ਮੇਜਰ ’ਤੇ ਸਮੂਹਿਕ ਜਬਰ-ਜਨਾਹ ਦਾ ਕੇਸ: ਪਿਤਾ ਨੇ ਦੱਸਿਆ ‘ਫਰਜ਼ੀ’, CM ਤੇ DGP ਨੂੰ ਚਿੱਠੀ ਲਿਖ ਮੰਗਿਆ ਇਨਸਾਫ਼

ਲਗਪਗ ਦੋ ਮਹੀਨੇ ਗੱਲਬਾਤ ਹੋਈ ਪਰ ਮੇਜਰ ਨੇ ਵਿਆਹ ਤੋਂ ਇਨਕਾਰ ਕਰ ਦਿੱਤਾ। ਇਸ ਤੋਂ ਬਾਅਦ 21 ਸਤੰਬਰ 2023 ਨੂੰ ਮੁਟਿਆਰ ਨੇ ਮੇਜਰ ’ਤੇ ਜਬਰ ਜਨਾਹ ਦਾ ਕੇਸ ਦਰਜ ਕਰਵਾ ਦਿੱਤਾ, ਜੋ ਅਜੇ ਵੀ ਹਾਈ ਕੋਰਟ ’ਚ ਵਿਚਾਰ ਅਧੀਨ ਹੈ। ਮੇਜਰ ਦਾ ਕਹਿਣਾ ਹੈ ਕਿ ਇਸ ਤੋਂ ਬਾਅਦ ਸਮਝੌਤਾ ਵੀ ਹੋਇਆ ਪਰ ਕੁਝ ਸਮੇਂ ਬਾਅਦ ਲੜਕੀ ਨੇ ਉਨ੍ਹਾਂ ਦੇ ਪਿਤਾ ’ਤੇ ਉਸ ਨੂੰ ਸਾੜ ਕੇ ਮਾਰਨ ਦੀ ਕੋਸ਼ਿਸ਼ ਦਾ ਦੋਸ਼ ਲਾ ਦਿੱਤਾ। ਫਿਰ ਅੰਮ੍ਰਿਤਸਰ ਜਾ ਕੇ ਉਨ੍ਹਾਂ ਦੀ ਭੈਣ ’ਤੇ ਵੀ ਮਾਰਨ ਦੀ ਕੋਸ਼ਿਸ਼ ਦੇ ਦੋਸ਼ ਲਗਾਏ, ਜੋ ਬੇਬੁਨਿਆਦ ਸਾਬਤ ਹੋਏ। ਮੁੱਖ ਮੰਤਰੀ ਤੇ ਡੀਜੀਪੀ ਨੂੰ ਲਿਖੀ ਚਿੱਠੀ ’ਚ ਦੱਸਿਆ ਗਿਆ ਹੈ ਕਿ ਮਨਪ੍ਰੀਤ ਸਿੰਘ 12 ਤੋਂ 17 ਜਨਵਰੀ 2026 ਤੱਕ ਛੁੱਟੀ ’ਤੇ ਜਲੰਧਰ ਆਏ ਹੋਏ ਸਨ ਤੇ ਪਿੱਠ ਦੇ ਦਰਦ ਦਾ ਇਲਾਜ ਕਰਵਾ ਰਹੇ ਸਨ। ਇਸ ਦੌਰਾਨ ਮੁਟਿਆਰ ਨੇ ਗੈਂਗਰੇਪ ਦਾ ਕੇਸ ਦਰਜ ਕਰਵਾ ਦਿੱਤਾ। ਮੁਟਿਆਰ ਨੇ ਦੋਸ਼ ਲਾਇਆ ਕਿ ਉਸ ਨੂੰ ਜਲੰਧਰ ਬੁਲਾਇਆ ਗਿਆ, ਫਿਰ ਇਕ ਚੌਕ ’ਤੇ ਕਾਰ ’ਚ ਮੇਜਰ, ਉਨ੍ਹਾਂ ਦੇ ਜੀਜਾ ਤੇ ਇਕ ਹੋਰ ਵਿਅਕਤੀ ਆਏ, ਉਸ ਨੂੰ ਕੁਝ ਸੁੰਘਾਇਆ ਗਿਆ ਤੇ ਹੋਸ਼ ਆਉਣ ’ਤੇ ਉਹ ਕਪੂਰਥਲਾ ਦੇ ਇਕ ਹੋਟਲ ’ਚ ਸੀ। ਪਰਿਵਾਰ ਦਾ ਕਹਿਣਾ ਹੈ ਕਿ ਜਿਸ ਦਿਨ ਦਾ ਦੋਸ਼ ਲਗਾਇਆ ਗਿਆ, ਉਸ ਦਿਨ ਨਾ ਤਾਂ ਮੇਜਰ ਦੇ ਜੀਜਾ ਜਲੰਧਰ ’ਚ ਸਨ ਤੇ ਨਾ ਹੀ ਮੁਟਿਆਰ ਜਲੰਧਰ ਆਈ ਸੀ। ਪੁਲਿਸ ਜਾਂਚ ’ਚ ਵੀ ਸਾਹਮਣੇ ਆਇਆ ਹੈ ਕਿ ਉਸ ਦਿਨ ਲੜਕੀ ਦੀ ਮੋਬਾਈਲ ਲੋਕੇਸ਼ਨ ਹਰਿਦੁਆਰ ਦੀ ਸੀ। ਪਰਿਵਾਰ ਦਾ ਦੋਸ਼ ਹੈ ਕਿ ਮੁਟਿਆਰ ਝੂਠੇ ਕੇਸਾਂ ਰਾਹੀਂ ਉਨ੍ਹਾਂ ਨੂੰ ਬਲੈਕਮੇਲ ਕਰ ਰਹੀ ਹੈ। ਉਨ੍ਹਾਂ ਦੱਸਿਆ ਕਿ 2022 ’ਚ ਲੜਕੀ ਨੇ ਇਕ ਸੀਆਰਪੀਐੱਫ ਦੇ ਜਵਾਨ ’ਤੇ ਵੀ ਇਸੇ ਤਰ੍ਹਾਂ ਦਾ ਕੇਸ ਦਰਜ ਕਰਵਾਇਆ ਸੀ।