ਆਟੋ-ਰਿਕਸ਼ਾ ਕਿਰਾਏ ਨੂੰ ਲੈ ਕੇ ਵਿਵਾਦ

ਰਾਕੇਸ਼ ਗਾਂਧੀ, ਪੰਜਾਬੀ ਜਾਗਰਣ, ਜਲੰਧਰ : ਰਾਮਾ ਮੰਡੀ ਨੇੜੇ ਮਾਹੌਲ ਉਸ ਵੇਲੇ ਤਣਾਅਪੂਰਨ ਹੋ ਗਿਆ ਜਦੋਂ ਇਕ ਆਟੋ-ਰਿਕਸ਼ਾ ਚਾਲਕ ਤੇ ਇਕ ਔਰਤ ਵਿਚਕਾਰ ਕਿਰਾਏ ਨੂੰ ਲੈ ਕੇ ਝਗੜਾ ਹੋ ਗਿਆ। ਦੋਸ਼ ਹੈ ਕਿ ਡਰਾਈਵਰ ਨੇ ਔਰਤ ਨੂੰ ਰਸਤੇ ਦੇ ਵਿਚਕਾਰ ਮੰਜ਼ਿਲ ਤੋਂ ਥੋੜ੍ਹੀ ਦੂਰ ਉਤਾਰ ਦਿੱਤਾ, ਜਿਸ ਨਾਲ ਦੋਵਾਂ ਵਿਚਕਾਰ ਬਹਿਸ ਹੋ ਗਈ। ਔਰਤ ਨੇ ਦੱਸਿਆ ਕਿ ਉਸਨੇ ਰਾਮਾਮੰਡੀ ਤੋਂ ਪਠਾਨਕੋਟ ਬਾਈਪਾਸ ਤੱਕ ਆਟੋ-ਰਿਕਸ਼ਾ 200 ਰੁਪਏ ’ਚ ਕਿਰਾਏ ਤੇ ਲਿਆ ਸੀ। ਡਰਾਈਵਰ ਨੇ ਉਸਨੂੰ ਉਸ ਦੀ ਮੰਜ਼ਿਲ ਤੋਂ ਲਗਭਗ 500 ਮੀਟਰ ਦੂਰ ਉਤਾਰ ਦਿੱਤਾ ਤੇ ਪੂਰਾ ਕਿਰਾਇਆ ਮੰਗਿਆ। ਜਦੋਂ ਔਰਤ ਨੇ ਉਸ ਨੂੰ ਕਿਹਾ ਕਿ ਉਹ ਉਸਨੂੰ ਦੱਸੀ ਹੋਈ ਥਾਂ ’ਤੇ ਛੱਡ ਦੇਵੇ ਤਾਂ ਡਰਾਈਵਰ ਨੇ ਅੱਗੇ ਵਧਣ ਤੋਂ ਸਾਫ਼ ਇਨਕਾਰ ਕਰ ਦਿੱਤਾ। ਜਿਵੇਂ-ਜਿਵੇਂ ਵਿਵਾਦ ਵਧਦਾ ਗਿਆ, ਮੌਕੇ ਤੇ ਭੀੜ ਇਕੱਠੀ ਹੋ ਗਈ ਤੇ ਹੰਗਾਮਾ ਹੋ ਗਿਆ। ਔਰਤ ਨੇ ਕਿਹਾ ਕਿ ਉਹ ਕਿਰਾਇਆ ਦੇਣ ਲਈ ਤਿਆਰ ਹੈ, ਬਸ਼ਰਤੇ ਉਸਨੂੰ ਉਸ ਦੀ ਨਿਰਧਾਰਤ ਮੰਜ਼ਿਲ ਤੇ ਪਹੁੰਚਾਇਆ ਜਾਵੇ। ਇਸ ਦੌਰਾਨ ਆਟੋ-ਰਿਕਸ਼ਾ ਚਾਲਕ ਔਰਤ ਤੇ ਭੁਗਤਾਨ ਕਰਨ ਤੋਂ ਇਨਕਾਰ ਕਰਨ ਦਾ ਦੋਸ਼ ਲਗਾਉਂਦਾ ਰਿਹਾ। ਮੌਕੇ ਤੇ ਖੜ੍ਹੇ ਲੋਕਾਂ ਨੇ ਦਖਲ ਦੇ ਕੇ ਸਥਿਤੀ ਨੂੰ ਸ਼ਾਂਤ ਕੀਤਾ। ਕਿਸੇ ਨੇ ਪੂਰੀ ਘਟਨਾ ਦਾ ਵੀਡੀਓ ਰਿਕਾਰਡ ਕੀਤਾ ਤੇ ਇਸਨੂੰ ਸੋਸ਼ਲ ਮੀਡੀਆ ਤੇ ਪੋਸਟ ਕਰ ਦਿੱਤਾ, ਜਿੱਥੇ ਇਹ ਹੁਣ ਤੇਜ਼ੀ ਨਾਲ ਵਾਇਰਲ ਹੋ ਰਿਹਾ ਹੈ।