ਡੀਏਵੀ ਕਾਲਜ ਦੇ ਐੱਨਐੱਸਐੱਸ ਵਲੰਟੀਅਰਜ਼ ਨੇ ਪੰਜ ਰੋਜ਼ਾ ਕੈਂਪ ’ਚ ਲਿਆ ਹਿੱਸਾ

ਤੇਜਿੰਦਰ ਕੌਰ ਥਿੰਦ, ਪੰਜਾਬੀ ਜਾਗਰਣ, ਜਲੰਧਰ : ਪ੍ਰਿੰਸੀਪਲ ਡਾ. ਅਨੂਪ ਕੁਮਾਰ ਦੀ ਅਗਵਾਈ ਹੇਠ ਡੀਏਵੀ ਕਾਲਜ ਦੇ ਪੰਜ ਐੱਨਐੱਸਐੱਸ ਵਲੰਟੀਅਰਜ਼ ਨੇ ਹੁਸ਼ਿਆਰਪੁਰ ਦੇ ਦੇਹਰੀਆਂ ਵਿਖੇ ਯੁਵਕ ਸੇਵਾਵਾਂ ਵਿਭਾਗ, ਪੰਜਾਬ ਵੱਲੋਂ ਆਯੋਜਿਤ ਪੰਜ ਰੋਜ਼ਾ ਐਡਵੈਂਚਰ ਤੇ ਟ੍ਰੈਕਿੰਗ ਕੈਂਪ ’ਚ ਹਿੱਸਾ ਲਿਆ। ਬੀ-ਕਾਮ ਦੂਜੇ ਸਾਲ ਦੇ ਸ਼ਿਵਮ ਸਫ਼ਰੀ ਦੀ ਅਗਵਾਈ ਵਾਲੀ ਇਸ ਟੀਮ ’ਚ ਬੀਏ ਦੂਜੇ ਸਾਲ ਦੇ ਅਰਸ਼ਦੀਪ ਸਿੰਘ ਤੇ ਬੀਬੀਏ ਦੂਜੇ ਸਾਲ ਦੇ ਦਕਸ਼ ਜੈਨ, ਤਨਮਯ ਭਰਮਾਕਰ ਤੇ ਰਾਹੁਲ ਕੁਮਾਰ ਸ਼ਾਮਲ ਸਨ। ਕੈਂਪ ਦੌਰਾਨ ਇੰਸਟ੍ਰਕਟਰਾਂ ਨੇ ਵਲੰਟੀਅਰਜ਼ ਨੂੰ ਰੱਸੀਆਂ ਨਾਲ ਜੁੜੀਆਂ ਤਕਨੀਕਾਂ ਸਿਖਾਈਆਂ, ਜਿਨ੍ਹਾਂ ਦੀ ਵਰਤੋਂ ਪਹਾੜੀ ਚੜ੍ਹਾਈ ਦੌਰਾਨ ਕੀਤੀ ਜਾਂਦੀ ਹੈ। ਉਨ੍ਹਾਂ ਨੇ ਜ਼ਿਪ-ਲਾਈਨਿੰਗ ਤੇ ਟ੍ਰੈਕਿੰਗ ’ਚ ਵੀ ਹਿੱਸਾ ਲਿਆ। ਜਿਸ ’ਚ ਇਕ ਡੈਮ ਤੱਕ ਲਗਭਗ ਦੋ ਘੰਟਿਆਂ ਦੀ ਪੈਦਲ ਯਾਤਰਾ ਵੀ ਸ਼ਾਮਲ ਸੀ। ਸਮੂਹ ਦੇ ਪ੍ਰਬੰਧ ਲਈ ਕੈਂਪ ’ਚ ਹਿੱਸਾ ਲੈਣ ਵਾਲਿਆਂ ’ਚੋਂ ਹੀ ਰੋਪ ਲੀਡਰ , ਇਕ ਸੀਨੀਅਰ ਲੀਡਰ ਤੇ ਇਕ ਡਿਪਟੀ ਲੀਡਰ ਨਿਯੁਕਤ ਕੀਤੇ ਗਏ। ਪੂਰੇ ਕੈਂਪ ਦੌਰਾਨ ਸਮੇਂ ਦੀ ਪਾਬੰਦੀ, ਟੀਮ ਵਰਕ ਤੇ ਅਨੁਸ਼ਾਸਨ ’ਤੇ ਵਿਸ਼ੇਸ਼ ਜ਼ੋਰ ਦਿੱਤਾ ਗਿਆ। ਕੈਂਪ ਦੀਆਂ ਗਤੀਵਿਧੀਆਂ ’ਚ ਬੈਡਮਿੰਟਨ ਤੇ ਵਾਲੀਬਾਲ ਖੇਡਾਂ ਦੇ ਨਾਲ-ਨਾਲ ਇਕ ਬੋਨਫਾਇਰ ਸ਼ਾਮਲ ਸੀ। ਜਿਸ ਦੌਰਾਨ ਭਾਗੀਦਾਰਾਂ ਨੇ ਕਹਾਣੀਆਂ ਸੁਣਾਈਆਂ, ਗੀਤ ਗਾਏ ਤੇ ਸੱਭਿਆਚਾਰਕ ਪ੍ਰੋਗਰਾਮ ’ਚ ਹਿੱਸਾ ਲਿਆ। ਐੱਨਐੱਸਐੱਸ ਕੋਆਰਡੀਨੇਟਰ ਡਾ. ਸਾਹਿਬ ਸਿੰਘ ਤੇ ਪ੍ਰੋਗਰਾਮ ਅਫ਼ਸਰਾਂ-ਪ੍ਰੋ. ਸੁਰੁਚੀ ਕਾਟਲਾ, ਡਾ. ਗੁਰਜੀਤ ਕੌਰ ਤੇ ਡਾ. ਸੁਮਿਤ ਜਲੋਟਾ ਨੇ ਕੈਂਪ ’ਚ ਕਾਲਜ ਦੀ ਨੁਮਾਇੰਦਗੀ ਕਰਨ ਲਈ ਟੀਮ ਦੀ ਸ਼ਲਾਘਾ ਕੀਤੀ। ਵਾਈਸ ਪ੍ਰਿੰਸੀਪਲ ਪ੍ਰੋ. ਕੁੰਵਰ ਰਾਜੀਵ ਤੇ ਪ੍ਰੋ. ਸੋਨਿਕਾ ਦਾਨੀਆ, ਰਜਿਸਟਰਾਰ ਪ੍ਰੋ. ਅਸ਼ੋਕ ਕਪੂਰ ਤੇ ਡਿਪਟੀ ਰਜਿਸਟਰਾਰ ਪ੍ਰੋ. ਮਨੀਸ਼ ਖੰਨਾ ਨੇ ਵਲੰਟੀਅਰਜ਼ ਨੂੰ ਵਧਾਈ ਦਿੱਤੀ।