ਫੋਰਟਿਸ ਜਲੰਧਰ ਦੇ ਡਾਕਟਰਾਂ ਨੇ 20 ਸਾਲਾ ਲੜਕੀ ਦੀ ਬਚਾਈ ਜਾਨ

ਗਰਦਨ ’ਤੇ ਜਾਨਲੇਵਾ ਸੱਟ ਲੱਗਣ ਤੋਂ ਬਾਅਦ ਸਾਹ ਦੀ ਨਾਲੀ ਹੋ ਗਈ ਸੀ ਪੂਰੀ ਤਰ੍ਹਾਂ ਬੰਦ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ: ਫੋਰਟਿਸ ਹਸਪਤਾਲ, ਜਲੰਧਰ ਦੇ ਡਾਕਟਰਾਂ ਨੇ ਤੇਜ਼ਧਾਰ ਹਥਿਆਰ ਨਾਲ ਕੀਤੇ ਗਏ ਹਮਲੇ ਵਿੱਚ ਗਰਦਨ ’ਤੇ ਲੱਗੀ ਗੰਭੀਰ ਸੱਟ ਕਾਰਨ ਜਾਨਲੇਵਾ ਹਾਲਤ ਦਾ ਸਾਹਮਣਾ ਕਰ ਰਹੀ 20 ਸਾਲਾ ਲੜਕੀ ਦੀ ਸਫਲਤਾਪੂਰਵਕ ਜਾਨ ਬਚਾਈ। ਇਸ ਗੁੰਝਲਦਾਰ ਐਮਰਜੈਂਸੀ ਸਥਿਤੀ ਨੂੰ ਡਾ. ਮਨਦੀਪ ਸਿੰਘ, ਮੁਖੀ ਐਮਰਜੈਂਸੀ ਮੈਡੀਸਨ, ਫੋਰਟਿਸ ਹਸਪਤਾਲ, ਜਲੰਧਰ ਅਤੇ ਡਾ. ਅਮਿਤ ਗੁਪਤਾ, ਸੀਨੀਅਰ ਕੰਸਲਟੇਂਟ ਈਐਨਟੀ, ਫੋਰਟਿਸ ਹਸਪਤਾਲ, ਜਲੰਧਰ ਦੀ ਅਗਵਾਈ ਹੇਠ ਮਲਟੀਡਿਸਪਲਨਰੀ ਡਾਕਟਰੀ ਟੀਮ ਨੇ ਕੁਸ਼ਲਤਾ ਨਾਲ ਸੰਭਾਲਿਆ।

ਮਾਮਲੇ ਬਾਰੇ ਜਾਣਕਾਰੀ ਦਿੰਦਿਆਂ ਡਾ. ਮਨਦੀਪ ਸਿੰਘ, ਮੁਖੀ-ਐਮਰਜੈਂਸੀ ਮੈਡੀਸਨ, ਫੋਰਟਿਸ ਹਸਪਤਾਲ, ਜਲੰਧਰ ਨੇ ਕਿਹਾ ਕਿ ਮਰੀਜ਼ ਦੀ ਸਾਹ ਦੀ ਨਾਲੀ ਖੁੱਲ੍ਹੇ ਜ਼ਖ਼ਮ ਕਾਰਨ ਪ੍ਰਭਾਵਿਤ ਹੋਈ ਸੀ, ਇਸ ’ਚ ਖ਼ੂਨ ਭਰ ਰਿਹਾ ਸੀ ਤੇ ਸਰੀਰ ਵਿੱਚ ਆਕਸੀਜਨ ਦਾ ਪੱਧਰ ਖ਼ਤਰਨਾਕ ਹੱਦ ਤੱਕ ਘੱਟ ਸੀ। ਸ਼ੁਰੂਆਤੀ ਕੋਸ਼ਿਸ਼ ਦੌਰਾਨ ਮਰੀਜ਼ ਦੇ ਕੁਦਰਤੀ ਤਰੀਕੇ ਨਾਲ ਸਾਹ ਲੈਣ ਦੀ ਪ੍ਰਕਿਰਿਆ ਨੂੰ ਬਰਕਰਾਰ ਰੱਖਦਿਆਂ ਸਾਡੀ ਟੀਮ ਨੇ ਇੱਕੋ ਸਮੇਂ ਇੰਟਿਊਬੇਸ਼ਨ ਅਤੇ ਸਰਜਰੀ ਰਾਹੀਂ ਸਾਹ ਲੈਣ ਦਾ ਰਸਤਾ ਬਣਾਉਣ ਦੀ ਤਿਆਰੀ ਕੀਤੀ। ਡਾ. ਅਮਿਤ ਗੁਪਤਾ, ਸੀਨੀਅਰ ਕੰਸਲਟੇਂਟ ਈਐਨਟੀ, ਫੋਰਟਿਸ ਹਸਪਤਾਲ, ਜਲੰਧਰ ਨੇ ਕਿਹਾ ਕਿ ਗਰਦਨ ਦੀਆਂ ਅਜਿਹੀਆਂ ਸੱਟਾਂ, ਜਿਨ੍ਹਾਂ ਨਾਲ ਸਾਹ ਦੀ ਨਾਲੀ ਵਿੱਚ ਛੇਕ ਹੋ ਜਾਂਦਾ ਹੈ, ਅਚਾਨਕ ਗੰਭੀਰ ਸਥਿਤੀ ਪੈਦਾ ਹੋਣ ਦਾ ਤੁਰੰਤ ਖ਼ਤਰਾ ਰੱਖਦੀਆਂ ਹਨ।

ਡਾ. ਅੰਕੁਸ਼ ਮਹਿਤਾ, ਫੈਸਿਲਿਟੀ ਡਾਇਰੈਕਟਰ, ਫੋਰਟਿਸ ਹਸਪਤਾਲ, ਜਲੰਧਰ ਨੇ ਕਿਹਾ ਕਿ, “ਇਹ ਜ਼ਿਕਰਯੋਗ ਸੁਧਾਰ ਗੁੰਝਲਦਾਰ ਸੱਟਾਂ ਦੇ ਮਾਮਲਿਆਂ ਨੂੰ ਸੰਭਾਲਣ ਲਈ ਸਾਡੀਆਂ ਐਮਰਜੈਂਸੀ ਅਤੇ ਸਰਜੀਕਲ ਟੀਮਾਂ ਦੀ ਚੌਵੀ ਘੰਟੇ ਦੀ ਕਲੀਨਿਕਲ ਤਿਆਰੀ ਅਤੇ ਮਾਹਰਤਾ ਨੂੰ ਦਰਸਾਉਂਦਾ ਹੈ, ਜਿੱਥੇ ਹਰ ਸਕਿੰਟ ਜਾਨ ਬਚਾਉਣ ਲਈ ਮਹੱਤਵਪੂਰਨ ਹੁੰਦਾ ਹੈ। ਫੋਰਟਿਸ ਹਸਪਤਾਲ, ਜਲੰਧਰ ਖੇਤਰ ਦੇ ਲੋਕਾਂ ਨੂੰ ਵਿਸ਼ਵ ਪੱਧਰੀ ਐਮਰਜੈਂਸੀ ਅਤੇ ਟ੍ਰੌਮਾ ਇਲਾਜ ਮੁਹੱਈਆ ਕਰਵਾਉਣ ਲਈ ਵਚਨਬੱਧ ਹੈ।