ਜੇਬੀਪੀਐੱਲ ਸੀਜ਼ਨ-1 ਕ੍ਰਿਕਟ ਕੱਪ ਅੱਜ ਤੋਂ

ਤੇਜਿੰਦਰ ਕੌਰ ਥਿੰਦ, ਪੰਜਾਬੀ ਜਾਗਰਣ, ਜਲੰਧਰ : ਜਲੰਧਰ ਬਾਕਸ ਪ੍ਰੀਮੀਅਰ ਲੀਗ (ਜੇਬੀਪੀਐੱਲ) ਵੱਲੋਂ ਜੇਬੀਪੀਐਲ ਸੀਜ਼ਨ-1 ਕ੍ਰਿਕਟ ਕੱਪ 29 ਅਗਸਤ ਤੋਂ ਕਰਵਾਇਆ ਜਾ ਰਿਹਾ ਹੈ। ਟੂਰਨਾਮੈਂਟ ਦਾ ਉਦਘਾਟਨ 29 ਅਗਸਤ ਨੂੰ ਸ਼ਾਮ 5 ਵਜੇ ਪਾਵਰ ਪਲੇ ਕ੍ਰਿਕਟ ਅਕੈਡਮੀ ਦੇ ਗਰਾਊਂਡ, ਯੂਨੀਕ ਹੋਮ ਦੇ ਨੇੜੇ, ਨਕੋਦਰ ਰੋਡ ’ਤੇ ਹੋਵੇਗਾ। ਮੁਕਾਬਲੇ ਦਾ ਫਾਈਨਲ ਮੈਚ ਐਤਵਾਰ, 30 ਅਗਸਤ ਨੂੰ ਖੇਡਿਆ ਜਾਵੇਗਾ। ਜੀਐੱਸ ਬਿੰਦਰਾ, ਐਮੀ ਭੱਟੀ, ਰਾਜੇਸ਼ ਸਰਨਾ ਤੇ ਰਿਸ਼ੀ ਲੂਥਰਾ ਨੇ ਦੱਸਿਆ ਕਿ ਜੇਬੀਪੀਐੱਲ ਸੀਜ਼ਨ-1 ਦਾ ਮੁੱਖ ਉਦੇਸ਼ ਨੌਜਵਾਨ ਪੀੜ੍ਹੀ ਨੂੰ ਖੇਡਾਂ ਨਾਲ ਜੋੜਨਾ ਤੇ ਉਨ੍ਹਾਂ ਵਿੱਚ ਖੇਡ ਭਾਵਨਾ, ਅਨੁਸ਼ਾਸਨ ਅਤੇ ਸਿਹਤਮੰਦ ਮੁਕਾਬਲੇ ਦੀ ਭਾਵਨਾ ਨੂੰ ਮਜ਼ਬੂਤ ਕਰਨਾ ਹੈ। ਟੂਰਨਾਮੈਂਟ ਵਿੱਚ ਕੁੱਲ 18 ਟੀਮਾਂ ਹਿੱਸਾ ਲੈਣਗੀਆਂ। ਹਰੇਕ ਟੀਮ ’ਚ 8 ਖਿਡਾਰੀ ਹੋਣਗੇ। ਮੁਕਾਬਲੇ ਦੇ ਸਾਰੇ ਮੈਚ 8-8 ਓਵਰਾਂ ਦੇ ਹੋਣਗੇ। ਬਿਹਤਰ ਪ੍ਰਦਰਸ਼ਨ ਕਰਨ ਵਾਲੀਆਂ ਟੀਮਾਂ ਲਈ ਨਕਦ ਇਨਾਮਾਂ ਦਾ ਪ੍ਰਬੰਧ ਕੀਤਾ ਗਿਆ ਹੈ। ਜੇਤੂ ਟੀਮ ਨੂੰ 31,000 ਰੁਪਏ, ਦੂਜੇ ਸਥਾਨ ’ਤੇ ਰਹਿਣ ਵਾਲੀ ਟੀਮ ਨੂੰ 21,000 ਰੁਪਏ ਅਤੇ ਤੀਜੇ ਸਥਾਨ ’ਤੇ ਆਉਣ ਵਾਲੀ ਟੀਮ ਨੂੰ 11,000 ਰੁਪਏ ਦਾ ਇਨਾਮ ਦਿੱਤਾ ਜਾਵੇਗਾ। ਇਸ ਤੋਂ ਇਲਾਵਾ ਖਿਡਾਰੀਆਂ ਦੇ ਨਿੱਜੀ ਪ੍ਰਦਰਸ਼ਨ ਨੂੰ ਉਤਸ਼ਾਹਿਤ ਕਰਨ ਲਈ ਪਲੇਅਰ ਆਫ਼ ਦਿ ਟੂਰਨਾਮੈਂਟ, ਮੈਨ ਆਫ਼ ਦਿ ਮੈਚ, ਸਰਬੋਤਮ ਬੱਲੇਬਾਜ਼ ਅਤੇ ਸਰਬੋਤਮ ਗੇਂਦਬਾਜ਼ ਵਰਗੇ ਇਨਾਮ ਵੀ ਦਿੱਤੇ ਜਾਣਗੇ। ਇਸ ਮੌਕੇ ਸਭ ਤੋਂ ਪਹਿਲਾਂ ਰਵੀ ਚੌਰਸੀਆ, ਰਣਜੋਤ ਸਿੰਘ ਅਤੇ ਕ੍ਰਿਕਟ ਟੀਮਾਂ ਦੇ ਕਪਤਾਨ ਵੀ ਮੌਜੂਦ ਸਨ।