ਗੁਆਚਿਆ ਪਰਸ ਅਸਲੀ ਮਾਲਕ ਨੂੰ ਮੋੜਿਆ

ਹਰਜਿੰਦਰ ਸਿੰਘ ਖਾਨਪੁਰ, ਪੰਜਾਬੀ ਜਾਗਰਣ, ਅੱਪਰਾ: ਜੋਗ ਰਾਜ ਰੱਤੂ ਵਾਸੀ ਪਿੰਡ ਸਰਹਾਲ ਮੁੰਡੀ ਨੇ ਇਮਾਨਦਾਰੀ ਦੀ ਮਿਸਾਲ ਕਾਇਮ ਕਰਦਿਆਂ ਸੜਕ ’ਤੇ ਮਿਲਿਆ ਪੈਸਿਆਂ ਤੇ ਜ਼ਰੂਰੀ ਦਸਤਾਵੇਜ਼ਾਂ ਨਾਲ ਭਰਿਆ ਪਰਸ ਉਸ ਦੇ ਅਸਲੀ ਮਾਲਕ ਨੂੰ ਵਾਪਸ ਕਰ ਦਿੱਤਾ। ਜਾਣਕਾਰੀ ਅਨੁਸਾਰ ਹਰਵਿੰਦਰ ਸਿੰਘ ਪੁੱਤਰ ਅਮਰਜੀਤ ਸਿੰਘ ਵਾਸੀ ਪਿੰਡ ਦੁਸਾਂਝ ਕਲਾਂ, ਜ਼ਿਲ੍ਹਾ ਜਲੰਧਰ ਮੋਟਰਸਾਈਕਲ ’ਤੇ ਦੁਸਾਂਝ ਕਲਾਂ ਤੋਂ ਪਿੰਡ ਮੇਹਲੀ ਨੂੰ ਕੰਮ ਲਈ ਜਾ ਰਿਹਾ ਸੀ। ਇਸ ਦੌਰਾਨ ਦੁਸਾਂਝ ਕਲਾਂ ਦੇ ਮੰਢਾਲੀ ਮੋੜ ਨੇੜੇ ਉਸ ਦਾ ਪਰਸ ਸੜਕ ’ਤੇ ਡਿੱਗ ਗਿਆ। ਕੁਝ ਸਮੇਂ ਬਾਅਦ ਜੋਗ ਰਾਜ ਰੱਤੂ ਆਪਣੇ ਕਿਸੇ ਰਿਸ਼ਤੇਦਾਰ ਨੂੰ ਮਿਲਣ ਲਈ ਦੁਸਾਂਝ ਕਲਾਂ ਤੋਂ ਮੰਢਾਲੀ ਰੋਡ ਵੱਲੋਂ ਲੰਘ ਰਿਹਾ ਸੀ। ਇਸ ਦੌਰਾਨ ਉਸ ਦੀ ਨਜ਼ਰ ਸੜਕ ’ਤੇ ਪਏ ਪਰਸ ’ਤੇ ਪਈ। ਪਰਸ ਚੁੱਕ ਕੇ ਜਾਂਚ ਕਰਨ ’ਤੇ ਉਸ ’ਚੋਂ ਡਰਾਈਵਿੰਗ ਲਾਇਸੈਂਸ, ਪੈਨ ਕਾਰਡ, ਆਧਾਰ ਕਾਰਡ ਸਮੇਤ ਲਗਭਗ 3 ਹਜ਼ਾਰ ਰੁਪਏ ਨਕਦ ਮਿਲੇ। ਜੋਗ ਰਾਜ ਰੱਤੂ ਨੇ ਇਮਾਨਦਾਰੀ ਦਿਖਾਉਂਦਿਆਂ ਪਿੰਡ ਦੁਸਾਂਝ ਕਲਾਂ ਦੇ ਕੁੱਕੂ ਦੁਸਾਂਝ ਨਾਲ ਸੰਪਰਕ ਕੀਤਾ ਤੇ ਪਰਸ ਦੇ ਅਸਲੀ ਮਾਲਕ ਦੀ ਭਾਲ ਕਰਨ ਲਈ ਕਿਹਾ। ਇਸ ਤੋਂ ਬਾਅਦ ਪਰਸ ਉਸ ਦੇ ਅਸਲੀ ਮਾਲਕ ਹਰਵਿੰਦਰ ਸਿੰਘ ਨੂੰ ਵਾਪਸ ਕਰ ਦਿੱਤਾ ਗਿਆ। ਪਰਸ ਵਾਪਸ ਮਿਲਣ ’ਤੇ ਹਰਵਿੰਦਰ ਸਿੰਘ ਨੇ ਜੋਗ ਰਾਜ ਰੱਤੂ ਦਾ ਤਹਿ ਦਿਲੋਂ ਧੰਨਵਾਦ ਕੀਤਾ।