ਸੇਵਾ ਕੇਂਦਰ ’ਚ ਪਸਰਿਆ ਸੰਨਾਟਾ, ਐੱਸਆਰ ਦਫ਼ਤਰਾਂ ’ਚ ਹੋਈਆਂ ਖੂਬ ਰਜਿਸਟਰੀਆਂ

ਲਖਬੀਰ, ਪੰਜਾਬੀ ਜਾਗਰਣ, ਜਲੰਧਰ ਬੇਅਦਬੀ ਕਾਂਡ ਦੇ ਵਿਰੋਧ ’ਚ ਜਲੰਧਰ ਬੰਦ ਦਾ ਅਸਰ ਸ਼ਹਿਰ ਦੇ ਬਾਜ਼ਾਰਾਂ ਤੋਂ ਲੈ ਕੇ ਪ੍ਰਸ਼ਾਸਕੀ ਕੰਪਲੈਕਸ ਤੱਕ ਵੀ ਸਾਫ਼ ਨਜ਼ਰ ਆਇਆ। ਆਮ ਦਿਨਾਂ ’ਚ ਲੋਕਾਂ ਦੀ ਆਵਾਜਾਈ ਨਾਲ ਗੁਲਜ਼ਾਰ ਰਹਿਣ ਵਾਲੀ ਤਹਿਸੀਲ ਵੀਰਵਾਰ ਨੂੰ ਕਾਫ਼ੀ ਹੱਦ ਤੱਕ ਸੁੰਨਸਾਨ ਨਜ਼ਰ ਆਈ। ਬੰਦ ਕਾਰਨ ਸਰਕਾਰੀ ਕੰਮਕਾਜ ਲਈ ਘਰਾਂ ਤੋਂ ਨਿਕਲਣ ਵਾਲੇ ਲੋਕਾਂ ਦੀ ਗਿਣਤੀ ਬੇਹੱਦ ਘੱਟ ਰਹੀ, ਜਿਸ ਦਾ ਅਸਰ ਤਹਿਸੀਲ ਤੋਂ ਲੈ ਕੇ ਸੇਵਾ ਕੇਂਦਰ ਤੱਕ ਸਾਫ਼ ਦਿਖਾਈ ਦਿੱਤਾ। ਇਸੇ ਦੌਰਾਨ ਪੰਜਾਬ ਦੇ ਸਾਬਕਾ ਕੈਬਨਿਟ ਮੰਤਰੀ ਭਗਤ ਚੁੰਨੀ ਲਾਲ ਦੇ ਅਚਾਨਕ ਦਿਹਾਂਤ ਕਾਰਨ ਸਰਕਾਰੀ ਦਫ਼ਤਰਾਂ ’ਚ ਅੱਧੇ ਦਿਨ ਦੀ ਛੁੱਟੀ ਦਾ ਐਲਾਨ ਵੀ ਕੀਤਾ ਗਿਆ ਸੀ। ਬੰਦ ਅਤੇ ਛੁੱਟੀ ਦੋਵਾਂ ਦਾ ਅਸਰ ਪ੍ਰਸ਼ਾਸਕੀ ਕੰਪਲੈਕਸ ’ਚ ਦੇਖਣ ਨੂੰ ਮਿਲਿਆ। ਜਿੱਥੇ ਆਮ ਦਿਨਾਂ ’ਚ ਸਵੇਰ ਤੋਂ ਹੀ ਲੋਕਾਂ ਦੀ ਆਵਾਜਾਈ ਸ਼ੁਰੂ ਹੋ ਜਾਂਦੀ ਹੈ, ਉੱਥੇ ਵੀਰਵਾਰ ਨੂੰ ਕਈ ਹਿੱਸਿਆਂ ’ਚ ਦੁਪਹਿਰ ਤੋਂ ਪਹਿਲਾਂ ਹੀ ਸੰਨਾਟਾ ਛਾਇਆ ਨਜ਼ਰ ਆਇਆ। ------------------------- ਸੇਵਾ ਕੇਂਦਰ ’ਚ ਖਾਲੀ ਰਹੇ ਕਾਊਂਟਰ ਪ੍ਰਸ਼ਾਸਕੀ ਕੰਪਲੈਕਸ ਸਥਿਤ ਸੇਵਾ ਕੇਂਦਰ ’ਤੇ ਬੰਦ ਦਾ ਸਭ ਤੋਂ ਵੱਧ ਅਸਰ ਦੇਖਣ ਨੂੰ ਮਿਲਿਆ। ਵੱਖ-ਵੱਖ ਸਰਕਾਰੀ ਸੇਵਾਵਾਂ ਲੈਣ ਲਈ ਆਮ ਦਿਨਾਂ ’ਚ ਜਿੱਥੇ ਲੋਕਾਂ ਦੀਆਂ ਕਤਾਰਾਂ ਲੱਗੀਆਂ ਰਹਿੰਦੀਆਂ ਹਨ, ਉੱਥੇ ਵੀਰਵਾਰ ਨੂੰ ਕਾਊਂਟਰ ਲਗਭਗ ਖਾਲੀ ਨਜ਼ਰ ਆਏ। ਲੋਕਾਂ ਦੀ ਨਾ-ਮਾਤਰ ਹਾਜ਼ਰੀ ਕਾਰਨ ਮੁਲਾਜ਼ਮਾਂ ਕੋਲ ਵੀ ਆਮ ਦਿਨਾਂ ਜਿੰਨਾ ਕੰਮ ਨਹੀਂ ਸੀ। ਸੇਵਾ ਕੇਂਦਰ ਦੇ ਬਾਹਰ ਅਤੇ ਅੰਦਰ ਦੋਵਾਂ ਥਾਵਾਂ ’ਤੇ ਲੋਕਾਂ ਦੀ ਭੀੜ ਗਾਇਬ ਰਹੀ। ਜਿਨ੍ਹਾਂ ਕਾਊਂਟਰਾਂ ’ਤੇ ਆਮ ਤੌਰ ’ਤੇ ਲੋਕਾਂ ਨੂੰ ਆਪਣੀ ਵਾਰੀ ਲਈ ਇੰਤਜ਼ਾਰ ਕਰਨਾ ਪੈਂਦਾ ਹੈ, ਉੱਥੇ ਵੀਰਵਾਰ ਨੂੰ ਮੁਲਾਜ਼ਮ ਖਾਲੀ ਬੈਠੇ ਨਜ਼ਰ ਆਏ। ਬੰਦ ਕਾਰਨ ਲੋਕਾਂ ਨੇ ਸਰਕਾਰੀ ਕੰਮ ਅੱਗੇ ਪਾਉਣਾ ਹੀ ਬਿਹਤਰ ਸਮਝਿਆ। ------------------------ ਤਹਿਸੀਲ ’ਚ ਵੀ ਫਿੱਕੀ ਰਹੀ ਰੌਣਕ ਤਹਿਸੀਲ ਕੰਪਲੈਕਸ ’ਚ ਵੀ ਆਮ ਦਿਨਾਂ ਵਰਗੀ ਚਹਿਲ-ਪਹਿਲ ਨਜ਼ਰ ਨਹੀਂ ਆਈ। ਮਾਲ ਵਿਭਾਗ ਨਾਲ ਸਬੰਧਤ ਕੰਮ, ਦਸਤਾਵੇਜ਼, ਇੰਤਕਾਲ ਅਤੇ ਹੋਰ ਕੰਮਾਂ ਲਈ ਰੋਜ਼ਾਨਾ ਪਹੁੰਚਣ ਵਾਲੇ ਲੋਕਾਂ ਦੀ ਗਿਣਤੀ ’ਚ ਵੱਡੀ ਕਮੀ ਦਿਖਾਈ ਦਿੱਤੀ। ਕੰਪਲੈਕਸ ਦੇ ਗਲਿਆਰਿਆਂ ਤੋਂ ਲੈ ਕੇ ਵੱਖ-ਵੱਖ ਦਫ਼ਤਰਾਂ ਦੇ ਬਾਹਰ ਤੱਕ ਆਮ ਦਿਨਾਂ ਵਾਲੀ ਭੀੜ ਨਜ਼ਰ ਨਹੀਂ ਆਈ।ਤਹਿਸੀਲ ’ਚ ਘੱਟ ਲੋਕਾਂ ਦੇ ਪਹੁੰਚਣ ਕਾਰਨ ਸਰਕਾਰੀ ਕੰਮਕਾਜ ਦੀ ਰਫ਼ਤਾਰ ਵੀ ਮੱਠੀ ਰਹੀ। ਬੰਦ ਦਾ ਅਸਰ ਸਿਰਫ਼ ਬਾਜ਼ਾਰਾਂ ਤੱਕ ਹੀ ਸੀਮਤ ਨਹੀਂ ਰਿਹਾ, ਸਗੋਂ ਸਰਕਾਰੀ ਦਫ਼ਤਰਾਂ ’ਚ ਆਪਣੇ ਜ਼ਰੂਰੀ ਕੰਮ ਕਰਵਾਉਣ ਲਈ ਪਹੁੰਚਣ ਵਾਲੇ ਲੋਕਾਂ ਦੀ ਆਵਾਜਾਈ ’ਤੇ ਵੀ ਇਸ ਦਾ ਸਿੱਧਾ ਅਸਰ ਪਿਆ। ------------------------ ਅੱਧੇ ਦਿਨ ਦੀ ਛੁੱਟੀ ਦੇ ਬਾਵਜੂਦ ਐੱਸਆਰ ਦਫ਼ਤਰਾਂ ’ਚ ਖੂਬ ਰਜਿਸਟਰੀਆਂ ਪ੍ਰਸ਼ਾਸਕੀ ਕੰਪਲੈਕਸ ’ਚ ਜਿੱਥੇ ਤਹਿਸੀਲ ਅਤੇ ਸੇਵਾ ਕੇਂਦਰਾਂ ’ਚ ਸੰਨਾਟਾ ਨਜ਼ਰ ਆਇਆ, ਉੱਥੇ ਹੀ ਸਬ-ਰਜਿਸਟਰਾਰ ਦਫ਼ਤਰਾਂ ਦਾ ਨਜ਼ਾਰਾ ਬਿਲਕੁਲ ਵੱਖਰਾ ਰਿਹਾ। ਅੱਧੇ ਦਿਨ ਦੀ ਛੁੱਟੀ ਦੇ ਐਲਾਨ ਅਤੇ ਸ਼ਹਿਰ ਬੰਦ ਦੇ ਬਾਵਜੂਦ ਇੱਥੇ ਰਜਿਸਟਰੀਆਂ ਕਰਵਾਉਣ ਲਈ ਲੋਕਾਂ ਦੀ ਚੰਗੀ-ਖਾਸੀ ਆਵਾਜਾਈ ਰਹੀ। ਰਜਿਸਟਰੀ ਨਾਲ ਸਬੰਧਤ ਕੰਮ ਪਹਿਲਾਂ ਤੋਂ ਤੈਅ ਹੋਣ ਕਾਰਨ ਕਈ ਲੋਕ ਸਵੇਰੇ ਹੀ ਸਬ-ਰਜਿਸਟਰਾਰ ਦਫ਼ਤਰਾਂ ’ਚ ਪਹੁੰਚ ਗਏ। ਇਸ ਕਰਕੇ ਅੱਧੇ ਦਿਨ ਦੀ ਛੁੱਟੀ ਦੇ ਬਾਵਜੂਦ ਦਫ਼ਤਰਾਂ ’ਚ ਕੰਮਕਾਜ ਚੱਲਦਾ ਰਿਹਾ ਅਤੇ ਰਜਿਸਟਰੀਆਂ ਕਰਵਾਉਣ ਵਾਲਿਆਂ ਦੀ ਭੀੜ ਬਣੀ ਰਹੀ। -------------------------- ਇੱਕੋ ਕੰਪਲੈਕਸ ’ਚ ਬੰਦ ਦੀਆਂ ਦੋ ਤਸਵੀਰਾਂ ਵੀਰਵਾਰ ਨੂੰ ਪ੍ਰਸ਼ਾਸਕੀ ਕੰਪਲੈਕਸ ’ਚ ਜਲੰਧਰ ਬੰਦ ਦੀਆਂ ਦੋ ਵੱਖ-ਵੱਖ ਤਸਵੀਰਾਂ ਦੇਖਣ ਨੂੰ ਮਿਲੀਆਂ। ਇੱਕ ਪਾਸੇ ਸੇਵਾ ਕੇਂਦਰ ਅਤੇ ਤਹਿਸੀਲ ’ਚ ਲੋਕਾਂ ਦੀ ਆਵਾਜਾਈ ਲਗਭਗ ਥੰਮ ਗਈ ਅਤੇ ਖਾਲੀ ਕਾਊਂਟਰ ਤੇ ਸੁੰਨੇ ਗਲਿਆਰੇ ਬੰਦ ਦਾ ਅਸਰ ਬਿਆਨ ਕਰ ਰਹੇ ਸਨ। ਦੂਜੇ ਪਾਸੇ ਸਬ-ਰਜਿਸਟਰਾਰ ਦਫ਼ਤਰਾਂ ’ਚ ਰਜਿਸਟਰੀਆਂ ਦੇ ਕੰਮ ਕਾਰਨ ਲੋਕਾਂ ਦੀ ਆਵਾਜਾਈ ਜਾਰੀ ਰਹੀ। ਕੁੱਲ ਮਿਲਾ ਕੇ ਜਲੰਧਰ ਬੰਦ ਦਾ ਅਸਰ ਪ੍ਰਸ਼ਾਸਕੀ ਕੰਪਲੈਕਸ ਦੇ ਆਮ ਕੰਮਕਾਜ ’ਤੇ ਸਾਫ਼ ਨਜ਼ਰ ਆਇਆ। ਕਿਤੇ ਬੰਦ ਕਾਰਨ ਸਰਕਾਰੀ ਦਫ਼ਤਰਾਂ ’ਚ ਸੰਨਾਟਾ ਛਾਇਆ ਰਿਹਾ ਅਤੇ ਕਿਤੇ ਜ਼ਰੂਰੀ ਦਸਤਾਵੇਜ਼ੀ ਕੰਮਾਂ ਕਾਰਨ ਦਫ਼ਤਰਾਂ ’ਚ ਰੌਣਕ ਕਾਇਮ ਰਹੀ।