ਬੀਆਈਐੱਸ ਵੱਲੋਂ ਜਲੰਧਰ ’ਚ ਵਿਸ਼ਵ ਮਿਆਰ ਦਿਵਸ-2026 ਮੌਕੇ ਹਿੱਤਧਾਰਕ ਸੰਮੇਲਨ ਕਰਵਾਇਆ

ਤੇਜਿੰਦਰ ਕੌਰ ਥਿੰਦ, ਪੰਜਾਬੀ ਜਾਗਰਣ ਜਲੰਧਰ : ਭਾਰਤੀ ਮਿਆਰ ਬਿਊਰੋ ਦੇ ਜੰਮੂ-ਕਸ਼ਮੀਰ ਸ਼ਾਖਾ ਦਫ਼ਤਰ ਵੱਲੋਂ ਵਿਸ਼ਵ ਮਿਆਰ ਦਿਵਸ-2026 ਦੇ ਜਸ਼ਨਾਂ ਤਹਿਤ ਜਲੰਧਰ ਵਿਖੇ ਹਿੱਤਧਾਰਕ ਸੰਮੇਲਨ ਕਰਵਾਇਆ ਗਿਆ। ਇਹ ਸੰਮੇਲਨ ‘ਬਿਹਤਰ ਦੁਨੀਆ ਲਈ ਸਾਂਝਾ ਦ੍ਰਿਸ਼ਟੀਕੋਣ–ਟਿਕਾਊ ਵਿਕਾਸ ਟੀਚਾ 7 : ਕਿਫਾਇਤੀ ਅਤੇ ਸਵੱਛ ਊਰਜਾ’ ਵਿਸ਼ੇ ’ਤੇ ਕੇਂਦਰਿਤ ਸੀ। ਇਸ ਦਾ ਮੰਤਵ ਗੁਣਵੱਤਾ ਪ੍ਰਤੀ ਜਾਗਰੂਕਤਾ, ਮਿਆਰੀਕਰਨ, ਟਿਕਾਊ ਨਿਰਮਾਣ, ਊਰਜਾ ਕੁਸ਼ਲਤਾ ਅਤੇ ਵੱਖ-ਵੱਖ ਉਦਯੋਗਿਕ ਖੇਤਰਾਂ ਵਿੱਚ ਭਾਰਤੀ ਮਿਆਰਾਂ ਨੂੰ ਵਿਆਪਕ ਤੌਰ ’ਤੇ ਅਪਣਾਉਣ ਨੂੰ ਉਤਸ਼ਾਹਿਤ ਕਰਨਾ ਸੀ। ਇਸ ਪ੍ਰੋਗਰਾਮ ਵਿੱਚ ਉਦਯੋਗਾਂ, ਸੂਖਮ, ਲਘੂ ਅਤੇ ਦਰਮਿਆਨੇ ਉੱਦਮਾਂ, ਅਕਾਦਮਿਕ ਖੇਤਰ, ਸਰਕਾਰੀ ਵਿਭਾਗਾਂ, ਤਕਨੀਕੀ ਸੰਸਥਾਵਾਂ, ਜਾਂਚ ਪ੍ਰਯੋਗਸ਼ਾਲਾਵਾਂ, ਉਦਯੋਗਿਕ ਐਸੋਸੀਏਸ਼ਨਾਂ ਅਤੇ ਮੀਡੀਆ ਦੇ ਲਗਭਗ 200 ਨੁਮਾਇੰਦਿਆਂ ਨੇ ਸ਼ਮੂਲੀਅਤ ਕੀਤੀ। ਇਸ ਸੰਮੇਲਨ ਨੇ ਉਦਯੋਗਿਕ ਹਿੱਤਧਾਰਕਾਂ, ਤਕਨੀਕੀ ਮਾਹਿਰਾਂ, ਸਿੱਖਿਆ ਸ਼ਾਸਤਰੀਆਂ ਅਤੇ ਬੀਆਈਐੱਸ ਦੇ ਅਧਿਕਾਰੀਆਂ ਨੂੰ ਇੱਕ ਸਾਂਝਾ ਮੰਚ ਪ੍ਰਦਾਨ ਕੀਤਾ, ਜਿੱਥੇ ਉਨ੍ਹਾਂ ਨੇ ਗੁਣਵੱਤਾ ਭਰੋਸੇ, ਉਤਪਾਦ ਸੁਰੱਖਿਆ, ਬੀਆਈਐੱਸ ਪ੍ਰਮਾਣੀਕਰਨ, ਟਿਕਾਊ ਉਦਯੋਗਿਕ ਕਾਰਜ-ਪ੍ਰਣਾਲੀਆਂ ਅਤੇ ਉਦਯੋਗਿਕ ਮੁਕਾਬਲੇਬਾਜ਼ੀ ਨੂੰ ਮਜ਼ਬੂਤ ਕਰਨ ਵਿੱਚ ਮਿਆਰਾਂ ਦੀ ਭੂਮਿਕਾ ਬਾਰੇ ਵਿਚਾਰ-ਵਟਾਂਦਰਾ ਕੀਤਾ। ਉਦਘਾਟਨੀ ਸੈਸ਼ਨ ਵਿੱਚ ਐੱਨਆਈਟੀ, ਜਲੰਧਰ ਦੇ ਰਜਿਸਟਰਾਰ ਪ੍ਰੋ. ਅਨੀਸ਼ ਕੁਮਾਰ ਸਚਦੇਵਾ ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਏ। ਸੈਂਟਰਲ ਇੰਸਟੀਚਿਊਟ ਆਫ਼ ਹੈਂਡ ਟੂਲਜ਼ ਜਲੰਧਰ ਦੇ ਪ੍ਰਿੰਸੀਪਲ ਡਾਇਰੈਕਟਰ ਪੀ.ਕੇ. ਵਰਮਾ ਵਿਸ਼ੇਸ਼ ਮਹਿਮਾਨ ਵਜੋਂ ਸ਼ਾਮਲ ਹੋਏ। ਯੂਨਾਈਟਿਡ ਫੋਰਮ ਆਫ਼ ਇੰਡਸਟਰੀ ਐਂਡ ਟ੍ਰੇਡ, ਜਲੰਧਰ ਦੇ ਪ੍ਰਧਾਨ ਨਰਿੰਦਰ ਸਿੰਘ ਸੱਗੂ ਅਤੇ ਦਿ ਇੰਸਟੀਚਿਊਟ ਆਫ਼ ਇੰਡੀਅਨ ਫਾਊਂਡਰੀਮੈਨ, ਜਲੰਧਰ ਦੇ ਸੰਯੁਕਤ ਸਕੱਤਰ ਵਿਸ਼ਾਲ ਗੌਤਮ ਵਿਸ਼ੇਸ਼ ਮਹਿਮਾਨਾਂ ਵਜੋਂ ਹਾਜ਼ਰ ਰਹੇ। ਇਸ ਮੌਕੇ ਬੀਆਈਐੱਸ ਜੰਮੂ-ਕਸ਼ਮੀਰ ਸ਼ਾਖਾ ਦਫ਼ਤਰ ਦੇ ਵਿਗਿਆਨੀ-ਈ/ਡਾਇਰੈਕਟਰ ਅਤੇ ਮੁਖੀ ਜੀਵਾਨੰਦਮ ਡੀ, ਵਿਗਿਆਨੀ-ਡੀ/ਸੰਯੁਕਤ ਡਾਇਰੈਕਟਰ ਕੁੰਦਨ ਗਿਰੀ, ਵਿਗਿਆਨੀ-ਡੀ/ਸੰਯੁਕਤ ਡਾਇਰੈਕਟਰ ਵੇਸਲਾਪੂ ਅਵਿਨਾਸ਼ ਬਾਬੂ, ਵਿਗਿਆਨੀ-ਡੀ/ਸੰਯੁਕਤ ਡਾਇਰੈਕਟਰ ਮਨੀਸ਼ ਕੁਮਾਰ ਅਤੇ ਬੀਆਈਐੱਸ-ਜੇਕੇਬੀਓ ਦੇ ਹੋਰ ਅਧਿਕਾਰੀ ਵੀ ਹਾਜ਼ਰ ਰਹੇ। ਇਸ ਤੋਂ ਇਲਾਵਾ ਉਦਯੋਗਿਕ ਨੁਮਾਇੰਦਿਆਂ, ਤਕਨੀਕੀ ਮਾਹਿਰਾਂ, ਸਿੱਖਿਆ ਸ਼ਾਸਤਰੀਆਂ ਅਤੇ ਹੋਰ ਪਤਵੰਤੇ ਭਾਗੀਦਾਰਾਂ ਨੇ ਵੀ ਪ੍ਰੋਗਰਾਮ ਵਿੱਚ ਸ਼ਮੂਲੀਅਤ ਕੀਤੀ। ਉਦਘਾਟਨੀ ਸੰਬੋਧਨ ਵਿੱਚ ਮੁੱਖ ਮਹਿਮਾਨ ਪ੍ਰੋ. ਅਨੀਸ਼ ਕੁਮਾਰ ਸਚਦੇਵਾ ਨੇ ਟਿਕਾਊ ਵਿਕਾਸ ਟੀਚਾ 7 (ਐੱਸਡੀਜੀ 7), ਭਾਵ ਕਿਫਾਇਤੀ ਅਤੇ ਸਵੱਛ ਊਰਜਾ ਦੇ ਮਨੋਰਥ ਹਾਸਲ ਕਰਨ ਲਈ ਅਕਾਦਮਿਕ ਸੰਸਥਾਵਾਂ ਅਤੇ ਉਦਯੋਗ ਜਗਤ ਦਰਮਿਆਨ ਸਹਿਯੋਗ ਦੀ ਮਹੱਤਤਾ ’ਤੇ ਚਾਨਣਾ ਪਾਇਆ। ਉਨ੍ਹਾਂ ਨੇ ਭਾਰਤੀ ਉਦਯੋਗਾਂ ਦੀ ਮੁਕਾਬਲੇਬਾਜ਼ੀ ਨੂੰ ਵਧਾਉਣ ਲਈ ਮਜ਼ਬੂਤ ਗੁਣਵੱਤਾ ਸੱਭਿਆਚਾਰ ਵਿਕਸਿਤ ਕਰਨ ਅਤੇ ਨਵੀਨਤਾ ਨੂੰ ਉਤਸ਼ਾਹਿਤ ਕਰਨ ਦੀ ਲੋੜ ’ਤੇ ਵੀ ਜ਼ੋਰ ਦਿੱਤਾ। ਵਿਸ਼ੇਸ਼ ਮਹਿਮਾਨ ਪੀਕੇ ਵਰਮਾ ਨੇ ਗੁਣਵੱਤਾਪੂਰਨ ਨਿਰਮਾਣ ਨੂੰ ਉਤਸ਼ਾਹਿਤ ਕਰਨ ਅਤੇ ਹੈਂਡ ਟੂਲਜ਼ ਖੇਤਰ ਨੂੰ ਮਜ਼ਬੂਤ ਬਣਾਉਣ ਵਿੱਚ ਤਕਨੀਕੀ ਸਿੱਖਿਆ, ਹੁਨਰ ਵਿਕਾਸ ਅਤੇ ਉਦਯੋਗ-ਮੁਖੀ ਸਿਖਲਾਈ ਦੀ ਮਹੱਤਤਾ ਨੂੰ ਉਜਾਗਰ ਕੀਤਾ। ਨਰਿੰਦਰ ਸਿੰਘ ਸੱਗੂ ਅਤੇ ਵਿਸ਼ਾਲ ਗੌਤਮ ਨੇ ਗੁਣਵੱਤਾ ਭਰੋਸੇ, ਮਿਆਰੀਕਰਨ ਅਤੇ ਉਦਯੋਗਿਕ ਐਸੋਸੀਏਸ਼ਨਾਂ, ਨਿਰਮਾਤਾਵਾਂ ਤੇ ਹੋਰ ਹਿੱਤਧਾਰਕਾਂ ਦਰਮਿਆਨ ਸਹਿਯੋਗ ਦੀ ਮਹੱਤਤਾ ਬਾਰੇ ਆਪਣੇ ਵਿਚਾਰ ਸਾਂਝੇ ਕੀਤੇ। ਸੰਮੇਲਨ ਦਾ ਇੱਕ ਪ੍ਰਮੁੱਖ ਆਕਰਸ਼ਣ ਚਾਰ ਮਹੱਤਵਪੂਰਨ ਉਦਯੋਗਿਕ ਖੇਤਰਾਂ ’ਤੇ ਪੈਨਲ ਚਰਚਾਵਾਂ ਦੀ ਲੜੀ ਸੀ। ਇਨ੍ਹਾਂ ਚਰਚਾਵਾਂ ਵਿੱਚ ਉਦਯੋਗ ਜਗਤ, ਤਕਨੀਕੀ ਸੰਸਥਾਵਾਂ ਅਤੇ ਅਕਾਦਮਿਕ ਖੇਤਰ ਦੇ ਨੁਮਾਇੰਦਿਆਂ ਨੇ ਸ਼ਮੂਲੀਅਤ ਕੀਤੀ ਅਤੇ ਟਿਕਾਊ ਨਿਰਮਾਣ, ਗੁਣਵੱਤਾ ਭਰੋਸੇ, ਊਰਜਾ ਕੁਸ਼ਲਤਾ ਅਤੇ ਉਦਯੋਗਿਕ ਵਿਕਾਸ ਵਿੱਚ ਭਾਰਤੀ ਮਿਆਰਾਂ ਦੀ ਭੂਮਿਕਾ ਬਾਰੇ ਆਪਣੇ ਵਿਚਾਰਾਂ ਦਾ ਆਦਾਨ-ਪ੍ਰਦਾਨ ਕੀਤਾ। ਇਸ ਪੈਨਲ ਵਿੱਚ ਈਈਪੀਸੀ ਇੰਡੀਆ, ਇੰਦਰ ਇੰਡਸਟਰੀਜ਼ ਅਤੇ ਡੀ ਨੀਅਰਜ਼ ਟੂਲਜ਼ ਲਿਮਟਿਡ, ਲੀਡਰ ਵਾਲਵਜ਼ ਲਿਮਟਿਡ, ਜ਼ੋਲੋਟੋ ਇੰਡਸਟਰੀਜ਼ ਅਤੇ ਜੇਬੀਐੱਸ ਟੈਸਟਿੰਗ ਸਲਿਊਸ਼ਨਜ਼ ਪ੍ਰਾਈਵੇਟ ਲਿਮਟਿਡ ਦੇ ਨੁਮਾਇੰਦਿਆਂ ਨੇ ਸ਼ਮੂਲੀਅਤ ਕੀਤੀ। ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ (ਪੀਏਯੂ), ਲੁਧਿਆਣਾ ਵਿਖੇ ਸਿੰਚਾਈ ਇੰਜੀਨੀਅਰਿੰਗ ਦੇ ਪ੍ਰਮੁੱਖ ਵਿਗਿਆਨੀ ਡਾ. ਜਗਰਾਜ ਸਿੰਘ ਮਰੋਕ ਨੇ ਕਲਸੀ ਮੈਟਲ ਵਰਕਸ ਅਤੇ ਸੈਂਟੈਕ ਇਲੈਕਟ੍ਰੋ ਸਿਸਟਮ ਸਮੇਤ ਸਬੰਧਿਤ ਖੇਤਰਾਂ ਦੇ ਹੋਰ ਨੁਮਾਇੰਦਿਆਂ ਨਾਲ ਪੰਪਾਂ ਦੀ ਜਾਂਚ, ਕਾਰਗੁਜ਼ਾਰੀ ਦੇ ਮੁਲਾਂਕਣ ਅਤੇ ਕੁਸ਼ਲ ਯੰਤਰਾਂ ਦੀ ਚੋਣ ਨਾਲ ਜੁੜੇ ਤਕਨੀਕੀ ਤਜ਼ਰਬੇ ਸਾਂਝੇ ਕੀਤੇ। ਪ੍ਰਦਰਸ਼ਨੀ ਵਿੱਚ ਹਿੱਸਾ ਲੈਣ ਵਾਲੀਆਂ ਸੰਸਥਾਵਾਂ ਵਿੱਚ ਦੋਆਬਾ ਕੋਆਪ੍ਰੇਟਿਵ ਮਿਲਕ ਪ੍ਰੋਡਿਊਸਰਜ਼ ਯੂਨੀਅਨ ਲਿਮਟਿਡ, ਕਲਸੀ ਮੈਟਲ ਵਰਕਸ ਪ੍ਰਾਈਵੇਟ ਲਿਮਟਿਡ, ਐੱਸਐੱਸ ਕੇ ਇੰਜੀਨੀਅਰਿੰਗ ਕੰਪਨੀ (ਪ੍ਰਾਈਵੇਟ) ਲਿਮਟਿਡ, ਅਜੈ ਇੰਡਸਟਰੀਜ਼, ਐੱਚਐੱਸ ਹਾਲਮਾਰਕਿੰਗ ਸੈਂਟਰ, ਕਰਤਾਰ ਵਾਲਵਜ਼ ਪ੍ਰਾਈਵੇਟ ਲਿਮਟਿਡ ਅਤੇ ਨਿਵੀਆ ਸਪੋਰਟਸ ਸ਼ਾਮਲ ਸਨ। ਪ੍ਰਦਰਸ਼ਨੀ ਰਾਹੀਂ ਉਤਪਾਦਾਂ, ਨਿਰਮਾਣ ਕਾਰਜ-ਪ੍ਰਣਾਲੀਆਂ, ਗੁਣਵੱਤਾ ਭਰੋਸੇ ਅਤੇ ਲਾਗੂ ਭਾਰਤੀ ਮਿਆਰਾਂ ਦੀ ਪਾਲਣਾ ਦੀ ਮਹੱਤਤਾ ਨਾਲ ਸਬੰਧਿਤ ਜਾਣਕਾਰੀ ਦਾ ਆਦਾਨ-ਪ੍ਰਦਾਨ ਕੀਤਾ ਗਿਆ। ਪ੍ਰੋਗਰਾਮ ਦੀ ਸਮਾਪਤੀ ਬੀਆਈਐੱਸ ਜੰਮੂ-ਕਸ਼ਮੀਰ ਸ਼ਾਖਾ ਦਫ਼ਤਰ ਦੇ ਵਿਗਿਆਨੀ-ਡੀ/ਸੰਯੁਕਤ ਡਾਇਰੈਕਟਰ ਸ਼੍ਰੀ ਵੇਸਲਾਪੂ ਅਵਿਨਾਸ਼ ਬਾਬੂ ਵੱਲੋਂ ਧੰਨਵਾਦੀ ਮਤਾ ਪੇਸ਼ ਕਰਨ ਨਾਲ ਹੋਈ।