ਕੇਐੱਮਵੀ ਨੇ ਹਾਸਲ ਕੀਤੀ ਇਤਿਹਾਸਕ ਪ੍ਰਾਪਤੀ

ਤੇਜਿੰਦਰ ਕੌਰ ਥਿੰਦ, ਪੰਜਾਬੀ ਜਾਗਰਣ, ਜਲੰਧਰ

ਗਲੋਬਲ ਅਕਾਦਮਿਕ ਉੱਤਮਤਾ ਦੇ ਇਕ ਪ੍ਰਮੁੱਖ ਕੇਂਦਰ ਵਜੋਂ ਆਪਣੀ ਸਥਿਤੀ ਨੂੰ ਹੋਰ ਮਜ਼ਬੂਤ ਕਰਦਿਆਂ ਕੰਨਿਆ ਮਹਾ ਵਿਦਿਆਲਾ ਨੇ ਵੱਕਾਰੀ ਇਰਾਸਮਸ ਇੰਟਰਨੈਸ਼ਨਲ ਕ੍ਰੈਡਿਟ ਮੋਬਿਲਿਟੀ ਪ੍ਰੋਗਰਾਮ ਕੇ.ਏ.171 ਤਹਿਤ ਫੰਡਿੰਗ ਪ੍ਰਾਪਤ ਕਰਕੇ ਅੰਤਰਰਾਸ਼ਟਰੀ ਸਹਿਯੋਗ ਦੇ ਖੇਤਰ ’ਚ ਇਕ ਇਤਿਹਾਸਕ ਪ੍ਰਾਪਤੀ ਹਾਸਲ ਕੀਤੀ ਹੈ। ਹੰਗਰੀ ਦੀ ਈਓਟਵੋਸ ਲੋਰੈਂਡ ਯੂਨੀਵਰਸਿਟੀ ਦੀ ਭਾਈਵਾਲੀ ਨਾਲ 2026-2029 ਪ੍ਰੋਜੈਕਟ ਲਈ ਪ੍ਰਦਾਨ ਕੀਤਾ ਗਿਆ। ਇਹ ਪ੍ਰੋਗਰਾਮ ਹੰਗਰੀ ਦੀ ਰਾਸ਼ਟਰੀ ਏਜੰਸੀ, ਟੈਂਪਸ ਪਬਲਿਕ ਫਾਊਂਡੇਸ਼ਨ ਦੁਆਰਾ ਪ੍ਰਵਾਨ ਕੀਤਾ ਗਿਆ ਹੈ। ਪ੍ਰੋਗਰਾਮ ਤਹਿਤ ਹਿੱਸਾ ਲੈਣ ਵਾਲੇ ਵਿਦਿਆਰਥੀਆਂ ਤੇ ਅਧਿਆਪਕਾਂ ਦੇ ਸਾਰੇ ਯਾਤਰਾ ਖਰਚੇ, ਰਿਹਾਇਸ਼ ਤੇ ਸਬੰਧਤ ਖਰਚੇ ਸਕਾਲਰਸ਼ਿਪ ਦੇ ਨਾਲ ਪੂਰੀ ਤਰ੍ਹਾਂ ਚੁੱਕੇ ਜਾਣਗੇ। ਨਿਰੰਤਰ ਅੰਤਰਰਾਸ਼ਟਰੀ ਯਤਨਾਂ ਦਾ ਇਕ ਤਾਜ਼ਾ ਸਬੂਤ ਐੱਮਐੱਸਸੀ ਫਿਜ਼ਿਕਸ ਦੀ ਵਿਦਿਆਰਥਣ ਸ਼ੀਤਲ ਦੀ ਪ੍ਰਾਪਤੀ ਹੈ, ਜਿਨ੍ਹਾਂ ਨੇ ਹਾਲ ਹੀ ’ਚ ਹੰਗਰੀ ਦੇ ਪ੍ਰਸਿੱਧ ਬੁਡਾਪੇਸਟ ਨਿਊਟ੍ਰੋਨ ਸੈਂਟਰ ’ਚ ਇਕ ਵਿਸ਼ੇਸ਼ ਨਿਊਟ੍ਰੋਨ ਡਿਫ੍ਰੈਕਸ਼ਨ ਪ੍ਰਯੋਗ ’ਚ ਹਿੱਸਾ ਲਿਆ। ਤਿੰਨ ਸਾਲ ਦੀ ਇਰਾਸਮਸ ਪ੍ਰੋਗਰਾਮ ਦੀ ਮਿਆਦ 1 ਅਗਸਤ 2026 ਤੋਂ 31 ਜੁਲਾਈ, 2029 ਤੱਕ ਚੱਲੇਗੀ, ਜਿਸ ’ਚ ਪਹਿਲਾ ਬੈਚ 2027-2028 ਅਕਾਦਮਿਕ ਸਾਲ ਦੇ ਔਟਮ ਸਮੈਸਟਰ ਦੌਰਾਨ ਸ਼ੁਰੂ ਹੋਵੇਗਾ। ਡਾਇਰੈਕਟਰ ਪ੍ਰੋ. ਡਾ. ਆਤਿਮਾ ਸ਼ਰਮਾ ਦਿਵੇਦੀ ਨੇ ਇਸ ਗੱਲ 'ਤੇ ਜ਼ੋਰ ਦਿੱਤਾ ਕਿ ਗਲੋਬਲ ਰਸਤੇ ਬਣਾਉਣ ਨਾਲ ਔਰਤਾਂ ਨੂੰ ਵਿਸ਼ਾਲ ਦੁਨੀਆ ਨਾਲ ਆਤਮ-ਵਿਸ਼ਵਾਸ ਨਾਲ ਜੁੜਨ ਵਿੱਚ ਮਦਦ ਮਿਲਦੀ ਹੈ।