ਨਵੇਂ ਟਿਊਬਵੈੱਲਾਂ ’ਚ ਦੇਰੀ ਕਾਰਨ ਹੋ ਸਕਦੀ ਹੈ ਪਾਣੀ ਦੀ ਕਿੱਲਤ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਸ਼ਹਿਰ ’ਚ ਨਵੇਂ ਟਿਊਬਵੈੱਲ ਲਾਉਣ ਵਿੱਚ ਦੇਰੀ ਤੇ ਲੱਗੇ ਹੋਏ ਟਿਊਬਵੈੱਲਾਂ ਨੂੰ ਬਿਜਲੀ ਦੇ ਕੁਨੈਕਸ਼ਨ ਨਾ ਮਿਲਣ ਕਾਰਨ ਕਈ ਇਲਾਕਿਆਂ ’ਚ ਪਾਣੀ ਦੀ ਕਮੀ ਪੈ ਸਕਦੀ ਹੈ। ਟਿਊਬਵੈੱਲਾਂ ਦਾ ਮਾਮਲਾ ਨਿਗਮ ਹਾਊਸ ਦੀ ਮੀਟਿੰਗ ਵਿੱਚ ਕਈ ਕੌਂਸਲਰਾਂ ਵੱਲੋਂ ਉਠਾਇਆ ਗਿਆ। ਬਿਜਲੀ ਕੁਨੈਕਸ਼ਨ ਨਾ ਮਿਲਣ ਕਰਕੇ ਕਈ ਟਿਊਬਵੈੱਲ ਮਹੀਨਿਆਂ ਤੋਂ ਚਾਲੂ ਨਹੀਂ ਹੋ ਸਕੇ। ਲਗਪਗ 20 ਕਾਲੋਨੀਆਂ ’ਚ ਨਵੇਂ ਟਿਊਬਵੈੱਲ ਲਾਉਣ ਦੇ ਪ੍ਰਸਤਾਵ ਮਨਜ਼ੂਰ ਹੋਏ ਹਨ, ਜਿਸ ਨਾਲ ਹਜ਼ਾਰਾਂ ਲੋਕਾਂ ਨੂੰ ਪਾਣੀ ਦੀ ਸਹੂਲਤ ਮਿਲੇਗੀ। ਇਸ ਦੇ ਨਾਲ ਹੀ ਕਰੀਬ 20 ਤੋਂ 22 ਟਿਊਬਵੈੱਲ ਲੱਗ ਚੁੱਕੇ ਹਨ ਪਰ ਹਾਲੇ ਤੱਕ ਚਾਲੂ ਨਹੀਂ ਹੋਏ। ਹੋਰ ਕਰੀਬ 20 ਟਿਊਬਵੈੱਲਾਂ ਲਈ ਟੈਂਡਰ ਜਾਰੀ ਕੀਤੇ ਜਾ ਰਹੇ ਹਨ, ਜਿਨ੍ਹਾਂ ਨੂੰ ਲਾਉਣ ਵਿੱਚ 2 ਤੋਂ 3 ਮਹੀਨੇ ਲੱਗ ਸਕਦੇ ਹਨ। ਕਈ ਇਲਾਕਿਆਂ ’ਚ ਟਿਊਬਵੈੱਲ ਖਰਾਬ ਹਨ ਤੇ ਉਨ੍ਹਾਂ ਨੂੰ ਬਦਲਣ ਵਿੱਚ ਵੀ ਸਮਾਂ ਲੱਗੇਗਾ। ਖਰਾਬ ਟਿਊਬਵੈੱਲਾਂ ਕਾਰਨ ਹੀ ਗੰਦੇ ਪਾਣੀ ਦੀ ਸਪਲਾਈ ਹੋ ਰਹੀ ਹੈ। ਇਹ ਸਾਰੇ ਮੁੱਦੇ ਨਗਰ ਨਿਗਮ ਹਾਊਸ ਵਿੱਚ ਪ੍ਰਮੁੱਖਤਾ ਨਾਲ ਉਠਾਏ ਗਏ। ਆਉਣ ਵਾਲੀ ਗਰਮੀ ਦੇ ਮੌਸਮ ਵਿੱਚ ਪਾਣੀ ਦੀ ਕਮੀ ਅਤੇ ਗੰਦੇ ਪਾਣੀ ਦੀ ਸਪਲਾਈ ਨਾਲ ਲੋਕਾਂ ਨੂੰ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਹਾਊਸ ’ਚ ਕੌਂਸਲਰ ਹਰਸਿਮਰਨ ਕੌਰ ਰੌਨੀ ਨੇ ਵੀ ਇਹ ਮਾਮਲਾ ਉਠਾਇਆ ਕਿ ਟਿਊਬਵੈੱਲ ਮੁਰੰਮਤ ਲਈ ਸ਼ਨਿਚਰਵਾਰ ਤੇ ਐਤਵਾਰ ਨੂੰ ਵੀ ਪ੍ਰਬੰਧ ਹੋਣਾ ਚਾਹੀਦਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਜੇ ਸ਼ਨਿਚਰਵਾਰ ਨੂੰ ਟਿਊਬਵੈੱਲ ਖਰਾਬ ਹੋ ਜਾਵੇ ਤਾਂ ਉਹ ਸੋਮਵਾਰ ਨੂੰ ਹੀ ਠੀਕ ਹੁੰਦਾ ਹੈ, ਜਿਸ ਨਾਲ ਲੋਕਾਂ ਨੂੰ ਦੋ ਦਿਨ ਤੱਕ ਪਰੇਸ਼ਾਨੀ ਝੱਲਣੀ ਪੈਂਦੀ ਹੈ। ਉਨ੍ਹਾਂ ਨੇ ਟਿਊਬਵੈਲਾਂ ਦੀਆਂ ਮੋਟਰਾਂ ਦਾ ਬੈਕਅੱਪ ਰੱਖਣ ਦੀ ਵੀ ਮੰਗ ਕੀਤੀ। ਦੂਜੇ ਪਾਸੇ ਕੌਂਸਲਰ ਉਮਾ ਬੇਰੀ ਨੇ ਕਿਹਾ ਕਿ ਪਾਵਰਕਾਮ ਨਾਲ ਤਾਲਮੇਲ ਬਣਾਇਆ ਜਾਵੇ ਤਾਂ ਜੋ ਟਿਊਬਵੈੱਲ ਚੱਲਣ ਦੇ ਸਮੇਂ ਬਿਜਲੀ ਕੱਟ ਨਾ ਹੋਵੇ। -------------------------- ਕਈ ਟਿਊਬਵੈਲ ਮਹੀਨਿਆਂ ਤੋਂ ਬੰਦ, ਕਈ ਸ਼ੁਰੂ ਹੀ ਨਹੀਂ ਹੋ ਸਕੇ ਨਗਰ ਨਿਗਮ ਹਾਊਸ ਦੀ ਮੀਟਿੰਗ ’ਚ ਕੌਂਸਲਰ ਮਨਜੀਤ ਕੌਰ ਸਮੇਤ ਕਈ ਮੈਂਬਰਾਂ ਨੇ ਕਿਹਾ ਕਿ ਉਨ੍ਹਾਂ ਦੇ ਵਾਰਡ ’ਚ ਦੋ ਸਾਲ ਪਹਿਲਾਂ ਲੱਗਿਆ ਟਿਊਬਵੈੱਲ ਹੁਣ ਖਰਾਬ ਪਿਆ ਹੈ ਤੇ ਲਗਪਗ 5 ਮਹੀਨਿਆਂ ਤੋਂ ਬੰਦ ਹੈ। ਡਾ. ਜਸਲੀਨ ਸੇਠੀ ਨੇ ਕਿਹਾ ਕਿ 5 ਮਹੀਨੇ ਪਹਿਲਾਂ ਮਨਜ਼ੂਰ ਹੋਇਆ ਟਿਊਬਵੈੱਲ ਅਜੇ ਤੱਕ ਸ਼ੁਰੂ ਨਹੀਂ ਹੋਇਆ, ਜਦਕਿ 2 ਮਹੀਨੇ ਪਹਿਲਾਂ ਮਨਜ਼ੂਰ ਹੋਇਆ ਕੰਮ ਮੁਕੰਮਲ ਹੋ ਰਿਹਾ ਹੈ। ਕੌਂਸਲਰ ਰਾਣੀ ਭਗਤ ਨੇ ਨਗਰ ਨਿਗਮ ਹਾਊਸ ’ਚ ਗੰਦੇ ਪਾਣੀ ਨਾਲ ਭਰੀਆਂ ਬੋਤਲਾਂ ਰੱਖ ਕੇ ਸਮੱਸਿਆ ਨੂੰ ਉਠਾਇਆ। ਹਾਊਸ ’ਚ 20 ਤੋਂ ਵੱਧ ਨਵੇਂ ਟਿਊਬਵੈਲ ਮਨਜ਼ੂਰ ਕੀਤੇ ਗਏ ਹਨ। ਇਨ੍ਹਾਂ ਲਈ ਟੈਂਡਰ ਜਾਰੀ ਹੋਣ ਤੋਂ ਬਾਅਦ ਕੰਮ ਸ਼ੁਰੂ ਕੀਤਾ ਜਾਵੇਗਾ, ਜਿਸ ’ਚ ਹੋਰ ਦੇਰੀ ਹੋ ਸਕਦੀ ਹੈ ਤੇ ਪਾਣੀ ਦੀ ਕਮੀ ਵਧ ਸਕਦੀ ਹੈ।