Powercut : ਜਲੰਧਰ ਦੇ ਉਦਯੋਗਿਕ ਖੇਤਰ ’ਚ ਅਚਾਨਕ ਲੱਗੇ ਬਿਜਲੀ ਕੱਟ ਕਾਰਨ ਫੈਕਟਰੀਆਂ 'ਚ ਪਿਘਲਿਆ ਮਾਲ ਹੋਇਆ ਠੰਢਾ; ਲੱਖਾਂ ਰੁਪਏ ਦਾ ਨੁਕਸਾਨ

ਤੇਜਿੰਦਰ ਕੌਰ ਥਿੰਦ, ਜਲੰਧਰ: ਬਿਜਲੀ ਦੀ ਵਧਦੀ ਮੰਗ ਦੇ ਵਿਚਕਾਰ ਪਾਵਰਕੌਮ ਵੱਲੋਂ ਇੰਡਸਟਰੀ ਨੂੰ ਪਾਵਰਕੱਟ ਦਿੱਤੇ ਜਾਣ ਕਾਰਨ ਉਦਯੋਗਿਕ ਇਕਾਈਆਂ ਦਾ ਕੰਮਕਾਜ ਪ੍ਰਭਾਵਿਤ ਹੋ ਰਿਹਾ ਹੈ। ਬੁੱਧਵਾਰ ਨੂੰ ਸ਼ਾਮ 7 ਵਜੇ ਤੋਂ ਰਾਤ 12 ਵਜੇ ਤੱਕ ਲਗਭਗ ਪੰਜ ਘੰਟਿਆਂ ਦਾ ਬਿਜਲੀ ਕੱਟ ਲੱਗਣ ਕਾਰਨ ਇੰਡਸਟਰੀ ਦੀ ਨਾਈਟ ਸ਼ਿਫਟ ਪ੍ਰਭਾਵਿਤ ਹੋਈ। ਇਸ ਦੇ ਨਾਲ ਹੀ ਗਰਮੀ ਅਤੇ ਹੁੰਮਸ ਕਾਰਨ ਮਜ਼ਦੂਰਾਂ ਨੂੰ ਵੀ ਭਾਰੀ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ। ਗਦਈਪੁਰ, ਸਵਰਨ ਪਾਰਕ, ਰਾਜਾ ਗਾਰਡਨ ਅਤੇ ਰੰਧਾਵਾ ਮਸੰਦਾ ਦੇ ਉਦਯੋਗਿਕ ਇਲਾਕਿਆਂ ਵਿੱਚ ਕਰੀਬ 1300 ਤੋਂ ਵੱਧ ਘਰ ਹਨ ਅਤੇ 700 ਤੋਂ 800 ਦੇ ਕਰੀਬ ਮਜ਼ਦੂਰ ਕੁਆਰਟਰ ਬਣੇ ਹੋਏ ਹਨ। ਇਨ੍ਹਾਂ ਕੁਆਰਟਰਾਂ ’ਚ 10 ਹਜ਼ਾਰ ਤੋਂ ਵੱਧ ਮਜ਼ਦੂਰ ਰਹਿੰਦੇ ਹਨ। ਇੰਡਸਟਰੀ ’ਤੇ ਪਾਵਰਕੱਟ ਲੱਗਣ ਕਾਰਨ ਇਨ੍ਹਾਂ ਇਲਾਕਿਆਂ ’ਚ ਵੀ ਬਿਜਲੀ ਸਪਲਾਈ ਪ੍ਰਭਾਵਿਤ ਹੁੰਦੀ ਹੈ। ਗਰਮੀ ਵਿੱਚ ਬਿਜਲੀ ਨਾ ਹੋਣ ਕਾਰਨ ਮਜ਼ਦੂਰਾਂ ਦੀ ਨੀਂਦ ਪੂਰੀ ਨਹੀਂ ਹੁੰਦੀ, ਜਿਸ ਦਾ ਅਸਰ ਅਗਲੇ ਦਿਨ ਦੀ ਡੇ ਸ਼ਿਫਟ ’ਤੇ ਵੀ ਪੈਂਦਾ ਹੈ। ਉਦਯੋਗਪਤੀਆਂ ਮੁਤਾਬਕ ਨਾਈਟ ਸ਼ਿਫਟ ਲਈ ਬੁਲਾਏ ਗਏ ਮਜ਼ਦੂਰਾਂ ਨੂੰ ਕੰਮ ਨਾ ਹੋਣ ਦੇ ਬਾਵਜੂਦ ਦਿਹਾੜੀ ਦੇਣੀ ਪੈਂਦੀ ਹੈ। ਆਰਡਰ ਪੂਰੇ ਕਰਨ ਲਈ ਜਨਰੇਟਰ ਚਲਾਉਣੇ ਪੈਂਦੇ ਹਨ, ਜਿਸ ਨਾਲ ਇੰਡਸਟਰੀ ’ਤੇ ਵਾਧੂ ਵਿੱਤੀ ਬੋਝ ਪੈਂਦਾ ਹੈ। ਪਹਿਲਾਂ ਹੀ ਮਜ਼ਦੂਰਾਂ ਦੀ ਕਮੀ ਨਾਲ ਜੂਝ ਰਹੀ ਇੰਡਸਟਰੀ ਵਿੱਚ ਪਾਵਰਕੱਟ ਕਾਰਨ ਹਾਲਾਤ ਹੋਰ ਮੁਸ਼ਕਲ ਹੋ ਰਹੇ ਹਨ।

ਅਚਾਨਕ ਕੱਟ ਨਾਲ ਫਰਨੇਸਾਂ ਵਿੱਚ ਜੰਮਿਆ ਮਾਲ

ਨਰਿੰਦਰ ਸਿੰਘ ਸੱਗੂ ਨੇ ਕਿਹਾ ਕਿ ਬਿਨਾਂ ਪੂਰਵ ਸੂਚਨਾ ਦੇ ਲਗਾਏ ਜਾ ਰਹੇ ਬਿਜਲੀ ਕੱਟਾਂ ਕਾਰਨ ਉਨ੍ਹਾਂ ਨੂੰ ਲੱਖਾਂ ਰੁਪਏ ਦਾ ਨੁਕਸਾਨ ਹੋ ਰਿਹਾ ਹੈ। ਸ਼ਨਿਚਰਵਾਰ ਨੂੰ ਸਵੇਰੇ 7 ਵਜੇ ਬਿਜਲੀ ਬੰਦ ਕਰ ਦਿੱਤੀ ਗਈ, ਜਦਕਿ ਕੱਟ ਸਬੰਧੀ ਮੈਸੇਜ 7:05 ਵਜੇ ਭੇਜਿਆ ਗਿਆ। ਅਚਾਨਕ ਬਿਜਲੀ ਬੰਦ ਹੋਣ ਕਾਰਨ ਫੈਕਟਰੀਆਂ ਦੀਆਂ ਫਰਨੇਸਾਂ ਵਿੱਚ ਪਿਘਲ ਰਿਹਾ ਮਾਲ ਠੰਡਾ ਹੋ ਕੇ ਜੰਮ ਗਿਆ। ਇਕ ਉਦਯੋਗਪਤੀ ਨੇ ਦੱਸਿਆ ਕਿ ਮਾਲ ਨੂੰ ਪਿਘਲਾਉਣ ਲਈ ਕਰੀਬ 10-10 ਹਜ਼ਾਰ ਯੂਨਿਟ ਬਿਜਲੀ ਪਹਿਲਾਂ ਹੀ ਖਰਚ ਹੋ ਚੁੱਕੀ ਸੀ ਤੇ ਮਾਲ ਤਿਆਰ ਹੋਣ ਲਈ ਸਿਰਫ਼ ਥੋੜ੍ਹਾ ਕੰਮ ਬਾਕੀ ਸੀ। ਅਚਾਨਕ ਕੱਟ ਕਾਰਨ ਸਾਰਾ ਮਾਲ ਫਰਨੇਸ ’ਚ ਹੀ ਜੰਮ ਗਿਆ। ਵੱਡੀਆਂ ਫਰਨੇਸਾਂ ਨੂੰ ਜਨਰੇਟਰ ਨਾਲ ਚਲਾਉਣਾ ਵੀ ਸੰਭਵ ਨਹੀਂ ਹੁੰਦਾ। ਉਦਯੋਗਪਤੀਆਂ ਦਾ ਕਹਿਣਾ ਹੈ ਕਿ ਬਿਜਲੀ ਬਚਾਉਣ ਦੀ ਕੋਸ਼ਿਸ਼ ’ਚ ਉਲਟਾ ਇੰਡਸਟਰੀ ਦਾ ਭਾਰੀ ਨੁਕਸਾਨ ਹੋ ਰਿਹਾ ਹੈ।

ਸੀਈਆਈਆਈ ਨੇ ਵੀ ਪਾਵਰਕੱਟ ਦਾ ਮੁੱਦਾ ਚੁੱਕਿਆ

ਪਾਵਰਕੱਟ ਦੇ ਮੁੱਦੇ ਨੂੰ ਲੈ ਕੇ ਸੀਈਆਈਆਈ ਪੰਜਾਬ ਦੇ ਚੇਅਰਮੈਨ ਹਰਪ੍ਰੀਤ ਨਿੱਬੜ ਨੇ ਇੰਡਸਟਰੀ ਐਂਡ ਕਾਮਰਸ ਵਿਭਾਗ ਦੇ ਪ੍ਰਿੰਸੀਪਲ ਸਕੱਤਰ ਗੁਰਕੀਰਤ ਕ੍ਰਿਪਾਲ ਸਿੰਘ ਤੇ ਪੀਐੱਸਪੀਸੀਐੱਲ ਦੇ ਸੀਐੱਮਡੀ ਡਾ. ਬਸੰਤ ਗਰਗ ਨਾਲ ਮੁਲਾਕਾਤ ਕੀਤੀ। ਨਿੱਬੜ ਮੁਤਾਬਕ ਪੀਐੱਸਪੀਸੀਐੱਲ ਦੇ ਸੀਐੱਮਡੀ ਨੇ ਦੱਸਿਆ ਕਿ ਦੇਸ਼ ’ਚ ਬਿਜਲੀ ਦੀ ਕਮੀ ਕਾਰਨ ਸਪਲਾਈ ’ਤੇ ਦਬਾਅ ਹੈ। ਕੁਝ ਕੋਲੇ ਦੀਆਂ ਖਾਣਾਂ ’ਚ ਪਾਣੀ ਭਰਨ ਕਾਰਨ ਨੈਸ਼ਨਲ ਗ੍ਰਿਡ ਤੋਂ ਲੋੜ ਅਨੁਸਾਰ ਬਿਜਲੀ ਨਹੀਂ ਮਿਲ ਰਹੀ। ਇਸ ਤੋਂ ਇਲਾਵਾ ਰਾਜ ਦੇ ਥਰਮਲ ਪਾਵਰ ਸਟੇਸ਼ਨਾਂ ਦੇ ਕਰਮਚਾਰੀਆਂ ਦੀ ਹੜਤਾਲ ਕਾਰਨ ਵੀ ਲਗਭਗ 900 ਮੈਗਾਵਾਟ ਦੀ ਕਮੀ ਆਈ ਸੀ, ਹਾਲਾਂਕਿ ਹੜਤਾਲ ਹੁਣ ਖਤਮ ਹੋ ਚੁੱਕੀ ਹੈ। ਸੀਐੱਮਡੀ ਨੇ ਕਿਹਾ ਕਿ ਘਰੇਲੂ ਖਪਤਕਾਰਾਂ ਨੂੰ ਪਹਿਲ ਦੇਣ ਤੇ ਬਿਜਲੀ ਸਪਲਾਈ ਨੂੰ ਮੈਨੇਜ ਕਰਨ ਲਈ ਸ਼ਾਮ ਦੇ ਸਮੇਂ ਇੰਡਸਟਰੀ ’ਤੇ ਪਾਵਰਕੱਟ ਲਗਾਇਆ ਜਾ ਰਿਹਾ ਹੈ। ਉਨ੍ਹਾਂ ਆਉਣ ਵਾਲੇ ਦਿਨਾਂ ’ਚ ਸਥਿਤੀ ’ਚ ਸੁਧਾਰ ਦੀ ਉਮੀਦ ਜਤਾਈ। ਸੀਈਆਈਆਈ ਪੰਜਾਬ ਨੇ ਸਰਕਾਰ ਤੋਂ ਮੰਗ ਕੀਤੀ ਕਿ ਇੰਡਸਟਰੀ ਨੂੰ ਘੱਟੋ-ਘੱਟ ਚਾਰ ਰਾਤਾਂ ਅਤੇ ਪੰਜ ਦਿਨ ਬਿਨਾਂ ਰੁਕਾਵਟ ਬਿਜਲੀ ਸਪਲਾਈ ਦਿੱਤੀ ਜਾਵੇ।