗਾਇਕ ਕਲਾਕਾਰਾਂ ਨੇ ਸ੍ਰੀ ਗੁਰੂ ਰਵਿਦਾਸ ਜੀ ਦੀ ਮਹਿਮਾ ਦਾ ਗੁਣਗਾਨ ਕੀਤਾ। ਇਸ ਮੌਕੇ ਆਮ ਆਦਮੀ ਪਾਰਟੀ ਦੇ ਹਲਕਾ ਇੰਚਾਰਜ ਪਵਨ ਕੁਮਾਰ ਟੀਨੂੰ ਵਿਸ਼ੇਸ਼ ਤੌਰ ’ਤੇ ਪਹੁੰਚੇ। ਸੰਗਤ ਨੂੰ ਸੰਬੋਧਨ ਕਰਦਿਆਂ ਉਨ੍ਹਾਂ ਕਿਹਾ ਕਿ ਬਜ਼ੁਰਗਾਂ ਦੀ ਯਾਦ ’ਚ ਅਜਿਹੇ ਮੇਲੇ ਕਰਵਾਉਣ ਨਾਲ ਜਿੱਥੇ ਨਵੀਂ ਪੀੜ੍ਹੀ ਨੂੰ ਆਪਣੇ ਵਿਰਸੇ ਨਾਲ ਜੋੜਨ ’ਚ ਮਦਦ ਮਿਲਦੀ ਹੈ, ਉੱਥੇ ਆਪਸੀ ਭਾਈਚਾਰਕ ਸਾਂਝ ਵੀ ਮਜ਼ਬੂਤ ਹੁੰਦੀ ਹੈ। ਦਲਿਤ ਵਿਕਾਸ ਬੋਰਡ ਦੇ ਚੇਅਰਮੈਨ ਬੀਰ ਚੰਦ ਸੁਰੀਲਾ (ਨੰਬਰਦਾਰ) ਤੇ ਪ੍ਰਿੰਸੀਪਲ ਗੁਰਦੇਵ ਲਾਲ ਨੇ ਕਿਹਾ ਕਿ ਬਜ਼ੁਰਗਾਂ ਦੀ ਯਾਦ ’ਚ ਹਰ ਸਾਲ ਕਰਵਾਇਆ ਜਾਣ ਵਾਲਾ ਇਹ ਮੇਲਾ ਸਾਡੀ ਪੁਰਾਤਨ ਸੰਸਕ੍ਰਿਤੀ, ਸੱਭਿਆਚਾਰ ਤੇ ਵਿਰਸੇ ਨਾਲ ਜੁੜੇ ਰਹਿਣ ਦਾ ਸੁਨੇਹਾ ਦਿੰਦਾ ਹੈ। ਇਸ ਮੌਕੇ ਪ੍ਰਧਾਨ ਤਰਸੇਮ ਲਾਲ ਸੋਮਾ, ਚੇਅਰਮੈਨ ਤਾਰਾ ਚੰਦ ਸੁਰੀਲਾ, ਪ੍ਰਿੰਸੀਪਲ ਗੁਰਦੇਵ ਚੰਦ, ਗੁਰਪ੍ਰੀਤ ਸਿੰਘ ਪੰਚ, ਰਮਨ ਸੁਰੀਲਾ, ਅਭਿਨੰਦਨ ਸੁਰੀਲਾ, ਰਾਮਭਜ ਸੁਰੀਲਾ, ਕੈਸ਼ੀਅਰ ਮਾਸਟਰ ਰਾਕੇਸ਼ ਚੰਦਰ, ਸੇਵਾਮੁਕਤ ਸਿਵਲ ਸਰਜਨ ਡਾ. ਸੁਰਿੰਦਰ ਪਾਲ, ਨੰਬਰਦਾਰ ਬੀਰ ਚੰਦ ਸੁਰੀਲਾ, ਸਟੇਟ ਐਵਾਰਡੀ ਮਾਸਟਰ ਪਰਵੀਨ ਕੁਮਾਰ, ਥਾਣੇਦਾਰ ਰਾਜਕੁਮਾਰ, ਮੈਨੇਜਰ ਸਰਬਜੀਤ ਭਾਰਦਵਾਜ, ਚਰਨਜੀਤ ਚੰਨੀ, ਮਨੋਹਰ ਲਾਲ, ਮੱਖਣ ਲਾਲ, ਜਸਵਿੰਦਰ ਕੁਮਾਰ ਤੇ ਦਵਿੰਦਰ ਸੁਰੀਲਾ ਆਦਿ ਹਾਜ਼ਰ ਸਨ।