ਪੰਜਾਬ ਤੇ ਹਿਮਾਚਲ ਪ੍ਰਦੇਸ਼ ਦੇ ਪੱਤਰਕਾਰਾਂ ਨੇ ਮਿਜ਼ੋਰਮ ਪੱਤਰਕਾਰ ਐਸੋਸੀਏਸ਼ਨ ਨਾਲ ਗੱਲਬਾਤ ਕੀਤੀ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਪੰਜਾਬ ਤੇ ਹਿਮਾਚਲ ਪ੍ਰਦੇਸ਼ ਦੇ ਪੱਤਰਕਾਰਾਂ ਦਾ ਇਕ ਵਫ਼ਦ ਪੱਤਰ ਸੂਚਨਾ ਦਫ਼ਤਰ (ਪੀਆਈਬੀ), ਜਲੰਧਰ ਵੱਲੋਂ ਇਕ ਵਿਸ਼ੇਸ਼ ਮੀਡੀਆ ਟੂਰ ਲਈ ਮਿਜ਼ੋਰਮ ਦੇ ਦੌਰੇ ਤੇ ਹੈ। ਆਪਣੀ ਫੇਰੀ ਦੇ ਦੂਜੇ ਦਿਨ, ਵਫ਼ਦ ਨੇ ਅੰਤਰ-ਰਾਜੀ ਸੰਚਾਰ ਤੇ ਸੱਭਿਆਚਾਰਕ ਸਮਝ ਨੂੰ ਉਤਸ਼ਾਹਤ ਕਰਨ ਲਈ ਸੂਚਨਾ ਤੇ ਲੋਕ ਸੰਪਰਕ ਡਾਇਰੈਕਟੋਰੇਟ (ਡੀਆਈਪੀਆਰ), ਮਿਜ਼ੋਰਮ ਸਰਕਾਰ ਤੇ ਮਿਜ਼ੋਰਮ ਪੱਤਰ ਐਸੋਸੀਏਸ਼ਨ (ਐੱਮਜੇਏ) ਨਾਲ ਗੱਲਬਾਤ ਸੈਸ਼ਨ ਕੀਤੇ। ਡੀਆਈਪੀਆਰ ਦਫ਼ਤਰ ਵਿਖੇ ਡਾਇਰੈਕਟਰ ਕੇ ਵਨਲਾਲਸਾਂਗੀ ਤੇ ਸੀਨੀਅਰ ਅਧਿਕਾਰੀਆਂ ਵੱਲੋਂ ਵਫ਼ਦ ਦਾ ਨਿੱਘਾ ਸਵਾਗਤ ਕੀਤਾ ਗਿਆ। ਮੀਟਿੰਗ ਦੌਰਾਨ, ਆਉਣ ਵਾਲੇ ਪੱਤਰਕਾਰਾਂ ਨੇ ਮਿਜ਼ੋਰਮ ਦੇ ਵਿਕਾਸ ਪ੍ਰੋਜੈਕਟਾਂ ਤੇ ਇਸ ਦੇ ਵਿਲੱਖਣ ਸੱਭਿਆਚਾਰਕ ਦ੍ਰਿਸ਼ ਤੇ ਇਕ ਫਲਦਾਇਕ ਗੱਲਬਾਤ ’ਚ ਹਿੱਸਾ ਲਿਆ। ਅਧਿਕਾਰੀਆਂ ਨੇ ਇਸ ਗੱਲ ਤੇ ਜ਼ੋਰ ਦਿੱਤਾ ਕਿ ਮਿਜ਼ੋਰਮ ਦੀ ਉੱਚ ਸਾਖਰਤਾ ਦਰ ਇਕ ਅਨੁਸ਼ਾਸਿਤ ਤੇ ਪ੍ਰਗਤੀਸ਼ੀਲ ਸਮਾਜ ਨੂੰ ਸਰੂਪ ਦੇਣ ’ਚ ਇਕ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦੀ ਹੈ। ਐਸੋਸੀਏਸ਼ਨ ਦੇ ਪ੍ਰਧਾਨ ਸੀ ਲਾਲਰਾਮਬੁਤਸਾਈਹਾ ਨੇ ਆਉਣ ਵਾਲੇ ਪੱਤਰਕਾਰਾਂ ਦਾ ਸਵਾਗਤ ਕੀਤਾ ਤੇ ਰਾਜ ’ਚ ਮੀਡੀਆ ਦੇ ਇਤਿਹਾਸ ਤੇ ਵਿਕਾਸ ਬਾਰੇ ਜਾਣਕਾਰੀ ਸਾਂਝੀ ਕੀਤੀ। ਚਰਚਾ ਮਿਜ਼ੋ ਲੋਕਾਂ ਦੇ ਸਮਾਜਿਕ ਨੈਤਿਕਤਾ, ਖ਼ਾਸ ਕਰਕੇ ਟ੍ਰੈਫਿਕ ਅਨੁਸ਼ਾਸਨ ਤੇ ਇਮਾਨਦਾਰੀ ਦੀ ਉਨ੍ਹਾਂ ਦੀ ਮਜ਼ਬੂਤ ਭਾਵਨਾ ਤੇ ਵੀ ਕੇਂਦ੍ਰਿਤ ਸੀ। ਮਿਜ਼ੋਰਮ ਦੇ ਬਹੁਤ ਸਾਰੇ ਦੂਰ-ਦੁਰਾਡੇ ਖੇਤਰਾਂ ’ਚ ਸਥਾਨਕ ਕਿਸਾਨ ਤਾਜ਼ੇ ਉਤਪਾਦਾਂ ਨਾਲ ਭਰੇ ਸੜਕ ਕਿਨਾਰੇ ਸਟਾਲ ਲਗਾਉਂਦੇ ਹਨ। ਇਹ ਸਟਾਲ ਅਣਗੌਲਿਆ ਛੱਡ ਦਿੱਤੇ ਜਾਂਦੇ ਹਨ, ਕਿਸਾਨ ਸਿਰਫ਼ ਇਕ ਕੀਮਤ ਸੂਚੀ ਦੇ ਨਾਲ ਇਕ ਸੰਗ੍ਰਹਿ ਡੱਬਾ ਜਾਂ ਮੇਜ਼ ਤੇ ਇਕ ਕਿਊਆਰ ਕੋਡ ਰੱਖਦੇ ਹਨ। ਰਾਹਗੀਰ ਆਪਣੀ ਲੋੜ ਅਨੁਸਾਰ ਚੋਣ ਕਰਦੇ ਹਨ ਤੇ ਬਿਨਾਂ ਕਿਸੇ ਨਿਗਰਾਨੀ ਦੇ ਸਹੀ ਰਕਮ ਦਾ ਭੁਗਤਾਨ ਕਰਦੇ ਹਨ। ਪੱਤਰਕਾਰਾਂ ਨੇ ਇਹ ਨੋਟ ਕਰਦੇ ਹੋਏ ਕਿ ਅਜਿਹੇ ਅਭਿਆਸ ਮਿਜ਼ੋਰਮ ਦੇ ਨਾਗਰਿਕਾਂ ਦੀਆਂ ਉੱਚ ਨੈਤਿਕ ਕਦਰਾਂ-ਕੀਮਤਾਂ ਦਾ ਪ੍ਰਮਾਣ ਹਨ, ਇਨ੍ਹਾਂ ਇਮਾਨਦਾਰੀ ਦੇ ਸਟਾਲਾਂ ਸ਼ਲਾਘਾ ਕੀਤੀ।