ਸਕੂਲ ਜਾ ਰਹੀਆਂ ਦੋ ਭੈਣਾਂ ਨੂੰ ਆਟੋ ਰਿਕਸ਼ਾ ਨੇ ਮਾਰੀ ਟੱਕਰ, ਜ਼ਖ਼ਮੀ

ਸੀਸੀਟੀਵੀ ’ਚ ਕੈਦ ਹੋਈ ਦਿਲ ਦਹਿਲਾ ਦੇਣ ਵਾਲੀ ਘਟਨਾ

ਕ੍ਰਾਈਮ ਰਿਪੋਰਟਰ, ਪੰਜਾਬੀ ਜਾਗਰਣ

ਜਲੰਧਰ : ਸ਼ੁੱਕਰਵਾਰ ਸਵੇਰੇ ਸ਼ਹਿਰ ਦੇ ਪੱਛਮੀ ਹਲਕੇ ’ਚ ਭਿਆਨਕ ਸੜਕ ਹਾਦਸਾ ਵਾਪਰਿਆ, ਜਿੱਥੇ ਸਕੂਲ ਜਾ ਰਹੀਆਂ ਦੋ ਛੋਟੀਆਂ ਭੈਣਾਂ ਨੂੰ ਇਕ ਆਟੋ ਰਿਕਸ਼ਾ ਨੇ ਟੱਕਰ ਮਾਰ ਦਿੱਤੀ। ਇਸ ਘਟਨਾ ਦੀ ਸੀਸੀਟੀਵੀ ਫੁਟੇਜ ਸਾਹਮਣੇ ਆਈ ਹੈ, ਜਿਸ ’ਚ ਆਟੋ ਰਿਕਸ਼ਾ ਚਾਲਕ ਦੀ ਲਾਪਰਵਾਹੀ ਸਾਫ਼ ਦਿਖਾਈ ਦੇ ਰਹੀ ਹੈ। ਦੋਵੇਂ ਲੜਕੀਆਂ ਗੰਭੀਰ ਜ਼ਖ਼ਮੀ ਹੋ ਗਈਆਂ ਹਨ। ਖੁਸ਼ਕਿਸਮਤੀ ਨਾਲ ਸਥਾਨਕ ਲੋਕ ਸਮੇਂ ਸਿਰ ਮੌਕੇ ’ਤੇ ਪਹੁੰਚ ਗਏ। ਉਨ੍ਹਾਂ ਨੇ ਆਟੋ ਰਿਕਸ਼ਾ ਨੂੰ ਪਲਟ ਦਿੱਤਾ ਤੇ ਲੜਕੀਆਂ ਨੂੰ ਬਾਹਰ ਕੱਢ ਕੇ ਉਨ੍ਹਾਂ ਦੀ ਜਾਨ ਬਚਾ ਲਈ। ਸਵੇਰੇ ਕਰੀਬ 8:30 ਵਜੇ ਸਕੂਲੀ ਵਰਦੀ ’ਚ ਦੋਵੇਂ ਭੈਣਾਂ ਸੜਕ ’ਤੇ ਜਾ ਰਹੀਆਂ ਸਨ। ਜਦੋਂ ਇਕ ਆਟੋ ਰਿਕਸ਼ਾ ਉੱਥੋਂ ਲੰਘਿਆ ਤਾਂ ਦੋਵੇਂ ਸੜਕ ਦੇ ਕਿਨਾਰੇ ਵੱਲ ਹੋ ਗਈਆਂ। ਇਸੇ ਦੌਰਾਨ ਨੇੜੇ ਖੜ੍ਹਾ ਇਕ ਹੋਰ ਆਟੋ ਰਿਕਸ਼ਾ ਅਚਾਨਕ ਚੱਲ ਪਿਆ ਤੇ ਦੋਵਾਂ ਨੂੰ ਟੱਕਰ ਮਾਰ ਦਿੱਤੀ।

ਸੀਸੀਟੀਵੀ ਫੁਟੇਜ ’ਚ ਦਿਖਾਈ ਦੇ ਰਿਹਾ ਹੈ ਕਿ ਟੱਕਰ ਲੱਗਣ ਤੋਂ ਬਾਅਦ ਲੜਕੀਆਂ ਸੜਕ ’ਤੇ ਡਿੱਗ ਪਈਆਂ। ਇਸ ਤੋਂ ਪਹਿਲਾਂ ਕਿ ਡਰਾਈਵਰ ਵਾਹਨ ਨੂੰ ਪੂਰੀ ਤਰ੍ਹਾਂ ਰੋਕ ਸਕਦਾ, ਆਟੋ ਰਿਕਸ਼ਾ ਦਾ ਅਗਲਾ ਪਹੀਆ ਛੋਟੀ ਭੈਣ ਦੇ ਉੱਪਰੋਂ ਲੰਘ ਗਿਆ, ਜਦੋਂ ਕਿ ਵੱਡੀ ਭੈਣ ਪਿਛਲੇ ਪਹੀਆਂ ਦੇ ਹੇਠਾਂ ਆ ਗਈ। ਉਨ੍ਹਾਂ ਦੀਆਂ ਚੀਕਾਂ ਸੁਣ ਕੇ ਨੇੜੇ ਮੌਜੂਦ ਲੋਕ ਤੁਰੰਤ ਮੌਕੇ ’ਤੇ ਪਹੁੰਚ ਗਏ। ਚਸ਼ਮਦੀਦਾਂ ਅਨੁਸਾਰ, ਲੜਕੀਆਂ ਦੀ ਪਿੱਠ ’ਤੇ ਲੱਗੇ ਸਕੂਲੀ ਬੈਗਾਂ ਨੇ ਉਨ੍ਹਾਂ ਦੀ ਜਾਨ ਬਚਾਉਣ ’ਚ ਮਦਦ ਕੀਤੀ। ਦੱਸਿਆ ਜਾ ਰਿਹਾ ਹੈ ਕਿ ਬੈਗ ਟਾਇਰ ਦੇ ਹੇਠਾਂ ਫਸ ਗਏ, ਜਿਸ ਕਾਰਨ ਪਿਛਲਾ ਪਹੀਆ ਉਨ੍ਹਾਂ ਦੇ ਸਰੀਰ ਦੇ ਪੂਰੀ ਤਰ੍ਹਾਂ ਉੱਪਰੋਂ ਨਹੀਂ ਲੰਘ ਸਕਿਆ ਤੇ ਇੱਕ ਵੱਡਾ ਹਾਦਸਾ ਟਲ ਗਿਆ। ਹਾਦਸੇ ਪਿੱਛੋਂ ਵੱਡੀ ਭੈਣ ਲੰਗੜਾਉਂਦੇ ਹੋਏ ਖੁਦ ਬਾਹਰ ਆ ਗਈ, ਜਦੋਂ ਕਿ ਛੋਟੀ ਭੈਣ ਨੂੰ ਮੌਕੇ ’ਤੇ ਮੌਜੂਦ ਲੋਕਾਂ ਨੇ ਚੁੱਕ ਕੇ ਸੁਰੱਖਿਅਤ ਬਾਹਰ ਕੱਢਿਆ। ਦੋਵਾਂ ਨੂੰ ਇਲਾਜ ਲਈ ਹਸਪਤਾਲ ਲਿਜਾਇਆ ਗਿਆ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਘਟਨਾ ਤੋਂ ਬਾਅਦ ਆਟੋ ਰਿਕਸ਼ਾ ਚਾਲਕ ਮੌਕੇ ਤੋਂ ਫਰਾਰ ਹੋ ਗਿਆ। ਫਿਲਹਾਲ ਇਸ ਮਾਮਲੇ ਸਬੰਧੀ ਪੁਲਿਸ ਕੋਲ ਕੋਈ ਸ਼ਿਕਾਇਤ ਦਰਜ ਨਹੀਂ ਕਰਵਾਈ ਗਈ। ਬਸਤੀ ਬਾਵਾ ਖੇਲ ਥਾਣੇ ਦੀ ਪੁਲਿਸ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਇਸ ਘਟਨਾ ਬਾਰੇ ਕੋਈ ਸ਼ਿਕਾਇਤ ਜਾਂ ਜਾਣਕਾਰੀ ਨਹੀਂ ਮਿਲੀ ਹੈ। ਸ਼ਿਕਾਇਤ ਦਰਜ ਹੋਣ ਤੋਂ ਬਾਅਦ ਕਾਨੂੰਨ ਅਨੁਸਾਰ ਕਾਰਵਾਈ ਕੀਤੀ ਜਾਵੇਗੀ।