ਜੈਸੀ ਸਹੋਤਾ ਸਰੀ ’ਚ ਵਿਧਾਇਕ ਬਣ ਕੇ ਪੰਜਾਬ ਦਾ ਮਾਣ ਵਧਾਇਆ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਫਿਲੌਰ : ਕੈਨੇਡਾ ’ਚ ਹੋਈਆਂ ਚੋਣਾਂ ’ਚ ਕੰਜ਼ਰਵੇਟਿਵ ਪਾਰਟੀ ਦੇ ਉਮਦੀਵਾਰ ਵਜੋਂ ਪੰਜਬ ਦੀ ਧਰਤੀ ਦਾ ਮਾਣ ਜੈਸੀ ਸਹੋਤਾ 4435 ਵੋਟਾਂ ਨਾਲ ਬਹੁਤ ਹੀ ਸ਼ਾਨਦਾਰ ਜਿੱਤ ਪ੍ਰਾਪਤ ਕਰ ਕੇ ਐੱਮਐੱਲਏ ਦੇ ਅਹੁਦੇ ਦਾ ਹੱਕਦਾਰ ਬਣ ਗਿਆ ਹੈ। ਇਹ ਗੱਲ ਸਮੁੱਚੇ ਪੰਜਾਬੀ ਭਾਈਚਾਰੇ ਦੇ ਨਾਲ ਨਾਲ ਦੁਆਬੇ ਲਈ ਖਾਸ ਤੌਰ ’ਤੇ ਮਾਣ ਕਰਨਯੋਗ ਹੈ, ਕਿਉਂਕਿ ਜਲੰਧਰ ਜ਼ਿਲ੍ਹੇ ਦੇ ਪਿੰਡ ਚੱਕ ਦੇਸ ਰਾਜ ’ਚ ਜੰਮਿਆ ਇਹ ਗੱਭਰੂ ਅੱਜ ਸਾਰੀ ਦੁਨੀਆ ’ਚ ਆਪਣੀ ਵੱਖਰੀ ਪਛਾਣ ਕਾਇਮ ਕਰ ਚੁੱਕਾ ਹੈ। ਲਾਲਾ ਮਨੋਹਰ ਸਿੰਘ ਦਾ ਪੋਤਰਾ ਤੇ ਪਿਤਾ ਰਛਪਾਲ ਸਿੰਘ (ਪਾਲਾ) ਤੇ ਮਾਤਾ ਹਰਜਿੰਦਰ ਕੌਰ ਦਾ ਫਰਜ਼ੰਦ ਬਹੁਤ ਵਧੀਆ ਭਲਵਾਨ ਤੇ ਬਹੁਤ ਹੀ ਵਧੀਆ ਕਬੱਡੀ ਖਿਡਾਰੀ ਵੀ ਹੈ। ਕੈਨੇਡਾ ਦੀ ਪੁਲਿਸ ਦਾ ਇਹ ਹੋਣਹਾਰ ਅਫਸਰ ਬਹੁਤ ਸਾਰੇ ਅੰਤਰਰਾਸ਼ਟਰੀ ਮੁਕਾਬਲਿਆਂ ’ਚ ਜੇਤੂ ਟਰਾਫੀਆਂ ਆਪਣੇ ਨਾਂ ਕਰ ਚੁੱਕਾ ਹੈ। ਰਾਜਨੀਤੀ ਦੇ ਖੇਤਰ ’ਚ ਪਿਛਲੇ ਕਈ ਸਾਲਾਂ ਤੋਂ ਆਪਣੀ ਜੀਵਨ ਸਾਥਣ ਇਕਜੋਤ ਸੰਧੂ ਤੇ ਛੋਟੇ ਭਰਾ ਪੋਲਾ ਸਹੋਤਾ ਨਾਲ ਮਿਲ ਕੇ ਸਮਾਜ ਦੀ ਸੇਵਾ ਕਰ ਰਿਹਾ ਹੈ। ਇਕ ਛੋਟੇ ਜਿਹੇ ਪਿੰਡ ਤੋਂ ਉੱਠ ਕੇ ਅੰਤਰਰਾਸ਼ਟਰੀ ਪੱਧਰ ਤੱਕ ਆਪਣੀ ਪਛਾਣ ਬਣਾਉਣਾ ਤੇ ਨਿਹਾਇਤ ਵੱਕਾਰੀ ਅਹੁਦੇ ਤੱਕ ਪਹੁੰਚਣਾ ਕਿਸੇ ਵਿਰਲੇ ਦੇ ਹਿੱਸੇ ਆਉਂਦਾ ਹੈ। ਜੈਸੀ ਦੀ ਜਿੱਤ ਨਾਲ ਸਮੁੱਚੇ ਇਲਾਕੇ ’ਚ ਖੁਸ਼ੀ ਦੀ ਲਹਿਰ ਹੈ ਤੇ ਇਲਾਕਾ ਨਿਵਾਸੀ ਪਰਿਵਾਰ ਨੂੰ ਵਧਾਈਆਂ ਦੇ ਰਹੇ ਹਨ।