- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਜਲੰਧਰ ਦੀ ਬਹਾਦਰ ਧੀ ਕੁਸੁਮ ਨੂੰ ਛੇ ਸਾਲ ਬਾਅਦ ਮਿਲਿਆ ਇਨਸਾਫ, ਜਾਨਲੇਵਾ ਹਮਲਾ ਤੇ ਮੋਬਾਈਲ ਖੋਹਣ ਵਾਲਿਆਂ ਨੂੰ 10-10 ਸਾਲ ਦੀ ਕੈਦ
ਜਲੰਧਰ ਦੀ ਬਹਾਦਰ ਧੀ ਕੁਸੁਮ ਨੂੰ ਛੇ ਸਾਲ ਬਾਅਦ ਇਨਸਾਫ ਮਿਲਿਆ ਹੈ। ਮੋਬਾਈਲ ਖੋਹਣ ਤੇ ਜਾਨਲੇਵਾ ਹਮਲਾ ਕਰਨ ਵਾਲੇ ਦੋ ਦੋਸ਼ੀਆਂ ਨੂੰ 10-10 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਕੁਸੁਮ ਨੇ 2020 ’ਚ ਲੁਟੇਰਿਆਂ ਦਾ ਬਹਾਦਰੀ ਨਾਲ ਮੁਕਾਬਲਾ ਕੀਤਾ ਸੀ ਤੇ ਬਾਅਦ ’ਚ ਉਸ ਨੂੰ ਰਾਸ਼ਟਰੀ ਬਹਾਦਰੀ ਪੁਰਸਕਾਰ ਨਾਲ ਵੀ ਸਨਮਾਨਿਤ ਕੀਤਾ ਗਿਆ ਸੀ।
Posted By Paramjit Kaur
Publish Date: Thu, 08 Oct 2026 10:35 AM (IST)
Updated Date: Thu, 08 Oct 2026 10:38 AM (IST)
ਦਿਨੇਸ਼ ਸ਼ਰਮਾ, ਜਲੰਧਰ। ਛੇ ਸਾਲ ਪਹਿਲਾਂ ਮੋਬਾਈਲ ਖੋਹ ਕੇ ਭੱਜ ਰਹੇ ਲੁਟੇਰਿਆਂ ਨਾਲ ਇਕੱਲੀ ਭਿੜ ਜਾਣ ਵਾਲੀ ਜਲੰਧਰ ਦੀ ਬਹਾਦਰ ਧੀ ਕੁਸੁਮ ਨੂੰ ਆਖਿਰਕਾਰ ਇਨਸਾਫ ਮਿਲ ਗਿਆ। ਜ਼ਿਲ੍ਹਾ ਤੇ ਸੈਸ਼ਨ ਜੱਜ ਪਰਮਿੰਦਰ ਸਿੰਘ ਰਾਏ ਦੀ ਅਦਾਲਤ ਨੇ ਬੁੱਧਵਾਰ ਨੂੰ ਇਹ ਮਹੱਤਵਪੂਰਨ ਫੈਸਲਾ ਸੁਣਾਇਆ।
ਉਸ ਸਮੇਂ ਅੱਠਵੀਂ ਜਮਾਤ ’ਚ ਪੜ੍ਹ ਰਹੀ ਕੁਸੁਮ 'ਤੇ ਜਾਨਲੇਵਾ ਹਮਲਾ ਕਰਕੇ ਉਸ ਦੀ ਹੱਤਿਆ ਦੀ ਕੋਸ਼ਿਸ਼ ਕਰਨ ਤੇ ਮੋਬਾਈਲ ਖੋਹਣ ਦੇ ਮਾਮਲੇ ’ਚ ਦੋਸ਼ੀ ਕਰਾਰ ਦਿੱਤੇ ਗਏ ਅਵਿਨਾਸ਼ ਕੁਮਾਰ ਉਰਫ਼ ਆਸ਼ੂ, ਵਾਸੀ ਮੁਹੱਲਾ ਬੇਗਮਪੁਰਾ, ਬਸਤੀ ਦਾਨਿਸ਼ਮੰਦਾ ਤੇ ਵਿਨੋਦ ਕੁਮਾਰ ਉਰਫ਼ ਝਿਕਾ, ਵਾਸੀ ਸੰਤ ਭਾਗ ਸਿੰਘ ਨਗਰ, ਮਾਡਲ ਟਾਊਨ ਨੂੰ 10-10 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਇਸ ਤੋਂ ਇਲਾਵਾ ਅਵਿਨਾਸ਼ ਕੁਮਾਰ ਨੂੰ 70 ਹਜ਼ਾਰ ਰੁਪਏ ਤੇ ਵਿਨੋਦ ਕੁਮਾਰ ਨੂੰ 75 ਹਜ਼ਾਰ ਰੁਪਏ ਜੁਰਮਾਨਾ ਵੀ ਕੀਤਾ ਗਿਆ ਹੈ।
30 ਅਗਸਤ 2020 ਨੂੰ ਹੋਈ ਸੀ ਵਾਰਦਾਤ
ਵਾਰਦਾਤ 30 ਅਗਸਤ 2020 ਦੀ ਹੈ। ਉਸ ਸਮੇਂ ਜਲੰਧਰ ਦੇ ਫਤਿਹਪੁਰੀ ਮੁਹੱਲਾ, ਨਿੰਬੂ ਵਾਲੀ ਗਲੀ ਦੀ ਰਹਿਣ ਵਾਲੀ ਕੁਸੁਮ ਅੱਠਵੀਂ ਜਮਾਤ ’ਚ ਪੜ੍ਹਦੀ ਸੀ। ਉਸ ਦਿਨ ਟਿਊਸ਼ਨ ਕਲਾਸ ਤੋਂ ਘਰ ਵਾਪਸ ਆਉਂਦੇ ਸਮੇਂ ਮੋਟਰਸਾਈਕਲ ਸਵਾਰ ਦੋ ਲੁਟੇਰਿਆਂ ਨੇ ਉਸ ਦੇ ਹੱਥੋਂ ਮੋਬਾਈਲ ਖੋਹ ਲਿਆ।
ਆਨਲਾਈਨ ਪੜ੍ਹਾਈ ਲਈ ਵਰਤਿਆ ਜਾਣ ਵਾਲਾ ਮੋਬਾਈਲ ਲੈ ਕੇ ਲੁਟੇਰਿਆਂ ਨੂੰ ਭੱਜਦਾ ਦੇਖ ਕੇ ਕੁਸੁਮ ਵੀ ਉਨ੍ਹਾਂ ਦੇ ਪਿੱਛੇ ਦੌੜ ਪਈ। ਜਦੋਂ ਲੁਟੇਰਾ ਮੋਟਰਸਾਈਕਲ 'ਤੇ ਬੈਠ ਕੇ ਭੱਜਣ ਲੱਗਾ ਤਾਂ ਕੁਸੁਮ ਨੇ ਉਸ ਨੂੰ ਕਮੀਜ਼ ਤੋਂ ਫੜ ਲਿਆ।
ਕੁਸੁਮ ਬਿਨਾਂ ਡਰੇ ਲੁਟੇਰਿਆਂ ਨਾਲ ਭਿੜ ਗਈ। ਆਪਣੇ ਆਪ ਨੂੰ ਫਸਿਆ ਹੋਇਆ ਦੇਖ ਕੇ ਲੁਟੇਰੇ ਨੇ ਕੁਸੁਮ ਦਾ ਹੱਥ ਛੁਡਾਉਣ ਲਈ ਦਾਤਰ ਕੱਢਿਆ ਤੇ ਉਸ ਦੀ ਕਲਾਈ 'ਤੇ ਵਾਰ ਕਰ ਦਿੱਤਾ। ਵਾਰ ਇੰਨਾ ਡੂੰਘਾ ਸੀ ਕਿ ਕੁਸੁਮ ਦੇ ਹੱਥ ਦੀਆਂ ਨਸਾਂ ਕੱਟ ਗਈਆਂ ਤੇ ਖੂਨ ਵਹਿਣ ਲੱਗ ਪਿਆ। ਇਸ ਦੇ ਬਾਵਜੂਦ ਕੁਸੁਮ ਨੇ ਲੁਟੇਰੇ ਨੂੰ ਨਹੀਂ ਛੱਡਿਆ।
ਕੁਸੁਮ ਦੀਆਂ ਚੀਕਾਂ ਸੁਣ ਕੇ ਆਸ-ਪਾਸ ਦੇ ਸਥਾਨਕ ਲੋਕ ਤੇ ਰਾਹਗੀਰ ਮਦਦ ਲਈ ਦੌੜੇ। ਉਨ੍ਹਾਂ ਨੇ ਮੌਕੇ 'ਤੇ ਹੀ ਇੱਕ ਦੋਸ਼ੀ ਨੂੰ ਕਾਬੂ ਕਰ ਲਿਆ, ਜਦਕਿ ਉਸ ਦਾ ਦੂਜਾ ਸਾਥੀ ਮੋਟਰਸਾਈਕਲ ਲੈ ਕੇ ਫਰਾਰ ਹੋ ਗਿਆ। ਛੇ ਸਾਲ ਤੱਕ ਚੱਲੀ ਕਾਨੂੰਨੀ ਲੜਾਈ ਤੋਂ ਬਾਅਦ ਅਦਾਲਤ ਦੇ ਇਸ ਫੈਸਲੇ ਨੇ ਉਸ ਦੀ ਬਹਾਦਰੀ ਦੀ ਕਹਾਣੀ ’ਚ ਇੱਕ ਹੋਰ ਅਧਿਆਇ ਜੋੜ ਦਿੱਤਾ ਹੈ।
ਕੋਰੋਨਾ ਕਾਲ ਦੌਰਾਨ ਭਰਾ ਨੇ ਆਨਲਾਈਨ ਪੜ੍ਹਾਈ ਲਈ ਦਿੱਤਾ ਸੀ ਮੋਬਾਈਲ
ਕੁਸੁਮ ਦੇ ਪਿਤਾ ਉਸ ਸਮੇਂ ਪੱਲੇਦਾਰੀ ਦਾ ਕੰਮ ਕਰਦੇ ਸਨ। ਕੁਸੁਮ ਦੀਆਂ ਦੋ ਭੈਣਾਂ ਤੇ ਇੱਕ ਭਰਾ ਹੈ। ਉਸ ਦੇ ਭਰਾ ਨੇ ਹੀ ਕਰੀਬ ਦੋ ਮਹੀਨੇ ਪਹਿਲਾਂ 12 ਹਜ਼ਾਰ ਰੁਪਏ ਜੋੜ ਕੇ ਕੁਸੁਮ ਲਈ ਮੋਬਾਈਲ ਖਰੀਦਿਆ ਸੀ, ਤਾਂ ਜੋ ਉਹ ਕੋਰੋਨਾ ਕਾਲ ਦੌਰਾਨ ਆਨਲਾਈਨ ਕਲਾਸਾਂ ਲਗਾ ਕੇ ਪੜ੍ਹਾਈ ਕਰ ਸਕੇ।
ਭਰਾ ਵੱਲੋਂ ਦਿੱਤਾ ਮੋਬਾਈਲ ਵਾਪਸ ਲੈਣ ਲਈ ਨਿਹੱਥੀ ਕੁਸੁਮ ਲੁਟੇਰਿਆਂ ਨਾਲ ਭਿੜ ਗਈ ਸੀ। ਉਸ ਨੂੰ ਡਰ ਸੀ ਕਿ ਜੇ ਮੋਬਾਈਲ ਇੱਕ ਵਾਰ ਚੋਰੀ ਹੋ ਗਿਆ ਤਾਂ ਘਰ ਵਾਲਿਆਂ ਨੂੰ ਦੁਬਾਰਾ ਪੈਸੇ ਜੋੜ ਕੇ ਮੋਬਾਈਲ ਖਰੀਦਣਾ ਪਵੇਗਾ ਜਾਂ ਫਿਰ ਉਸ ਦੀ ਪੜ੍ਹਾਈ ਰੁਕ ਸਕਦੀ ਹੈ। ਕੁਸੁਮ ਨੇ ਸਕੂਲ ’ਚ ਤਾਈਕਵਾਂਡੋ ਦੀ ਟ੍ਰੇਨਿੰਗ ਵੀ ਲਈ ਸੀ, ਜਿਸ ਨਾਲ ਉਸ ਦਾ ਹੌਸਲਾ ਵਧਿਆ ਸੀ।
2023 ’ਚ ਮਿਲਿਆ ਸੀ ਰਾਸ਼ਟਰੀ ਬਹਾਦਰੀ ਪੁਰਸਕਾਰ
ਉਸ ਸਮੇਂ 15 ਸਾਲ ਦੀ ਵਿਦਿਆਰਥਣ ਕੁਸੁਮ ਦਾ ਲੁਟੇਰਿਆਂ ਨਾਲ ਬਹਾਦਰੀ ਨਾਲ ਮੁਕਾਬਲਾ ਕਰਨਾ ਤੇ ਜ਼ਖਮੀ ਹੋਣ ਦੇ ਬਾਵਜੂਦ ਹਾਰ ਨਾ ਮੰਨਣਾ ਚਰਚਾ ਦਾ ਵਿਸ਼ਾ ਬਣਿਆ ਸੀ। ਇੱਕ ਲੁਟੇਰੇ ਨੂੰ ਕਾਬੂ ਕਰਨ ’ਚ ਕਾਮਯਾਬ ਰਹਿਣ ਕਾਰਨ ਤਤਕਾਲੀ ਡੀਸੀ ਘਨਸ਼ਿਆਮ ਥੋਰੀ ਨੇ ਕੁਸੁਮ ਨੂੰ ਰਾਸ਼ਟਰੀ ਬਹਾਦਰੀ ਪੁਰਸਕਾਰ ਲਈ ਨਾਮਜ਼ਦ ਕੀਤਾ ਸੀ। ਕੋਰੋਨਾ ਕਾਲ ਤੋਂ ਬਾਅਦ 2023 ’ਚ ਕੁਸੁਮ ਨੂੰ ਇਹ ਪੁਰਸਕਾਰ ਪ੍ਰਦਾਨ ਕੀਤਾ ਗਿਆ ਸੀ।
ਇਹ ਪੁਰਸਕਾਰ ਹਰ ਸਾਲ ਵਿਸ਼ੇਸ਼ ਬਹਾਦਰੀ ਦਿਖਾਉਣ ਵਾਲੇ ਬੱਚਿਆਂ ਨੂੰ ਸਨਮਾਨਿਤ ਕਰਨ ਲਈ ਰਾਸ਼ਟਰੀ ਬਾਲ ਕਲਿਆਣ ਕੌਂਸਲ ਵੱਲੋਂ ਦਿੱਤਾ ਜਾਂਦਾ ਹੈ। ਇਸ ਤੋਂ ਇਲਾਵਾ ਪੰਜਾਬ ਸਰਕਾਰ ਨੇ ਵੀ ਕੁਸੁਮ ਨੂੰ ਸਨਮਾਨਿਤ ਕੀਤਾ ਸੀ ਤੇ ਤਤਕਾਲੀ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਉਸ ਨੂੰ ਇੱਕ ਲੱਖ ਰੁਪਏ ਦਾ ਇਨਾਮ ਦਿੱਤਾ ਸੀ। ਤਤਕਾਲੀ ਪੁਲਿਸ ਕਮਿਸ਼ਨਰ ਗੁਰਪ੍ਰੀਤ ਭੁੱਲਰ ਨੇ ਵੀ ਕੁਸੁਮ ਨੂੰ ਪੁਰਸਕਾਰ ਦੇ ਨਾਲ ਨਵਾਂ ਮੋਬਾਈਲ ਫੋਨ ਦਿੱਤਾ ਸੀ।
ਦੋਸ਼ੀ 1: ਅਵਿਨਾਸ਼ ਕੁਮਾਰ ਉਰਫ਼ ਆਸ਼ੂ
ਅਵਿਨਾਸ਼ ਕੁਮਾਰ ਉਰਫ਼ ਆਸ਼ੂ ਇਸ ਮਾਮਲੇ ਦਾ ਮੁੱਖ ਦੋਸ਼ੀ ਸੀ। ਉਸ ਨੇ ਹੀ ਕੁਸੁਮ 'ਤੇ ਦਾਤਰ ਨਾਲ ਵਾਰ ਕੀਤਾ ਸੀ। ਇਸ ਕਾਰਨ ਇਸ ਕੇਸ ’ਚ ਹੱਤਿਆ ਦੀ ਕੋਸ਼ਿਸ਼ ਦੀ ਧਾਰਾ ਵੀ ਲਗਾਈ ਗਈ ਸੀ। ਉਹ ਜਲੰਧਰ ਦੇ ਬਸਤੀ ਦਾਨਿਸ਼ਮੰਦਾ ਦੇ ਮੁਹੱਲਾ ਬੇਗਮਪੁਰਾ ਦਾ ਰਹਿਣ ਵਾਲਾ ਹੈ। ਕੁਸੁਮ ਨੇ ਇਸੇ ਦੋਸ਼ੀ ਨੂੰ ਮੌਕੇ 'ਤੇ ਕਾਬੂ ਕੀਤਾ ਸੀ।
ਦੋਸ਼ੀ 2: ਵਿਨੋਦ ਕੁਮਾਰ ਉਰਫ਼ ਝਿਕਾ
ਵਿਨੋਦ ਕੁਮਾਰ ਉਰਫ਼ ਝਿਕਾ ਵੀ ਜਲੰਧਰ ਦੇ ਮਾਡਲ ਟਾਊਨ ਇਲਾਕੇ ਦੇ ਸੰਤ ਭਾਗ ਸਿੰਘ ਨਗਰ ਦਾ ਰਹਿਣ ਵਾਲਾ ਹੈ। ਉਸ ਦਿਨ ਉਹੀ ਮੋਟਰਸਾਈਕਲ ਚਲਾ ਰਿਹਾ ਸੀ। ਅਵਿਨਾਸ਼ ਦੇ ਫੜੇ ਜਾਣ ਤੋਂ ਬਾਅਦ ਉਹ ਮੌਕੇ ਤੋਂ ਫਰਾਰ ਹੋ ਗਿਆ ਸੀ। ਪੁਲਿਸ ਨੇ ਤਲਾਸ਼ ਦੌਰਾਨ ਉਸ ਨੂੰ ਕਾਬੂ ਕਰ ਲਿਆ ਸੀ।