ਜਲੰਧਰ ਦੇ ਸਕੂਲ ’ਚ ਦੋ ਬੱਚਿਆਂ ਵਿਚਕਾਰ ਖ਼ੂਨੀ ਸੰਘਰਸ਼, ਵਿਦਿਆਰਥੀ ਨੇ ਕੁਰਸੀ ਨਾਲ ਕੀਤਾ ਹਮਲਾ; ਪੇਟ ’ਚ ਲੱਗੇ 22 ਟਾਂਕੇ

ਜ਼ਖ਼ਮੀ ਬੱਚੇ ਦੇ ਤਾਇਆ ਜਸਵੀਰ ਸਿੰਘ ਅਤੇ ਮਾਸੀ ਸਿਮਰਨ ਨੇ ਕਿਹਾ ਕਿ ਉਨ੍ਹਾਂ ਦਾ ਬੱਚਾ ਆਕਾਸ਼ਦੀਪ ਦਸਵੀਂ ਜਮਾਤ ’ਚ ਪੜ੍ਹਦਾ ਹੈ। ਸਕੂਲ ’ਚ ਇੱਕ ਹੀ ਕਲਾਸ ’ਚ ਦਸਵੀਂ ਅਤੇ ਨੌਵੀਂ ਜਮਾਤ ਪੜ੍ਹਾਈ ਜਾਂਦੀ ਹੈ।

ਉਨ੍ਹਾਂ ਦੇ ਬੱਚੇ ਨੂੰ ਸਵੇਰੇ ਜਲਦੀ ਬੁਲਾਇਆ ਜਾਂਦਾ ਹੈ ਅਤੇ ਉਹ ਸਵੇਰੇ ਜਲਦੀ ਆ ਕੇ ਕਲਾਸ ਦੇ ਬੈਂਚ ਠੀਕ ਕਰਦਾ ਹੈ। ਅਜਿਹੇ ’ਚ ਆਕਾਸ਼ਦੀਪ ਦੋ ਦਿਨ ਪਹਿਲਾਂ ਕਲਾਸ ਦੇ ਬੈਂਚ ਠੀਕ ਕਰ ਰਿਹਾ ਸੀ, ਤਦ ਨੌਵੀਂ ਜਮਾਤ ਦੀ ਇੱਕ ਵਿਦਿਆਰਥਣ ਨੇ ਉਸ ਨਾਲ ਬਹਿਸਬਾਜ਼ੀ ਸ਼ੁਰੂ ਕਰ ਦਿੱਤੀ ਕਿ ਉਹ ਇਸ ਬੈਂਚ 'ਤੇ ਬੈਠੇਗਾ, ਜਦੋਂ ਕਿ ਉਹ ਬੈਂਚ ਵਾਧੂ ਸੀ। ਇਸੇ ਗੱਲ ਨੂੰ ਲੈ ਕੇ ਉਨ੍ਹਾਂ ਦੇ ਬੱਚੇ ਨੂੰ ਪਹਿਲਾਂ ਚਿਹਰੇ ਅਤੇ ਬਾਅਦ ਵਿੱਚ ਕੁਰਸੀ ਚੁੱਕ ਕੇ ਉਸ ਦੇ ਪੇਟ ਵਿੱਚ ਮਾਰੀ ਗਈ।

ਉਨ੍ਹਾਂ ਦਾ ਦੋਸ਼ ਹੈ ਕਿ ਸਕੂਲ ਵਾਲੇ ਉਨ੍ਹਾਂ ਨੂੰ ਸਪੋਰਟ ਨਹੀਂ ਕਰ ਰਹੇ ਹਨ, ਕਿਉਂਕਿ ਉਨ੍ਹਾਂ ਦੇ ਬੱਚੇ ਦੀ ਹਾਲਤ ਜ਼ਿਆਦਾ ਖ਼ਰਾਬ ਹੈ। ਉਸ ਦੀ ਸਰਜਰੀ ਹੋਈ ਹੈ ਅਤੇ ਉਹ ਸੈਕਰਡ ਹਾਰਟ ਹਸਪਤਾਲ ਵਿੱਚ ਹੈ, ਜਿੱਥੇ ਡਾਕਟਰਾਂ ਨੇ ਹਾਲੇ ਵੀ ਉਸ ਦੀ ਹਾਲਤ ਖ਼ਰਾਬ ਹੀ ਦੱਸੀ ਹੈ। ਉਨ੍ਹਾਂ ਦੀ ਸਕੂਲ ਪ੍ਰਸ਼ਾਸਨ ਤੋਂ ਇਹੀ ਮੰਗ ਹੈ ਕਿ ਉਹ ਉਨ੍ਹਾਂ ਦੀ ਸਪੋਰਟ ਕਰਨ ਤਾਂ ਜੋ ਬੱਚੇ ਦਾ ਇਲਾਜ ਚੰਗੀ ਤਰ੍ਹਾਂ ਹੋ ਸਕੇ।

ਹਾਲਾਂਕਿ ਜਦੋਂ ਉਨ੍ਹਾਂ ਦੇ ਬੱਚੇ ਨੂੰ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਜਾ ਰਿਹਾ ਸੀ, ਤਦ ਹਸਪਤਾਲ ਵੱਲੋਂ ਪਹਿਲਾਂ ਪੁਲਿਸ ਸ਼ਿਕਾਇਤ ਦਾਖ਼ਲ ਕਰਨ ਲਈ ਕਿਹਾ ਗਿਆ ਸੀ ਪਰ ਸਕੂਲ ਪ੍ਰਬੰਧਨ ਵੱਲੋਂ ਪੁਲਿਸ ਸ਼ਿਕਾਇਤ ਨਾ ਕਰਕੇ ਇਲਾਜ ਦਾ ਸਾਰਾ ਖ਼ਰਚਾ ਚੁੱਕਣ ਦੀ ਗੱਲ ਕਹੀ ਗਈ ਸੀ। ਹੁਣ ਉਨ੍ਹਾਂ ਨੂੰ ਇਹ ਕਿਹਾ ਜਾ ਰਿਹਾ ਹੈ ਕਿ ਦੂਜੇ ਬੱਚੇ ਦੇ ਪੇਰੈਂਟਸ ਕਰਨਗੇ।

ਇਸ ਦੇ ਸੰਬੰਧ ਵਿੱਚ ਹੀ ਉਹ ਵੀਰਵਾਰ ਨੂੰ ਸਕੂਲ ਵਿੱਚ ਗੱਲ ਕਰਨ ਆਏ ਸਨ ਕਿ ਉਨ੍ਹਾਂ ਨੂੰ ਇਸ ਬਾਰੇ ਨਹੀਂ ਪਤਾ, ਆਕਾਸ਼ਦੀਪ ਦੇ ਇਲਾਜ ਦਾ ਖ਼ਰਚਾ ਸਕੂਲ ਕਰੇ ਜਾਂ ਫਿਰ ਦੂਜੇ ਬੱਚੇ ਦੇ ਪੇਰੈਂਟਸ। ਉਨ੍ਹਾਂ ਨੂੰ ਬੱਸ ਆਪਣਾ ਬੱਚਾ ਸੁਰੱਖਿਅਤ ਚਾਹੀਦਾ ਹੈ ਪਰ ਸਕੂਲ ਪ੍ਰਬੰਧਕਾਂ ਨੇ ਉਨ੍ਹਾਂ ਦੀ ਸਪੋਰਟ ਕਰਨ ਤੋਂ ਮਨ੍ਹਾ ਕਰ ਦਿੱਤਾ।

ਸਕੂਲ ਦਾ ਪੱਖ

ਦੂਜੇ ਪਾਸੇ ਸਕੂਲ ਦੀ ਅਧਿਆਪਕਾ ਮੀਰਾ ਸੇਠੀ ਦਾ ਕਹਿਣਾ ਹੈ ਕਿ ਜਦੋਂ ਸਕੂਲ ’ਚ ਇਹ ਘਟਨਾ ਹੋਈ ਸੀ, ਤਦ ਕਲਾਸ ’ਚ ਕੋਈ ਅਧਿਆਪਕ ਮੌਜੂਦ ਨਹੀਂ ਸੀ, ਮਗਰ ਜਦੋਂ ਬੱਚੇ ਦੀ ਹਾਲਤ ਸੰਬੰਧੀ ਪਤਾ ਲੱਗਿਆ ਤਾਂ ਉਹ ਉਸ ਨੂੰ ਤੁਰੰਤ ਹਸਪਤਾਲ ਲੈ ਗਏ ਸਨ ਅਤੇ ਉਸ ਦੀ ਸਰਜਰੀ ਤੱਕ ਉਹ ਹਸਪਤਾਲ ਵਿੱਚ ਹੀ ਰਹੇ। ਵੀਰਵਾਰ ਨੂੰ ਵੀ ਸਕੂਲ ਵਿੱਚ ਛੁੱਟੀ ਕਰਨ ਤੋਂ ਬਾਅਦ ਬੱਚਿਆਂ ਦੀ ਹਾਲਤ ਨੂੰ ਜਾਣਨ ਲਈ ਹਸਪਤਾਲ ਹੀ ਜਾਣਾ ਸੀ ਪਰ ਉਸ ਤੋਂ ਪਹਿਲਾਂ ਜ਼ਖ਼ਮੀ ਬੱਚੇ ਦੇ ਪਰਿਵਾਰਕ ਮੈਂਬਰਾਂ ਵੱਲੋਂ ਸਕੂਲ ਵਿੱਚ ਹੰਗਾਮਾ ਸ਼ੁਰੂ ਕਰ ਦਿੱਤਾ ਗਿਆ।

ਇਸ ਤੋਂ ਬਾਅਦ ਉਨ੍ਹਾਂ ਨੇ ਤੁਰੰਤ ਪੁਲਿਸ ਨੂੰ ਇਸ ਸੰਬੰਧ ਵਿੱਚ ਸੂਚਿਤ ਕੀਤਾ, ਜਿਨ੍ਹਾਂ ਦੇ ਕਹਿਣ ਅਨੁਸਾਰ ਹੀ ਸਕੂਲ ਵਿੱਚ ਬਾਕੀ ਬੱਚਿਆਂ ਦੀ ਸੁਰੱਖਿਆ ਲਈ ਮੁੱਖ ਗੇਟ ਬੰਦ ਕਰ ਦਿੱਤੇ ਗਏ ਸਨ, ਕਿਉਂਕਿ ਉਨ੍ਹਾਂ ਕੋਲ ਲਗਭਗ 350 ਤੋਂ ਵੱਧ ਬੱਚੇ ਪੜ੍ਹਦੇ ਹਨ।

ਅਜਿਹੀ ਸਥਿਤੀ ’ਚ, ਉਨ੍ਹਾਂ ਨੇ ਬੱਚਿਆਂ ਦੀ ਸੁਰੱਖਿਆ ਲਈ ਸਕੂਲ ਦੇ ਦਰਵਾਜ਼ੇ ਬੰਦ ਕਰ ਦਿੱਤੇ। ਹਾਲਾਂਕਿ, ਇਸ ਤੋਂ ਪਹਿਲਾਂ ਹੀ, ਵੱਡੀ ਗਿਣਤੀ ਵਿੱਚ ਮਾਪੇ ਇਕੱਠੇ ਹੋ ਗਏ ਸਨ ਅਤੇ ਬਾਹਰ ਮਾਹੌਲ ਵਿਗੜ ਗਿਆ ਸੀ। ਪੁਲਿਸ ਦੇ ਆਉਣ ਤੋਂ ਬਾਅਦ ਹੀ ਸਕੂਲ ਦੇ ਦਰਵਾਜ਼ੇ ਖੋਲ੍ਹੇ ਗਏ ਅਤੇ ਬੱਚਿਆਂ ਨੂੰ ਉਨ੍ਹਾਂ ਦੇ ਮਾਪਿਆਂ ਕੋਲ ਵਾਪਸ ਭੇਜ ਦਿੱਤਾ ਗਿਆ ਤਾਂ ਜੋ ਕਿਸੇ ਵੀ ਅਣਸੁਖਾਵੀਂ ਘਟਨਾ ਨੂੰ ਰੋਕਿਆ ਜਾ ਸਕੇ।